“Guqulwani Litshintshe Indlela Elicabanga Ngayo”

1-2. Kumele siqhubeke sisenzani lanxa sesibhabhathiziwe? Chasisa.

UYIKLINA kangaki indlu yakho? Mhlawumbe wayiklina okuzwayo uqalisa ukuhlala kuyo. Kodwa kuzahamba njani ungayekela ukuqhubeka uyiklina? Phela idoti lothuli akuphuzi ukugcwala endlini. Kumele uhlale uklina indlu yakho ukuze ihlale ihlanzekile.

² Lathi akumelanga sime ukuqhubeka silungisisa ubuntu bethu lendlela esicabanga ngayo. Singakabhabhathizwa siyabe sisebenza nzima sifuna ukutshintsha lokhu okumele sikutshintshe ‘ukuze sizihlambulule ezintweni zonke ezingcolisa umzimba lomoya.’ (2 Khor. 7:1) Kodwa kumele siqhubeke silalela isixwayiso somphostoli uPhawuli sokuthi ‘siqhubeke sitshintsha indlela esicabanga ngayo.’ (Efe. 4:23) Kungani kumele siqhubeke sitshintsha? Ngenxa yokuthi singayekela singazithola sesilothuli ledoti yomhlaba lo. Yikho kumele sihlale sihlola indlela esicabanga ngayo, lobuntu bethu kanye lezifiso zethu ukuze singathatheki ngomhlaba lo kodwa siqhubeke sithokozisa uJehova.

 3. Kutshoni ‘ukutshintsha indlela esicabanga ngayo’? (URoma 12:2)

³ Kumele senzeni ukuze sitshintshe indlela esicabanga ngayo? (Bala uRoma 12:2.) Umutsho wesiGrikhi ohunyutshwe ngokuthi “litshintshe indlela elicabanga ngayo” ungabekwa langokuthi “lilungisise izingqondo zenu.” Yikho akumelanga sisuthiseke ngokuthi sesilungisile impilo zethu nxa sesenze imisebenzi emihle emilutshwana nje. Kodwa kumele sihlole lokhu esiyikho ngaphakathi, sitshintshe lapho okumele sitshintshe khona ukwenzela ukuthi lokho esikwenzayo kuhambelane lalokho okufunwa nguJehova. Lokhu asikwenzi kanye kuphela kodwa kumele sihlale sikwenza.

 4. Singenzani ukuze indlela esicabanga ngayo ingabunjwa ngumhlaba lo omubi?

⁴ Nxa sesingaselasono konke esiyabe sikwenza kuzabe kumthokozisa uJehova. Kodwa singakafiki lesosikhathi kumele siqhubeke sisebenza nzima ukuze simthokozise. KuRoma 12:2 uPhawuli uthi ukuze siyazi intando kaNkulunkulu kumele sitshintshe indlela esicabanga ngayo. Kumele siqale sizihlole ukuze sibone ukuthi izinto esizikhethayo lesihlela ukuzenza ziyahambelana yini lokucabanga kukaNkulunkulu hatshi okomhlaba.

 5. Kuyini okungasinceda sihlale sikhumbula ukuthi usuku lukaJehova seluseduze? (Khangela umfanekiso.)

⁵ Nanku esingacabanga ngakho. UJehova ufuna ‘siqhubeke sikukhumbula ukuba khona kosuku lwakhe.’ (2 Phet. 3:12) Nansi imibuzo ongazibuza yona: ‘Indlela engiphila ngayo iyatshengisa yini ukuthi ngiyabona ukuthi umumo lo wezinto ususiyaphela? Imfundo lomsebenzi engiwukhethayo kuyatshengisa yini ukuthi ngiyakuqakathekisa ukukhonza uJehova ukwedlula loba yini empilweni yami? Ngiyakholwa yini ukuthi uJehova uzanginakekela mina lemuli yami kumbe ngihlala ngikhathazekile ngokuthi ngizayondla ngani?’ Kumele ukuthi uJehova uyathokoza kakhulu nxa esibona sizama ngamandla wonke ukwenza intando yakhe.—Mat. 6:25-27, 33; Flp. 4:12, 13.

