“Uthando LukaKhristu Luyasifuqa”

1-2. (a) Sizwa njani nxa sicabangisisa ngempilo kaJesu langenkonzo yakhe? (b) Sizaxoxa ngani esihlokweni lesi?

NXA singafelwa ngumuntu esimthandayo siyamkhanuka kakhulu. Ekuqaliseni singezwa ubuhlungu nxa sicabanga ukuthi kwenzakalani esezakufa ikakhulu nxa kuyikuthi wagula. Kodwa ngokuhamba kwesikhathi, singathokoza nxa singacabanga ngento asifundisa yona kumbe okunye akwenzayo, loba sicabange indlela asikhuthaza ngayo kumbe amazwi amnandi asitshela wona.

² Ngendlela efananayo kuyasidanisa nxa sicabanga ngokuhlupheka kukaJesu lokufa kwakhe. Ngesikhathi seSikhumbuzo kulapho esicabangisisa khona ngokuthi umhlatshelo kaJesu uqakatheke kangakanani. (1 Khor. 11:24, 25) Lanxa kunjalo, okunye okusithokozisa kakhulu yikucabangisisa ngakho konke uJesu akutshoyo lakwenzayo esasemhlabeni njalo kuyasikhuthaza ukucabangisisa ngalokho akwenzayo khathesi, lalokho azakwenza esikhathini esizayo. Ukucabangisisa ngezinto lezi langendlela asithanda ngayo kungasifuqa ukuthi sitshengise ukuthi siyambonga njengoba sizabona esihlokweni lesi.

 3. Kuyini okusenza siyibonge inhlawulo?

³ Ukucabangisisa ngempilo kaJesu lokufa kwakhe kuzasifuqa ukuthi sitshengise ukuthi siyabonga. Ngesikhathi uJesu esenza inkonzo yakhe emhlabeni wafundisa abantu ngezibusiso ezizalethwa nguMbuso kaNkulunkulu. Siyaliqakathekisa kakhulu iqiniso leli eliphathelane loMbuso. Siyayibonga inhlawulo ngoba isenza sibe ngabangane bakaJehova loJesu. Abantu abalokholo kuJesu baphinda babe lethemba lokuphila phakade lelokubona abantu ababathandayo bevuswa. (Joh. 5:28, 29; Rom. 6:23) Izibusiso lezi sizithola nje ngenxa yomusa kaNkulunkulu njalo akulalutho esingabhadala ngalo uJehova loJesu ngalokho abasenzele khona. (Rom. 5:8, 20, 21) Kodwa kukhona esingakwenza ukuze sibatshengise ukuthi siyababonga sibili. Singakwenza njani lokho?

 4. UMariya Magadalena watshengisa njani ukuthi wayebonga lokho uJesu ayemenzele khona? (Khangela umfanekiso.)

⁴ Omunye owesifazana ongumJuda okuthiwa nguMariya Magadalena wayethwele nzima ehlukuluzwa ngamadimoni ayisikhombisa. Kumele ukuthi wayezibona ephakathi kwelitshe lembokodo. Akucabange ukuthi wathokoza njani ngesikhathi uJesu emkhipha amadimoni wonke la. Watshengisa ukuthi uyambonga ngokuba ngumlandeli wakhe langokusebenzisa isikhathi sakhe lamandla akhe lempahla yakhe ukuze amsekele enkonzweni. (Luk. 8:1-3) Lanxa uMariya wayekuqakathekisa lokho uJesu ayemenzele khona, kungenzeka wayengakwazi ukuthi uJesu usazomenzela okukhulu esikhathini esizayo. Wayezanikela ngokuphila kwakhe ‘ukuze wonke umuntu otshengisa ukuthi uyakholwa kuye’ athole ukuphila okungapheliyo. (Joh. 3:16) Lanxa uMariya wayengakwazi lokho, watshengisa ukuthi uyambonga uJesu ngokuba qotho. Ngesikhathi uJesu ehlupheka esigodweni sokuhlutshwa, uMariya wayekhonapho eduze emduduza njalo eduduza labanye. (Joh. 19:25) UJesu esefile, uMariya labanye abesifazana ababili bathenga amakha ukuze bagcobe isidumbu sikaJesu. (Mak. 16:1, 2) UJehova wambusisa uMariya ngenxa yokuthi waba qotho kuJesu. Waba lesibusiso sokubona uJesu esevusiwe njalo wakhuluma laye kodwa abafundi abanengi kabazange basithole isibusiso lesi.—Joh. 20:11-18.

