TLAMACHTILI 40
¿Kenijkatsa uelis tiitstosej titlapajpaktikej iixpa toTeotsij?
Ximoiljui tlen kichiua se tenaj kema ikone yas escuela: achtoui kialtia uan kuali kiyoyontia pampa kineki kuali ma nesi. Tlen inana kichiua kipaleuia ikone amo ma mokoko uan sekinok kiitaj nelia kiiknelia. Jehová, katli eli toTata, techiknelia uan nojkia kineki amo ma tinemikaj tisokiyojkej uan kuali ma timonejnemiltikaj. Tlaj kiampa tijchiuasej, techpaleuis kuali ma tiitstokaj uan tijueyichiuasej Jehová.
1. ¿Kenijkatsa uelis tijnextisej amo tielij tisokiyojkej?
Jehová techiljuia: “Moneki xiitstokaj intlatsejtseloltikej” (1 Pedro 1:16). Tlaj tijnekij tielisej titlatsejtseloltikej, moneki kuali timonejnemiltisej uan amo tinemisej tisokiyojkej. Tijnextiaj amo tisokiyojkej kema nochipa timaltiaj, tijchikueniaj toyoyo, amo tlasokiyo kampa tiitstokej, tlaj tijpajpakaj tocarro uan tijkualtlaliaj nochi ni tlamantli. Nojkia titlapaleuiaj kema tlachpanaj uan tlapojpouaj ipan kali kampa timosentiliaj. Tlaj kiampa tijchiuaj, titlapaleuiaj sekinok nojkia ma kiueyichiuakaj Jehová (2 Corintios 6:3, 4).
2. ¿Tlake tlamantli moneki amo tijchiuasej uan kiampa tiitstosej titlapajpaktikej?
Biblia techiljuia “ma timoiyokatlalikaj tlen nochi tlamantli tlen kiijtlakos totlakayo o toyolo” (2 Corintios 7:1). Yeka amo tijchiuaj tlamantli tlen ueliskia kitlanauis totlakayo o kisokiuis totlalnamikilis. Uan pampa tijnekij Jehová ma kipakti tlen timoiljuiaj, tijchiuaj kampeka amo timoiljuisej tlen amo kipaktia (Salmo 104:34). Uan nojkia tijchiuaj kampeka san tikijtosej tlamantli tlen kuali (xijpoua Colosenses 3:8).
¿Tlake uelis kisokiuis totlakayo uan kichiuas ayokmo kuali ma timonejnemiltikaj? Se keski tlamantli uelis kitlanauis totlakayo kej kema se akajya kichichina iyatl uan kema kitekiuia miak pajtli maske amo kiiljuijtok se tepajtijketl o kitekiuia drogas. Kema amo tijchiuaj nopa tlamantli, tijnextiaj tijpatiitaj uan tijmokuitlauiaj tonemilis. Nojkia pampa tijnekij kuali timonejnemiltisej, tijchiuaj kampeka amo tikitasej pornografía uan amo timoijitskisej kampa amo kinamiki (Salmo 119:37; Efesios 5:5). Maske uelis ouij tijmatisej tijkauasej ni tlamantli, Jehová uelis techpaleuis ayokmo ma tijchiuakaj (xijpoua Isaías 41:13).
KUALI XIMOMACHTI
Ma tikitakaj kenijkatsa tijueyichiuaj Jehová kema amo tinemij tisokiyojkej uan kema tijnekij nochi ma elto tlapajpaktik, uan tlake techpaleuis ayokmo tijchiuasej tlamantli tlen sokiyo.
3. Tijueyichiuaj Jehová kema amo tielij tisokiyojkej
Kema tijpouaj nopa tlanauatili tlen Jehová kinmakak israeleuanij, tikitaj Jehová kineki itekipanojkauaj ma itstokaj tlapajpaktikej. Xijpouakaj Éxodo 19:10 uan 30:17-19 uan xijnankilikaj ni tlajtlanili:
¿Kenijkatsa ni textos techpaleuia ma tijkuamachilikaj kenijkatsa kineki Jehová ma elto totlakayo?
¿Tlake uelis tijchiuasej mojmostla uan kiampa amo tinemisej tisokiyojkej?
Moneki tijchiuasej kampeka tlaj tijnekij tiitstosej titlapajpaktikej. Uan ni uelis tijchiuasej maske kampa ueli tiitstokej o tlaj titlapijpiaj o amo. Xikitakaj nopa VIDEO uan xijnankilikaj ni tlajtlanili:
Tlaj kema titlajtolmoyauaj maseualmej kiitaj tlen tiuikaj eltok tlapajpaktik, ¿timoiljuia nopa kichiuas ma kitlepanitakaj Jehová? ¿Kenke kiampa timoiljuia?
4. Ayokmo xijchiua tlen amo kuali tlen timomajtok tijchiua
Jehová uelis techpaleuis ayokmo ma tijchiuakaj tlen amo kuali tlen timomajtokej tijchiuaj.
Tlaj tijtekiuia miak pajtli maske amo mitsiljuijtok se tepajtijketl, tlaj titlachichina o tijtekiuia drogas, uelis ouij tijmati tijkauas. Tlaj timoiljuis kenijkatsa mitstlanauia nopa tlamantli, mitspaleuis ayokmo xijchiua. Xijpouakaj Mateo 22:37-39 uan ximoiljuikaj kenijkatsa kema se akajya tlachichina o kitekiuia sekinok tlamantli tlen tetlanauia, kichiua...
...ayokmo kuali ma mouika iuaya Jehová.
...ayokmo kuali ma itstokaj ichampoyouaj uan sekinok maseualmej.
