¡Ximosentlalikaj ‘nochipa inmoiknelijtosej kej iniknimej’!

1, 2. ¿Kenke Pablo kintlajkuiljuilik Cristo itokilijkauaj?

IPAN xiuitl 61, Cristo itokilijkauaj katli itstoyaj ipan Israel amo tleno kinkuesouayaya. Apóstol Pablo tsaktoya ne Roma, uan kimatiyaya nechka kikixtiskiaj. Timoteo, katli yauiyaya iuaya Pablo, ya kikixtijtoyaj uan inijuantij moiljuijtoyaj yasej kinpaxalotij toikniuaj katli itstoyaj ne Judea (Heb. 13:23). Toikniuaj amo nochipa kuali itstoskiaj. ¿Kenke? Pampa poliuiyaya makuili xiuitl kema romaeuanij kiyaualoskiaj Jerusalén. Jesús kiijtojtoya kema kiitaskiaj panos nopa, monekiyaya nimantsi cholosej (Luc. 21:20-24).

² Ya panotoya 28 xiuitl kema Jesús kiniljuik nopa. Ipan nopa xiuitl Cristo itokilijkauaj amo kema kitlauelkajkej toTeotsij maske kintlaijiyouiltijkej (Heb. 10:32-34). Uan nechka asiskia tonali kema tlauel kintlaijiyouiltiskiaj, yeka Pablo kinekiyaya kinpaleuis (Mat. 24:20, 21; Heb. 12:4). Tlaj kinekiyayaj kineltokasej tlen Jesús kinnauatik uan momakixtisej, monekiyaya kuali tlaneltokasej uan kiijiyouisej nochi tlen kinpanoskia (xijpoua Hebreos 10:36-39). Yeka, Jehová kichijki Pablo ma kintlajkuiljuili toikniuaj katli tlauel kinikneliyaya. Nopa Amatlajkuiloli tlen kintitlanilijkej Hebreos, kinmatiltik toikniuaj tlake panoskia uan tlauel kinyolchikajki.

 3. ¿Kenke moneki kuali tikitasej tlen kiijtoua Hebreos?

³ Ipan ni tonali, tojuantij nojkia moneki tijmatisej tlake kiijtoua Hebreos. ¿Kenke? Pampa tiitstokej sanse kej Cristo itokilijkauaj katli itstoyaj Judea. Tiitstokej ipan “tonali tlen nelia fiero”, uan maske miakej toikniuaj nojkia kintlaijiyouiltiaj uan kipiaj kuesoli, amo kitlauelkauaj toTeotsij (2 Tim. 3:1, 12). Maske miakej kuali tiitstokej uan amo techtlaijiyouiltiaj, moneki kuali titlachixtosej kej Cristo itokilijkauaj katli Pablo kintlajkuiljuilik. ¿Kenke? Pampa monechkauia tonali kema monekis tijnextisej tlaj nelia kuali titlaneltokaj (xijpoua Lucas 21:34-36).

 4. ¿Tlake texto motekiuis ipan xiuitl 2016, uan kenijkatsa techpaleuis?

⁴ ¿Tlake techpaleuis kuali titlachixtosej? Pablo kiijkuilok ipan Hebreos miak tlamantli tlen techpaleuis kuali titlaneltokasej. Se tlen nopa tlamantli ijkuilijtok ipan Hebreos 13:1: “Nochipa ximoiknelijtokaj kej iniknimej”. Ni versículo motekiuis ipan texto tlen xiuitl 2016.

 5. ¿Tlake kiijtosneki timoiknelisej kej tiiknimej?

⁵ ¿Tlake kiijtosneki timoiknelisej kej tiiknimej? Ni tlajtoli motekiuia kema se akajya tlauel kiniknelia ichampoyouaj o se kuali iuampo (Juan 11:36). Uajka, katli tijtokiliaj Cristo amo kinamiki san timoiknelisej kejuak tieliskiaj tiiknimej, moneki timoitasej kej tiiknimej (Mat. 23:8). Pablo kiijtok: “Ximoiknelikaj se ika seyok keja iknimej moikneliaj. Uan xikintlepanitakaj sekinok inmoikniuaj ipan Cristo achi más uan axkeja inmotlepanitaj” (Rom. 12:10). Ni tlajtoli kinextia tlauel tikinikneliaj toikniuaj. Tlaj timoikneliaj kej tiiknimej uan kej kinamiki moiknelisej Cristo itokilijkauaj, uajka nochi kuali timouampojchiuasej uan tlauel kuali timouikasej.

 6. ¿Ajkia inijuantij tikinikneliaj kej toikniuaj?

