Ncedisa Abanye Baqinisele Nxa Besebunzimeni

 1. UJehova ujayele ukuyiphendula njani imithandazo yezinceku zakhe?

UBUKWAZI yini ukuthi uJehova angasebenzisa wena ukuphendula umthandazo wenceku yakhe osuka enhliziyweni? Angakusebenzisa kungelani lokuthi ungumdala webandla, inceku ekhonzayo, iphayona loba ummemezeli, futhi akulandaba ukuthi usesemutsha kumbe usukhulile loba ukuthi ungumfowethu kumbe udadewethu. Nxa umuntu othanda uJehova angakhala kuye efuna ukuncedwa, uNkulunkulu wethu ujayele ukusebenzisa abadala bebandla lezinye inceku zakhe ezithembekileyo ukuthi ‘bamduduze.’ (Kol. 4:11) Kuyisibusiso sibili ukukhonza uJehova ngalindlela sisiza abazalwane bethu. Singancedisa njalo siduduze abazalwane nxa kulomkhuhlane omemethekayo, kulomonakalo loba nxa behlukuluzwa.

 2. Kungani kungaba nzima ukunceda abanye nxa kulomkhuhlane omemethekayo?

² Kungaba nzima ukuthi sincedisane nxa kulomkhuhlane omemethekayo. Ngokwesibonelo singabe sifisa ukuvakatshela abangane kodwa singenelisi ngenxa yokuthi kuyabe kuyingozi ukwenza njalo. Kuyabe kungavumi lokuthi sinxuse imuli elohlupho lwemali ukuthi izokudla lathi. Lanxa singabe sifuna ukunceda abafowethu labodadewethu, kungaba nzima nxa abanye emulini yangakithi labo besebunzimeni. Kodwa kumele sibancede abazalwane bethu, futhi uJehova uyathokoza nxa sisenza loba yini esingayenza ukuze sibancede. (Zaga. 3:27; 19:17) Kuyini esingakwenza?

 3. Sifundani kulokho okwenziwa ngabadala abasebandleni uDesi akulo? (UJeremiya 23:4)

³ Okungenziwa ngabadala. Nxa ungumdala webandla zazi kuhle izimvu. (Bala uJeremiya 23:4.) UDesi okukhulunywe ngaye esihlokweni esidlulileyo uthi, “Abadala abaseqenjini engikulo bebehlala betshumayela lami kanye labanye njalo bebesibakhona nxa sizilibazisa.”b Lokhu kwenza kwabalula ukuthi abelusi laba bancedise uDesi ngesikhathi somkhuhlane weCOVID-19 lalapho abangakibo sebebulewe ngumkhuhlane lo.

 4. Kuyini okwenza kwabalula ukuthi abadala bancedise uDesi njalo kubafundisani lokhu abadala?

⁴ UDesi uqhubeka esithi, “Njengoba ngasengikwazi ukuthi abadala balendaba lami njalo bayangithanda kwabalula ukuthi ngibatshele indlela engizizwa ngayo lalokho okwakungikhathaza.” Kulifundisani lokhu badala? Yelusani abamemezeli bengakabi sebunzimeni. Wobani ngabangane babo. Zamani ukuxoxa labo ngezinye indlela nxa kulomkhuhlane owenza kube nzima ukuthi libavakatshele. UDesi uthi: “Kwesinye isikhathi ngangifonelwa kumbe ngithunyelwe amameseji ngabadala abatshiyeneyo ngelanga elilodwa. Imibhalo ababengibalela yona yayingiduduza lanxa ngangiyazi kuhle.”

 5. Kuyini okunganceda abadala ukuthi bakwazi okudingwa ngabafowabo labodadewabo, futhi bangabancedisa njani?

⁵ Okunye okungakunceda ukuthi ukwazi lokho abafowenu labodadewenu abakudingayo yikubabuza imibuzo engasoze ibayangise. (Zaga. 20:5) Balakho yini ukudla okweneleyo lemithi kanye lezinye nje izinto? Kungenzeka baphelelwe ngumsebenzi yini? Bangabe bengelamali yokubhadala irenti yini? Bangabe bedinga ukuncediswa yini ukuze bathole uncedo oluvela kuhulumende? Abafowethu labodadewethu bancedisa uDesi ngezinto ayezidinga. Kodwa uthi okwamnceda kakhulu ngesikhathi esebunzimeni luthando alutshengiswa ngabadala lendlela abamkhuthaza ngayo besebenzisa iBhayibhili. Uthi: “Abadala babethandaza lami. Angisawakhumbuli amazwi ababewakhuluma kodwa ngisayikhumbula indlela engazizwa ngayo. Kwakungani uJehova uthi, ‘Awuwedwa.’”—Isaya. 41:10, 13.