 5. Singatshengisa njani ukuthi siyambonga uJehova loJesu ngakho konke abasenzele khona?

⁵ Lathi siyabe sitshengisa ukuthi siyambonga uJehova loJesu ngalokho abasenzela khona nxa sisebenzisa isikhathi sethu lamandla ethu kanye lemali ukuze umsebenzi woMbuso uqhubekele phambili. Ngokwesibonelo singancedisa emsebenzini wokwakha lokulungisa izakhiwo zenhlanganiso.

 6. Kungani singathi inhlawulo yaphiwa ngamunye wethu?

⁶ Nxa sicabanga indlela uJehova loJesu abasithanda ngayo kuyasifuqa ukuthi lathi sibathande. (1 Joh. 4:10, 19) Okuzakwenza ubathande kakhulu yikunanzelela ukuthi uJesu wafela wena ngokwakho. Umphostoli uPhawuli wayekwazi mhlophe lokho njalo watshengisa ukuthi uyabonga ngesikhathi ebhalela amaGalathiya esithi: ‘INdodana kaNkulunkulu yangithanda yazinikela ngenxa yami.’ (Gal. 2:20) UJehova ukudonsele kuye esebenzisa inhlawulo ukuze ube ngumngane wakhe. (Joh. 6:44) Uzwa njani ngokuthi uJehova wabona okuhle kuwe wasekuthenga ngentengo ephezulu kakhulu ukuze ube ngumngane wakhe? Kumele ukuthi lokhu kwenza umthande kakhulu uJehova loJesu. Kuhle ukuzibuza umbuzo lo, ‘Uthando lolu luzangifuqa ukuthi ngenzeni?’

 7. Njengoba sibona emfanekisweni, singatshengisa njani ukuthi siyamthanda uJehova loJesu? (U-2 Khorinte 5:14, 15; 6:1, 2)

⁷ Ukuthanda uNkulunkulu loKhristu kuzasifuqa ukuthi sithande abanye. (Bala u-2 Khorinte 5:14, 15; 6:1, 2.) Enye indlela esitshengisa ngayo ukuthi siyabathanda yikukhuthala emsebenzini wokutshumayela. Kumele sitshumayeze loba ngubani esihlangana laye kungelani lokuthi ngumhlobo bani, ngowasiphi isizwe futhi kungelani lokuthi ngumyanga kumbe unothile, ukuthi ufundile kumbe kafundanga. Nxa sisenza njalo siyabe sisenza intando kaNkulunkulu, ofuna “abantu bemihlobo yonke basindiswe njalo bathole ulwazi oluqondileyo lweqiniso.”—1 Thim. 2:4.

 8. Singatshengisa njani ukuthi siyabathanda abafowethu labodadewethu?

⁸ Enye indlela esitshengisa ngayo ukuthi siyamthanda uNkulunkulu loKhristu yikuthanda abafowethu labodadewethu. (1 Joh. 4:21) Asibalahli njalo siyabancedisa nxa besebunzimeni. Siyabaduduza nxa bengafelwa, sibavakatshele nxa begula futhi senza konke okusemandleni ethu ukuthi sibakhuthaze nxa bedanile. (2 Khor. 1:3-7; 1 Thes. 5:11, 14) Siqhubeka sibathandazela sikhumbula ukuthi “umthandazo womuntu olungileyo okhuleka encenga ulamandla futhi uyanceda kakhulu.”—Jak. 5:16.

 9. Yiphi enye indlela esingatshengisa ngayo ukuthi siyabathanda abafowethu labodadewethu?

⁹ Enye indlela esitshengisa ngayo ukuthi siyabathanda abafowethu labodadewethu yikuhlalisana labo ngokuthula. Kumele sizame ngamandla ukuthethelela abanye njengoJehova. Nxa uJehova wayezimisele ukuthi iNdodana yakhe ifele izono zethu, kutsho ukuthi lathi kumele sizimisele kakhulu ukuthethelela abafowethu labodadewethu nxa bengasonela. Asifuni ukulingisela inceku embi uJesu akhuluma ngayo emzekelisweni wakhe. Lanxa inceku le yayithethelelwe isikwelede esikhulu kakhulu, yehluleka ukuthethelela enye inceku eyayilesikwelede esincane kakhulu. (Mat. 18:23-35) Nxa kulomunye ongazwisisani laye ebandleni ngeke yini wena uqale ukwenza umzamo wokuthi lenze ukuthula lingakangeni iSikhumbuzo? (Mat. 5:23, 24) Nxa ungenza njalo uyabe utshengisa ukuthi uyamthanda kakhulu uJehova loJesu.