⁶ Nopa tlajtoli “ximoiknelijtokaj kej iniknimej” san kitekiuiyayaj Cristo itokilijkauaj kema kiijkuilouayayaj se amochtli. Uejkajkia, nopa judíos san kiiljuiyayaj “noikni” seyok katli eliyaya ininuikal o ininuampo. Amo kema kiiljuiyayaj “noikni” se akajya tlaj amo eliyaya judío. Uan tojuantij, katli nelia tijtokiliaj Cristo, tikinitaj kej toikniuaj nochi katli kitekipanouaj Jehová maske kampa ueli euaj (Rom. 10:12). Jehová techmachtijtok kinamiki timoiknelisej kej tiiknimej (1 Tes. 4:9). ¿Kenke tlauel moneki nochipa tijnextisej timoikneliaj kej tiiknimej?

 7. 1) ¿Kenke tlauel moneki timoiknelisej kej tiiknimej? 2) ¿Kenke nojkia moneki timoiknelisej?

⁷ ¿Kenke tlauel moneki timoiknelisej kej tiiknimej? Pampa Jehová technauatia ma tijchiuakaj. Amo uelis tikiknelisej Jehová tlaj amo tikinikneliaj toikniuaj (1 Juan 4:7, 20, 21). Nojkia tlauel moneki timoiknelisej kej tiiknimej pampa kiampa uelis timopaleuisej kema tijpiasej kuesoli. Kema Pablo kintlajkuiljuilik toikniuaj, kimatiyaya amo poliuiyaya miak tonali kema choloskiaj uan kikajteuaskiaj nochi tlen kipixtoyaj. Jesús kiijtojtoya tlauel ouij eliskia nopa tonali (Mar. 13:14-18; Luc. 21:21-23). Yeka, pampa nechka asiskia nopa tonali, Cristo itokilijkauaj monekiyaya nojua tlauel moiknelisej (Rom. 12:9).

 8. ¿Tlake moneki tijchiuasej ipan ni tonali kema ayamo peua ueyi tlaijiyouilistli?

⁸ Monechkauia tonali kema peuas nopa ueyi tlaijiyouilistli (Mar. 13:19; Apoc. [Rev.] 7:1-3). Ipan nopa tonali monekis tijneltokasej tlen kiijtoua Isaías 26:20: “Innotlakauaj, xiakaj inmochaj uan xijtsakuakaj inmopuertas kampa initstosej temachtli. Ximotlatikaj se tlalochtli hasta kema ya panotos ikualankayo toTeko”. Kema kiijtoua “inmochaj” uelis kiijtosneki tlanechikoli kampa timosentiliaj, kampa tijueyichiuaj Jehová ininuaya toikniuaj. Ni amo san kiijtosneki timonechikosej sejse chikueyi, nojkia kinamiki tijchiuasej sekinok tlamantli. Pablo kiniljuik toikniuaj monekiyaya mopaleuiskiaj uan kinextiskiaj tlauel moikneliaj kema monechikoskiaj (Heb. 10:24, 25). Tojuantij nojkia moneki nojua tlauel timoiknelisej, kiampa uelis tikijiyouisej nochi tlaouijkayotl tlen tijpiasej teipa.

 9. 1) ¿Kema uelis tijnextisej nelia timoikneliaj kej tiiknimej? 2) Xikijto kenijkatsa Jehová itlajtoltemakauaj kinextijtokej nelia moikneliaj kej iknimej.

⁹ Ipan ni tonali, kema ayamo peua nopa ueyi tlaijiyouilistli, uelis tijnextisej nelia timoikneliaj kej tiiknimej. Miakej tlaijiyouiaj kema kintlasojsoljuilia se chikauak ajakatl, kema mojmolinia tlali o kema kinpano sekinok tlamantli. Uan sekij toikniuaj tlauel kintlaijiyouiltiaj (Mat. 24:6-9). Nojkia, miakej amo kipiaj miak tomij pampa itstokej maseualmej tlen tlauel tlachtekij (Apoc. 6:5, 6). Yeka, kema toikniuaj kipiaj miak kuesoli, tojuantij uelis tikinnextilisej nelia tikinikneliaj. Maske sekinok maseualmej amo moikneliaj, tojuantij nojua moneki timoiknelijtosej kej tiiknimej (Mat. 24:12)^[1] (xikita nopa nota kampa tlami ni tlamachtili).

10. ¿Tlake nojua tikixtomasej ipan ni tlamachtili?

¹⁰ ¿Tlake techpaleuis nojua timoiknelijtosej kej tiiknimej maske tijpiaj miak kuesoli? ¿Kenijkatsa uelis tijnextisej nelia timoikneliaj kej tiiknimej? Kema Pablo kiijtok “nochipa ximoiknelijtokaj kej iniknimej”, nojkia kiijtok sekinok tlamantli tlen techpaleuiskia ma tijnextikaj nelia timoikneliaj kej tiiknimej. Ma tikitakaj chikuasej tlamantli.