 6. Abanye ebandleni bangenzani ukuze bancedise abafowabo labodadewabo? (Khangela umfanekiso.)

⁶ Okungenziwa ngabanye. Sikhangelele ukuthi kube ngabadala abahamba phambili ekuncediseni abafowethu labodadewethu. Kodwa uJehova ufuna sonke sibakhuthaze futhi sibancedise. (Gal. 6:10) Umfowethu loba udadewethu ogulayo angakhuthazwa yilokho esimenzela khona lanxa kukuncane. Umntwana angathumela umfowethu ikhadi kumbe amdwebele okuthile okuzamkhuthaza. Osakhulayo yena angayathengela udadewethu izinto azidingayo loba amenzele okunye nje. Abanye ebandleni bangaphekela othile ogulayo ukudla besebesiyamtshiyela endlini yakhe. Wonke umuntu ebandleni uyadinga ukukhuthazwa nxa kulomkhuhlane omemethekayo. Mhlawumbe singasala ngemva kwemihlangano ukuze sixoxe labafowethu labodadewethu sikhangelene kumbe ngezempucuko. Abadala labo bayakudinga ukukhuthazwa. Abanye abamemezeli bathumela abadala incwadi kumbe ikhadi lokubabonga. Phela ngesikhathi kulomkhuhlane omemethekayo kunengi abadala okumele bakwenzele abafowabo labodadewabo. Kubamnandi sibili nxa sonke ‘siqhubeka sikhuthazana futhi sisakhana.’—1 Thes. 5:11.

 7. Kuyini okungenzakala nxa kungaba lomonakalo?

⁷ Umonakalo wemvelo kumbe odalwe ngokunye nje ungahlasela abantu belibele. Abanye bangalahlekelwa yimpahla yabo, izindlu zabo kumbe bafelwe yizihlobo labangane. Izinto ezibuhlungu kangaka azibacezi abafowethu labodadewethu. Pho singenzani ukuze sibancede?

 8. Abadala kanye lenhloko zezimuli bangenzani kungakabi lomonakalo?

⁸ Okungenziwa ngabadala. Badala, ncedani abafowenu labodadewenu bawulungele umonakalo. Wobani leqiniso lokuthi bonke ebandleni bayakwazi okumele bakwenze ukuze bahlale bevikelekile njalo bathintane lani. UMargaret okukhulunywe ngaye esihlokweni esidlulileyo uthi: “Kuzidingo zebandla abadala basitshela ukuthi ukutsha kweganga endaweni esasihlala kuyo kwakungakapheli. Bathi sihle sisuke emizini yethu nxa iziphathamandla zingasitshela ukuthi sisuke kumbe nxa sekuyingozi ukuthi sibe silokhu sihlezi.” Isixwayiso leso safika ngesikhathi esihle sibili ngoba ngemva kwamaviki amahlanu kwaba lomlilo owesabekayo endaweni leyo. Ngesikhathi sokukhonza kwemuli inhloko zezimuli zingaxoxa ngalokho okungenziwa ngumuntu ngamunye emulini nxa kungaba lomonakalo. Ukwenza lokhu labantwabenu kuzalinceda ukuthi lihlaliseke nxa kungaba lomonakalo.

 9. Abadala bangenzani kungakabi lomonakalo langemva kwawo?

⁹ Nxa ungumbonisi weqembu ungalindi kuze kube lomonakalo kodwa woba leqiniso lokuthi ulenamba zefoni ezisebenzayo kanye lamakheli abamemezeli abaseqenjini okulo. Kubhale phansi lokhu njalo ukutshintshe ngemva kwesikhathi nxa kudingeka ukuthi wenze njalo. Kuzakuthi nxa sekulomonakalo kube lula ukuthi uthintane labamemezeli futhi ubekwazi lokho abakudingayo. Tshela umhleli wequla labadala lokho okutholileyo ngabamemezeli, yena uzakhuluma lombonisi wesiqinti. Ukusebenza ndawonye okunje kuyanceda sibili. Ngemva komonakalo owawudalwe ngumlilo, umbonisi wesiqinti webandla laboMargaret kazange abuquthe okwamahola angu-36 encedisana labadala ukuthi bathintane njalo bancedise abafowabo labodadewabo abangaba ngu-450 ababetshiye imizi yabo. (2 Khor. 11:27) Lokhu kwenza wonke umuntu wathola indawo yokuhlala.

