¿Tijsenkauas kuesoli uan tijchiuas sekinok ma itstokaj ika tlaseuilistli?

JEHOVÁ kineki itekipanojkauaj ma kipatiitakaj tlaseuilistli uan ma kichiuakaj kampeka itstosej ika tlaseuilistli. Kema tijchiuaj nopa, nochi tlauel kuali tiitstokej. Uan nopa tlaseuilistli kichiua sekinok maseualmej nojkia ma kinekikaj mochiuasej Cristo itokilijkauaj.

Ipan Madagascar, se tetlajchiuijketl tlauel kipaktik kema kiitak Jehová itlajtoltemakauaj itstoyaj ika tlaseuilistli. Ya kiijtok: “Tlaj se tonali nijtlapejpeniskia se religión, ya ni nijtlapejpeniskia”. Teipa ayokmo kichijki tlen amo kuali, uan ipan miak metstli kichijki kampeka kuali itstos iuaya isiua kej Biblia kiijtoua, uan teipa nojkia pejki kitekipanoua Jehová, toTeotsij katli kipaktia tlaseuilistli.

Kej nopa tlakatl, sejse xiuitl miakej maseualmej asij ipan tlanechikoli pampa nopaya kipiaj tlaseuilistli. Maske tiitstokej ika tlaseuilistli, Biblia kiijtoua kema se akajya tekualankaita o mokualaniaj ipan tlanechikoli, uelis kichiuas ayokmo kuali ma mouikakaj yon ayokmo kuali ma itstokaj (Sant. 3:14-16). Maske kiampa pano, Biblia nojkia techtlajtolmaka uan techiljuia kenijkatsa amo timokualanisej ininuaya sekinok uan kiampa tijchiuasej nochi ma itstokaj ika tlaseuilistli. Ma tikitakaj kenijkatsa sekij kichijtokej ni.

“Amo kuali nimouikayaya iuaya se toikni katli iuaya nitekitiyaya. Se tonali, kema timokualankanojnotstoyaj, omej maseualmej kalajkej uan techitakej timokualanijtoyaj” (CHRIS).

“Nochipa nitlajtolmoyauayaya iuaya se tosiuaikni uan teipa ayokmo kinejki yas nouaya, uan ayokmo nechnojnotsayaya. Amo nijmatiyaya kenke kiampa kichiuayaya” (JANET).

“Tieyij tikamanaltitoyaj ipan teléfono. Se kiijtok timoitasej, yeka nimoiljuik san tiomej timokajkej. Na pejki tlauel nikijilnamiki katli techtlajpalok, uan ya ayamo kiseuijtoya iteléfono, yeka kikajki nochi tlen nikijtok” (MICHAEL).

“Ipan totlanechikol, omej precursoras tlauel mokualaniyayaj. Se nochipa kiajuayaya nopa seyok. Pampa tlauel mokualaniyayaj, kichiuayayaj sekinok ma moyolkokokaj” (GARY).

Maske uelis timoiljuiaj nochi ni kuesoli amo tlauel uejueyi, kena kichijki tlauel ma moyolkokokaj uan amo kuali ma kiyolmatikaj katli kiixnamijkej nopa kuesoli uan uelis kichijki ipan tlanechikoli ayokmo kuali ma itstokaj. Maske kiampa kinpanok, nochi kichijkej tlen Biblia tetlajtolmaka uan nama sampa itstokej ika tlaseuilistli. ¿Tlake textos kinpaleuik?