 6. Kuyini okumele siqhubeke sikwenza?

⁶ Kumele sihlale sihlola indlela esicabanga ngayo besesilungisisa lapho okumele silungisise khona. UPhawuli watshela abaseKhorinte wathi: “Qhubekani lizihlola ukuthi lisekukholweni yini, qhubekani lizihlolisisa ukuthi lingabantu abanjani.” (2 Khor. 13:5) Ukuba ‘sekukholweni’ akupheleli ekungeneni imihlangano lokuya ekutshumayeleni kodwa kuhlanganisa lendlela esicabanga ngayo, inhloso zethu lalokho esikufisayo. Yikho kumele siqhubeke sitshintsha indlela esicabanga ngayo. Lokhu singakwenza ngokubala iLizwi likaNkulunkulu, sifunde ukucabanga ngendlela acabanga ngayo njalo senze konke esingakwenza ukuze izenzo zethu zihambelane lentando yakhe.—1 Khor. 2:14-16.

 7. U-Efesu 4:31, 32 uthi kuyini okufanele sikwenze njalo kungani kungabanzima ukwenza njalo?

⁷ Bala u-Efesu 4:31, 32. Okunye okumele sikwenze ngaphandle kokutshintsha indlela esicabanga ngayo ‘yikugqoka ubuntu obutsha.’ (Efe. 4:24) Lokhu kutsho ukuthi kumele senze okuthile, ngokwesibonelo sisebenze ngamandla ukuze singafukameli inzondo, singathukutheli futhi singabi lolaka. Kungani kungaba nzima? Ngenxa yokuthi siyabe sivela layo khatshana imikhuba le. Ngokwesibonelo iBhayibhili lithi abanye abantu ‘bazonda masinyane’ njalo ‘bayaphangisa ukuthukuthela.’ (Zaga. 29:22) Umuntu onjalo kumele aqhubeke ezama ngamandla ukutshintsha lanxa esebhabhathiziwe. Ake sixoxe ngokwenzakala komunye umfowethu.

8-9. Okwenzakala kuStephen kutshengisa njani ukuthi kumele siqhubeke sikhipha ubuntu obudala?

⁸ Omunye umfowethu okuthiwa nguStephen wayehlutshwa lulaka. Uthi: “Lanxa ngasengibhabhathiziwe kwakumele ngiqhubeke ngilwisana lolaka lwami. Ngokwesibonelo, ngelinye ilanga sitshumayela endlini ngendlu ngagijimisa isela elaselitshontshe irediyo emoteni yami. Lathi libona ukuthi sengikhonapho ezithendeni zalo, layilahlela phansi irediyo labaleka. Ngathi sengixoxela engangihamba labo ukuthi ngangiyithole njani irediyo yami omunye umdala webandla wangibuza wathi, ‘Stephen ubuzalenzani isela lelo aluba ulibambile?’ Umbuzo lo wangenza ngacabangisisa, wangikhuthaza lokuthi ngiqhubeke ngilwisa ukuba ngumuntu othanda ukuthula.”b

⁹ Okwenzakala kuStephen kutshengisa ukuthi umkhuba esicabanga ukuthi sesiwunqobile singaqabuka usuphendukile. Nxa lokhu kungenzakala kuwe ungalahli ithemba uhle uzitshele ukuthi ungumuntu omubi. Umphostoli uPhawuli laye wake wathi: “Nxa ngifisa ukwenza okuqondileyo, okubi kuyabe kukimi khonapho.” (Rom. 7:21-23) Wonke amaKhristu alesono yikho kumele alwisane lemikhuba emibi eqhubeka iphenduka njengedoti lothuli olugcwala endlini. Kumele siqhubeke sisebenza nzima ukuze sihlale sihlanzekile. Singakwenza njani lokhu?

10. Kuyini esingakwenza ukuze silwisane lemikhuba emibi? (U-1 Johane 5:14, 15)

¹⁰ Thandaza kuJehova umcela ukuthi akuncedise ngomkhuba okuthwalise nzima ukuthi uwutshiye njalo ungathandabuzi ukuthi uzawuzwa umthandazo wakho akuncedise. (Bala u-1 Johane 5:14, 15.) Lanxa uJehova engasoze akususele umkhuba lo ngendlela eyisimangaliso angakuqinisa ukuze uqhubeke ulwisana lawo. (1 Phet. 5:10) Izenzo zakho kumele zihambelane lalokho okuthandazelayo njalo ungenzi izinto ezizakwenza ukuthi ubuyele emkhubeni olwisana lawo. Ngokwesibonelo, nanzelela amafilimu lezinhlelo ze-TV loba amabhuku enza kukhanye angathi ubuntu lobu obudala ozama ukububalekela yinto enhle. Kanti njalo nxa izifiso ezingayisizo zingabuya engqondweni zisuse masinyane.—Flp. 4:8; Kol. 3:2.

