Nopa carta tlen kintitlanilijkej hebreos

13 Nojua xijnextijtokaj inmoikneliaj kej iniknimej. 2 Amo xikilkauakaj kuali inkinselisej sekinok, pampa se keskij kiampa kichijkej uan kinselijkej ángeles maske amo kimatkej. 3 Xikinilnamikikaj katli kintsaktokej,* kejuak inmojuantij nojkia intsaktoskiaj ininuaya, uan katli kintlaijiyouiltiaj, pampa inmojuantij nojkia kejuak inkipiaj sanse inmotlakayo.* 4 Nochi ma kitlepanitakaj kema se tlakatl uan se siuatl mosenkajtokej* uan amo aka ma kikajkayaua inamik, pampa Dios* kintlajtolsenkauas katli auilnemij* uan katli momekatiaj. 5 Amo xijpatiitakaj tomij uan xiyolpakikaj san ika tlen inkipiaj. Pampa ya kiijtojtok: “Amo kema nimitskajteuas uan amo kema nimitstlauelkauas”. 6 Yeka amo ma timajmauikaj, más kuali ma tikijtokaj: “Jehová* eli notlapaleuijka; amo nimajmauis. ¿Tlake uelis nechchiuilisej maseualmej?”.

7 Xikinilnamikikaj katli inmechyakanaj, katli inmechmachtijtokej tlen kiijtoua itlajtol Dios, uan xikitakaj kenijkatsa kuali monejnemiltiaj para nojkia intlaneltokasej sanse kej inijuantij.

8 Jesucristo eli sanse kej yaloua, nama uan nochipa.

9 Amo xijkauakaj ma inmechkajkayauakaj ika sekinok tlamachtili tlen amo kema inkikaktokej, pampa más kuali timoyolchikauasej kema Dios kinextia ueyi iyolo ika tojuantij,* uan amo ika tlakualistli* tlen amo kinpaleuia katli san mosentlaliaj ipan nopa tlamantli.

10 Tijpiaj se tlaixpamitl, kampa amo kinamiki tlakuasej katli kichiuaj se tekitl para kiueyichiuasej Dios ipan nopa yoyonkali,* 11 pampa nopa sumo sacerdote kiuika inineso tlapialmej kampa tlatsejtseloltik para temaktilis kej se ofrenda* para kiixtsakuas tlajtlakoli, pero inintlakayo nopa tlapialmej kitlatiaj kalixpa kampa amo aka itstok. 12 Yeka, Jesús nojkia tlaijiyouik kalixpa tlen nopa altepetl para kinchiuas maseualmej tlatsejtseloltikej ika ieso. 13 Uajka ma tiakaj kampa ya, kalixpa kampa amo aka itstok uan ma tikijiyouikaj kema techpinajtiaj sanse kej ya, 14 pampa nikaj amo tijpixtokej se altepetl tlen uejkaua para nochipa, tojuantij tijtemouaj ika nochi toyolo se altepetl tlen teipa ualas. 15 Nochipa ma tijueyichiuakaj Dios ika Jesús. Ni eli kej kema tijmaktiliaj Dios se tlapiali, nopa kiijtosneki tlajtoli tlen kisa ipan tokamak, tlen ika titematiltiaj itoka ininixpa nochi maseualmej. 16 Nojkia, amo xikilkauakaj inkichiuasej tlen kuali uan inkinmakasej sekinok tlen inkipiaj, pampa nopa tlamantli eli kej ofrendas tlen tlauel kiyolpakiltia Dios.

17 Xikinneltokakaj katli inmechyakanaj uan xijkauakaj ma inmechyakanakaj, pampa inijuantij inmechmokuitlauiaj uan temakasej cuentas ika tlen kichiuaj. Kiampa inijuantij kichiuasej ininteki ika pakilistli uan amo ika kuesoli, pampa tlaj inkichiuaskiaj ma mokuesokaj, nopa kichiuaskia amo kuali xiitstokaj.*

18 Nojua ximomaijtojtokaj* por tojuantij pampa timotemachiaj tijpiaj se kuali totlalnamikilis, pampa amo tijnekij titlakajkayauasej ika yon se tlamantli. 19 Pero achi más niinmechtlajtlania ximomaijtokaj para nima ma nitlakuepili kampa inmojuantij.

20 Dios katli temaka tlaseuilistli, katli kiyolkuik toTeko Jesús, nopa ueyi tlamokuitlauijketl tlen pilborregojtsitsij katli kimaktilik Dios nopa estli tlen ika mochijki se tlajtolsenkaualistli* tlen uejkaua para nochipa, 21 ma inmechmaka nochi tlen moneki para inkichiuasej tlen ya kineki, uan ma kitekiui Jesucristo para kichiuas ika tojuantij tlen ya kipaktia. Yaya kinamiki ma kiuejkapantlalikaj para nochipa uan amo kema ma tlami. Amén.*

22 Noikniuaj, nama niinmechtlajtlania xijpiakaj inmoyolo para inkitlakakilisej ni tlajtoli tlen inmechyolchikauas, pampa niinmechijkuiljuilijtok se carta tlen amo ueueyak. 23 Nijneki xijmatikaj toikni Timoteo ya kikixtijkej kampa tsaktoya. Tlaj nima ualas, tiasej sansejko tiinmechitatij.

24 Xikintlajpalokaj nochi katli inmechyakanaj uan nochi katli Dios kiniyokatlalijtok.* Toikniuaj tlen Italia inmechontlajpalouaj.

25 Dios ma kinexti ueyi iyolo ika nochi inmojuantij.*