TLAMACHTILI 51
¿Kenijkatsa uelis tijyolpakiltisej Jehová kema tikamanaltij?
Jehová kichijki ma tikamanaltikaj uan nopa eli se tlamantli tlen tlauel kuali. Yeka, Jehová kineki ma tijtekiuikaj kuali tlajtoli kema tikamanaltij (xijpoua Santiago 1:26). Uajka, ¿kenijkatsa uelis tijyolpakiltisej Jehová kema tikamanaltij?
1. ¿Kenijkatsa kineki Jehová ma tikamanaltikaj?
Biblia kiijtoua: “Noja más ximoyolchikauakaj ipan toTeko uan ximofuerzajmakakaj se ika sekinok” (1 Tesalonicenses 5:11). ¿Tikixmati se akajya katli moneki ma kiyolchikauakaj? ¿Uelis tijpaleuis kuali ma kiyolmati? Xikiljui nopa maseuali tlauel tikiknelia. Ueliskia tikiljuis tlake kuajkuali tlamantli kichiua. ¿Tikilnamiki se texto tlen ueliskia kiyolchikauas se akajya katli tikixmati? Onka miak textos tlen uelis tijtekiuis. Nojkia xijmajto ni: kej tikijtos se tlamantli uelis kiyolchikauas se akajya. Yeka xijchiua kampeka tikamanaltis ika tlaiknelili uan ika yamanik tlajtoli (Proverbios 15:1).
2. ¿Kenijkatsa amo kinamiki tikamanaltisej?
Biblia kiijtoua: “Amo tlen ueli xikamatikaj” (xijpoua Efesios 4:29). Nopa kiijtosneki amo tikijtosej tlajtoli tlen sokiyo, tlen amo kuali uan tlen teyolkokoua. Nojkia amo kinamiki tikijilnamikisej yon tikistlakauisej se akajya (xijpoua Proverbios 16:28).
3. ¿Tlake techpaleuis ma tikijtokaj tlen kinyolchikauas sekinok?
Kema tikamanaltij tijnextiaj tlake nelnelia timoiljuiaj uan tlake tijyolmatij (Lucas 6:45). Yeka moneki nochipa timoiljuisej tlamantli tlen kuali, nopa kiijtosneki tlamantli “tlen xitlauak uan tlen tlapajpaktik”, “tlen nochi tlakamej kikualitaj” uan tlen kinextia titeikneliaj (Filipenses 4:8). Tlaj tijnekij kiampa tijchiuasej, moneki tikinpiasej kuali touampoyouaj uan timoyolpakiltisej ika tlamantli tlen kuali (Proverbios 13:20). Nojkia, achtoui moneki kuali timoiljuisej tlake tikijtosej. Ximoiljui kenijkatsa kiyolmatisej sekinok kema kikakisej tlen tikijtos. Biblia kiijtoua: “Itstokej sekij tlakamej tlen tekokouaj ika inintlajtol keja eliskia se machete tlen tlateki. Pero inintlajtol tlalnamikinij eltok keja se pajtli tlen teyolchikaua uan teseseltia” (Proverbios 12:18).
KUALI XIMOMACHTI
Ma tikitakaj kenijkatsa kipaktia Jehová ma tikamanaltikaj uan kenijkatsa uelis kinyolchikauas sekinok.
4. Kuali ximoiljui tlake tikijtos
Kemantika nochi tikijtouaj se tlenijki tlen teipa kichiua amo kuali ma tijyolmatikaj (Santiago 3:2). Xijpouakaj Gálatas 5:22, 23 uan xijnankilikaj ni tlajtlanili:
Tlaj tijneki kuali timoiljuis kenijkatsa tikijtos se tlamantli uan amo nima tikijtojtiuetsis, ¿tlake kuajkuali tlamantli tlen kiijtoua ni texto tikiljuiskia Jehová ma mitspaleui tijnextis? ¿Kenijkatsa uelis mitspaleuis ni kuajkuali tlamantli?
