¿Uelis ipan ni tonali timosenkauas san iuaya se “tlen nojkia kineltoka” Jehová?

Maske se keskij katli itstokej ininselti nojkia kiijtojtokej nopa, kimatij Jehová kineki itekipanojkauaj ma mosenkauakaj san ininuaya se “tlen nojkia kineltoka” Jehová uan moatsonpoliuiltijtok (1 Cor. 7:39). ¿Kenke kiijtouaj nopa?

Sekij kiijtouaj nopa pampa moiljuiaj itstokej tlauel miakej tosiuaikniuaj uan totlakaikniuaj amo. Ipan miak altepemej nopa nelia. Ne Corea, tlen sejse 100 toikniuaj, 57 tosiuaikniuaj uan 43 totlakaikniuaj. Uan ne Colombia, tlen sejse 100 toikniuaj, 66 tosiuaikniuaj uan 34 totlakaikniuaj.

Ipan sekij altepemej momajtokej nopa tlakatl ma kinmaka tomij o sekinok tlamantli nopa ichpokatl itatauaj. Kema nopa ichpokatl itatauaj amo kitekipanouaj Jehová, uelis tlajtlanij miak tomij o tlen tlauel patiyo. Miakej totlakaikniuaj amo uelij temakaj nopa tlamantli. Yeka, se keskij tosiuaikniuaj moiljuiaj amo kema uelis monamiktisej.a (Xikita nopa nota.)

Tlaj nojkia timoyoliljuijtok nopa, xikilnamiki Jehová kimajtok uan kikuamachilia tlen mitspanotok (2 Crón. 6:29, 30).

Jehová kineki ma timosenkauakaj san iuaya se itlatekipanojka, pampa kimati tlake techpaleuis uan kineki techmokuitlauis. Ya amo kineki ma titlaijiyouikaj tlaj tijchiuasej tlen amo kuali. Kema itstoya Nehemías, miakej judeaeuanij mosiuajtijkej ininuaya katli amo kitekipanouayayaj Jehová. Yeka Nehemías kinilnamikilik tlen kipanok Salomón. Kiniljuik maske toTeotsij kiikneliyaya uan kitlalik ma tekichiua ne Israel, ya mosiuajtik ininuaya katli amo kitekipanouayayaj Jehová, uan kichijkej ma tlaixpano (Neh. 13:23-26). Jehová kineki kuali ma tiitstokaj, yeka techiljuia ma timosenkauakaj san ininuaya katli kitekipanouaj (Sal. 19:7-10; Is. 48:17, 18). Ya kinamiki techiljuis tlen moneki uan tlen amo moneki tijchiuasej. Yeka, tijtlaskamatiliaj pampa tlen techtlajtolmaka nochipa techpaleuia uan kiampa kinextia techiknelia (Prov. 1:5).

Tlaj timosenkauas iuaya se tlen amo kitekipanoua Jehová, uelis kichiuas ayokmo xijtekipano. Uan ta amo tijneki ma mitspano nopa (2 Cor. 6:14). Xikilnamiki nochipa techpaleuia tlen Jehová techtlajtolmaka. Maske miakej kichijtokej tlen kuali uan kineltokatokej ni tlanauatili, sekinok amo kichijtokej.

Maggy, katli eua Australia pejki kiixtoka se tlen amo kitekipanouayaya Jehová.b (Xikita nopa nota.) Kiijtoua miakpa amo monechikouayaya pampa itstoya iuaya. Yeka ayokmo kuali mouikayaya iuaya Jehová. Ratana, katli eua la India pejki kiixtoka se katli yauiyaya escuela iuaya, uan kinejki ma kimachtikaj ika Biblia san pampa kinekiyaya itstos iuaya. Teipa, Ratana ayokmo kitekipanok Jehová uan yajki ipan seyok religión pampa kinekiyaya monamiktis iuaya.

Ndenguè, katli eua Camerún monamiktik kema kipixtoya 19 xiuitl iuaya se katli amo kitekipanouayaya toTeotsij. Maske kiiljuijtoya kikauaskia kitekipanos Jehová, kema mosenkajkej uan panok ome semanas ayokmo kikajki ma monechiko. Kiijtoua kiyolmatiyaya itstoya iselti uan nochipa chokayaya. Uajka, ayokmo uelki kichijki tlen kinekiyaya uan nochipa kiyolkokouayaya tlen kichijtoya.

Tlaj tikasiskia se akajya katli amo kitekipanoua Jehová uan kipia kuali iyolo, uan timosenkauaskia iuaya, ¿nojua kuali timouikaskia iuaya Jehová? ¿Kenijkatsa tijyolmatiskia tlaj amo tijneltokaskia tlen Jehová mitstlajtolmaka? Uan, ¿kenijkatsa kiyolmatis Jehová? (Prov. 1:33.)

