UHezekheli

40 Mhlaka 10 wenyanga, ekuqaliseni komnyaka, ngomnyaka wesi-25 sisekuthunjweni+ futhi kungumnyaka wesi-14 idolobho lidiliziwe,+ isandla sikaJehova saba phezu kwami, wangithatha wangisa edolobheni.+ 2 UNkulunkulu wangithwala wangisa elizweni lako-Israyeli ngokungitshengisa imibono, wafika wangibeka entabeni ende kakhulu.+ Ngaseningizimu kwentaba le kwakulezakhiwo ezazingathi lidolobho.

3 Wathi esengibeke lapho ngabona indoda eyayikhazimula angathi yikhopha.+ Yayimi egedini njalo yayiphethe intambo yelineni lomhlanga wokulinganisa*+ esandleni sayo. 4 Indoda le yathi kimi: “Ndodana yomuntu, khangelisisa, ulalelisise njalo unanzelele* konke engizakutshengisa khona ngoba yikho ulethwe lapha. Konke ozakubona lapha ukutshele abantu bako-Israyeli.”+

5 Ngabona umduli owawugombolozele ithempeli lonke. Esandleni sendoda engayibonayo kwakulomhlanga wokulinganisa owawuzingalo eziyisithupha ubude (engalweni eyodwa kungezelelwe ububanzi beminwe emine nxa ihlangene).* Yaqalisa ukulinganisa umduli njalo wawungumhlanga owodwa ubuqatha lomhlanga owodwa ukuya phezulu.

6 Yasisiya egedini elikhangele empumalanga+ yafika yakhwela amasitephisi. Yalinganisa isitubhu segedi njalo sasingumhlanga owodwa ububanzi futhi esinye isitubhu laso sasingumhlanga owodwa ububanzi. 7 Izindlu zabalindi zazingumhlanga owodwa ubude lomhlanga owodwa ububanzi futhi ziqhelelene ngengalo ezinhlanu.+ Isitubhu esiseduze kwevurandi elisegedini elikhangele ethempelini sasingumhlanga owodwa.

8 Yalinganisa ivurandi elisegedini elikhangele ethempelini, lalingumhlanga owodwa. 9 Yasilinganisa ivurandi elisegedini, lalizingalo ezingu-8. Yalinganisa lezinsika ezazisemaceleni kwalo, zona zazizingalo ezimbili. Ivurandi elisegedini lalikhangele ethempelini.

10 Kwakulezindlu zabalindi ezintathu ngapha langapha kwegedi lempumalanga. Zontathu izindlu lezi zazilingana futhi lensika ezisemaceleni wonke zazilingana.

11 Yasilinganisa ububanzi bentuba yegedi njalo yayizingalo ezilitshumi. Igedi lona lalizingalo ezingu-13 ubude.

12 Indawo eyayiphambi kwezindlu zabalindi eyayivalelwe ngomduli omncane yayiyingalo eyodwa amacele womabili. Izindlu zabalindi ezazisemaceleni womabili zazizingalo eziyisithupha.

13 Yasilinganisa igedi kusukela ephahleni lwendlu yabalindi* kusiya ephahleni lwenye indlu yabalindi, lalizingalo ezingu-25 ububanzi. Iminyango yezindlu zabalindi yayikhangelene.+ 14 Yalinganisa lensika ezazisemaceleni futhi zazizingalo ezingu-60 ukuya phezulu. Yaphinda yalinganisa lensika ezazisemagedini wonke ayesegumeni. 15 Kusukela entubeni yegedi kusiya phambi kwevurandi elikhangele ethempelini kwakuzingalo ezingu-50.