Xijpouakaj 1 Corintios 15:33 uan xijnankilikaj ni tlajtlanili:
¿Timoiljuia tlen ika timoyolpakiltia uan kej kamanaltij mouampoyouaj ueliskia kichiuas xikamanalti kej inijuantij? ¿Kenijkatsa ueliskia mitsmauasej?
¿Tlake ueliskia kichiuas xikijto tlajtoli tlen teyolkokoua o amo?
Xijpouakaj Eclesiastés 3:1, 7 uan xijnankilikaj ni tlajtlanili:
¿Kema kinamiki amo tleno tikijtos o timochias kema tikijtos se tlamantli?
5. Xikamanalti kuali tlen se akajya
¿Tlake techpaleuis amo ma tikinyolkokokaj sekinok yon ma tikijtokaj tlen amo kinpaktis? Xikitakaj nopa VIDEO uan xijnankilikaj ni tlajtlanili:
¿Kenke nopa toikni katli nesi ipan video kinekiyaya kipatlas kej kamanaltiyaya tlen sekinok?
¿Tlake kipaleuik ayokmo kiampa ma kichiua?
Xijpouakaj Eclesiastés 7:16 uan xijnankilikaj ni tlajtlanili:
¿Tlake moneki tikilnamikisej kema tijnekisej tikijtosej tlen amo kuali tlen se akajya?
Xijpouakaj Eclesiastés 7:21, 22 uan xijnankilikaj ni tlajtlanili:
Kema se akajya amo kuali kamanalti tlen ta, ¿timoiljuia ni versículos uelis mitspaleuis? ¿Kenke kiampa timoiljuia?
6. Kuali xikinnojnotsa mochampoyouaj
Jehová kineki ma tikinnojnotsakaj tochampoyouaj ika tlaiknelili uan ika yamanik tlajtoli. Xikitakaj nopa VIDEO uan xijnankilikaj ni tlajtlanili:
¿Tlake uelis mitspaleuis tikinnojnotsas mochampoyouaj ika tlaiknelili?
Xijpouakaj Efesios 4:31, 32 uan xijnankilikaj ni tlajtlanili:
¿Kenijkatsa moneki tikinkamanaljuisej tochampoyouaj uan kiampa kiitasej nelnelia tikinikneliaj?
Jehová kiiljuiyaya Jesús kiiknelia. Xijpouakaj Mateo 17:5 uan xijnankilikaj ni tlajtlanili:
¿Kenijkatsa uelis tijchiuas kej Jehová kema tikamanaltis ininuaya mochampoyouaj?
Xijchiua kampeka tikiniljuis sekinok tlake kuali tlamantli kichiuaj.
TLEN SEKINOK KIIJTOUAJ: “Na san nikijtoua tlen nimoiljuia, uan amo nechkuesoua tlaj sekinok amo kinpaktia”.
¿Ta nojkia kiampa timoiljuia? ¿Kenke kiampa tikijtoua?
TLEN TIMOMACHTIJKEJ
Tlen tikijtouaj uelis kinyolchikauas o kinyolkokos sekinok. Yeka moneki kuali timoiljuisej tlake tikijtosej, kema tikamanaltisej uan kenijkatsa tikijtosej.
¿Tlake tijyekok?
¿Kenijkatsa uelis tikinpaleuis sekinok ika tlen tikijtos?
¿Tlake amo tijnekiskia tikijtos kema tikamanaltis?
¿Kenijkatsa kej tinesij uelis kichiuas sekinok kuali ma kiitakaj Jehová?
NOJKIA XIKITA NI
¿Tlake techpaleuis ma tikijtokaj tlamantli tlen kinyolchikauas sekinok?
Xikita tlake mitspaleuis amo tikijtos tlajtoli tlen sokiyo.
“¿Nelia tlauel amo kuali tlaj tikijtosej tlajtoli tlen sokiyo?” (Tlamachtili ipan jw.org)
Xikita tlake mitspaleuis amo titeijilnamikis.
Xikita kenijkatsa Jehová kipaleuik se tlakatl ayokmo ma kiijto tlajtoli tlen sokiyo.
“Pejki nimoiljuia tlake nijchiuayaya ipan nonemilis” (Tlen Tematiltia, agosto 1, 2013)