“Bazibona” Izinto Ababezithenjisiwe

 1. Isipho sokubona into ethile ngelihlo lengqondo singasinceda ngani? (Khangela umfanekiso osekuqaliseni.)

UNKULUNKULU wasinika isipho sokubona into ethile ngelihlo lengqondo lanxa singakaze siyithi tshazi. Isipho lesi sisinceda ukuthi sihlele kuhle njalo sibe lethemba lokuthola izinto ezinhle esiyabe sizilindele. UJehova uyenelisa ukubona okuzakwenzakala njalo usebenzisa iMibhalo ukuze asitshele kuseselesikhathi ukuthi kuzakwenzakalani. Siyenelisa ukukubona ngelihlo lengqondo lokho asithembisa khona njalo lokhu kusinceda ukuthi sibe lokholo.​—2 Khor. 4:18.

2, 3. (a) Ukuzibona ngelihlo lengqondo izinto esizithenjiswayo kungasinceda ngani? (b) Esihlokweni lesi sizaxoxa ngayiphi imibuzo?

² Kwezinye izikhathi singanakana ngezinto ezingeke zenzakale. Ngokwesibonelo, inkazana encane ingazibona igade ivevane lanxa lokhu kungeke kwafa kwenzakala. Kodwa lapho uHana ezinika isikhathi sokucabanga ngokuthi kwakuzabe kunjani mhla ehambisa indodana yakhe uSamuyeli ukuthi iyesebenza ethabanikeli, wayengacabangi ngento eliphupho nje. Wayenakana ngalokho ayekhethe ukukwenza futhi ukuzibona esehambisa umntanakhe kwamnceda ukuthi agcwalise isithembiso sakhe. (1 Sam. 1:22) Nxa singakubona ngelihlo lengqondo lokho uNkulunkulu athembisa ukusenzela khona, siyabe sicabanga ngento ezakwenzakala sibili.​—2 Phet. 1:19-21.

³ Akuthandabuzwa ukuthi endulo izinceku zikaJehova ezinengi ezazithembekile zazizibona ngelihlo lengqondo izinto ezazizithenjisiwe. Kwazinceda ngani ukucabanga ngezibusiso ezazizazithola? Kanti njalo kungasinceda ngani ukucabangisisa ngezinto ezinhle uNkulunkulu athembisa ukuthi uzazenzela abantu abalalelayo?

 4. Kuyini okwakusenza ukuthi u-Abela acabangisise ngekusasa lakhe?

⁴ U-Abela wayezibona yini ngelihlo lengqondo izithembiso zikaJehova? UNkulunkulu watshela inyoka wathi: “Ngizafaka ubutha phakathi kwakho lowesifazana, laphakathi kwenzalo yakho leyowesifazana; uzahlifiza ikhanda lakho njalo wena uzamnqanda isithende sakhe.” (Gen. 3:14, 15) Asingeke sitsho ukuthi u-Abela wayekwazi ukuthi isithembiso lesi sasizagcwaliseka njani. Lanxa kunjalo, kumele ukuthi wayecabangisisa ngaso njalo wananzelela ukuthi ukhona ‘owayezanqandwa isithende’ ukuze abantu bathole impilo epheleleyo eyalahlwa ngu-Adamu lo-Eva. Lanxa singakwazi ukuthi kuyini u-Abela ayekubona engqondweni yakhe mayelana lekusasa, sileqiniso lokuthi wayekholwa ukuthi uJehova wayezasigcwalisa isithembiso lesi. Yikho uJehova wawamukela umhlatshelo wakhe.​—Bala uGenesisi 4:3-5 loHebheru 11:4.

