AmaNani

28 UJehova wasesithi kuMosi: 2 “Khuluma labako-Israyeli uthi kubo, ‘Kumele libe leqiniso lokuthi liyawunikela umnikelo wami, isinkwa sami. Iminikelo yami etshiswa ngomlilo ukuthi ibe luqhatshi olumnandi kimi kumele yenziwe ngezikhathi zayo ezibekiweyo.’+

3 “Batshele uthi, ‘Nanku umnikelo otshiswa ngomlilo elizawunikela kuJehova: Ngelanga ngalinye kumele linikele ngemvana ezinduna ezimbili ezingelasici, zibe ngumnikelo wokutshiswa owenziwa zikhathi zonke.+ 4 Enye imvana enduna lizanikela ngayo ekuseni kuthi enye enduna linikele ngayo sekuhwalala,*+ 5 ndawonye lomnikelo wamabele wefulawa ecolekileyo oyingxenye ye-efa* eyodwa etshumini ehlanganiswe lamafutha ayingxenye yehini* eyodwa kwezine akhanywe kuma-oliva.+ 6 Lo ngumnikelo wokutshiswa owenziwa zikhathi zonke,+ owaqaliswa entabeni iSinayi ukuze ube luqhatshi olumnandi, umnikelo otshiselwa uJehova ngomlilo, 7 kanye lomnikelo wawo wokunathwayo oyingxenye yehini eyodwa kwezine, ozanikelwa lemvana enduna ngayinye.+ Thela endaweni engcwele umnikelo wokunathwayo okudakayo, ube ngumnikelo wokunathwayo kuJehova. 8 Kumele unikele enye imvana enduna sekuhwalala kanye lomnikelo wamabele onjengalowo onikelwe ekuseni kanye lomnikelo wokunathwayo ofananayo. Uzakunikela kube ngumnikelo otshiswa ngomlilo, kube luqhatshi olumnandi kuJehova.+

9 “‘Kodwa ngelanga leSabatha+ kumele kunikelwe ngemvana ezimbili ezinduna ezingelasici kanye lomnikelo wamabele wefulawa ecolekileyo ehlanganiswe lamafutha ozingxenye ze-efa ezimbili etshumini, ndawonye lomnikelo wakhona wokunathwayo. 10 Lo ngumnikelo wokutshiswa ozakwenziwa ngeSabatha ndawonye lomnikelo owenziwa zikhathi zonke lomnikelo wawo wokunathwayo.+

11 “‘Ekuqaliseni kwenyanga ngayinye* kumele linikele ngamajongosi amabili lenqama eyodwa kanye lemvana ezinduna eziyisikhombisa ezilomnyaka owodwa ezingelasici,+ kube ngumnikelo otshiselwa uJehova, 12 kanye lomnikelo wamabele wefulawa ecolekileyo ehlanganiswe lamafutha ozingxenye ezintathu etshumini,+ ozanikelwa lejongosi ngalinye kanye lomnikelo wamabele wefulawa ecolekileyo ozingxenye ezimbili etshumini ozanikelwa lenqama,+ 13 kanye lomnikelo wamabele wefulawa ecolekileyo ehlanganiswe lamafutha oyingxenye eyodwa etshumini, ozanikelwa lemvana ngayinye enduna kube ngumnikelo wokutshiswa, ube luqhatshi olumnandi,+ umnikelo otshiselwa uJehova ngomlilo. 14 Umnikelo wokunathwayo ozanikelwa lejongosi ngalinye kumele ube liwayini eliyingxenye yehini+ njalo ozanikelwa lenqama kumele ube yingxenye yehini eyodwa kwezintathu,+ ikanti owemvana enduna kumele ube yingxenye yehini eyodwa kwezine.+ Lo ngumnikelo wokutshiswa ozakwenziwa nyanga zonke kuze kuphele umnyaka. 15 Kanti njalo kumele linikele ngezinyane lembuzi elilodwa libe ngumnikelo wesono kuJehova phezu komnikelo wokutshiswa owenziwa zikhathi zonke kanye lomnikelo wawo wokunathwayo.

16 “‘Mhlaka 14 ngenyanga yokuqala kuzakuba liPhasika likaJehova.+ 17 Mhlaka 15 ngayonaleyo nyanga kuzakuba lomkhosi njalo kuzadliwa isinkwa esingelamvubelo okwamalanga ayisikhombisa.+ 18 Ngelanga lokuqala kuzakuba lomhlangano ongcwele. Akumelanga lenze loba yiwuphi umsebenzi onzima. 19 Kumele linikele ngamajongosi amabili lenqama eyodwa kanye lemvana ezinduna eziyisikhombisa ezilomnyaka owodwa, kube ngumnikelo wokutshiswa owenzelwa uJehova ngomlilo. Kufanele linikele ngezifuyo ezingelasici.+ 20 Kumele lizinikele ndawonye leminikelo yamabele yefulawa ecolekileyo ehlanganiswe lamafutha.+ Owejongosi kumele ube zingxenye ezintathu etshumini, owenqama ube zingxenye ezimbili etshumini. 21 Lizaletha lengxenye eyodwa etshumini ezanikelwa lemvana enduna yinye ngayinye kuzo zonke eziyisikhombisa, 22 kanye lembuzi eyodwa eyomnikelo wesono ukuze lihlawulelwe. 23 Kumele linikele ngezinto lezi lengezelele phezu komnikelo owenziwa ekuseni, oyingxenye yomnikelo owenziwa zikhathi zonke. 24 Lizanikela izinto lezi ngendlela efananayo nsuku zonke okwamalanga ayisikhombisa zibe njengokudla,* umnikelo otshiswa ngomlilo, ube luqhatshi olumnandi kuJehova. Kumele zinikelwe ndawonye lomnikelo wokutshiswa owenziwa zikhathi zonke kanye lomnikelo wawo wokunathwayo. 25 Ngelanga lesikhombisa kumele lenze umhlangano ongcwele.+ Akumelanga lenze loba yiwuphi umsebenzi onzima.+

26 “‘Ngelanga lezithelo zenu zokuqala,+ nxa seliletha umnikelo wenu wamabele amatsha kuJehova,+ kumele lenze umhlangano ongcwele ngesikhathi sedili lenu lamaviki.+ Akumelanga lenze loba yiwuphi umsebenzi onzima.+ 27 Lizanikela ngamajongosi amabili, lenqama eyodwa kanye lemvana ezinduna eziyisikhombisa ezilomnyaka owodwa, kube ngumnikelo wokutshiswa oloqhatshi olumnandi kuJehova,+ 28 njalo lizaletha lomnikelo wamabele wefulawa ecolekileyo ehlanganiswe lamafutha, owejongosi ngalinye ube zingxenye ezintathu etshumini owenqama ube zingxenye ezimbili etshumini, 29 lengxenye eyodwa etshumini ezanikelwa lemvana enduna yinye ngayinye kuzo zonke eziyisikhombisa, 30 kanye lezinyane lembuzi elilodwa ukuze lihlawulelwe izono zenu.+ 31 Lizanikela izinto lezi lengezelele phezu komnikelo wokutshiswa owenziwa zikhathi zonke kanye lomnikelo wawo wamabele. Kumele kube yizifuyo ezingelasici+ kanye leminikelo yazo yokunathwayo.