Miakej kineltokaj tlen Jehová kintlajtolmaka uan mosenkauaj san ininuaya toikniuaj. Kimatij ya nopa tlen tlauel kuali kichijkej. Uan kichiuaj pampa kinekij ma yolpaki Jehová. Maske Michiko, katli eua Japón kinekiyaya kineltokas toTeotsij, ichampoyouaj kinekiyayaj ma monamikti iuaya se tlen amo kitekipanoua Jehová. Nojkia kiitayaya iuampoyouaj monamiktiyayaj uan ya amo. Maske tlauel ouij, ya kimatiyaya tlaj monamiktiskia o amo, amo kiijtosneki yolpakiskia; san monekiyaya kitekipanos Jehová, katli tlauel yolpaki (1 Tim. 1:11). Ya motemachia Jehová techmaka tlen moneki, uan kiijtoua tlaj tijnekij timosenkauasej uan amo tikasij se tlen kitekipanoua Jehová, tlauel kuali ma tiitstokaj toselti. Teipa Michiko monamiktik iuaya se kuali toikni. Ya tlauel yolpaki pampa kineltokak Jehová.

Sekij totlakaikniuaj nojkia kichixtokej mosiuajtisej ininuaya se tlen kinamiki. Toikni Bill, katli eua Australia kiijtoua maske kemantika kiyoltilanayaya ichpokamej tlen amo kitekipanouayayaj toTeotsij, amo tlauel kinnojnotsayaya pampa amo kinekiyaya kiixtokas katli amo kitekipanoua toTeotsij. Bill mochixki 30 xiuitl uan teipa kipantik se tosiuaikni tlen nojkia kinekiyaya kitekipanos toTeotsij kej ya. Bill kiijtoua kuali tlen kichijki. Tlauel yolpaki pampa iuaya isiua sansejko tlajtolmoyauaj, tlamachtiaj uan kitekipanouaj Jehová. Nojkia yolpaki ininuaya isiua iuampoyouaj pampa nojkia kitekipanouaj Jehová. Kiijtoua tlauel kuali itstok iuaya isiua pampa kineltoka tlen Biblia tetlajtolmaka.

Tlaj amo timosenkajtok pampa tijneki tijneltokas Jehová, mitspaleuis ximochixto tlaj timoiljuis kenijkatsa yolpaki Jehová kema tijneltoka (1 Sam. 15:22; Prov. 27:11). Tlaj nochipa tikiljuis tlen tijyolmati nojkia mitspaleuis (Sal. 62:8). Uan tlaj tijchiuas kampeka tikijiyouis tlayejyekoli uan amo tijchiuas tlen mitsyoltilana, tlauel kuali timouikas iuaya Jehová. Xikilnamiki ya tlauel mitspatiita. Ximotemachi nochipa mitsmakas tlen mitspoloua. Uan maske amo mitsiljuia mitsmakas se moueue o mosiua, tlaj mitspoloua nopa, ya kimatis kenijkatsa mitspaleuis (Sal. 145:16; Mat. 6:32).

Uelis kemantika nojkia tijyolmati kej David. Kema tlauel mokuesojtoya, kiiljuik Jehová nimantsi ma kipaleui pampa ayokmo kipiayaya chikaualistli (Sal. 143:5-7, 10). Yeka nochipa ximomaijto uan xijchia ma mitspaleui, xijpoua Biblia uan ximoyoliljui kenijkatsa mitspaleuia. Kiampa tijmatis tlake kineki Jehová uan kenijkatsa uejkajkia kinpaleuik itekipanojkauaj. Ni mitspaleuis ximotemachi ipan ya uan xijneltoka.

Nojkia xijchiua kampeka tlauel kuali timouikas iuaya Jehová uan ma kimatikaj sekinok kuali timonejnemiltia. Nojkia ximomachti kuali timouikas ininuaya sekinok, titemakas tlen tijpia, tlauel titekitis uan amo xijtlauelkaua Jehová. Katli kinextis ni tlamantli, uelis yolpaktos iuaya katli mosenkauas (Gén. 24:16-21; Rut 1:16, 17; 2:6, 7, 11; Prov. 31:10-27). Nochipa tlauel xitlajtolmoyaua uan xitlapaleui ipan tlanechikoli. Ni mitspaleuis amo tijchiuas tlen amo kuali. Bill kiijtoua kema nojua itstoya iselti nimantsi panok xiuitl pampa tlatekipanouayaya kej precursor.

Ipan ni tonali kena uelis tijneltokas Jehová uan timosenkauas san iuaya se “tlen nojkia kineltoka”. Tlaj kiampa tijchiuasej, kitlepanitasej toTeotsij uan tiyolpakisej. Biblia kiijtoua katli kineltoka Jehová nochipa yolpakis (Sal. 112:1, 3). Yeka, nochipa xikilnamikto Jehová kineki ximosenkaua san iuaya se “tlen nojkia kineltoka”.