 5. Ukuwubona ngelihlo lengqondo umhlaba ungaselabo abantu ababi kungabe kwamkhuthaza njani u-Enoki?

⁵ U-Enoki wayelokholo futhi ethembekile lanxa wayehlala phakathi kwabantu ababengamhloniphi uNkulunkulu futhi bemhlambalaza. U-Enoki waphefumulelwa ukuthi aphrofethe mayelana lokuthi uJehova wayezakuza ‘lezinkulungwane lezinye izinkulungwane zabangcwele ukwahlulela abantu bonke, lokubalahla ngamacala bonke abangamesabiyo uNkulunkulu ngenxa yezenzo zabo zonke zokweyisa uNkulunkulu abazenzayo ezindleleni zabo zokwedelela uNkulunkulu, langenxa yamazwi wonke alukhuni izoni ezingamesabiyo uNkulunkulu ezawakhuluma kubi ngaye.’ (Jud. 14, 15) Kuyini okwamnceda ukuthi enze lokhu? Kungenzakala ukuthi ukholo lwakhe lwalumenza awubone ngelihlo lengqondo umhlaba usungaselabo abantu ababi.​—Bala uHebheru 11:5, 6.

 6. Yiziphi izinto okungenzeka ukuthi uNowa waqhubeka ecabangisisa ngazo ngemva kukaZamcolo?

⁶ UNowa wasindiswa lapho kufika uZamcolo ngenxa yokuthi wayelokholo. (Heb. 11:7) Izulu likaZamcolo seliphelile, ukholo ayelalo lwamenza wanikela ngemihlatshelo yezinyamazana. (Gen. 8:20) Akuthandabuzwa ukuthi njengo-Abela, uNowa laye wayekholwa ukuthi abantu bonke babezacina bekhululiwe ebugqilini besono lokufa. Ngemva kukaZamcolo abantu baqalisa ukwenza izinto ezimbi bekhokhelwa ngenye indoda okwakuthiwa nguNimrodi eyayiphikisana loJehova, kodwa uNowa waqhubeka elokholo njalo elethemba. (Gen. 10:8-12, NW) Kumele ukuthi laye kwakumkhuthaza ukucabangisisa ngokuthi kwakuzakuba mnandi njani emhlabeni nxa ukufa lesono kanye lokucindezelwa kungasekho. Lathi singenelisa ukusibona ngelihlo lengqondo isikhathi leso esizabe sithokozisa njalo sekuseduze kakhulu ukuthi sifike.​—Rom. 6:23.

 7. Kuyini okungabe kwakubonwa ngu-Abhrahama, u-Isaka loJakhobe mayelana lekusasa?

⁷ U-Abhrahama, u-Isaka loJakhobe babengalibona engqondweni ikusasa elihle ngoba uNkulunkulu wayebathembise ukuthi uzasebenzisa inzalo yabo ukuze abusise zonke izizwe zomhlaba. (Gen. 22:18; 26:4; 28:14) Izizukulwane zabo zazizakuba zinengi kakhulu njalo zazizahlala eLizweni Lesithembiso ezazizaliphiwa nguNkulunkulu. (Gen. 15:5-7) Ngokukholwa, amadoda la ayengazibona ngelihlo lengqondo izizukulwane zawo seziyizakhamizi kulelolizwe. Phela kusukela abantu balahlekelwa yimpilo epheleleyo, uJehova ubelokhu enika izinceku zakhe ezithembekileyo isiqiniselo sokuthi abantu bazaphinda bazithole izibusiso ezalahlwa ngu-Adamu.

 8. Kuyini okwanceda u-Abhrahama ukuthi enze imisebenzi yokholo emangalisayo?

⁸ Kuyini okwanceda u-Abhrahama ukuthi enze imisebenzi yokholo emangalisayo? Kumele ukuthi wayezibona ngelihlo lengqondo izinto ayezithenjiswe nguNkulunkulu. IMibhalo iveza ukuthi u-Abhrahama labanye abantu ababekhonza uNkulunkulu bethembekile baze bafa ‘bengazamukelanga izinto ezathenjiswayo’ kodwa “bazibona nje kuphela bazithakazelela kude.” (Bala uHebheru 11:8-13.) U-Abhrahama kwakungani uyazibona izithembiso lezo lanxa zazingakafiki ngenxa yokuthi wayelobufakazi obunengi obabusenza ukuthi abe leqiniso lalokho ayekulindele.