“Amo ximonajnankilikaj ipan ojtli” (Gén. 45:24). José kiniljuik iikniuaj ni tlajtoli kema tlakuepiliskiaj kampa inintata. ¡Tlen kiniljuik tlauel techpaleuia! Tlaj se akajya nimantsi kualani o tlauel yolkentsi, ueliskia kichiuas sekinok nojkia ma kualanikaj. Chris kiitak tlauel moueyimatiyaya uan amo kikauayaya ma kiiljuikaj kenijkatsa kichiuas se tlenijki. Yeka, kiiljuik toikni katli iuaya mokualanijtoya ma kitlapojpoljui uan kichijki kampeka ayokmo tlauel kualanis. Kema nopa toikni kiitak Chris kichiuayaya kampeka ayokmo tlauel kualanis, ya nojkia kiampa kichijki. Nama tlauel yolpakij uan sansejko kitekipanouaj Jehová.

“Kema se akajya kineki kichiuas se tlamantli pero axmotlajtlania kejatsa kichiuas o intla kuali para kichiuas, axkisa kuali iteki” (Prov. 15:22). Janet kimatki monekiyaya kichiuas tlen kiijtoua ni texto, yeka kamanaltik iuaya nopa toikni. Kema monojnotstoya iuaya, Janet kitlajtlanilik kenke kualantoya. Maske achtoui amo kinekiyayaj kiijtosej, teipa kiijtojkej tlake panotoya pampa kuali monojnotskej. Nopa tosiuaikni kiitak Janet amo tleno kichiuilijtoya, yeka kiiljuik ma kitlapojpoljui. Nama sampa sansejko kitekipanouaj Jehová.

“Intla timoketsa kampa itlaixpa para tijmakas toTeko se tlakajkaualistli uan ipan nopa tlalochtli tikilnamikis para moikni kualani mouaya, uajka [...] xijkaua motlakajkaualis ipan tlaixpamitl uan xia achtoui para ta uan moikni ma ximotlapojpoljuikaj uan ximoyoltlalikaj” (Mat. 5:23, 24). Uelis tikilnamikij ni tlajtoli tlen Jesús kiijtok kema tlamachtik ipan se tepetl. Michael amo kuali kiyolmatiyaya pampa kiijilnamiktoya nopa toikni. Ya mosentlalijtoya sampa kuali mouikas iuaya. Kinextik amo moueyimatiyaya uan kiiljuik ma kitlapojpoljui. ¿Tlake panok pampa kichijki nopa? Michael kiijtoua: “Noikni nechtlapojpoljuik ika nochi iyolo”. Nama kuali mouikaj.

“Uajka xijpiakaj inmoyolo ika tlen inmechchiuiliaj tlen axkuali uan xikintlapojpoljuikaj” (Col. 3:12-14). ¿Tikinilnamiki nopa omej precursoras katli tlauel mokualaniyayaj kema tlajtolmoyauayayaj? Se ueuejtlakatl kinpaleuik ma kiitakaj sekinok moyolkokouayayaj ika tlen kichiuayayaj. Uan kintlajtlanilik tlaj nelia amo ueliskiaj kipiasej ininyolo, uan kiampa kichiuaskiaj sekinok ipan tlanechikoli ma itstokaj ika tlaseuilistli. Tosiuaikniuaj kichijkej tlen nopa ueuejtlakatl kiniljuik. Nama kuali mouikaj uan sansejko tlajtolmoyauaj.

Tlen tetlajtolmaka Colosenses 3:12-14 nojkia uelis techpaleuis tlaj se akajya techchiuilia tlen amo kuali. Miakej maseualmej kiitstokej kema amo moueyimatij kinpaleuia ma tetlapojpoljuikaj uan ma kiilkauakaj tlen kinchiuilijkej. Uan tlaj tijmatij ouij, uajka kualtiaskia tijchiuasej tlen kiijtoua Mateo 18:15. Maske Jesús kiijtok moneki tijchiuasej ni kema se akajya tlauel techixpanotok, nojkia techpaleuis kema tijpiasej se kuesoli iuaya se toikni. Moneki amo timoueyimatisej uan tikamanaltisej ika miak tlaiknelili iuaya nopa toikni uan kiampa tijsenkauasej nopa kuesoli.

