UJehova Uyakubusisa Esikwenzayo Ukuze Singene ISikhumbuzo

1-2. Kungani singena iSikhumbuzo minyaka yonke?

EMINYAKENI engaba ngu-2 000 eyadlulayo uJesu wanikela ngempilo yakhe ukuze sithole ukuphila okungapheliyo. Ngobusuku bokucina uJesu engakafi, watshela abalandeli bakhe ukuthi bakhumbule umhlatshelo wakhe ngokwenza umkhosi owawungelazinto ezinenginengi, ulesinkwa lewayini kuphela.—1 Khor. 11:23-26.

² Siyakulalela lokho uJesu akutshoyo ngenxa yokuthi siyamthanda kakhulu. (Joh. 14:15) Minyaka yonke ngesikhathi seSikhumbuzo sitshengisa ukuthi siyambonga ngalokho asenzela khona ngokuthandaza langokucabangisisa ngokuthi ukufa kwakhe kuqakatheke kanganani. Kanti njalo senza okunengi enkonzweni futhi sinxuse abantu abanengi ukuthi bazonanza lathi umkhosi lo oqakathekileyo. Sizimisele ukungavumeli loba yini isenze sehluleke ukungena iSikhumbuzo.

 3. Sizaxoxa ngani esihlokweni lesi?

³ Esihlokweni lesi sizaxoxa ngezinto ezintathu ezitshengisa ukuthi abantu bakaJehova bebesenza konke abangakwenza ukuthi bananze ukufa kukaJesu. Okokuqala abakwenzayo yikunanza iSikhumbuzo ngendlela uJesu asinanza ngayo. Okwesibili yikunxusa abantu ukuthi bananze iSikhumbuzo. Ikanti okwesithathu yikusinanza lanxa kunzima ukuthi benze njalo.

 4. Kuyini esikufundiswayo minyaka yonke eSikhumbuzweni futhi kungani kumele sikuqakathekise? (ULukha 22:19, 20)

⁴ Minyaka yonke eSikhumbuzweni kuba lenkulumo yeBhayibhili ephendula imibuzo eminengi ngendlela ecacileyo. Sifunda ukuthi kungani abantu bedinga ukuhlawulelwa lokuthi ukufa komuntu oyedwa kungazibhadalela njani izono zabanengi. Siyakhunjuzwa ukuthi isinkwa lewayini kumelani lokuthi ngobani okumele badle izinto lezi. (Bala uLukha 22:19, 20.) Kanti njalo sicabangisisa ngezibusiso ezizatholwa yilabo abalethemba lokuphila emhlabeni. (Isaya. 35:5, 6; 65:17, 21-23) Kumele siziqakathekise izinto lezi. Amabhiliyoni abantu awazizwisisi njalo awakwazi ukuthi ukufa kukaJesu kuqakatheke ngani. Kanti njalo ngesikhathi ekhumbula ukufa kwakhe awalandeli lokho okwenziwa nguJesu. Kubangelwa yini lokhu?

 5. Abantu basebekunanza njani ukufa kukaJesu abaphostoli abanengi sebefile?

⁵ Abaphostoli bakaJesu abanengi bathi sebefile kwaqalisa ukungena amaKhristu amanga ebandleni. (Mat. 13:24-27, 37-39) Akhuluma “izinto ezingaqondanga efuna ukudukisa abafundi ukuze bawalandele.” (Imiseb. 20:29, 30) IBhayibhili lithi uJesu wanikela ngomzimba wakhe “kwaba kanye kuphela ukuze athwale izono zabanengi.” Kodwa amaKhristu la amanga acina efundisa ‘okungaqondanga’ esithi umhlatshelo wakhe kumele unikelwe kanenginengi. (Heb. 9:27, 28) Lamuhla abantu abanengi bayawakholwa amanga la. Bayabuthana emasontweni abo zikhathi zonke ukuze bananze lokho abakuthi yisidlob futhi kwezinye izikhathi lokhu bakwenza nsuku zonke. Amanye amasonto awakunanzi kanengi ukufa kukaJesu kodwa abantu abanengi emasontweni la abazi lutho ngokuthi kutshoni. Abanye bangazibuza besithi, ‘Kambe ukufa kukaJesu kungenza izono zami zithethelelwe sibili?’ Okunye okwenza bazibuze umbuzo lo yikuthi bayabe befundiswe ngabantu abathandabuza ukuthi umhlatshelo kaJesu ungenza bathethelelwe izono. Abalandeli bakaJesu bona babancedise njani abantu ukuthi bayizwisise indaba le?

 6. Kuyini abafundi beBhayibhili abasebekutholile kusiyafika u-1872?

⁶ Ngo-1870 iqembu labafundi beBhayibhili elalikhokhelwa nguCharles Taze Russell laqalisa ukuchwayisisa iMibhalo. Babefuna ukwazi ukuthi umhlatshelo kaJesu uqakatheke kangakanani lokuthi ukufa kwakhe kumele kunanzwe njani. Kusiyafika u-1872 basebehlolisisile eBhayibhilini bathola ukuthi uJesu wabahlawulela abantu bonke sibili. Batshela abantu lokho ababekutholile besebenzisa amabhuku, amaphephandaba labomagazini. Ngemva kwalokho bahle baqalisa ukunanza iSikhumbuzo kanye ngomnyaka belingisela amaKhristu akuqala.