11, 12. ¿Tlake kiijtosneki kuali titeselisej? (Xikita nopa achtoui tlaixkopinkayotl.)

¹¹ “Amo xikilkauakaj [...] inkinselisej ika kuali.” (Xijpoua Hebreos 13:2.) Kema Pablo kiijtok ni, kitekiuik se tlajtoli tlen kiijtosneki “xikinselikaj kuali katli amo inkinixmatij”. Kema tijkakij ni tlajtoli uelis tikinilnamikij tlen kichijkej Abraham uan Lot. Inijuantij kuali kinselijkej katli kinpaxalotoj maske amo kinixmatiyayaj, teipa kimatkej eliyayaj iluikaeuanij (Gén. 18:2-5; 19:1-3). Kema Pablo kintlajkuiljuilik toikniuaj, kiniljuik tlen kichijtoyaj nopa omej tlakamej pampa kinekiyaya nojkia kuali ma teselikaj uan kiampa kinextiskiaj nelia teikneliaj.

¹² ¿Kenijkatsa uelis tijnextisej kuali titeseliaj? Uelis tikintlaneuisej toikniuaj ma tlakuatij tochaj o san ma techpaxalotij. Nojkia kema techpaxalos ipan tlanechikoli toikni katli tepaxaloua chijchikuasej metstli, uelis tijtlaneuisej iuaya isiua maske amo kuali tikinixmatij (3 Juan 5-8). Amo moneki tikinmakasej miak tlakualistli o tlen tlauel patiyo. Amo tijnekij ma kiitakaj tijpiaj miak tlamantli, tijnekij tikinyolchikauasej toikniuaj. Nojkia amo kinamiki tikintlaneuisej san katli nojkia techtlaneuij (Luc. 10:42; 14:12-14). Uan maske tlauel timotekiuijtokej, uelis tijnextisej kuali titeseliaj.

13, 14. ¿Kenijkatsa uelis tijnextisej amo tikinilkauaj katli tsaktokej?

¹³ “Amo xikilkauakaj xikinpaleuikaj tlen tsaktokej.” (Xijpoua Hebreos 13:3.) Kema Pablo kiijkuilok ni, kinilnamiktoya toikniuaj katli tsaktoyaj pampa amo kitlauelkajtoyaj Jehová. Pablo kiniljuik toikniuaj tlauel kuali tlen kichijtoyaj pampa kinextijkej kinikneliyayaj “nopa tlaneltokanij tlen kintsaktoyaj” (Heb. 10:34). Kema Pablo tsaktoya naui xiuitl, toikniuaj katli itstoyaj nechka nochipa kipaleuijkej. ¿Uan kenijkatsa kipaleuijkej katli uejka itstoyaj? Inijuantij tlauel momaijtojkej uan kitlajtlanijkej toTeotsij ma kipaleui (Filip. 1:12-14; Heb. 13:18, 19).

¹⁴ Ipan ni tonali miakej toikniuaj nojkia kintsaktokej pampa kitekipanouaj Jehová. Toikniuaj katli itstokej nechka nochipa kinpaleuiaj. Maske tojuantij tiitstokej uejka, nojkia uelis tikinpaleuisej. ¿Kenijkatsa uelis tijchiuasej uan tijnextisej amo tikinilkauaj? Tlaj tikinikneliaj kej toikniuaj, nochipa timomaijtosej uan tikiljuisej Jehová ma kinpaleui. Uelis tikiljuisej ma kinpaleui toikniuaj: tlakamej, siuamej, uan konemej katli tsaktokej ne Eritrea, kej Paulos Eyassu, Isaac Mogos uan Negede Teklemariam, inijuantij kipiaj 20 xiuitl tsaktokej.

15. ¿Kenijkatsa uelis tijnextisej tijtlepanitaj tosiua o toueue?

¹⁵ “Nochi ma kitlepanitakaj se tlakatl uan se siuatl tlen monamiktijtokej pampa tlapajpaktik ininnemilis sansejko.” (Xijpoua Hebreos 13:4.) Nojkia tijnextiaj timoikneliaj kej tiiknimej kema tikintlepanitaj katli mosenkajtokej uan amo timomekatiaj, uan nojkia kema amo tikixpanoj tosiua o toueue (1 Tim. 5:1, 2). Tlaj timomekatiskiaj iuaya se toikni, tlauel tijchiuiliskiaj tlen amo kuali nopa toikni uan ichampoyouaj. Nojkia toikniuaj ayokmo motemachiskiaj ipan tojuantij (1 Tes. 4:3-8). Uan ximoiljui kenijkatsa kiyolmatiskia se toikni tlaj kimatiskia iueue kitlachilia pornografía. ¿Moiljuiskia nelia kiiknelia uan kitlepanita? (Mat. 5:28.)