16 Izindlu zabalindi lensika zazo ezaziphakathi kwegedi eceleni ngalinye zazilamawindi ayebanzi ngaphakathi, emancane ngaphandle.+ Langaphakathi kwamavurandi wonke kwakulamawindi emaceleni wonke njalo ensikeni ezazisemaceleni kwakubazelwe imiceciso yezihlahla zelala.+

17 Yangithatha yangingenisa egumeni elingaphandle ngasengibona izindlu zokudlela+ futhi indawo yonke eyayigombolozele iguma elingaphandle yayigandelwe ngamatshe. Endaweni le egandelwe ngamatshe kwakulezindlu zokudlela ezingu-30. 18 Ububanzi bendawo eyayigandelwe ngamatshe babulingana lobude bamagedi. Indawo le eyayigandelwe ngamatshe yayiphansi kuleguma elingaphakathi.

19 Yasilinganisa kusukela phambi kwegedi eliphansi kusiyafika ekuqaliseni kweguma elingaphakathi, kwakuzingalo ezingu-100 empumalanga lezingalo ezingu-100 enyakatho.

20 Iguma elingaphandle lalilegedi elalikhangele enyakatho njalo indoda le yalinganisa ubude balo lobubanzi balo. 21 Icele elilodwa lalilezindlu zabalindi ezintathu. Insika zalo levurandi kwakulingana lokwegedi lokuqala. Igedi leli lalizingalo ezingu-50 ubude lezingu-25 ububanzi. 22 Amawindi alo, levurandi lalo, lemiceciso yezihlahla zelala+ kwakulingana lokwegedi elisempumalanga. Kwakulamasitephisi ayisikhombisa abantu ababeqansa ngawo nxa besiya kulo njalo ivurandi laliphambi kwawo.

23 Egumeni elingaphakathi kwakulegedi eliqondane legedi elisenyakatho lelinye eliqondane legedi elisempumalanga. Yalinganisa isuka kwelinye igedi isiya kwelinye njalo umango wakhona wawuzingalo ezingu-100.

24 Yasingithatha yangisa eceleni eliseningizimu njalo eceleni lelo ngabona igedi.+ Yalinganisa insika zalo levurandi njalo kwakulingana lokwamanye amagedi. 25 Emaceleni egedi leli kwakulamawindi. Amawindi la ayefanana lawamanye amagedi futhi ayekhona lasevurandini. Igedi leli lalizingalo ezingu-50 ubude lezingu-25 ububanzi. 26 Kwakungamasitephisi ayisikhombisa ukuyafika kulo+ futhi ivurandi laliphambi kwawo. Insika ezazisemaceleni alo zazibazelwe imiceciso yezihlahla zelala.

27 Iguma elingaphakathi lalilegedi elikhangele eningizimu. Yalinganisa isuka egedini lelo iqonda eningizimu yaze yayafika kwelinye igedi njalo umango wakhona wawuzingalo ezingu-100. 28 Ngemva kwalokho yangithatha yangisa egumeni elingaphakathi, sangena ngegedi eliseningizimu. Yalinganisa igedi eliseningizimu njalo lalilingana lamanye amagedi. 29 Izindlu zalo zabalindi, lensika zalo, levurandi kwakulingana lokwamanye amagedi. Lalilamawindi emaceleni alo lasevurandini. Igedi leli lalizingalo ezingu-50 ubude lezingu-25 ububanzi.+ 30 Wonke amagedi ayelamavurandi njalo amavurandi la ayezingalo ezingu-25 ubude lezingu-5 ububanzi. 31 Ivurandi legedi eliseningizimu lalikhangele egumeni elingaphandle. Kwakubazelwe imiceciso yezihlahla zelala emaceleni ensika zalo+ futhi kwakulamasitephisi angu-8 ayeqansa esiya kulo.+

32 Yangingenisa egumeni elingaphakathi ngegedi elisempumalanga yasilinganisa igedi. Igedi lelo lalilingana lamanye amagedi. 33 Izindlu zalo zabalindi, lensika zalo, levurandi kwakulingana lokwamanye amagedi. Lalilamawindi emaceleni alo kanye lasevurandini. Igedi leli lalizingalo ezingu-50 ubude lezingu-25 ububanzi. 34 Ivurandi elisegedini leli lalikhangele egumeni elingaphandle. Ensikeni zalo zombili kwakubazelwe imiceciso yezihlahla zelala njalo kwakulamasitephisi angu-8 ayeqansa esiya kulo.

