Nochipa ma tiitstokaj sansejko uan ika tlayolseuilistli

1, 2. ¿Tlake kiijtosneki kema ipan Nopa Achtoui Tlajtoli kiijtoua “kampa nijtlalis noikxiuaj”?

JEHOVÁ kiijtok: “Iluikaktli eltok keja nosilla kampa nimoseuia para nitlanauatis, uan ni Tlaltipaktli eltok kampa nikinsiyajkaua noikxiuaj” (Is. 66:1). Uan Isaías 60:13 nojkia kiijtoua: ‘Nijyejyekchiuas kampa nijtlalis noikxiuaj’. ¿Kenijkatsa kiyejyekchiua Jehová kampa kitlalia iikxiuaj? ¿Uan kenijkatsa techpaleuia ni?

² Kema ipan Nopa Achtoui Tlajtoli kiijtoua “kampa nijtlalis noikxiuaj” nojkia kiijtosneki nopa teokali tlen eltoya ne Israel (1 Crón. 28:2; Sal. 132:7). Jehová kiitayaya tlauel yejyektsi nopa teokali pampa nopaya kiueyichiuayayaj itekipanojkauaj.

 3. 1) ¿Tlake techpaleuia ma tijueyichiuakaj toTeotsij ipan ni tonali? 2) ¿Kema pejki onka nopa templo espiritual?

³ ¿Tlake techpaleuia ma tijueyichiuakaj toTeotsij ipan ni tonali? Amo se teokali. Ni tlen ika tijueyichiuaj Jehová uan tijtokaxtiaj “templo espiritual”. ¿Tlake nopa? Nochi tlen toTeotsij techmakatok tlen ika uelis timouampojchiuasej iuaya uan tijueyichiuasej. Ni ueli tijchiuaj pampa Jesús techmakixtik ika imikilis. ¿Kema pejki onka nopa templo espiritual? Ipan xiuitl 29, kema Jesús moatsonpoliuiltik uan Jehová kitlalik kej se ueyi sacerdote (Heb. 9:11, 12).

4, 5. 1) ¿Tlake kiijtoua Salmo 99 kinamiki kichiuasej Jehová itekipanojkauaj? 2) ¿Tlake tlamantli moneki ma timotlajtlanikaj?

⁴ Tlauel tijtlaskamatiliaj Jehová pampa techmakatok tlen ika uelis tijueyichiuasej. Ni tijnextiaj kema tikiniljuiaj maseualmej toTeotsij itoka Jehová uan ya kititlanki Jesús ma techmakixtiki ika imikilis. Tlauel tiyolpakij pampa kipano ocho millones Jehová itlajtoltemakauaj mojmostla kiueyichiuaj. Maske miakej moiljuiaj kema mikisej yasej iluikak uan nepa kiueyichiuatij toTeotsij, tojuantij tijmatij nopa amo nelia pampa nama moneki ma tijueyichiuakaj.

⁵ Kema tijueyichiuaj Jehová nojkia tijchiuaj kej itekipanojkauaj katli uejkajkia itstoyaj (xijpoua Salmo 99:1-3 uan 5-7). Miakej kej Moisés, Aarón uan Samuel, kiueyichijkej toTeotsij kej ya kinekiyaya. Ipan ni tonali toikniuaj sansejko kiueyichiuaj Jehová. Katli motemachiaj yasej iluikak uan tekichiuasej iuaya Jesús kej sacerdotes, kiueyichiuaj toTeotsij ipan Tlaltipaktli kej ya kineki. Nojkia itstokej “sekinok tlakamej” o tlauel miakej toikniuaj katli motemachiaj itstosej ipan Tlaltipaktli. Inijuantij kinpaleuiaj katli yasej iluikak (Juan 10:16). Yeka moneki ma timotlajtlanikaj: “¿Nijueyichiua toTeotsij kej ya kineki?”.

6, 7. 1) ¿Tlake panok teipa kema toTeotsij kintlapejpenijtoya nopa achtoui itekipanojkauaj? 2) ¿Tlake panok ipan xiuitl 1919?

⁶ Apóstol Pablo kiijtok se keskij tlaijixnamikiskiaj ipan religión katli melauak uan tlamachtiskiaj tlen amo melauak ipan tlanechikoli (Hech. 20:28-30; 2 Tes. 2:3, 4). Ni pejki moaxitia kema ayamo panoyaya 100 xiuitl kema toTeotsij kintlapejpenijtoya nopa achtoui itekipanojkauaj. Uajka, ouij kimatiyayaj ajkia inijuantij kitekipanouayayaj toTeotsij kej kinamiki. Kema ya panotoya miak xiuitl, Jehová kichijki Jesús ma kinexti ajkia inijuantij kiueyichiuayayaj kej kinamiki.