 9. Ukukholwa izithembiso zikaNkulunkulu kwamnceda njani u-Abhrahama?

⁹ U-Abhrahama wayezikholwa izithembiso zikaNkulunkulu njalo lokhu kwamkhuthaza ukuthi azimisele ukwenza intando kaNkulunkulu. Ukholo lwakhe lwenza ukuthi atshiye idolobho lase-Uri njalo kazange abe yisakhamuzi kuloba yiliphi idolobho laseKhenani. Wonke amadolobho la ayefana lendlu eyakhelwe phezu kwetshebetshebe ngoba ayebuswa ngabantu. (Josh. 24:2) Okwempilo yakhe yonke, u-Abhrahama “wayelindele idolobho elilezisekelo, elimcandi walo lomakhi walo nguNkulunkulu.” (Heb. 11:10) U-Abhrahama wazibona ngelihlo lengqondo esephila emhlabeni obuswa nguhulumende kaJehova ozakuma kuze kube nininini. U-Abela, u-Enoki, uNowa lo-Abhrahama kanye labanye ababelokholo njengabo babekukholwa ukuthi abafileyo bazavuswa njalo babekhangelele ukuphila emhlabeni sekubusa uMbuso kaNkulunkulu, “idolobho elilezisekelo” eziqine nko! Ukucabangisisa ngezibusiso lezi kwaluqinisa kakhulu ukholo lwabo.​—Bala uHebheru 11:15, 16.

10. Kuyini uSara ayesekubona ngelihlo lengqondo esezwe isithembiso sokuthi uzakuba lomntwana?

¹⁰ Ake sixoxe ngoSara umka-Abhrahama. Wayeseleminyaka engu-90 futhi engelamntwana kodwa umbono wakhe omuhle ngekusasa wamnceda ukuthi atshengise ukuthi ulokholo. USara wazibona ngelihlo lengqondo izizukulwane zakhe zikholisa izibusiso ezazithenjiswe nguJehova. (Heb. 11:11, 12) Kuyini okwamenza wangathandabuzi ukuthi lokhu kwakuzakwenzakala? UJehova wayetshele u-Abhrahama wathi: “Ngizambusisa, njalo ngizakunika indodana ngaye. Ngizambusisa ukuze abe ngunina wezizwe; amakhosi ezizwe azavela kuye.” (Gen. 17:16) Ngemva kokuzalwa kuka-Isaka, uSara wayeselesizatho esihle sokuzibona sezigcwaliseka zonke izithembiso uNkulunkulu ayezitshele u-Abhrahama. Siyakubona-ke ukuthi kuyisipho esihle okumangalisayo ukuthi lathi siyenelisa ukuzibona ngelihlo lengqondo izinto ezinhle esizithenjiswa nguNkulunkulu njalo ezizagcwaliseka loba sekutheni.

11, 12. UMosi wenzani okwamsiza ukuthi amthande kakhulu uJehova?

¹¹ UMosi ngomunye umuntu owayelokholo njalo owayemthanda kakhulu uJehova. Eseselilunga lemuli yendlu yesikhosini eGibhithe kwakungaba lula ukuthi acine esengumuntu othanda inotho lesikhundla. Kodwa kumele ukuthi abazali bakhe abangama-Israyeli bamfundisa ngoJehova kanye lenhloso yakhe yokukhulula amaHebheru ebugqilini, abesewanika iLizwe ayewathembise lona. (Gen. 13:14, 15; Eks. 2:5-10) Akuthandabuzwa ukuthi ukuhlala ecabanga ngezibusiso ezazizatholwa ngabantu bakaNkulunkulu kwamsiza ukuthi amthande kakhulu kulokuthi afise ukuba ngumuntu odumileyo.

¹² IMibhalo ithi: “Ngokukholwa uMosi, esekhulile, wala ukuba aziwe njengendodana yendodakazi kaFaro. Wakhetha ukuphathwa kubi kanye labantu bakaNkulunkulu kulokuba akholise injabulo yesono okwesikhathi esifitshane. Wakhetha ihlazo ngenxa kaKhristu njengegugu elikhulu kulengcebo yaseGibhithe, ngoba wayekhangelele umvuzo phambili.”​—Heb. 11:24-26.

