Manyana Labanye Ngoba Ukuphela Sekusondele

1, 2. UNkulunkulu ufuna bonke abamkhonzayo benzeni kungelani lokuthi ngabasakhulayo kumbe ngabantu abadala?

UNGOSAKHULAYO yini? Nxa kunjalo woba leqiniso lokuthi uyaqakathekiswa kakhulu njengoba lawe usenhlanganisweni kaJehova. Emazweni amanengi, inengi labantu ababhaphathizwayo ngabasakhulayo. Kuyakhuthaza sibili ukubona abantu abasakhulayo abanengi kangaka labo bekhetha ukukhonza uJehova.

² Lina elisakhulayo liyakukholisa yini ukutshona labanye benu? Kumele ukuthi liyakukholisa sibili ngoba kumnandi kakhulu ukutshona labosowenu lizikholisela nje. Kodwa kungelani lokuthi uvela ngaphi, ungosakhulayo kumbe ungumuntu omdala, uNkulunkulu ufuna bonke abamkhonzayo bamanyane. Umphostoli uPhawuli wabhala ukuthi uNkulunkulu ufuna “abantu bonke basindiswe njalo balazi iqiniso.” (1 Tim. 2:3, 4) KuSambulo 7:9 kukhulunywa ngezinceku zikaNkulunkulu ezivela “ezizweni zonke, lezizwaneni, lasebantwini kanye lasezindimini zonke.”

3, 4. (a) Abanengi abasakhulayo baziphatha njani lamuhla? (b) Kuyini okwenziwa ngabasakhulayo abayizinceku zikaJehova okuhambelana lalokho okukhulunywa ku-Efesu 4:25?

³ Abasakhulayo abayizinceku zikaJehova batshiyene kakhulu labasakhulayo abagcwele emhlabeni lo. Abasakhulayo abanengi abangamkhonziyo uJehova bacabanga ngokufunwa yibo kuphela, abalandaba labanye abantu. Abanye abacubunguli bathi abasakhulayo abakhona kulezinsuku baziphilela eyabo impilo, abalandaba lokuthi omunye umuntu uthini. Indlela abakhuluma ngayo labagqoka ngayo itshengisa ukuthi abasabahloniphi ngitsho abantu abadala ngoba bababona bengabantu abalokhu besidla ngoludala.

⁴ Umoya lo ugcwele yonke indawo. Yikho-ke abasakhulayo abayizinceku zikaJehova bayakunanzelela ukuthi kudinga ukuzimisela okukhulu ukuwubalekela, benze lokho okufunwa nguNkulunkulu. Lasekhulwini lokuqala uPhawuli wabona kukuhle ukuthi akhuthaze ayekhonza labo ukuthi balwisane ‘lomoya osebenzayo lakhathesi kulabo abangalaleliyo,’ umoya ‘ababeke baphila’ ngawo. (Bala u-Efesu 2:1-3.) Kumele banconywe sibili abasakhulayo abalwisana lomoya lo njalo abaqhubeka besebenza bemanyene labo bonke abazalwane. Ukumanyana kwabo labanye kuhambelana lalokho okwakhulunywa nguPhawuli lapho esithi “sonke siyizitho zomzimba munye.” (Efe. 4:25) Ukusebenza simanyene kuzabe kuqakatheke kakhulukazi ekupheleni komhlaba lo omubi osekuseduze kakhulu. Asihloleni izibonelo eziseBhayibhilini ezizasinceda ukuthi sizwisise ukuthi kumele sihlale simanyene, singehlukani.

5, 6. Indaba kaLothi lamadodakazi akhe isifundisani?

⁵ Ekadeni uJehova kwakumthokozisa kakhulu ukuvikela abantu bakhe nxa babemanyana ukuze bancedisane ngezikhathi ezinzima. Ngakho-ke kunengi okungafundwa ngabantu bakaJehova lamuhla ezibonelweni lezi eziseBhayibhilini kungelani lokuthi ngabantu abadala kumbe ngabasakhulayo. Asikhangeleni isibonelo sikaLothi.