11. Ungenzani ukuze uqhubeke ugqoka ubuntu obutsha?

¹¹ Nxa usukhiphe ubuntu obudala kuqakathekile ukuthi ugqoke obutsha. Ungakwenza njani lokhu? Zimisele ukuthi ungafunda ngobuntu bukaJehova obuthile uhle umlingisele. (Efe. 5:1, 2) Ngokwesibonelo, nxa ungabala ngendaba ethile eBhayibhilini etshengisa ukuthi uJehova uyathethelela zibuze, ‘Ngiyabathethelela yini abanye?’ Nxa ungabala ngendlela uJehova ayelesihawu ngayo ebantwini ababedubeka zibuze, ‘Ngiyabazwela yini abasebandleni abaswelayo besengisenza okuthile ukuthi ngibancedise?’ Qhubeka utshintsha indlela ocabanga ngayo ngokugqoka ubuntu obutsha futhi ungakhalali nxa usehluleka ngezinye izikhathi.

12. IBhayibhili limtshintshe njani uStephen?

¹² UStephen esike sakhuluma ngaye wananzelela ukuthi uyenelisa ukutshintsha agqoke ubuntu obutsha kancane kancane. Uthi: “Kusukela ngibhabhathizwa kunengi ebengihlangana lakho obekungabangela ukuthi ngivuke ngolaka futhi ngibe lodlakela. Sengafunda ukusuka ngizihambele ngitshiyane labantu abazama ukungicaphula kumbe ngibhule umlilo ngezinye izindlela. Unkosikazi labanye abanengi bajayele ukungincoma ngalokho engiyabe ngikwenzile ezimeni lezi. Lami ngiyabe ngimangala ukuthi kambe yimi lo sibili. Ayisimi engizitshintshileyo kodwa ngikholwa ukuthi iBhayibhili yilo elilamandla okuguqula umuntu.”

13. Kuyini okuzasinceda ukuthi silwisane lezifiso ezimbi? (UGalathiya 5:16)

¹³ Bala uGalathiya 5:16. UJehova usincedisa ukuthi senze okulungileyo esebenzisa umoya wakhe ongcwele. Nxa sibala iLizwi likaNkulunkulu siyabe sivumela ukuthi umoya wakhe usikhokhele. Kanti njalo uJehova uyasinika umoya wakhe ongcwele nxa sisemihlanganweni. Emihlanganweni le kulabafowethu labodadewethu abazama ngamandla ukwenza okulungileyo futhi lokhu kuyasikhuthaza. (Heb. 10:24, 25; 13:7) Nxa singakhuleka kuJehova ngenhliziyo yonke simcele ukuthi asincedise silwisane lomkhuba othile, uzasinika umoya wakhe ongcwele sithole amandla okuqhubeka silwisana lawo. Lanxa izinto lezi zingasoze zenze izifiso ezimbi ziphele zizasinceda ukuthi sihle sizilahle izifiso lezi zingakasiphambanisi. Njengoba uGalathiya 5:16 esitsho, labo abahamba ngomoya ‘abasoze balandele isifiso senyama.’

14. Kungani kuqakathekile ukuthi siqhubeke silwisana lezifiso ezimbi?

¹⁴ Nxa sesiqalisile ukwenza izinto ezizasisondeza kuJehova, kuqakathekile ukuthi siqhubeke sizenza futhi silwisane lezifiso ezingayisizo ngoba kulesinye isitha sethu esingabeki izikhali phansi. Isitha lesi yisilingo sokwenza okubi. Lanxa sesibhabhathiziwe singabe silokhu sifisa ukwenza izinto okungamelanga sizenze, ngokwesibonelo ukubheja, ukudakwa lokubukela iphonografi. (Efe. 5:3, 4) Omunye umzalwane osesemutsha uthi: “Enye into engilwisana layo kakhulu yikuhawukela abanye abafana. Ngangizitshela ukuthi kuzadlula kodwa kulokhu kungihlupha lakhathesi.” Kuyini okungakunceda nxa isifiso esibi sikuthwalise amagabha avuzayo?