⁷ Ipan xiuitl 1919 neski ajkia inijuantij kiueyichiuayayaj toTeotsij kej ya kinekiyaya. Inijuantij kipatlakej tlen monekiyaya uan kiampa kiueyichijkej Jehová kej kinamiki (Is. 4:2, 3; Mal. 3:1-4). Uajka pejki moaxitia tlen Pablo kiitak ipan se temiktli. Ma tikitakaj tlake kiitak.

8, 9. ¿Tlake nopa “Xochimili” tlen kiitak Pablo ipan se temiktli?

⁸ Jehová kichijki Pablo ma kiita se tlamantli tlen mochiuaskia teipa (xijpoua 2 Corintios 12:1-4). Kiitak se tlamantli tlen kitokaxtik “Xochimili”. ¿Tlake nopa? Uelis eliyaya eyi tlamantli. Se. Nopa Xochimili tlen mochiuas ipan Tlaltipaktli (Luc. 23:43, TNM). Ome. Kenijkatsa toTeotsij itekipanojkauaj tlauel kuali itstosej ipan nopa yankuik Tlaltipaktli. Uan eyi. Uelis kiijtosneki “kampa itstok toTeko”, o kema katli kintlapejpenijtokej itstosej iuaya Jehová ne iluikak (Apoc. [Rev.] 2:7).

⁹ ¿Kenke Pablo kiijtok kikaktoya tlamantli tlen amo ueliskia kiijtos? Pampa ayamo kinamikiyaya kiixtomas nochi kuajkualtsitsij tlamantli tlen kiitstoya. Ipan ni tonali, kena uelis titeiljuisej nopa kuajkuali tlamantli tlen kipiaj itekipanojkauaj.

10. ¿Sanse kiijtosneki nopa paraíso espiritual uan nopa templo espiritual?

¹⁰ Ipan amatlajkuiloli nochipa moixtontok tlake kiijtosneki nopa paraíso espiritual. ¿Sanse kiijtosneki nopa paraíso espiritual uan nopa templo espiritual? Amo. Nopa templo espiritual kiijtosneki nochi tlamantli tlen toTeotsij techmakatok tlen ika uelis tijueyichiuasej. Uan nopa paraíso espiritual kiijtosneki kema Jehová kichiua itekipanojkauaj ma itstokaj sansejko uan ika tlayolseuilistli. Kiampa nesi ajkia inijuantij tlatekipanouaj ipan nopa templo espiritual (Mal. 3:18).

11. ¿Tlake tlen tlauel kuali tlamantli tijchiuaj ipan ni tonali?

¹¹ Tlauel tiyolpakij kema tikitaj kenijkatsa kema pejki xiuitl 1919, Jehová kinkajtok maseualmej tlen tlajtlakolejkej ma kichiuakaj ma momiakilikaj katli itstokej sansejko uan ika tlayolseuilistli. ¿Nojkia tijchiua ni? ¿Tijpatiita pampa tijpaleuia Jehová ma kiueyichiuakaj ipan Tlaltipaktli?

12. ¿Kenke tijmatij moaxitijtok tlen kiijtoua Isaías 60:17? (Xikita nopa achtoui tlaixkopinkayotl.)

¹² Ipan miak xiuitl tlen panotok mopatlatok uan mokualchijchijtok miak tlamantli ipan toTeotsij itlanechikol tlen eltok ipan Tlaltipaktli. Isaías ya nopa kiijtok panoskia (xijpoua Isaías 60:17). Nopa toikniuaj telpokamej uan katli namanok pejkej kinmachtiaj uelis kimatij tlen mopatlatok ipan tlanechikoli pampa se akajya kiniljuik o pampa kipojkej ipan amatlajkuiloli. Uan sekij toikniuaj katli kipiaj miak xiuitl kitekipanojtokej toTeotsij kiitstokej nochi tlen mopatlatok. Inijuantij motemachiaj toTeotsij kichijtok Jesús ma kiyakana itlanechikol. Tlaj tijkakisej tlen ni toikniuaj kiijtouaj techpaleuis ma timotemachikaj ipan Jehová.

13. ¿Tlake kiijtoua Salmo 48:12-14 moneki tijchiuasej?

¹³ Nochi moneki tikiniljuisej sekinok tlen Jehová itlanechikol. Ipan Tlaltipaktli kampa kichiuaj tlen amo kuali, nelia yejyektsi nesi kema miakej toikniuaj tlen nochi Tlaltipaktli itstokej sansejko uan ika tlayolseuilistli. Yeka, nopa maseualmej ‘ininteipaixuiuaj’ o toikniuaj telpokamej uan katli namanok pejtokej kinmachtiaj, moneki tikiniljuisej tlen toTeotsij itlanechikol uan kenijkatsa tiitstokej sansejko uan ika tlayolseuilistli (xijpoua Salmo 48:12-14).

14, 15. 1) ¿Tlake tlamantli mopatlak kema ya panotoya nopa xiuitl 1970? 2) ¿Kenke tlauel techpaleuijtok nopa?