⁶ ULothi lemuli yakhe basebezulelwa ngamanqe ngoba idolobho laseSodoma ababehlala kulo laselizabhujiswa. Izingilosi zikaNkulunkulu zatshela uLothi ukuthi abaleke ayecatsha ezintabeni, zathi: “Balekani liqinise!” (Gen. 19:12-22) ULothi walalela njalo amadodakazi akhe amabili avuma ukuhamba laye. Kodwa okudanisayo yikuthi abanye emulini yakhe kabazange balalele. Ngokwesibonelo amajaha ayethembisane lamadodakazi kaLothi acabanga ukuthi umuntu lo omdala “uyahlayaza.” Yikho abhujiswa ngenxa yokuthi kawazange alalele. (Gen. 19:14) Abasala bephila nguLothi kanye lamadodakazi akhe kuphela ngoba kabazange behlukane.

 7. UJehova wabanceda njani abantu bakhe ababemanyene lapho besuka eGibhithe?

⁷ Asikhangeleni esinye isibonelo. Lapho abako-Israyeli besuka eGibhithe kabazange bahambe buqamuqamu. Kanti njalo lapho uMosi ‘eselulela ingalo yakhe phezu kolwandle’ lalapho uJehova esenza ukuthi amanzi olwandle ahlukane phakathi, uMosi kazange achaphe yedwa kumbe lama-Israyeli amalutshwana kuphela. Kwachapha isizwe sonke njalo uJehova wasivikela. (Eks. 14:21, 22, 29, 30) Babemanyene njalo babehamba ‘labanye abantu nje abanengi,’ okutsho abantu ababengayisiwo ma-Israyeli abasebekhethe ukukhonza uJehova. (Eks. 12:38) Ubona angani kwakungahamba njani nxa kwakungaba labanye nje abalutshwana, mhlawumbe iqembu labasakhulayo, ababengakhetha ukuzihambela bodwa bethatha indlela abayifunayo? Lokhu kwakuzabe kuyibuthutha sibili ngoba umuntu owayengazihambela ngendlela ayifunayo wayengasoze avikelwe nguJehova.​—1 Khor. 10:1.

 8. Ngesikhathi kubusa iNkosi uJehoshafathi abantu bakaNkulunkulu batshengisa njani ukuthi babemanyene?

⁸ Ngesikhathi kubusa iNkosi uJehoshafathi abantu bakaNkulunkulu bahlaselwa ‘yimpi enkulu,’ isitha esasihlome siphelele sivela ezindaweni ezaziseduze labo. (2 ImiLan. 20:1, 2) Okuhle kakhulu yikuthi bacela ukuncediswa nguJehova kulokuthi bazame ukunqoba isitha lesi ngamandla abo. (Bala u-2 ImiLando 20:3, 4.) Kodwa kabazange bathi omunye lomunye azicelele yedwa ngendlela ayifunayo kumbe ayibona ifanele. IBhayibhili lithi: “Wonke amadoda akoJuda, labomkawo labantwabawo lezinsane, bema lapho phambi kukaJehova.” (2 ImiLan. 20:13) Siyabona-ke ukuthi bonke bamanyana, abadala labancane, bavuma ukuqondiswa nguJehova njalo wabavikela ukuze banganqotshwa yisitha sabo. (2 ImiLan. 20:20-27) Lokhu yikho kanye lathi okumele sikwenze nxa sesehlelwe luhlupho.

 9. Okwakusenziwa ngamaKhristu okuqala kusifundisani ngokumanyana?

⁹ AmaKhristu okuqala lawo ayesebenza ngokumanyana. Ngokwesibonelo lapho amaJuda amanengi lababephendukele enkolweni yesiJuda besiba ngamaKhristu, bakhuthalela “imfundiso yabaphostoli kanye lobudlelwano, lokuhlephula isinkwa lokukhuleka.” (ImiSeb. 2:42) Ngesikhathi behlukuluzwa kwacaca ukuthi babemanyene ngoba yiso isikhathi lapho okwakufanele bancedisane khona kakhulu. (ImiSeb. 4:23, 24) Kuyakhanya-ke ukuthi ngezikhathi ezinzima kuqakatheke kakhulu ukuthi simanyane.