15. Kungani kududuza ukwazi ukuthi izifiso ezimbi ‘zijayelekile ebantwini’? (Khangela umfanekiso.)

¹⁵ Nxa kulesifiso esibi esikuthwalise nzima khumbula ukuthi awuwedwa. IBhayibhili lithi: “Akulasilingo esilehleleyo ngaphandle kwalezo ezijayelekileyo ebantwini.” (1 Khor. 10:13a) Amazwi la ayebhalelwe amaKhristu aseKhorinte awesilisa lawesifazana. Abanye babeke baba yizifebe, izitabane lezidakwa. (1 Khor. 6:9-11) Kambe ubona angani izifiso lezi zahle zanyamalala sebebhabhathiziwe? Hatshi. Bonke babengamaKhristu agcotshiweyo sibili kodwa babelokhu belesono. Akuthandabuzwa ukuthi ngezinye izikhathi labo babelwisana lezifiso ezimbi. Lokhu kuyasiduduza ngoba kutshengisa ukuthi ukulwisana lezifiso ezimbi akuqali ngathi. Singaqhubeka ‘siqinile ekukholweni, sisazi ukuthi inhlupho esiphakathi kwazo zehlela bonke abazalwane bethu abasemhlabeni.’—1 Phet. 5:9.

16. Kuyini okungamelanga sikwenze njalo kungani?

¹⁶ Ungacabangi ukuthi akulamuntu ongazwisisa isilingo olwisana laso ngoba lokhu kungaba yingozi. Kungenza ucabange ukuthi akulanto ongayenza ukuze ulwisane lesifiso leso esibi. Kodwa iBhayibhili lithi: “UNkulunkulu uthembekile futhi kasoze avume ukuthi lilingwe ngalokho elingeke lenelise ukukubekezelela. Kodwa nxa selilingwa uzakwenza ukuthi kube lendlela yokuphunyuka ukuze lenelise ukuqinisela.” (1 Khor. 10:13b) Lokhu kutshengisa ukuthi singenelisa ukulwisana lesifiso esibi kungelani lokuthi isifiso leso silamandla angakanani. UJehova uzasinika amandla okuthi singacini sesenze into embi.

17. Kuyini esingakwenza lanxa imicabango emibi ingasifikela silibele?

¹⁷ Hlala ukhumbula ukuthi izifiso ezimbi zizahlala zisivakatshela njengoba singabantu abalesono. Kodwa nxa zingathutsha singenelisa ukuthi sihle sizixotshe njengoJosefa ongazange athikaze ukubalekela umkaPhothifa. (Gen. 39:12) Akulasizatho sokuthi sicine silandele izifiso zethu ezimbi.

18-19. Yiphi imibuzo esingazibuza yona ngesikhathi sizama ukutshintsha indlela esicabanga ngayo?

¹⁸ Ukutshintsha indlela esicabanga ngayo kugoqela ukuqhubeka sisenza ukuthi indlela esicabanga ngayo lezenzo zethu kuhambelane lentando kaJehova. Yikho zihlole zikhathi zonke uzibuze imibuzo le: ‘Engikwenzayo kuyatshengisa yini ukuthi ngiyananzelela ukuthi sesiphila ezinsukwini zokucina? Kuyakhanya yini ukuthi ngiqhubeka ngisenza konke engingakwenza ukuze ngigqoke ubuntu obutsha? Ngiyawuvumela yini umoya kaJehova ukuthi uqondise impilo yami ukuze ngingacini ngilandela izifiso ezimbi?’

¹⁹ Nxa uzihlola khangela lokho ophumelele ukukwenza hatshi lokho okuphambanisayo kuphela. Ungadani nxa ungabona ulokhu usadonsa nzima kodwa yenza lokhu okutshiwo nguFiliphi 3:16 othi: “Njengoba sesithuthukile safika kulelibanga, asiqhubekeni sihamba ngokuhleleka endleleni yonale.” Ungenza njalo uJehova uzakubusisa ngoba uyabe uzama ngamandla ukutshintsha indlela ocabanga ngayo.