Rut uan Noemí

Ipan altepetl Israel onkak se ueyi mayantli. Yeka, se siuatl israelejketl katli motokaxtiyaya Noemí yajki iuaya iueue uan ikoneuaj ipan tlali Moab, uan nopaya mokajkej. Teipa iueue mijki. Ikoneuaj mosiuajtijkej ininuaya omej siuamej katli euayayaj Moab: Rut uan Orfa. Uan teipa, Noemí ikoneuaj nojkia mijkej.

Kema Noemí kimatki ipan Israel sampa onkayaya tlakualistli, kinejki tlakuepilis. Rut uan Orfa yajkej iuaya. Kema yauiyayaj ipan ojtli, Noemí kiniljuik: “Inmojuantij tlauel inkiniknelijkej nokoneuaj uan nojkia tlauel innechikneliaj. Nijnekiskia sampa ximonamiktikaj. Xitlakuepilikaj Moab”. Nopa siuamej kiiljuijkej: “Tlauel timitsikneliaj, amo tijnekij timitskajteuasej”. Noemí miakpa kiniljuik ma tlakuepilikaj Moab. Teipa, Orfa kena tlakuepilik, uan Rut amo. Uajka Noemí kiiljuik Rut: “Orfa tlakuepilik ichaj uan sampa kinueyichiuas ininteotsitsij moabeuanij. Xitlakuepili iuaya uan xia ichaj monana”. Rut kinankilik: “Amo nimitskajteuas. Moaltepe nojkia elis noaltepe, uan moTeotsij elis noTeotsij”. ¿Kenijkatsa timoiljuia kiyolmatki Noemí?

Kema Rut uan Noemí asitoj Israel, nopaya pejtoyaj kipixkaj cebada. Se tonali, Rut kipejpenato nopa cebada tlen mokajtoya ipan Booz imil. Booz eliyaya ikone Rahab. Ya kimatiyaya maske Rut euayaya Moab amo kitlauelkajtoya Noemí. Uan kiniljuik itekipanojkauaj nojua ma kikajtiakaj se kentsi cebada tlen kipixkayayaj, kiampa Rut ueliskia kipejpenas.

Nopa youali, Noemí kitlajtlanilik Rut: “¿Kanke titekitik nama?”. Rut kinankilik: “Ipan Booz imil”. Uajka Noemí kiiljuik: “Booz eli se iteixmatka noueue. Nojua nopaya xitekiti ininuaya nopa sekinok ichpokamej. Nopaya amo tleno mitsiljuisej”.

Rut tekitik nopaya nochi nopa tonali tlen uejkajki nopa pixkistli. Booz kiitak Rut kipixtoya kuali iyolo uan kipaktiyaya tekitis. Ipan nopa tonali, tlaj se tlakatl mikiyaya uan amo kinkajtejtoya ikoneuaj, se iteixmatka ueliskia mosiuajtis iuaya isiua. Yeka Booz mosiuajtik iuaya Rut, uan kipixkej se pilkonetsi katli kitokaxtijkej Obed. Obed elki iueyitata tlanauatijketl David. Noemí iuampoyouaj tlauel yolpajkej. Kiiljuijkej: “Achtoui, Jehová mitsmakak Rut, katli tlauel mitsiknelijtok. Uan nama mitsmakatok se moixui. Yeka ma tijueyichiuakaj Jehová”.