10. Kunini lapho ukumanyana okuzabe kuqakatheke khona kakhulukazi?

¹⁰ Sesiseduze kakhulu isikhathi esinzima esingakaze sibe khona kulokhu kwadabuka umhlaba. Umphrofethi uJoweli uchaza ukuthi kuzabe ‘kulusuku lomnyama lokudana.’ (Jow. 2:1, 2; Zef. 1:14) Ngalesosikhathi kuzamele abantu bakaNkulunkulu bamanyane. Phela uJesu wathi: “Yilowo lalowo umbuso owehlukene phakathi kawumi.”​—Mat. 12:25.

11. IHubo 122:3, 4 lisifundisani ngokumanyana? (Khangela umfanekiso osekuqaliseni.)

¹¹ Ngalesosikhathi sobunzima kuzabe kuqatheke kakhulu ukuthi sikhonze simanyene. Ukumanyana kwethu kungafaniswa lendlela izindlu zaseJerusalema yasendulo ezazakhiwe ngayo. Zazakhiwe zaba seduzeduze, yikho umhubi waze wathi iJerusalema lakhiwe “njengomuzi obambeneyo waqina.” Lokhu kwakunceda izakhamuzi zedolobho leli ukuthi zincedane njalo zivikelane. Kanti njalo indlela imizi le eyayakhiwe ngayo ingamela indlela isizwe lesi esasimanyana ngayo lapho zonke “izizwana zikaJehova” zibuthana ukuze zimkhonze. (Bala iHubo 122:3, 4.) Yikho-ke lathi kumele ‘sibambane siqine’ khathesi langesikhathi esinzima esesiseduze kangaka.

12. Kuyini okuzasinceda ukuthi sisinde nxa abantu bakaNkulunkulu sebehlaselwa?

¹² Ngalesosikhathi kuzabe kuqakatheke kakhulu ukuthi ‘sibambane siqine.’ Ngenxa yani? Isiphrofetho esikuHezekheli isahluko 38 sikhuluma ngokuthi abantu bakaNkulunkulu bazahlaselwa ‘nguGogi owaselizweni laseMagogi.’ Nxa uGogi esehlasela kuyabe kungamelanga sivumele loba yini ezakwenza ukuthi kube lokungazwanani phakathi kwethu. Kanti njalo kungaba yibuthutha ukuthi sicele uncedo ebantwini abangamkhonziyo uJehova. Kuzamele simanyane labafowethu. Lanxa kunjalo ukusindiswa akusoze kuye ngokuthi siseqenjini labantu bakaNkulunkulu. UJehova leNdodana yakhe bazavikela kuphela labo abathemba igama likaJehova. (Jow. 2:32; Mat. 28:20) Kodwa kulengqondo yini ukucabanga ukuthi umuntu okhetha ukwehlukana lomhlambi kaNkulunkulu azenzele okwakhe uzasindiswa?​—Mik. 2:12.

13. Esesixoxe ngakho kungabafundisani abasakhulayo?

¹³ Kusegcekeni-ke ukuthi nxa osakhulayo elandela okwenziwa ngosowabo abazenzela umathanda, uyabe ezithezela olulenkume. Isikhathi esiya kuso sizabe sinzima kakhulu. Ngakho-ke kungelani lokuthi umdala kumbe ungosakhulayo, sonke siyabe sibadinga kakhulu abafowethu. Asizameni khathesi ukuthi sibe ngabantu abazwananayo ukuze kube lokumanyana phakathi kwethu nxa isikhathi sobunzima sesifika.

14, 15. (a) Kungani uJehova eqeqetsha abantu bakhe lamuhla? (b) UJehova uthi kumele senzeni ukuze sibe ngabantu abamanyeneyo?