16. ¿Kenijkatsa uelis tijnextisej tikinikneliaj sekinok kej toikniuaj tlaj ‘tipakij ika tlen tijpiaj’?

¹⁶ “Xipakikaj ika tlen inkipiaj.” (Xijpoua Hebreos 13:5.) Kema timotemachiaj ipan Jehová, amo timotekipachouaj pampa amo tijpiaj miak tlamantli. ¿Kenijkatsa uelis tijnextisej tikinikneliaj sekinok kej toikniuaj tlaj ‘tipakij ika tlen tijpiaj’? Tlaj amo timotekipachouaj pampa amo titlapijpiaj, uajka nochipa tikilnamiktosej tlauel ipati tiitstosej ininuaya toikniuaj uan amo tijpiasej miak tomij o sekinok tlamantli tlen pajpatiyo (1 Tim. 6:6-8). Amo tikinijilnamikisej toikniuaj yon tikijtosej tlauel amo kuali tiitstokej. Nojkia amo tikinkokolisej sekinok pampa tijnekij tlen inijuantij kipiaj yon tijnekisej tlauel titlapijpiasej. Kema ‘tipakij ika tlen tijpiaj’, kichiua ma titemakakaj ika nochi toyolo san tlen tijpiaj (1 Tim. 6:17-19).

17. ¿Kenijkatsa techpaleuia kema tiitstokej ika pakilistli uan amo timajmauij?

¹⁷ Xijpiakaj “miak pakilistli” (xijpoua Hebreos 13:6). Tlaj timotemachiaj ipan Jehová, uelis tiitstosej ika pakilistli uan amo timomajmatisej kema tijpiasej kuesoli. Kiampa nojkia uelis tikinyolchikauasej toikniuaj uan tijnextisej nelia tikinikneliaj kej toikniuaj (1 Tes. 5:14, 15). Kema onkas ueyi tlaijiyouilistli, amo timajmauisej pampa timotemachijtosej Jehová techmakixtis (Luc. 21:25-28).

18. ¿Kenijkatsa uelis tijnextisej tikinikneliaj ueuejtlakamej kej toikniuaj?

¹⁸ “Xikinilnamikikaj [...] tlen inmechyakan[aj].” (Xijpoua Hebreos 13:7, 17.) Ueuejtlakamej katli itstokej ipan tlanechikoli tlauel tlatekipanouaj uan kikixtiaj tonali pampa kinekij techpaleuisej. Kema timoiljuiaj ipan nochi tlen kichiuaj, kichiua nojua tlauel ma tikiniknelikaj uan ma tikinpatiitakaj. Amo tijnekiskiaj ayokmo ma yolpakikaj o ma motekipachokaj ika tlen tijchiuaj. Tijnekij tikinneltokasej ika nochi toyolo uan amo ika kualantli. Kiampa tijnextisej tlauel tikintlepanitaj uan tikinikneliaj “ipampa nopa tekitl tlen kichiuaj” (1 Tes. 5:13).

19, 20. ¿Kenijkatsa uelis tijnextijtiasej nelia tikinikneliaj toikniuaj?

¹⁹ Katli tijtekipanouaj Jehová techixmatij pampa timoikneliaj kej tiiknimej. Maske toikniuaj nojkia moikneliyayaj kema Pablo itstoya, ya kiniljuik monekiyaya nojua tlauel ma moiknelikaj kej iknimej. Kiniljuik: “Toikniuaj, tiinmechtlajtlaniaj para achi más xi[mo]iknelikaj” (1 Tes. 4:9, 10). Ni kinextia nochipa uelis tijnextijtiasej nelia tikinikneliaj toikniuaj.

²⁰ Yeka kema tikitasej nopa texto tlen xiuitl 2016 ipan totlanechikol, ma timoyoliljuikaj ipan ni tlajtlanili: “¿Nojua uelis kuali niteselis? ¿Kenijkatsa uelis nikinpaleuis toikniuaj katli tsaktokej? ¿Nikintlepanita katli mosenkajtokej? ¿Nijtlepanita nosiua o noueue? ¿Niyolpaktok maske amo nijpia miak tomij o miak tlamantli? ¿Tlake nechpaleuis nojua ma nimotemachi ipan Jehová? ¿Kenijkatsa nojua uelis nikinneltokas ueuejtlakamej ipan tlanechikoli?”. Tlaj tijchiuasej kampeka tijchiuasej ni tlamantli, nopa texto tlen ni xiuitl amo san tlapik kitlatskiltijtosej ipan tlanechikoli. Kema tikitasej, nochipa tikilnamikisej moneki tijneltokasej tlen Pablo tetlajtolmakak: “Nochipa ximoiknelijtokaj kej iniknimej” (Heb. 13:1, TNM).