UJehova Walithethelela Ekhululekile

“Lowo owehluleka ukuthethelela abanye udiliza ibhiliji okumele laye achaphe kulo.” Amazwi la akhulunywa ngu-Edward Herbert waseBritain owayebona ngezembali ngekhulu lesi-17, asinika esinye isizathu sokuthethelela abanye: Ngesikhathi esizayo lathi singadinga ukuthethelelwa ngabanye. (UMathewu 7:12) Kodwa kulesinye isizathu esiqakatheke kakhulu sokuthi sithethelele abanye. Ake sibone amazwi kamphostoli uPhawuli akuKholose 3:13.—Bala.

Ngezinye izikhathi siyabacaphula abanye kumbe sibakhube ngoba sonke silesono, njalo bona bangasicaphula futhi basikhube. (KwabaseRoma 3:23) Singenza njani ukuthi sihlalisane ngokuthula labanye abantu abalesono njengathi? Ephefumulelwe nguNkulunkulu, uPhawuli usixwayisa ukuthi sibe lesineke njalo sithethelele. Isixwayiso lesi silokhu siqakathekile lamuhla ngendlela esasiqakatheke ngayo ngesikhathi sibhalwa eminyakeni ephose ifike izinkulungwane ezimbili eyadlulayo. Ake sikhangelisise amazwi kaPhawuli.

Qhubekani ‘libekezelelana.’ Esinye isichazamazwi sithi amaKhristu atshengisa uphawu lolu lobuntu “ngokubekezelela ukuphanjaniswa kumbe imikhuba yabanye engamihle ecaphulayo.” Ibala elithi ‘libekezelelane’ lisitshela ukuthi sibonisane isineke. Ngakho, nxa singakhumbula ukuthi lathi silezimpawu zobuntu ezicaphula abanye, asisoze sivumele ukuthi esingakuthandiyo kwabanye abantu kuphambanise ukuzwanana kwethu labo. Kodwa singenzani nxa abanye bangasonela?

Qhubekani ‘lithethelelelana’ likhululekile. Ngokutsho kwesinye isikhwicamfundo, ibala lesiGiriki elihunyutshwe ngokuthi ‘thethelela’ ukhululekile “kalijayelanga ukusetshenziswa ukuhumutsha amabala anjengokuthethelela kumbe ukukhululwa . . . kodwa litsho okunengi okutsho isihawu sothethelelayo.” Omunye umthombo uthi ibala leli lingatsho “into esuthisayo, encedayo loba umusa.” Singatshengisa ukuthi silesihawu ngokuvuma ukuthethelela lanxa ‘singaba lensolo bani komunye lomunye.’ Pho-ke kungani kumele sivume ukuthethelela abanye? Esinye isizathu yikuthi kungakabi nsuku ngaki lathi singadinga ukuthi esiyabe simonele asithethelele.

“Thethelelani njengoba iNkosi [uJehova, NW] yalithethelela.” Lesi yiso isizathu esiqakatheke kulazo zonke sokuthi kungani kumele sithethelele abanye: UJehova uNkulunkulu usithethelela ekhululekile. (UMikha 7:18) Ake ucabange ngomusa omkhulu uJehova awenzela izoni eziphendukayo. UJehova utshiyene lathi ngoba yena kenzi sono. Kodwa uyavuma njalo uyazithethelela ngokupheleleyo izoni eziphendukayo lanxa ekwazi ukuthi yena kasoze wafa wadinga ukuthi zimthethelele. Iqiniso ngelokuthi uJehova nguye othethelela izoni eziphendukayo ekhululekile ukwedlula loba ngubani!

Uzwelo lukaJehova lusenza sifune ukuba seduze laye njalo simlingisele. (Kwabase-Efesu 4:32–5:1) Kungaba kuhle ukuthi sizibuze ukuthi, ‘Njengoba uJehova engithethelela ngesihawu kangaka, ngingala njani ukuthethelela omunye umuntu olesono njengami oyabe engiphambanisele kodwa ephenduke ngeqiniso?’​—ULukha 17:3, 4.