Biblia nojkia techiljuia sekinok tlamantli tlen tlauel techpaleuia. Tlaj tijnekij nelia ma techpaleui, uajka moneki tijnextisej nopa kuajkuali tlamantli tlen toTeotsij itonal techpaleuia ma tijnextikaj: tlaiknelili, pakilistli, tlaseuilistli, tijpiaj toyolo, titetlasojtlaj, tikinchiuiliaj sekinok tlen kuali, tlaneltokili, “timoiknonekij uan timonauatiaj” (Gál. 5:22, 23). Kej aceite kichiua kuali ma tekiti se tepostli, nopa kuajkuali tlamantli techpaleuia kuali ma timouikakaj.

Amo nochi sanse tielij, yeka amo tijnextiaj sanse kuajkuali tlamantli ipan tonemilis, amo sanse timoiljuiaj uan amo sanse tikijtouaj o tijchiuaj se tlenijki. Maske ni ueliskia kichiuas ma tikinpiakaj kuali touampoyouaj, nojkia ueliskia kichiuas ma timokualanikaj ininuaya sekinok. Se ueuejtlakatl katli uejkajtok kitekipanoua Jehová, kiijtoua: “Se akajya katli pinaua kamanaltis uelis kimati ouij itstos inechka se akajya katli tlauel kipaktia kamanaltis. Maske timoiljuiskiaj amo tleno panos, nopa ueliskia kichiuas ma tijpiakaj kuesoli”. ¿Kiijtosneki amo uelis mouampojchiuasej omej maseualmej katli amo elij sanse? Ma timoiljuikaj ipan omej apóstoles: Pedro uan Juan. Kema tijpouaj Biblia, tikitaj Pedro nima kiijtouayaya tlen moiljuiyaya uan kemantika nimantsi kichiuayaya se tlenijki. Uan kema timoyoliljuiaj ipan Juan, tikitaj ya eliyaya se tlakatl katli teikneliyaya uan kuali moiljuiyaya tlake kichiuas. Maske amo eliyayaj sanse, sentik kitekipanouayayaj toTeotsij (Hech. 8:14; Gál. 2:9). Tlen kichijkej techmachtia tojuantij nojkia uelis titlatekipanosej sansejko maske amo sanse tielij.

Uelis ipan tlanechikoli itstok se toikni katli kichiua o kiijtoua se tlenijki tlen amo techpaktia. Tojuantij tijmatij Cristo nojkia mijki pampa kinejki kimakixtis uan moneki tikiknelisej (Juan 13:34, 35; Rom. 5:6-8). Yeka amo kinamiki tijtlalkauisej o timoiljuisej amo kema uelis timouampojchiuasej iuaya. Kualtiaskia ma timotlajtlanikaj: “¿Nelia kiixpano tlen kiijtoua Biblia tlen kichiua nopa toikni? ¿Kineki nechyolkokos? ¿O uelis kiampa nijyolmati san pampa amo sanse tielij?”. Nojkia tlauel ipati timotlajtlanisej ni: “¿Tlake kuajkuali tlamantli tlen kinextia uelis nojkia nijnextis?”.

Ni tlajtlanili tlauel ipati. Tlaj se akajya tlauel kipaktia kamanaltis uan tojuantij amo tlauel tikamanaltij, ma timoiljuikaj kenijkatsa nopa toikni amo ouij kimati tlajtolmoyauas. Kualtiaskia tikiljuisej ma tlajtolmoyaua touaya uan kiampa tikitasej kenijkatsa uelis tijchiuasej kej ya. Tlaj nopa toikni kipaktia temakas tlen kipia uan tojuantij amo tlauel, ¿ueliskia tijchiuasej kej ya uan tikinpaleuisej katli ueuentsitsij, katli mokokouaj o katli kinpoloua se keski tlamantli? Ni techmachtia se tlamantli: maske amo sanse tielij, uelis titlatekipanosej iuaya nopa toikni tlaj nochipa tikitasej san kuajkuali tlamantli tlen kinextia o kichiua. Maske uelis amo elis se kuali touampo, kena techpaleuis kuali ma timouikakaj, kuali ma tijyolmatikaj uan ma tiitstokaj ika tlaseuilistli ipan tlanechikoli.