10. Kungani abadala bekuqakathekisa ukwelusa abamemezeli? (UJohane 21:15)

¹⁰ Umsebenzi wabadala ugoqela ukukhuthaza abafowabo labodadewabo besebenzisa imibhalo lokuncedisa abayabe bekhathazekile. (1 Phet. 5:2) Okokuqala okumele bakwenze nxa kungaba lomonakalo yikuba leqiniso lokuthi abafowabo labodadewabo bavikelekile lokuthi balokudla lokokugqoka kanye lendawo yokuhlala. Kodwa ngezinyanga ezinengi ezilandelayo abafowabo labodadewabo bayabe belokhu bedinga ukukhuthazwa lokududuzwa. (Bala uJohane 21:15.) UHarold olilunga leKhomithi Yegatsha njalo osencedise abafowethu labodadewethu abanengi abahlaselwe ngumonakalo uthi: “Kuthatha isikhathi ukuthi abafowethu labodadewethu bazwe ngcono. Bangayijayela sibili impilo entsha kodwa bangabe belokhu becabanga ngomuntu abamthandayo owafayo lempahla ababeyithanda eyabalahlekelayo kumbe ngesimo esiyingozi ababa phakathi kwaso. Izinto ezinje zingabathunuka baqalise ukuzwa ubuhlungu futhi. Kodwa lokhu akutsho ukuthi abalakholo. Yikho vele esikhangelele ukuthi kwenzakale.”

11. Izimuli zingadinga ukuncediswa njani ngemva komonakalo?

¹¹ Abadala bayawalandela sibili amazwi okuthi ‘bakhale labakhalayo.’ (Rom. 12:15) Kumele baqinisekise labo abehlelwe ngumonakalo ukuthi uJehova labafowabo labodadewabo balokhu bebathanda. Kanti njalo kumele bancedise izimuli zabafowabo labodadewabo labo ukuthi ziqhubeke zisenza izinto ezibaqinisa ekukhonzeni ezigoqela ukuthandaza, ukutaditsha, ukungena imihlangano kanye lokuya ekutshumayeleni. Bangancedisa labazali ukuthi bancede abantwababo bacabange kumbe bagxile ezintweni ezingeke ziqedwe kumbe zitshabalaliswe ngumonakalo. Bazali, khumbuzani abantwabenu ukuthi uJehova uzahlala engumngane wabo lokuthi uzahlala ebancedisa. Kanti njalo wobani leqiniso lokuthi liyabatshela ukuthi bazahlala bephakathi kwemuli yabafowabo labodadewabo abasemhlabeni wonke abazimisele ukubancedisa.—1 Phet. 2:17.

12. Abanye bangenzani ukuze bancedise nxa kube lomonakalo? (Khangela umfanekiso.)

¹² Okungenziwa ngabanye. Nxa kungaba lomonakalo duzane lalapho ohlala khona buza abadala ukuthi ungancedisa njani. Mhlawumbe ungacela ukuthi labo abatshiya amakhaya abo kumbe labo abancedisa abehlelwe ngumonakalo bazehlala emzini wakho okwesikhathi esithile. Ungaphathela abamemezeli ukudla lokunye abakudingayo. Kodwa kukhona yini ongakwenza nxa umonakalo ungaba sendaweni ekhatshana? Ye. Ungakhulekela labo obahlaseleyo. (2 Khor. 1:8-11) Kanti njalo ungancedisa abahlelwe ngumonakalo ngokunikela emsebenzini womhlaba wonke. (2 Khor. 8:2-5) Nxa usenelisa ukuya endaweni leyo, buza abadala ukuthi ungenzani ukuze uyencedisa. Nxa ungabizwa kumele ukuthi uzafundiswa ukuthi uwenze njani umsebenzi wokuncedisa ukuze usetshenziswe ngesikhathi lasendaweni lapho odingakala khona kakhulu.

13. Yibuphi ubunzima abafowethu labodadewethu abahlala emazweni lapho umsebenzi wethu ongavunyelwa khona abahlangana labo?

¹³ Impilo iba nzima kakhulu emazweni lapho umsebenzi wethu ongavunyelwa khona. Abazalwane abahlala emazweni la bavele balezinye inhlupho ezigoqela uhlupho lwemali, ukugula lokufelwa yizihlobo labangane. Kodwa kungabe kungavumi ukuthi abadala bavakatshele kumbe baxoxe bekhululekile lalabo abadinga ukukhuthazwa ngenxa yokuthi umsebenzi wethu awuvunyelwa endaweni lezo. U-Andrei okukhulunywe ngaye esihlokweni esidlulileyo wakubona lokhu. Udadewethu owayeseqenjini akulo wayelohlupho lwemali, waphinda walimala engozini yemota kwadingeka ukuthi a-opharethwe kanengana futhi wayengasenelisi ukusebenza. Kodwa abafowethu benza konke ababengakwenza ukuthi bamncedise lanxa umsebenzi wethu wawungavunyelwa elizweni lelo futhi kulomkhuhlane omemethekayo. UJehova wakubona konke lokhu.