¹⁴ Miakej toikniuaj kiitstokej se keski tlamantli tlen mopatlatok uan tlen nojua kiyejyekchijtok toTeotsij itlanechikol. Uejkajkia, ipan sejse tlanechikoli uan ipan sejse kali Betel itstoya se tlayakanketl uan ipan tlauel ueyi kali Betel itstoya se presidente de la Sociedad Watch Tower. Maske ni toikniuaj katli tlayakanayayaj kinpixtoyaj inintlapaleuijkauaj, san katli tlayakanayaya kiijtouayaya tlake mochiuaskia ipan sejse tlanechikoli, ipan sejse kali Betel uan ipan tlauel ueyi kali Betel. Kema ya panotoya nopa xiuitl 1970, mopatlak ni pampa se keskij ueuejtlakamej kitlapejpeniskiaj tlake mochiuaskia. Ipan ni tonali, ipan sejse tlanechikoli tlayakanaj se keskij ueuejtlakamej, ipan sejse kali Betel itstokej se keskij toikniuaj katli tlayakanaj uan Jehová itlajtoltemakauaj kinyakantokej se keskij ueuejtlakamej katli motemachiaj yasej iluikak. Tikiniljuiaj Katli kinyakanaj Jehová itlajtoltemakauaj.

¹⁵ Tlen mopatlak ipan toTeotsij itlanechikol tlauel techpaleuijtok pampa nama tlauel kuali tijkuamachiliaj tlen Biblia tlamachtia. Pampa nama amo san se maseuali kiijtoua tlake mochiuas, kinpaleuia nochi toTeotsij itekipanojkauaj. Yeka, nochi ueuejtlakamej tlen Jehová kintlalijtok uelis techmachtisej ika kuajkuali tlamantli tlen kinextiaj (Prov. 24:6; Efes. 4:8).

16, 17. ¿Tlake tlamantli tlen namanok mopatlatok tlauel mitspaktijtok, uan kenke?

¹⁶ Ma tikitakaj se keski tlamantli tlen namanok mopatlatok. Nopa amatlajkuiloli tlen tijpiaj tlauel yejyektsitsij uan tlauel kinpaleuijtok miakej. Nojkia tijtekiuiaj nopa yajyankuik tlamantli tlen kichijtokej tlaixmatinij. Uan pampa titlamachtiaj kampa jw.org ipan Internet, tikinpaleuijtokej tlauel miakej. Ni kinextia Jehová tlauel kiniknelia maseualmej uan kitekipachoua tlen kinpano.

¹⁷ Tlauel tijpatiitaj pampa ayokmo timonechikouaj kej achtouia, uan kiampa tiuelij timomachtiaj ininuaya tochampoyouaj o toseltitsitsij. Tijtlaskamatiliaj toTeotsij tlen mopatlatok ipan uejueyi tlanechikolistli pampa sejse xiuitl tlauel kuali techmachtiaj. Uan nojkia tijtlaskamatiliaj pampa kuali techmachtiaj kenijkatsa titlajtolmoyauasej ika Biblia. Ni kinextia Jehová kiyakana itlanechikol uan kichiua nojua ma tiitstokaj sansejko uan ika tlayolseuilistli.

18, 19. ¿Kenijkatsa uelis tijchiuasej nojua ma tiitstokaj sansejko uan ika tlayolseuilistli?

¹⁸ Jehová kineki nojua ma tijchiuakaj tlen moneki uan kiampa uelis nochipa tiitstosej sansejko uan ika tlayolseuilistli. ¿Kenijkatsa uelis tijchiuasej? Tlaj ika nochi toyolo titlajtolmoyauasej uan titlamachtisej ika Biblia. Kema tijpaleuiaj se akajya ma mochiua se tlen Jehová itlajtoltemakauaj, momiakiliaj itekipanojkauaj (Is. 26:15; 54:2).

¹⁹ Tlaj tijchiuasej kampeka nojua tijnextisej kuajkuali tlamantli, nojkia uelis nochipa tiitstosej sansejko uan ika tlayolseuilistli. Kiampa uelis tijchiuasej tlauel ma kinpakti sekinok tlen tijchiuaj. ¿Tlake kichiua maseualmej ma kinekikaj monechikosej touaya uan ma tikinmachtikaj tlen Jehová uan Jesús? Amo tlen tikixmatij, kinyoltilana tlen tijchiuaj.

20. ¿Tlake kiijtoua Proverbios 14:35 moneki tijchiuasej?

²⁰ Jehová uan Jesús tlauel yolpakij kema kiitaj nochipa tiitstokej sansejko uan ika tlayolseuilistli. Maske nojkia tiyolpakij pampa titlapaleuiaj ma mochiua ni, nojua tlauel tiyolpakisej kema nelnelia mochiuas nopa Xochimili ipan Tlaltipaktli. Proverbios 14:35 kiijtoua se tlanauatijketl yolpaki kema kipia se itlatekipanojka katli tlalnamiki. Yeka, ma tijnextikaj titlalnamikij uan ma tijchiuakaj kampeka nojua tiitstosej sansejko uan ika tlayolseuilistli.