Nopa achtoui carta tlen kintitlanilijkej Cristo itokilijkauaj tlen Corinto

7 Nama niinmechiljuis tlen intlajtlankej kema innechtlajkuiljuilijkej. Tlauel kuali para se tlakatl amo ma moteka iuaya se siuatl. 2 Pero ipan ni tonali maseualmej tlauel auilnemij,* yeka sejse tlakatl ma kipia isiua uan sejse siuatl ma kipia iueue. 3 Nopa tlakatl moneki motekas iuaya isiua kema isiua kinekis uan nopa siuatl sanse moneki kichiuas ika iueue. 4 Se siuatl amo kinauatia itlakayo, eli iueue katli kinauatia. Uan nojkia se tlakatl amo kinauatia itlakayo, eli isiua katli kinauatia. 5 Yon se tlen inijuantij amo kinamiki kiijtos para inamik amo ma kochi iuaya. Pero tlaj nochi omej ya kiijtojkej amo kochisej sansejko se keski tonali pampa momaijtosej,* nopa tlauel kuali. Pero teipa sampa ma kochikaj sansejko, kiampa Satanás amo kitemolis ma tlajtlakolchiuakaj pampa amo uelij monauatiaj.* 6 Uelis inkichiuasej tlen ya nikijtok, pero amo eli se tlanauatili tlen moneki inkineltokasej. 7 Nechpaktiskia nochi ma elikaj kej na. Pero Dios* kimaka sejse maseuali se yajatili,* yeka sekij mosiuajtiaj* uan sekinok amo.

8 Nikiniljuia katli amo kipiaj ininnamik uan katli ya mijki ininueue, más kuali para inijuantij ma mokauakaj kej na. 9 Pero tlaj amo uelij monauatiaj, más kuali ma mosenkauakaj, pampa más kuali ma kipiakaj ininnamik uan amo san ma kinektokaj motekasej iuaya se akajya.

10 Katli mosenkajtokej nikinmaka ni tlanauatili: se siuatl amo kinamiki kikajteuas iueue. Uan ni tlanauatili amo na nikinmaka, kinnauatia toTeko. 11 Pero tlaj kikajteuas iueue, ayokmo ma monamikti, o tlaj amo kineki mokauas iselti uajka ma moyoltlali iuaya iueue. Uan nopa tlakatl amo kinamiki kikajteuas isiua.

12 Pero nopa sekinok nikiniljuia, tlaj se toikni kipia isiua katli amo tlaneltoka, uan nopa siuatl nojua kineki itstos iuaya, uajka nopa toikni amo ma kikajteua. Ni tlamantli na niinmechiljuia, amo toTeko. 13 Uan tlaj se siuatl kipia iueue katli amo tlaneltoka, uan nopa tlakatl nojua kineki itstos iuaya, uajka nopa siuatl amo ma kikajteua. 14 Pampa nopa tlakatl katli amo tlaneltoka kiselia se keski tlateochiualistli* pampa isiua tlaneltoka; uan se siuatl katli amo tlaneltoka nojkia kiselia se keski tlateochiualistli* pampa iueue tlaneltoka. Tlaj amo kiampa eliskia, ininkoneuaj amo ueliskiaj kiselisej yon se tlateochiualistli,* pero nama ya kiselijtokej tlateochiualistli.* 15 Pero tlaj katli amo tlaneltoka kineki yas,* uajka ma yaui. Yon toikni yon tosiuaikni amo moneki nojua itstos iuaya, pampa Dios kichijtok xiitstokaj ika tlaseuilistli. 16 Pampa ta, siuatl katli tijpia moueue, ¿kenijkatsa tijmati tlaj tijmakixtis* moueue o amo? O ta, tlakatl, ¿kenijkatsa tijmati tlaj tijmakixtis mosiua o amo?

17 Pero sejse maseuali nojua ma itsto sanse kej Jehová* kikauilijtok ma itsto uan sanse kej itstoya kema yaya kinotski. Ya ni tlen nikinnauatia toikniuaj ipan nochi tlanechikoli. 18 ¿Kinotskej se tlakatl kema ya mochiuilijtoya circuncisión?* Amo ma mochiua kejuak amo kichiuilijtokej.* ¿Kinotskej se tlakatl kema ayamo mochiuilijtoya circuncisión? Uajka amo ma mochiuili. 19 Tlaj timochiuilijtokej circuncisión o amo, nopa amo ipati. Tijneltokasej itlanauatiljuaj Dios ya nopa tlen más ipati. 20 Sejse maseuali nojua ma itsto sanse kej itstoya kema kinotskej. 21 ¿Mitskojtoyaj kej tlatekipanojketl kema mitsnotskej? Amo ma mitstekipacho nopa. Pero tlaj uelis tijchiuas ma mitskauakaj xia,* uajka xia. 22 Pampa katli eliyaya tlatekipanojketl kema toTeko kinotski, nama ya majkajtok uan iaxka toTeko. Uan nojkia, katli amo eliyaya tlatekipanojketl kema kinotskej, nama eli itlatekipanojka Cristo. 23 Dios tlaxtlajki para inmechkouas; uajka ayokmo ximochiuakaj inintlatekipanojkauaj maseualmej. 24 Noikniuaj, sejse tlen inmojuantij nojua ma itsto iixpa Dios sanse kej itstoya kema ya kinotski.