10-11. Abadala bangatshengisa njani ukuthi bayamthanda uJehova loJesu? (U-1 Phetro 5:1, 2)

¹⁰ Abadala bangatshengisa njani ukuthi bayamthanda uJehova loJesu? Indlela eqakathekileyo abangakwenza ngayo lokhu yikuba lendaba lezimvu zikaJesu. (Bala u-1 Phetro 5:1, 2.) UJesu wakucacisa lokhu kumphostoli uPhetro. Wathi esephike uJesu kathathu kumele ukuthi wayezimisele kakhulu ukutshengisa ukuthi uyamthanda. UJesu wathi esevusiwe wabuza uPhetro wathi: “Simoni ndodana kaJohane, uyangithanda yini?” Asithandabuzi ukuthi uPhetro wayengenza loba yini ukuthi atshengise iNkosi yakhe ukuthi uyayithanda. UJesu watshela uPhetro wathi: “Yelusa amazinyane ezimvu zami.” (Joh. 21:15-17) Lakanye okwempilo yakhe yonke uPhetro watshengisa ukuthi wayeziphethe kuhle kakhulu izimvu zikaJesu, etshengisa ukuthi wayemthanda.

¹¹ Badala, ngesikhathi seSikhumbuzo lingatshengisa njani ukuthi liyakwenza lokho uJesu akutshela uPhetro? Lingatshengisa ukuthi liyamthanda uJehova loJesu ngokwelusa izimvu zakhe njalo lisenza konke elingakwenza ukuze lincede abangasafezi inkonzo ukuthi babuyele kuJehova. (Hez. 34:11, 12) Okunye elingakwenza yikutshengisa ukuthi lilendaba lalabo abafunda iBhayibhili kanye labanye abatsha abazabe bebuye eSikhumbuzweni, lisenza konke elingakwenza ukubemukela ngazo zombili abafundi laba abakusasa.

12. Ukucabangisisa ngamazwi akhulunywa nguJesu esezakufa kungasinceda njani ukuthi sibe lesibindi? (UJohane 16:32, 33)

¹² UJesu wathi esezakufa watshela abafundi bakhe wathi: “Emhlabeni lizahlupheka kodwa wobani lesibindi! Mina ngiwunqobile umhlaba.” (Bala uJohane 16:32, 33.) Kuyini okwanceda uJesu ukuthi aqhubeke elesibindi lanxa wayehlaselwa yizitha zakhe? Kuyini okwamnceda ukuthi aqhubeke ethembekile kuze kube sekufeni? Wayethembela kuJehova. UJesu wacela ukuthi uYise abakhangele abafundi bakhe ngoba wayekwazi ukuthi labo babezahlangana lenhlupho ezifanana lezakhe. (Joh. 17:11) Isicelo sakhe senza sibe lesibindi ngoba uJehova ulamandla ukwedlula loba yisiphi isitha sethu. (1 Joh. 4:4) Kanti njalo uJehova ubona konke okwenzakalayo. Asithandabuzi ukuthi nxa singathembela kuye sizanqoba loba yikuphi ukwesaba, sibe lesibindi.

13. UJosefa wase-Arimathiya watshengisa njani ukuthi ulesibindi?

¹³ Ake sixoxe ngoJosefa wase-Arimathiya. Wayehlonitshwa kakhulu ngamaJuda njalo wayelilunga leSanihedrini, umthethwandaba omkhulu wamaJuda. Kodwa uJesu esasemhlabeni, uJosefa wayengelaso isibindi. UJohane wathi: ‘Wayengumfundi kaJesu kodwa ekufihla lokho ngoba esesaba amaJuda.’ (Joh. 19:38) Lanxa uJosefa wayefuna ukuzwa ngoMbuso, wayekufihla ukuthi ulokholo kuJesu. Kungenzeka wayesesaba ukuthi uzalahlekelwa yisikhundla sakhe emphakathini. Asikwazi ukuthi kungabe kwakuyini okwakumenza azifihle. Kodwa iBhayibhili lisitshela ukuthi uJesu esefile uJosefa “waqunga isibindi waya kuPhilathu wafika wacela isidumbu sikaJesu.” (Mak. 15:42, 43) Khathesi uJosefa wayengasakufihli ukuthi uyamsekela uJesu.