13. Ukucabangisisa ngezithembiso zikaNkulunkulu kwamsiza ngani uMosi?

¹³ Nxa uMosi wayesidla amathambo engqondo ecabanga ngalokho uJehova ayekuthembise ama-Israyeli, ukholo lwakhe lwaluqina kakhulu futhi wayeqhubeka emthanda uJehova. Laye wayemesaba uNkulunkulu. Yikho-ke wayezika emcabangweni asibone isikhathi lapho uJehova ayezakhulula khona abantu ekufeni. (Jobe. 14:14, 15; Heb. 11:17-19) Kusegcekeni ukuthi lokhu kwenza uMosi wamthanda kakhulu uJehova, uNkulunkulu owayewazwela isihawu amaHebheru kanye labantu bonke. UMosi wahlala elokholo njalo elothando waze wafa. (Dute. 6:4, 5) Lanxa uFaro wayefunga esithi uzambulala, waqhubeka elesibindi ngenxa yokuthi wayelokholo, emthanda uNkulunkulu futhi elibona ikusasa elihle engqondweni yakhe.​—Eks. 10:28, 29.

14. Yiziphi izinto ezicatshangwa ngabantu ngekusasa?

¹⁴ Abantu abanengi lamuhla bacabanga izinto ezingeke zafa zenzakala. Ngokwesibonelo, lanxa impilo kulezinsuku ‘ilohlupho losizi,’ abanye abantu abangabayanga bacabanga ukuthi bazakuba yizipatsha njalo baziphilele kungelanto ebakhathazayo. (Hubo. 90:10) Bazibona sebebuswa ngumuntu ozakwenza ukuthi bahlale kuhle bevikelekile, kodwa iBhayibhili lona lisitshela ukuthi uMbuso kaNkulunkulu yiwo kuphela uhulumende onganika abantu impilo enhle. (Dan. 2:44) Kanti njalo abanengi bazitshela ukuthi uNkulunkulu kasoze asuse umumo lo wezinto omubi, kodwa okutshiwo liBhayibhili kutshiyene kakhulu lalokho abakucabangayo. (Zef. 1:18; 1 Joh. 2:15-17) Bonke abantu abalezifiso eziphikisana lalokho uJehova akuhlosileyo bafisa izinto ezingamaphupho nje.

15. (a) AmaKhristu asizakala njani nxa ezibona ngelihlo lengqondo izinto azithenjiswayo? (b) Phakathi kwezinto esizithenjiswa nguNkulunkulu, wena kuyini okukhangeleleyo?

¹⁵ Kodwa thina kuyasikhuthaza ukucabanga ngokuthi impilo izabe injani nxa izithembiso zikaNkulunkulu sezigcwalisekile, kungelani lokuthi silethemba lokuphila ezulwini loba emhlabeni. Uyazibona yini usuthola izibusiso ezivela kuNkulunkulu? Ukucabangisisa ngalokho ongafisa ukukwenza nxa esegcwalisa izithembiso zakhe kuzakwenza ukuthi uthokoze. Mhlawumbe uyazibona usuphila phakade emhlabeni. Akucabange ukuthi kuzabe kunjani ukusebenza labanye ngesikhathi umhlaba usuntshintshwa usiba lipharadayisi. Phela uzabe usulabomakhelwana abathanda uJehova njengawe. Uyabe usulempilakahle, usuqine saka njalo ungasakhathazeki ngalutho. Impilo izabe isimnandi sibili ngoba abayabe bekhokhela emsebenzini wokwenza ukuthi umhlaba lo ube lipharadayisi kuyabe kungabantu abakukhathalelayo. Lawe kuzakuthokozisa ukusebenzisa iziphiwo zakho lobuciko bakho ngoba konke ozakwenza kuzanceda abanye njalo kuzakwenza ukuthi uNkulunkulu adunyiswe. Ngokwesibonelo, cabanga ngokuncedisa abazavuswa emathuneni ukuthi bafunde ngoJehova. (Joh. 17:3; ImiSeb. 24:15) Konke lokhu akusimaphupho nje azaphelela emoyeni. Nxa uzibona ngelihlo lengqondo izinto lezi uyabe ucabanga ngezinto eziliqiniso ezisekelwe eMibhalweni.​—Isaya. 11:9; 25:8; 33:24; 35:5-7; 65:22.

