¿Kenke uan kema kinamiki motsontsakuasej tosiuaikniuaj?

Apóstol Pablo kiijtok kemantika tosiuaikniuaj moneki motsontsakuasej kema kitekipanouaj toTeotsij. Ma tikitakaj tlen kiijkuilok ipan 1 Corintios 11:3-16, kiampa tijmatisej tlake moneki kichiuasej tosiuaikniuaj uan kiampa kiueyichiuasej Jehová. Ipan ni textos tikitasej kema, kanke uan kenke moneki motsontsakuasej.

¿Kema moneki motsontsakuasej? Ipan versículos 4 uan 5 Pablo kiijtok moneki kichiuasej kema momaijtouaj uan tlamachtiaj, pampa kema momaijtouaj kiueyichiuaj Jehová, uan kema tlamachtiaj kinmachtiaj sekinok maseualmej ika Biblia. ¿Nochipa moneki motsontsakuasej kema momaijtosej uan tlamachtisej? Amo. Ma tikitakaj kanke kinamiki motsontsakuasej.

¿Kanke kinamiki motsontsakuasej? Ipan versículos 3 uan 5 Pablo kiijtok moneki kichiuasej kema itstosej ininchaj uan ipan tlanechikoli, yeka kiijtok: “Se tlakatl kipia tekiuejkayotl ika isiua pampa itstok keja itsonteko, [...] intla se siuatl momaijtoua ika toTeko ipan tlasentilistli o tlamachtia [...] uan axmotsontsaktok, uajka axkinextia intla kitlepanita iueue”. Jehová kintekimakatok tlakamej ma kinyakanakaj ininchampoyouaj. Uajka tlaj se siuatl kichiuas tlen iueue kinamiki kichiuas moneki motsontsakuas, pampa tlaj amo, kipinaualtis iueue. Yeka, kema se tosiuaikni kimachtia se akajya uan itstok iueue, moneki motsontsakuas maske iueue amo moatsonpoliuiltijtok, pampa Jehová kikajtok yaya ma kinyakana ichampoyouaj.a ¿Uan tlake kinamiki kichiuas tlaj momaijtos uan itstok ikone katli moatsonpoliuiltijtok? Nojkia kinamiki motsontsakuas maske ikone amo yaya tlayakana ichaj. Kiampa kinextis kintlepanita tlakamej katli Jehová kintekimakatok ipan tlanechikoli.

Pablo nojkia kiijtok moneki motsontsakuasej kema itstosej ipan tlanechikoli, ipan versículo 16 kiijtok: “Intla sekij [tlakamej] kinekij monajnankilisej ika ni tlajtoli, ma kimatikaj para ya ni tojuantij titlamachtiaj. Nojkia ya ni kichiuaj nochi toikniuaj ipan [itlanechikoljuaj] toTeko”. Ni texto kinextia ipan tlanechikoli tlayakanaj tlakamej katli moatsonpoliuiltijtokej (1 Timoteo 2:11-14; Hebreos 13:17). Jehová kintekimaka san tlakamej kej ueuejtlakamej uan tlapaleuianij ma kinmokuitlauikaj itekipanojkauaj (Hechos 20:28). Maske kiampa kiijtoua toTeotsij, kemantika se tosiuaikni uelis kichiuas se tekitl tlen kinamiki kichiuas se tlakatl katli moatsonpoliuiltijtok, kej tlanechikoli kema tlajtolmoyauatij. Tlaj se tosiuaikni kichiuas ni tlanechikoli, moneki motsontsakuas, pampa nopaya nojkia techmachtiaj kej ipan tlanechikoli, uan ni tekitl san kinamiki kichiuasej tlakamej. Nojkia moneki motsontsakuas kema temachtis ika Biblia tlaj nopaya itstos se toikni tlakatl katli moatsonpoliuiltijtok.b

Maske kiampa kiijtoua toTeotsij ma kichiua se tosiuaikni, amo nochipa moneki motsontsakuas, kej kema tlanankilia ipan tlanechikoli, kema tlajtolmoyaua maske yaui iuaya iueue o seyok toikni katli moatsonpoliuiltijtok, yon kema momachtis o momaijtos ininuaya ikoneuaj katli amo moatsonpoliuiltijtokej. Uan tlaj kemantika se tosiuaikni amo kimatis tlake kichiuas, uajka moneki kitemos ipan sekinok amatlajkuiloli tlake uelis kichiuas.c Uan tlaj nojua amo kimati tlake kichiuas uan moiljuia kinamiki motsontsakuas, uajka uelis kichiuas kej nesi ipan tlaixkopinkayotl.

¿Kenke moneki motsontsakuasej? Versículo 10 kiijtoua: “Moneki se siuatl ma motsontsakua para ma kinextis ininixtla iluikaeuanij [...] [se tlakatl] kipia tekiuejkayotl ika ya”. Ni texto kiijtoua moneki motsontsakuas pampa kiampa kinextis kintlepanita tlakamej katli Jehová kintekimakatok ipan tlanechikoli. Kiampa kinextia kiiknelia uan kitlepanita toTeotsij. Ni texto nojkia kiijtoua “para ma kinextis ininixtla iluikaeuanij”. ¿Kenijkatsa kinpaleuia iluikaeuanij kema se tosiuaikni motsontsakua?

Iluikaeuanij kiitaj nochi tlen kichiuaj Jehová itekipanojkauaj katli itstokej iluikak uan ipan Tlaltipaktli, uan kinekij kiitasej kenijkatsa nochi kinextiaj kitlepanitaj Jehová. Tlauel kinpaleuia kema kiitaj maseualmej kineltokaj toTeotsij maske tlajtlakolejkej. Inijuantij kimatij nojkia moneki kineltokasej uan kitlepanitasej, uan amo tlaijixnamikisej kej kichijkej sekij iluikaeuanij (Judas 6). Iluikaeuanij kinpaleuia kema kiitaj tosiuaikniuaj kintlepanitaj tlakamej katli moatsonpoliuiltijtokej, maske tosiuaikniuaj miak xiuitl kitekipanojtokej Jehová, tlauel ixtlamatij o tlalnamikij. Uan tlauel kinpaleuia kema kiitaj kenijkatsa se tosiuaikni katli tlanauatis iuaya Cristo kintlepanita tlakamej, pampa kema ni tosiuaikni tlanauatis, toTeotsij kimakas miak tlanauatijkayotl, amo kej kinmakatok iluikaeuanij. Yeka tlauel ipati kema tosiuaikniuaj nelia tlatlepanitaj, pampa kiampa kinnextiliaj iluikaeuanij kenijkatsa nelia tlaneltokaj uan amo moueyimatij.