14. Abadala bangatshengisa njani ukuthi bayamthemba uJehova?

¹⁴ Okungenziwa ngabadala. U-Andrei wathandaza wasesenza lokho ayesenelisa ukukwenza. UJehova wayiphendula njani imithandazo yakhe? Wasebenzisa abanye ebandleni ababengenelisa ukumncedisa udadewethu. Abanye bamhambisa kudokotela abanye bamnika imali. UJehova wabasebenzisa ukuthi bancedise udadewethu njalo wakubusisa abakwenzayo. (Heb. 13:16) Badala, celani abanye balincedise nxa lihlala elizweni lapho umsebenzi wethu ongavunyelwa khona. (Jer. 36:5, 6) Okuqakatheke kakhulu yikuthi lithembe uJehova. Angalincedisa ukuthi lenelise ukusiza abanye ebandleni.

15. Singenzani ukuze sihlale simanyene labanye nxa sihlukuluzwa?

¹⁵ Okungenziwa ngabanye. Nxa umsebenzi wethu ungavunyelwa elizweni esikulo, singahlangana singamaqembu amancane. Yikho kuqakatheke kakhulu ukuthi sihlale silokuthula phakathi kwethu. Kumele silwe loSathane hatshi abazalwane bethu. Akumelanga sikhangele amaphutha abafowethu njalo kumele sizame ukulungisisa masinyane nxa kube lokungazwanani. (Zaga. 19:11; Efe. 4:26) Zimisele ukunceda abanye. (Tit. 3:14) Okwenziwa ngabanye bencedisa udadewethu esikhulume ngaye kundima 14 kwakhuthaza iqembu ayekulo. Baba yimuli emanyeneyo.—Hubo. 133:1.

16. Ngokwalokho okutshiwo kuKholose 4:3, 18, singabanceda njani abafowethu labodadewethu abahlukuluzwayo?

¹⁶ Abafowethu labodadewethu abanengi baqhubeka bekhonza uJehova lanxa behlala emazweni lapho umsebenzi wethu ongavunyelwa khona. Abanye basejele ngenxa yokuba ngoFakazi bakaJehova. Singabathandazela bona lezimuli zabo. Kanti njalo singathandazela lalabo abazinikela ukuthi babasekele, lanxa lokhu kungenza ukuthi labo babotshwe. Phela bakhuthaza abafowethu labodadewethu ababotshiweyo ukuthi baqhubeke bethembela kuJehova. Babanika izinto abazidingayo futhi bayabamela emthethwandaba.c (Bala uKholose 4:3, 18.) Khumbula ukuthi imithandazo yakho ingabanceda abafowethu labodadewethu labo.—2 Thes. 3:1, 2; 1 Thim. 2:1, 2.

17. Ungenzani ukuze ulungiselele khathesi ukuhlukuluzwa?

¹⁷ Wena lemuli yakho lingalungiselela khathesi ukuhlukuluzwa. (Imiseb. 14:22) Lingazami ukucabanga ngazo zonke izinto ezimbi ezingenzakala. Kodwa qinisani ubungane benu loJehova njalo lincede abantwabenu labo benze njalo. Nxa ngezinye izikhathi ukhathazeka thandaza kuJehova ngenhliziyo yonke. (Hubo. 62:7, 8) Xoxani liyimuli ngokuthi kungani lingamthemba uNkulunkulu.d Njengoba abantwabakho bencedakala nxa ulungiselela umonakalo, bazancedakala lalapho ubancedisa ukuthi balungele ukuhlukuluzwa. Bazakuba lesibindi njalo bahlaliseke ngenxa yokuthi ubafundise ukuthembela kuJehova.

18. Kuyini esikulindeleyo okuzakwenzakala esikhathini esizayo?

¹⁸ Ukuthula kukaNkulunkulu kusenza sizizwe sivikelekile. (Flp. 4:6, 7) UJehova usinika ukuthula lokhu ukuze asenze sihlaliseke lanxa kulemikhuhlane ememethekayo, umonakalo kumbe sihlukuluzwa. Usebenzisa abadala abakhutheleyo ukuthi baseluse. Sonke usinike isibusiso sokuthi sincedane. Ukuthula esilakho khathesi kusinceda ukuthi silungele inhlupho ezinkulu ezizayo okugoqela ‘ukuhlupheka okukhulu.’ (Mat. 24:21) Ngalesosikhathi kuzamele sihlale silokuthula njalo sincedisa abanye ukuthi labo benze njalo. Kodwa ngemva kokuhlupheka okukhulu asisoze siphinde sibe lobunzima obusenza sikhathazeke. Sizakuba lokuthula uJehova ayefuna sibe lakho. Ukuthula kuzakubakhona kuze kube nini lanini.—Isaya. 26:3, 4.