UJesu Uyabulawa

KHANGELA into ezwisa ubuhlungu kakhulu enzakalayo emfanekisweni! UJesu uyabulawa. Bamfake esigodweni. Bambethelele izipikili ezandleni lasenyaweni. Kungani benze lokhu kuJesu?

Kungenxa yokuthi abanye abantu bayamzonda uJesu. Uyakwazi ukuthi ngobani? Omunye wabo yingilosi embi uSathane uDeveli. Nguye owenza ukuthi u-Adamu lo-Eva bangalaleli uJehova. Nguye futhi owenza izitha zikaJesu zenza icala leli elikhulu.

Zingakambetheleli esigodweni, izitha zikaJesu zimenzela izinto ezimbi kakhulu. Usakhumbula ukuthi bamthatha njani esivandeni saseGetsemane? Zazingobani izitha lezo? Zazingabakhokheli benkolo. Ake sibone ukuthi kuyini okwenzakalayo khathesi.

UJesu uthathwa ngabakhokheli benkolo, abaphostoli bakhe besebebaleka. Batshiya uJesu eyedwa lezitha zakhe, ngoba bayesaba. Kodwa umphostoli uPhethro loJohane abayi khatshana. Bayalandela ukuze labo babone ukuthi kwenzakalani kuJesu.

Abaphristi bahambisa uJesu ku-Anasi owayengumphristi omkhulu. Abantu laba kabahlali isikhathi eside lapha. Basuka bahambise uJesu endlini kaKhayifasi osekunguye umphristi omkhulu. Abakhokheli benkolo abanengi sebebuthene endlini yakhe.

Lapha endlini kaKhayifasi bathetha icala lakhona. Abantu balethwe lapha ukuthi bazokhuluma amanga ngoJesu. Abakhokheli benkolo bonke bathi: ‘UJesu kumele abulawe.’ Bayamkhafulela besebemtshaya ngezibhakela.

Konke lokhu kwenzakala uPhethro ehlezi phandle egumeni. Kusebusuku njalo kuyaqanda, yikho abantu babasa umlilo. Bathi besotha umlilo, inkazana eyincekukazi ikhangela uPhethro ibisisithi: ‘Indoda le layo kade iloJesu.’

UPhethro uyaphendula: ‘Hatshi kade ngingelaye!’

Kathathu konke, abantu batshela uPhethro ukuthi kade eloJesu. Kodwa uPhethro uthi kakusilo qiniso. UPhethro esephika okwesithathu, uJesu uyatshibilika amkhangele. UPhethro uzwa ubuhlungu ngokukhuluma amanga la, abesephumela phandle akhale kabuhlungu.

NgoLwesihlanu ekuseni, ilanga lingakaphumi, abaphristi bahambisa uJesu endaweni enkulu, ewolu yeSanihedrini. Lapha bakhuluma ngokuthi bazamenzani. Bamhambisa kuPhontiyu Philathu ongumbusi wesigaba saseJudiya.

Abaphristi batshela uPhilathu ukuthi: ‘Lo ngumuntu omubi. Kumele abulawe.’ Ngemva kokubuza uJesu imibuzo, uPhilathu uthi: ‘Mina kangikuboni okuwonwe ngumuntu lo.’ UPhilathu uhambisa uJesu kuHerodi Antiphasi. UHerodi ungumbusi waseGalile kodwa uhlala eJerusalema. UHerodi laye kaliboni icala likaJesu, yikho-ke uyambuyisela kuPhilathu.

UPhilathu ufuna uJesu akhululwe. Kodwa izitha zikaJesu zifuna esinye isibotshwa sikhululwe kulokuthi kukhululwe uJesu. Isibotshwa lesi lisela okuthiwa nguBharaba. Sekusemini khathesi lapho uPhilathu aletha khona uJesu phandle. Uthi ebantwini: ‘Khangelani! Inkosi yenu!’ Kodwa abaphristi bamemeza ngamandla besithi: ‘Mthathe! Mbulale! Mbulale!’ Yikho-ke uPhilathu ukhulula uBharaba, abantu besebethatha uJesu ukuze bayembulala.

NgoLwesihlanu emini, uJesu uyabethelwa esigodweni. Emfanekisweni ubona uJesu eyedwa kodwa emaceleni kwakhe kulezigebenga ezibethelwe esigodweni. UJesu engakafi, omunye wezigebenga uthi kuye: ‘Ungikhumbule nxa usuthole umbuso wakho.’ UJesu uyaphendula: ‘Ngiyakuthembisa ukuthi uzakuba lami ePharadayisi.’

Lesi yisithembiso esihle kakhulu. Uyalazi yini ipharadayisi uJesu akhuluma ngalo? Lalingaphi ipharadayisi elenziwa nguNkulunkulu ekuqaliseni? Lalisemhlabeni. Nxa uJesu esebusa njengenkosi esezulwini, uzavusa indoda le, iphile ePharadayisi elitsha emhlabeni. Akusithabisi yini lokhu?