16, 17. Kusinceda ngani ukukhuluma ngezibusiso esizilindeleyo?

¹⁶ Nxa sixoxa lamanye amaKhristu mayelana lalokho esifuna ukukwenza ngesikhathi uJehova esegcwalisa izithembiso zakhe kusuka kusicacele ukuthi ikusasa lethu lizabe linjani. Asikwazi ukuthi munye ngamunye wethu uyabe esenzani sibili emhlabeni omutsha. Kodwa nxa sikhuluma ngezifiso zethu siyabe sikhuthazana njalo sitshengisa ukuthi siyakholwa ukuthi esikuthenjiswa nguNkulunkulu kuzakwenzakala. Lapho abazalwane baseRoma bevakatshelwa nguPhawuli akuthandabuzwa ukuthi ‘bona laye baqiniswa lukholo lomunye wabo.’ Lathi ukuqinisana kuyasinceda kakhulu ezikhathini lezi ezinzima.​—Rom. 1:11, 12.

¹⁷ Ukulibona ngelihlo lengqondo ikusasa lethu elihle kuzasisiza lokuthi singakhathazeki kakhulu ngezinhlupho zethu. Mhlawumbe umphostoli uPhetro wayezibuza ukuthi impilo yakhe yayizakuba njani lapho ebuza uJesu esithi: “Sesitshiye konke ukuze sikulandele! Pho sizazuzani na?” Yikho-ke uJesu wanceda uPhetro labanye ababekhona ukuthi bakubone ngelihlo lengqondo ukuthi ikusasa labo lalizabe linjani. Wathi: “Ngilitshela iqiniso ukuthi ngesikhathi sokwenziwa kabutsha izinto zonke, lapho iNdodana yoMuntu isihlezi esihlalweni sobukhosi, lina elingilandelayo lani lizahlala ezihlalweni zobukhosi ezilitshumi lambili, lahlulele izizwana ezilitshumi lambili zako-Israyeli. Njalo bonke labo abatshiye izindlu zabo, loba abafowabo, loba odadewabo kumbe uyise loba unina kumbe abantwana loba amasimu ngenxa yami bazakwamukeliswa okwandiswe ngekhulu njalo bazakudla ilifa lokuphila kwaphakade.” (Mat. 19:27-29) Siyabona-ke ukuthi uPhetro labanye abafundi babengazibona sebebusa loJesu ezulwini kuhulumende kaNkulunkulu ozakwenza ukuthi abantu abalalelayo bathole izibusiso ezinengi.

18. Kusinceda ngani ukucabanga ngokugcwaliseka kwezithembiso zikaNkulunkulu?

¹⁸ Kusukela endulo, izinceku zikaJehova zasemhlabeni bezilokhu zicabanga ngokugcwaliseka kwezithembiso zikaNkulunkulu njalo lokhu kuyazisiza. Izinto u-Abela ayezazi mayelana lezinjongo zikaNkulunkulu zamenza walibona ngelihlo lengqondo ikusasa elihle futhi waba lokholo kanye lethemba eliqinileyo. U-Abhrahama laye watshengisa ukuthi wayelokholo olumangalisayo ngenxa yokuthi wayekubona ngelihlo lengqondo ukuthi isiphrofetho sikaNkulunkulu esiphathelane ‘lenzalo’ eyayithenjisiwe sasizagcwaliseka. (Gen. 3:15) UMosi yena “wayekhangelele umvuzo phambili,” esenza izinto ezazitshengisa ukuthi ulokholo njalo eqhubeka emthanda kakhulu uJehova. (Heb. 11:26) Yikho-ke lathi ukholo lwethu luzaqina futhi sizamthanda kakhulu uJehova nxa singakubona ngelihlo lengqondo lokho asithembisa khona. Esihlokweni esilandelayo sizaxoxa ngokuthi singasisebenzisa njani ngendlela enhle isipho sokubona into ethile ngelihlo lengqondo.