35 Ngemva kwalokho yangithatha yangiletha egedini elisenyakatho+ yafika yalilinganisa. Lalilingana lamanye amagedi. 36 Izindlu zalo zabalindi, lensika zalo, levurandi kwakulingana lokwamanye amagedi. Lalilamawindi emaceleni alo. Igedi leli lalizingalo ezingu-50 ubude lezingu-25 ububanzi. 37 Insika zalo zazikhangele egumeni elingaphandle futhi zombili zazibazelwe imiceciso yezihlahla zelala. Kwakulamasitephisi angu-8 ayeqansa esiya kulo.

38 Eduze kwensika eziseceleni kwegedi kwakulendlu yokudlela njalo lomnyango wayo wawukhonapho. Lapho yikho okwakugeziselwa khona iminikelo yokutshiswa.+

39 Kwakulamatafula amabili ngapha langapha kwevurandi egedini. Iminikelo yokutshiswa+ leminikelo yesono+ leminikelo yecala+ yayihlatshelwa phezu kwawo. 40 Eduze kwegedi elisenyakatho kwakulamatafula amabili futhi ayephandle kwentuba. Kwakulamanye amatafula amabili kwelinye icele levurandi elisegedini. 41 Kwakulamatafula amane eceleni ngalinye legedi, esewonke ayengu-8. Imihlatshelo yayihlatshelwa phezu kwamatafula la. 42 Amatafula amane okwakuhlatshelwa phezu kwawo iminikelo yokutshiswa ayengawamatshe abaziweyo. Ayeyingalo lengxenye ubude, lengalo lengxenye ububanzi, lengalo eyodwa ukuya phezulu. Izinto ezazisetshenziswa ukuhlaba iminikelo yokutshiswa lemihlatshelo zazigcinwa phezu kwawo. 43 Kwakulamashelufu ayebunjelwe emidulini yonke ngaphakathi futhi ububanzi bawo babulingana lobubanzi beminwe emine nxa ihlangene. Inyama yeminikelo yezipho yayibekwa phezu kwamatafula.

44 Eduze kwegedi elingaphakathi kwakulezindlu zokudlela ezabahlabeleli.+ Zazisegumeni elingaphakathi eduze kwegedi elisenyakatho futhi zazikhangele eningizimu. Enye indlu yokudlela yayiseduze kwegedi elisempumalanga njalo yayikhangele enyakatho.

45 Indoda engayibona embonweni yangitshela yathi: “Indlu yokudlela ekhangele eningizimu ngeyabaphristi abakhangela imisebenzi eyenziwa ethempelini.+ 46 Indlu yokudlela ekhangele enyakatho ngeyabaphristi abakhangela konke okwenziwa e-alithareni.+ Abaphristi laba ngamadodana kaZadokhi+ njalo bangamaLevi aphiwe umsebenzi wokusondela kuJehova emenzela inkonzo engcwele.”+

47 Ngemva kwalokho yalinganisa iguma elingaphakathi. Lalizingalo ezingu-100 ubude lezingu-100 ububanzi, amacele womane elingana. I-alithare lona laliphambi kwethempeli.

48 Yangithatha yangisa evurandini elaliphambi kwethempeli,+ yafika yalinganisa insika eseceleni kwevurandi. Elinye icele layo lalizingalo ezinhlanu, lelinye lizingalo ezinhlanu. Igedi lalizingalo ezintathu ububanzi kwelinye icele, liphinde libe zingalo ezintathu kwelinye icele.

49 Ivurandi lalizingalo ezingu-20 ubude, lezingalo ezingu-11* ububanzi. Abantu babefika kulo ngokuqansa amasitephisi. Kwakulezinsika emaceleni alo, kulensika eyodwa eceleni ngalinye.+