Ximoiljui tlake tlamantli mitspaleuis tijkauas tlen amo kuali tlen timomajtok tijchiua.a Xikitakaj nopa VIDEO.
Xijpouakaj Filipenses 4:13 uan xijnankilikaj ni tlajtlanili:
¿Timoiljuia tlaj se akajya momaijtos, kipouas Biblia uan yas tlanechikoli, kipaleuis ayokmo ma kitekiui o ma kichiua se tlamantli tlen amo kuali tlen momajtok? ¿Kenke kiampa timoiljuia?
5. Ayokmo ximoiljui yon xijchiua tlamantli tlen sokiyo
Xijpouakaj Colosenses 3:5 uan xijnankilikaj ni tlajtlanili:
¿Kenijkatsa tijmatij Jehová amo kipaktia kema kitlachiliaj pornografía? ¿Uan nojkia kema motlajkuiljuiliaj o motitlaniliaj tlaixkopinkayomej uan videos tlen sokiyo? ¿Uan kenijkatsa kiita kema moijitskiaj kampa amo kinamiki?
¿Timoiljuia Jehová kinamiki ma techiljui kenijkatsa timonejnemiltisej? ¿Kenke kiampa timoiljuia?
Xikita tlake mitspaleuis amo timoiljuis ipan tlamantli tlen Jehová kiita sokiyo. Xikitakaj nopa VIDEO.
Tlen Jesús kiijtok techpaleuia ma tijkuamachilikaj tlake moneki tijchiuasej tlaj tijnekij kuali timonejnemiltisej. Xijpouakaj Mateo 5:29, 30 uan xijnankilikaj ni tlajtlanili:
Jesús amo kiijtok moneki nelia timokixtilisej toixtiyol o timomatsontekisej, ya kinejki kiijtos moneki nimantsi ma tijkauakaj tlen uelis kichiuas ma titlajtlakolchiuakaj. ¿Tlake moneki tijchiuasej uan kiampa amo timoiljuisej ipan tlamantli tlen sokiyo?b
Tlaj ya tijchiua kampeka ayokmo timoiljuis ipan tlamantli tlen sokiyo, uelis timotemachis Jehová kipatiita tlen tijchiua. Xijpouakaj Salmo 103:13, 14 uan xijnankilikaj ni tlajtlanili:
Tlaj namantsi tijchiua kampeka ayokmo tijchiuas se tlamantli tlen sokiyo, ¿timoiljuia ni versículos mitspaleuis nojua tijchijtos kampeka tijkauas? ¿Kenke kiampa timoiljuia?
¡Kena uelis tijkauas!
Tlaj sampa tijchijki tlen amo kinamiki, uelis timoiljuik: “Sampa nijchijki tlen amo kinamiki, amo kema uelis nijkauas”. Nama ximoiljui ipan ni tlamantli. Tlaj se akajya katli motlaloua motepotlamia uan uetsi, amo kiijtosneki ayokmo tlatlanis yon monekis sampa tlakuepilis kampa pejki motlaloua. Yeka, tlaj ta sampa tijchijki tlen amo kinamiki, amo kiijtosneki amo kema uelis tijkauas uan san tlapik nochi tlen tijchijtok. Amo tlauel ximokueso pampa yolik tijkajtias tlen timomajtoya tijchiua. Uan nojua xijchijto kampeka pampa Jehová mitspaleuis.
TLEN SEKINOK KIIJTOUAJ: “Amo kema uelis nijkauas tlen amo kuali pampa uejkajkia kiampa nijchiua”.
¿Tlake texto tijnextiliskia nopa maseuali uan kiampa kiitas Jehová kipaleuis ayokmo ma kichiua tlen amo kuali tlen momajtok kichiua?
TLEN TIMOMACHTIJKEJ
Tijyolpakiltiaj Jehová kema amo tisokiyojkej tinemij, kema amo timoiljuiaj tlamantli tlen sokiyo uan kema kuali timonejnemiltiaj.
¿Tlake tijyekok?
¿Kenke tlauel moneki amo tinemisej tisokiyojkej?
¿Tlake moneki tijchiuasej uan kiampa amo tinemisej tisokiyojkej?
¿Tlake moneki tijchiuasej uan kiampa amo timoiljuisej tlamantli tlen sokiyo uan kuali timonejnemiltisej?
NOJKIA XIKITA NI
Maske uelis amo tijpiaj miak tomij, ¿tlake tlamantli uelis tijchiuasej uan kiampa amo tinemisej tisokiyojkej?
Xikita se keski tlamantli tlen mitspaleuis ayokmo titlachichinas.
“¿Tlake mitspaleuis ayokmo titlachichinas?” (¡Xitlachixtokaj!, mayo 2010)
Xikita tlake uelis mitspanos tlaj tijtlachilis pornografía.
Xikita tlake kipaleuik se tlakatl ayokmo ma kitlachili pornografía.
“Maske tlauel ouij nijmatki, kena uelki nijkaua” (Tlen Tematiltia, tlamachtili)
a Xikita nopa tlamachtili “¿Tlake mitspaleuis ayokmo titlachichinas?”, tlen eltok ipan tlaxeloli “Nojkia xikita ni” tlen uala ipan ni tlamachtili, nopa mitspaleuis ayokmo tijchiuas tlen amo kuali tlen timomajtok.
b Tlaj tijneki tijmatis tlake mitspaleuis ayokmo timoijitskis kampa amo kinamiki, xikita tlamachtili 25 tlen nopa amochtli Kej monankilia tlen telpokamej kinekij kimatisej, volumen 1, tlen itoka “¿Tlake nechpaleuis ayokmo nimoijitskis kampa amo kinamiki?”.