14. Kumele wenzeni nxa usesaba abantu?

¹⁴ Lawe uyake wesabe abantu njengoJosefa yini? Uyake ube lenhloni zokutsho ukuthi unguFakazi kaJehova nxa usesikolo loba emsebenzini? Uyathikaza yini ukuba ngummemezeli loba ukubhabhathizwa ngenxa yokuthi uyesaba ukuthi abantu bazathini ngawe? Ungakuvumeli lokho kukuvimbele ukuthi wenze into eqondileyo. Thandaza kuJehova ngenhliziyo yonke. Mcele akunike isibindi sokuthi wenze intando yakhe. Nxa ungabona indlela uJehova aphendula ngayo imithandazo yakho uzaqina ube lesibindi.—Isaya. 41:10, 13.

15. UJesu wathi esebonakale kubafundi bakhe ukuthokoza kwabo kwabafuqa ukuthi benzeni? (ULukha 24:52, 53)

¹⁵ Ubona angathi abafundi bezwa njani lapho uJesu esifa? Kumele ukuthi badana kakhulu. Phela babetshiywe ngumngane wabo abamthandayo njalo babebona angathi ithemba labo selitshabalele. (Luk. 24:17-21) Kodwa uJesu esebonakele kubo wazinika isikhathi sokuthi abachasisele bazwisise ukuthi wayesigcwalisa njani isiphrofetho esiseBhayibhilini. Wabanika lomsebenzi oqakathekileyo okwakumele bawenze. (Luk. 24:26, 27, 45-48) UJesu wathi esebuyela ezulwini ngemva kwamalanga angu-40 abafundi bakhe babengasadananga kodwa basebethokoza kakhulu. Basebethokoza ngoba babekwazi ukuthi iNkosi yabo iyaphila lokuthi yayizabancedisa ukwenza umsebenzi eyayibanike wona. Ukuthokoza kwabo kwabafuqa ukuthi bengayekeli ukudumisa uJehova.—Bala uLukha 24:52, 53; Imiseb. 5:42.

16. Singabalingisela njani abafundi bakaJesu?

¹⁶ Singabalingisela njani abafundi bakaJesu? Okungenza sithokoze yikukhonza uJehova sonke isikhathi hatshi ngesikhathi seSikhumbuzo kuphela. Lokhu kutsho ukuthi kumele siqakathekise uMbuso kaNkulunkulu ukwedlula zonke izinto empilweni zethu. Ngokwesibonelo abanengi batshintsha uhlelo lwabo lokusebenza ukuze babe lesikhathi esinengi sokutshumayela, esokungena imihlangano kanye lokuba lokukhonza kwemuli zikhathi zonke. Abanye bakhetha ukuthi bangabi lezinto ezinenginengi ukuze benze imisebenzi eminengi ebandleni kumbe ukuthi bayencedisa lapho okulabamemezeli boMbuso abalutshwana khona. Lanxa kumele siqinisele ukuze siqhubeke sikhonza uJehova, usithembisa ukuthi uzasibusisa nxa singaqakathekisa uMbuso ukwedlula zonke ezinye izinto empilweni.—Zaga. 10:22; Mat. 6:32, 33.

17. Uzimisele ukwenzani ngesikhathi seSikhumbuzo? (Khangela umfanekiso.)

¹⁷ Sisilindele ngabomvu iSikhumbuzo mhlaka 4 April ngoLwesibili. Sebenzisa wonke amathuba ongawathola ngesikhathi seSikhumbuzo. Ungameleli ilanga leli leSikhumbuzo kuphela ukuze ucabangisise ngempilo kaJesu lokufa kwakhe kanye lothando yena loJehova abasitshengise lona. Zinike isikhathi sokubala njalo ucabangisise ngezenzakalo ezisetshathini elithi “Iviki Yokucina KaJesu Esemhlabeni” etholakala kuSengezo B12 ku-Nguqulo Yomhlaba Omutsha. Ekubaleni kwakho iBhayibhili dinga amavesi angakunceda ukuthi ube ngumuntu obongayo, olothando lesibindi futhi othokozayo. Cabangisisa udinge lezinye indlela ongatshengisa ngazo ukuthi ubonga ngenhliziyo yonke. Ungathandabuzi ukuthi uJesu uyakuqakathekisa konke okwenzayo ngalesisikhathi seSikhumbuzo—Isam. 2:19.