 7. Ukuchwayisisa okwenziwa ngabafundi beBhayibhili kudala kusinceda njani?

⁷ Lamuhla siyancedakala ngalokho okwachwayisiswa ngamadoda la kudala. UJehova usincedise sazwisisa ukuthi umhlatshelo kaJesu utshoni lokuthi usinceda ngani. (1 Joh. 2:1, 2) Kanti njalo iBhayibhili lisifundise ukuthi kulamaKhristu alethemba lokuphila ezulwini engasafi, kuphinde kube lamamiliyoni alethemba lokuphila phakade emhlabeni. Siyasondela kuJehova nxa sicabangisisa ngokuthi usithanda kangakanani lokuthi umhlatshelo kaJesu usinceda ngani. (1 Phet. 3:18; 1 Joh. 4:9) Yikho silingisela abafowethu bakudala ababethembekile ngokunxusa abanye ukuthi bazonanza lathi iSikhumbuzo silandela indlela uJesu asinanza ngayo.

 8. Kuyini abantu bakaJehova abakwenzileyo ukuze banxuse abanye eSikhumbuzweni? (Khangela umfanekiso.)

⁸ Sekuleminyaka abantu bakaJehova benxusa abantu eSikhumbuzweni. Ngo-1881 abafowethu labodadewethu e-United States banxuswa ukuthi babuthane endlini yomzalwane e-Allegheny ePennsylvania ukuze bananze umkhosi lo oqakathekileyo. Ngokuhamba kwesikhathi ibandla ngalinye laselizenzela iSikhumbuzo. NgoMarch 1940 abamemezeli batshelwa ukuthi banganxusa loba ngubani ongafuna ukubuya eSikhumbuzweni. Ngo-1960 iwofisi yegatsha yaqala ukuthumela amabandla izimemo eziphrintiweyo. Kusukela ngalesosikhathi sekuhanjiswe amabhiliyoni ezimemo. Kungani sisebenza nzima kangaka sinxusa abantu?

9-10. Ngobani abancedakalayo nxa sibanxusa eSikhumbuzweni? (UJohane 3:16)

⁹ Esinye isizatho esenza sinxuse abantu eSikhumbuzweni yikuthi sifuna labo abasingena okokuqala bafunde ngalokho uJehova loJesu abasenzele khona. (Bala uJohane 3:16.) Sithemba ukuthi lokho abazakubona futhi bakuzwe eSikhumbuzweni kuzakwenza bafune ukufunda okunengi njalo baqalise ukukhonza uJehova. Kodwa kulabanye abancedakalayo ngokubuya eSikhumbuzweni.

¹⁰ Sinxusa lalabo abangasafezi inkonzo. Siyabanxusa ukuze sibakhumbuze ukuthi uNkulunkulu ulokhu ebathanda. Abanengi bayabuya eSikhumbuzweni futhi siyathaba ukubabona. Nxa bangabuya eSikhumbuzweni kuyabakhumbuza ukuthi babekholisa njani besakhonza uJehova. Ake sixoxe ngoMonica.c Wabuyela kuJehova ngesikhathi seCOVID-19. Esengene iSikhumbuzo sika-2021 wathi: “ISikhumbuzo lesi besiqakatheke kakhulu kimi. Ngemva kweminyaka engu-20 ngingasafezi inkonzo ngitshumayeze abantu ngabanxusa eSikhumbuzweni. Lokhu ngikwenze ngenhliziyo yami yonke ngoba ngiyambonga sibili uJehova loJesu ngalokho abangenzele khona.” (Hubo. 103:1-4) Senza konke esingakwenza ukuthi sinxuse abantu eSikhumbuzweni kungelani lokuthi bayavuma kumbe abavumi ngenxa yokuthi siyakwazi ukuthi uJehova uyakuqakathekisa esikwenzayo.

11. UJehova uwubusise njani umsebenzi wethu wokunxusa abantu eSikhumbuzweni? (UHagayi 2:7)

¹¹ UJehova uyasibusisa nxa sisenza konke esingakwenza ukuthi sinxuse abantu eSikhumbuzweni. Lanxa bekulomkhuhlane weCOVID-19, ngo-2021 kwaba labantu abangu-21 367 603 eSikhumbuzweni. Inani leli liliphinda kabili elaboFakazi bakaJehova emhlabeni wonke. Kodwa ayisikho ukuthi uJehova ukhangela kuphela ukuthi bekulabantu abangaki eSikhumbuzweni. Ulendaba lomuntu ngamunye oyabe ebuyile. (Luk. 15:7; 1 Thim. 2:3, 4) Sileqiniso lokuthi nxa sinxusa abantu eSikhumbuzweni uJehova uyabe esincedisa ukuthi sithole abantu abafuna ukufunda ngaye.—Bala uHagayi 2:7.