25 Nama niinmechkamanaljuis tlen maseualmej katli amo kema monamiktijtokej. Amo nijpia yon se tlanauatili tlen toTeko, pero niinmechiljuia tlen na nimoiljuia, pampa toTeko nechtlasojtlatok uan yeka uelis inmotemachisej ipan tlen nikijtoua. 26 Pero nama onka miak tlaouijkayotl, yeka nimoiljuia más kuali se akajya nojua ma mokaua kej ipa itstok. 27 ¿Tijpia mosiua? Uajka amo xijtemoli kenijkatsa tijkauas. ¿Amo tijpia mosiua? Uajka amo xijtemo. 28 Pero tlaj timosiuajtis, amo tijchiua yon se tlajtlakoli. Uan tlaj se katli amo kema monamiktijtok, monamiktia, nojkia amo tlajtlakolchiua. Pero katli mosenkauasej, kipiasej miak tlaouijkayotl. Na amo nijneki kiampa ma inmechpano.

29 Noikniuaj, nojkia niinmechiljuia para ayokmo poliui miak tonali. Desde nama, katli kipiaj ininsiua ma mochiuakaj kejuak amo kipiaskiaj 30 uan katli chokaj ma mochiuakaj kej katli amo chokaj; katli yolpakij ma mochiuakaj kej katli amo yolpakij; katli tlakouaj ma mochiuakaj kej katli amo tleno kipiaj, 31 uan katli kitekiuiaj tlen onka ipan Tlaltipaktli, ma mochiuakaj kej katli amo tlauel kitekiuiaj. Pampa tlen panotok ipan ni Tlaltipaktli, mopatlatia. 32 Na amo nijneki ximotekipachojtokaj ika yon se tlamantli. Se tlakatl katli amo mosiuajtijtok, san kitekipachoua kenijkatsa kitekipanos toTeko, pampa kitemolia kenijkatsa toTeko kuali kiitas. 33 Pero se tlakatl katli ya mosiuajtijtok, kitekipachoua tlen onka ipan Tlaltipaktli pampa kineki isiua kuali ma kiita, 34 uan iyolo moxelojtok. Nojkia, se siuatl katli amo kipia iueue uan nojkia se katli amo kema monamiktijtok, san kitekipachoua kenijkatsa kitekipanos toTeko, kiampa itlalnamikilis* uan tlen kichiua, eltos tlapajpaktik iixpa Dios. Pero se siuatl katli ya monamiktijtok, kitekipachoua tlen onka ipan Tlaltipaktli pampa kineki iueue kuali ma kiita. 35 Nikijtoua ni tlamantli para ma inmechpaleui. Amo nikijtoua ni para amo xijchiuakaj se tlamantli,* nikijtoua para niinmechyololinis xijchiuakaj tlen kinamiki uan para nochipa xijtekipanokaj toTeko uan amo tleno ma inmechtsakuili.

36 Pero tlaj se akajya moiljuia kichiua tlen amo kinamiki pampa ayamo mosiuajtia, uan tlaj ya kuali tlalnamiki* uan ueli kinauatia itlakayo, uajka ma kichiua tlen kineki, amo tlajtlakolchiua. Ma mosiuajti. 37 Pero tlaj se akajya ipan iyolo mosentlalijtok amo mosiuajtis, uan ueli monauatia ika tlen kineki, tlaj kimati amo moneki mosiuajtis uan ipan iyolo kitlapejpenijtok mokauas iselti, uajka kuali tlen kichiuas. 38 Uajka, katli mosiuajtia kuali tlen kichiua, pero katli amo mosiuajtia kichiua más kuali.

39 Se siuatl kejuak ilpitok iuaya iueue kema iueue nojua itstok. Pero tlaj iueue mikis, uajka uelis monamiktis iuaya katli ya kinekis, pero san uelis monamiktis iuaya se toTeko itokilijka. 40 Pero na nimoiljuia más yolpakis tlaj amo monamiktis. Uan nimotemachia na nojkia nijpia ichikaualis* Dios.