¹⁴ UJehova uyasinceda ukuthi ‘simkhonze simanyene.’ (Zef. 3:8, 9) Uhlose ukuba ‘kuhlanganiswe ndawonye zonke izinto kuKhristu.’ (Bala u-Efesu 1:9, 10.) Yikho-ke uyasiqeqetsha khathesi esenzela ukuthi inhloso yakhe igcwaliseke. Akufunayo yikuhlanganisa zonke izidalwa ezisezulwini lezisemhlabeni ukuthi zimkhonze zimanyene njalo kasoze ehluleke ukwenza njalo. Kuyacaca ukuthi nxa ungosakhulayo, lokhu kumele kukwenze ube lesifiso sokuhlala umanyane lenhlanganiso kaJehova.

¹⁵ UJehova usifundisa ukuthi simanyane khathesi ngoba uhlose ukuthi abantu bakhe bamanyane kuze kube nini lanini. IMibhalo ihlala isikhuthaza ukuthi sibe “lokuzwelana okufananayo,” ‘sizimisele omunye komunye ngothando lobuzalwane’ njalo ‘sikhuthazane,’ lokuthi ‘sakhane.’ (1 Khor. 12:25; Rom. 12:10; 1 Thes. 4:18; 5:11) UJehova uyakwazi ukuthi sonke sizelwe silesono futhi lokhu kungenza kube nzima ukuthi simanyane. Yikho-ke kumele sizame ‘ukuthethelelana.’​—Efe. 4:32.

16, 17. (a) Kungani singena imihlangano yobuKhristu? (b) Abasakhulayo bangafundani kulokho okwakusenziwa nguJesu esakhula?

¹⁶ UJehova wahlela ukuthi kube lemihlangano yobuKhristu ukuze asifundise ukumanyana. Siwajayele amazwi akhuthazayo alotshwe kumaHebheru 10:24, 25. Enye inhloso yemihlangano le yikuthi ‘sicabangeni ukuba singakhuthazana kanjani ethandweni lasezenzweni ezinhle.’ Kanti njalo okuqakathekileyo yikuthi imihlangano le yenzelwe ukuthi isisize ukuba ‘sikhuthazane​—ikakhulu njengoba sibona uSuku lusondela.’

¹⁷ UJesu wasitshiyela isibonelo esihle ngoba wayeyiqakathekisa kakhulu imihlangano lapho esakhula. Ngesikhathi eleminyaka engu-12 wahamba labazali bakhe emhlanganweni omkhulu owawusethempelini. Abazali bakhe bacina bengasamboni. Ayisikho ukuthi uJesu wayesethathekile wayadlala labanye abantwana. Kodwa bamthola ethempelini exoxa labafundisi ngeMibhalo.​—Luk. 2:45-47.

18. Imithandazo yethu ingasinceda njani ukuthi simanyane?

¹⁸ Sesibonile ukuthi kumele sithandane lokuthi ukuya emihlanganweni yobuKhristu kwenza simanyane. Kodwa okunye okungasinceda ukuthi simanyane yikuthandazela abanye. Ukuqamba abafowethu ngamabizo nxa sibathandazela lokukhuluma ngezinhlupho abalazo kuzakwenza ukuthi sibathande kakhulu. Akumelanga sizitshele ukuthi lokhu kumele kwenziwe ngamaKhristu asekhulile kuphela. Lina abasakhulayo selike lakuzama yini ukwenza izinto zonke lezi esikhulume ngazo? Kwenzeni ngoba lokhu kuzalenza lizwanane labo bonke abazalwane. Kanti njalo kuzalinceda lokuthi lingabanjwa ngumhlaba lo osuzatshabalaliswa.

19-21. (a) Singatshengisa njani ukuthi “siyizitho zomzimba munye”? Nika izibonelo. (b) Indlela abafowethu ababencedana ngayo nxa kulomonakalo isifundisani?