Evodia uan Síntique eliyayaj omej tosiuaikniuaj katli itstoyaj uejkajkia. Maske uelis nojkia amo eliyayaj sanse, apóstol Pablo kiniljuik “ma kipiakaj sanse inintlalnamikilis ipan Jesucristo” (Filip. 4:2). ¿Nojkia kiampa tijchiuasej tojuantij pampa tijnekij ipan tlanechikoli ma onka tlaseuilistli?

Kema tijyolmatij se tlenijki tlen amo kuali, eli kej xiuitl tlen moskaltia kampa tixochitoktokej. Tlaj amo tijnekij ma moskalti, moneki nimantsi tijuiuitlasej. Nojkia kiampa pano kema se akajya tekualankaita, pampa ueliskia kichiuas ipan tlanechikoli ayokmo kuali ma itstokaj. Tlaj tikikneliaj Jehová uan tikinikneliaj toikniuaj, uajka tijchiuasej kampeka nochi kuali tiitstosej ipan tlanechikoli.

Tlaj tijchiuaj kampeka tijsenkauasej kuesoli pampa tijnekij tiitstosej ika tlaseuilistli, nelia tlauel kuali tiitstosej. Ma timoiljuikaj ipan tlen kipanok se tosiuaikni: “Nijmatiyaya se tosiuaikni nechitayaya kej nisiuapil, uan nopa tlauel nechkualankamakayaya. Pampa nojua tlauel nikualaniyaya, pejki nijkualankanojnotsa. Nimoiljuik: ‘Ya amo nechtlepanita kej kinamiki, yeka na nojkia amo nijtlepanitas’”.

Teipa, nopa toikni kuali moiljuik ipan tlen kichiuayaya, kiijtok: “Nikitak tlauel amo kuali tlen nijchiuayaya uan yeka amo kuali nijyolmatki. Nijmatki monekiyaya nijpatlas notlalnamikilis. Nikiljuik Jehová ma nechpaleui. Teipa, nijkojki se tlamantli tlen ueliskia nijmakas, uan ipan se pilamatsi nikijkuilok ma nechtlapojpoljui pampa amo kuali tlen nijchijtoya. Timonajnauajkej uan tikilkajkej tlen panotoya. Ayokmo kema sampa timokualanijtokej”.

Maske maseualmej tlauel kinekij itstosej ika tlaseuilistli, san mokualanijtokej ininuaya sekinok pampa moueyimatij o pampa moiljuiaj nojkia kinkualankaitaj. Maske miakej kiampa kichiuaj, ipan Jehová itlanechikol moneki itstosej ika tlaseuilistli uan mosentikapaleuisej. Jehová kichijki Pablo ma kiijkuilo ni: “Niinmechtlajtlania xijpiakaj se inmonemilis tlen nelia kuali keja kinamiki kipiasej tlakamej tlen toTeko kinnotski para elisej iaxkauaj. Ximoiknonekikaj uan ximokamauikaj ika kuali keja tlakamej tlen kuali monauatiaj. Xijpiakaj inmoyolo se ika seyok, uan sejse inmojuantij xikijiyouikaj kema seyok inmoikni kichiua o kiijtoua se tlamantli [...]. Kej nopa inkinextilisej inkiikneliaj. Ika itlapaleuil itonal toTeko, xijchiuakaj kampeka inkipiasej sanse inmotlalnamikilis. Uan kej nopa inkipiasej tlaseuilistli” (Efes. 4:1-3). ¡Nelia tlauel ipati tiitstosej ika tlaseuilistli! Yeka, ma timosentlalikaj nojua kuali timouikasej uan tijsenkauasej nochi kuesoli tlen tijpiasej.