12. Kuyini okungenza kube nzima ukuthi singene iSikhumbuzo? (Khangela umfanekiso.)

¹² UJesu wathi ezinsukwini zokucina sasizahlangana lobunzima obutshiyeneyo obugoqela ukuphikiswa ngabemuli, ukuhlukuluzwa, izimpi, imikhuhlane emibi lokunye okunengi. (Mat. 10:36; Mak. 13:9; Luk. 21:10, 11) Ngezinye izikhathi izinto lezi zenza kube nzima ukuthi sinanze ukufa kukaJesu. Kuyini okwenziwe ngabafowethu labodadewethu ukuze bangene iSikhumbuzo lanxa bephakathi kobunzima obunje njalo uJehova ubancedise njani?

13. UJehova wambusisa njani u-Artem?

¹³ Ukubotshwa. Abafowethu abasejele ngenxa yokholo lwabo benza konke abangakwenza ukuthi bananze ukufa kukaJesu. Ake sixoxe ngokwenzakala ku-Artem. Ngesikhathi seSikhumbuzo sika-2020 waphoselwa esitokisini esincane kakhulu esasijayele ukuhlala izibotshwa ezine kumbe ezinhlanu. Lanxa wayebotshiwe, wathola ezinye izinto ayengazisebenzisa eSikhumbuzweni njalo wahlela ukuthi azenzele inkulumo yeSikhumbuzo. Kodwa ezinye izibotshwa ezazilaye khonapho zazibhema futhi zihlala zikhuluma inhlamba. Pho wayezakwenzani? Wazicela ukuthi zingabhemi futhi zingakhulumi inhlamba okwehora elilodwa nje. Okwamangalisa u-Artem yikuthi izibotshwa lezi zavuma. U-Artem uthi, “Ngacela ukubaxoxela ngeSikhumbuzo.” Lanxa babethe abafuni ukuzwa lutho ngeSikhumbuzo, bathi bembona enanza iSikhumbuzo futhi esenza inkulumo yakhe bambuza ngaso.

14. Kwenziwani ukuze kunanzwe iSikhumbuzo ngesikhathi somkhuhlane weCOVID-19?

¹⁴ Umkhuhlane weCOVID-19. Kwathi sekulomkhuhlane lo abantu bakaJehova babengasenelisi ukubuthana ukuze bananze iSikhumbuzo. Kodwa lokho akuzange kubenze behluleke ukusinanza.d Amabandla ayele-inthanethi angena ngezempucuko kodwa abanengi ababengela inthanethi benza njani? Kwamanye amazwe kwenziwa uhlelo lokuthi inkulumo yeSikhumbuzo isakazwe ku-TV kumbe kurediyo. Kanti njalo amagatsha arekhoda inkulumo le ngendimi ezedlula 500 ukuze lalabo abasemaphandleni basinanze iSikhumbuzo. Kwahlelwa lokuthi kube labazalwane abazahambisa inkulumo lezo kulabo ababezifuna.

15. Ufundani kuSue?

¹⁵ Ukuphikiswa ngabemuli. Okwenza kube nzima ukuthi abanye bananze iSikhumbuzo yikuphikiswa ngabemuli. Ake sixoxe ngoSue. Ngo-2021 kuzavuka kuyiSikhumbuzo uSue watshela lowo owayemfundisa iBhayibhili ukuthi wayengasoze enelise ukuba khona eSikhumbuzweni ngenxa yokuthi abangakibo babemthwalise nzima. Udade owayemfundisa wambalela uLukha 22:44 wasemchasisela ukuthi nxa siphakathi kobunzima kumele silingisele uJesu ngokuthandaza kuJehova lokumthemba ngenhliziyo yethu yonke. Ngelanga elilandelayo uSue walungisa isinkwa lewayini wasebukela uhlelo lokuKhonza Kwekuseni lweSikhumbuzo ku-jw.org. Sekuntambama eyedwa walalela iSikhumbuzo ngefoni. Ngemva kweSikhumbuzo uSue wabhalela udade owayemfundisa iBhayibhili wathi: “Uyazi ungikhuthazile izolo. Ngenze konke engingakwenza ukuthi ngingene iSikhumbuzo njalo uJehova ungincedisile sibili. Ngiswele amazwi okuchasisa indlela engithabe ngayo futhi ngiyambonga kakhulu uJehova.” Ubona angani uJehova angakuncedisa lawe nxa ungaba sebunzimeni obunjengobukaSue?

16. Kuyini okwenza singathandabuzi ukuthi uJehova uzasibusisa nxa singenza konke esingakwenza ukuthi singene iSikhumbuzo? (URoma 8:31, 32)

¹⁶ UJehova uyathokoza kakhulu nxa sisenza konke esingakwenza ukuthi sinanze iSikhumbuzo sokufa kweNdodana yakhe. Asithandabuzi ukuthi uzasibusisa nxa singatshengisa ukuthi siyambonga ngalokho asenzele khona. (Bala uRoma 8:31, 32.) Yikho asizimiseleni ukwenza konke esingakwenza ukuthi singene iSikhumbuzo salonyaka. Asizimiseleni lokuthi senzele uJehova okunengi ngesikhathi seSikhumbuzo.