¹⁹ Abantu bakaJehova bayatshengisa ukuthi bayasilandela sibili isimiso esikuRoma 12:5 esithi: “Ilunga ngalinye ngelalawo wonke amanye.” Lokhu kukhanya ngabakwenzayo nxa abanye babo behlelwe yingozi ethile. NgoDecember 2011 kwaba lesiphepho esabangela umonakalo omkhulu esihlengeni seMindanao esiselizweni lasePhilippines. Imizi edlula 40 000 yakhukhulwa okugoqela lemizi yabafowethu eminengi. Iwofisi yegatsha eselizweni lelo yabika ukuthi “lanxa ikhomithi encedisa abehlelwe ngumonakalo yayingakafiki, abafowethu labodadewethu bakwezinye izindawo basebeqalisile ukuphathisa.”

²⁰ Kwaba njalo lalapho amagagasi olwandle ayebangelwe yikuzamazama komhlaba ehlasela izindawo ezisempumalanga yelizwe laseJapan. Abafowethu labodadewethu abanengi balahlekelwa kakhulu njalo abanye basala bengelalutho ngitsho. Omunye owalahlekelwa ngumuzi wakhe nguYoshiko owayehlala khatshana leWolu yoMbuso ngomango ongaba ngamakhilomitha angu-40. Wathi: “Samangala kakhulu lapho sisizwa ukuthi kusisa ngemva kokuzamazama komhlaba, umhambeli kanye lomunye umfowethu babefike besidinga.” Wakhuluma ebobotheka wathi: “Abazalwane bethu basikhuthaza kakhulu ngeMibhalo futhi sanikwa amajazi, izicathulo, izikhwama kanye lezigqoko zokulala.” Omunye umfowethu olilunga lekhomithi yokuncedisa abehlelwe ngumonakalo wathi: “Abazalwane kulo lonke elaseJapan babesebenza bemanyene bezama ukuncedana. Kwafika labazalwane ababevela khonale e-United States. Bathi bebuzwa ukuthi kungani besuke khatshana khonale baphendula bathi, ‘Simunye labazalwane bethu beJapan njalo bayaludinga usizo lwethu.’ ” Kumele ukuthi lawe uyaziqhenya ngokuba senhlanganisweni ephatha amalunga ayo kuhle kangaka. Kanti njalo ungaba leqiniso lokuthi uJehova uyathokoza kakhulu nxa esibona simanyene.

²¹ Nxa singahle siqalise khathesi ukuphathana kuhle kuzasinceda lakusasa ukuthi sihlale simanyene nxa sesilwisana lobunzima obuzasehlela lanxa ngalesosikhathi sehlukaniswe labafowethu abakwamanye amazwe. Nxa sisenza njalo siyabe sizifundisa lokuthi sibe ngabantu abazakuma beqinile ebunzimeni obungasehlela nxa umhlaba lo ususiya ekupheleni. Omunye owasinda ngesikhathi kulesiphepho eJapan okuthiwa nguFumiko uthi: “Ukuphela sekusondele. Kumele siqhubeke sincedana labazalwane bethu njengoba sikhangelele isikhathi lapho okungasoze kuphinde kube lezingozi.”

22. Ukuhlala kwethu simanyene kuzasinceda ngani kusasa?

²² Abadala labancane abazama ngamandla onke ukuthi bamanyane khathesi bayabe bezinceda ngoba kuzabalula ukuthi basinde nxa umhlaba lo omubi usutshabalaliswa. UNkulunkulu uzabasindisa abantu bakhe njengoba wake wakwenza endulo. (Isaya. 52:9, 10) Akumelanga kuphume engqondweni yakho ukuthi lawe ungaba phakathi kwabazasinda nxa usebenza gadalala ukuthi uhlale undawonye labantu bakaNkulunkulu abamanyeneyo. Okunye okungakunceda yikuthi uqhubeke ukuqakathekisa kakhulu osukwamukele. Lokhu sizaxoxa ngakho esihlokweni esilandelayo.