Taditsha Iziphrofetho EziseBhayibhilini

 1. Kuyini okungasinceda ukuthi sikuthande ukutaditsha iziphrofetho eziseBhayibhilini?

OMUNYE umzalwane osakhulayo okuthiwa nguBen wathi: “Ngiyakuthanda ukutaditsha iziphrofetho eziseBhayibhilini.” Wena uyakuthanda yini kumbe uyakwesaba ukuhlola iziphrofetho? Mhlawumbe ucabanga ukuthi ukutaditsha iziphrofetho akumnandi. Kodwa nxa ungabakwazi ukuthi kungani uJehova wafaka iziphrofetho eLizwini lakhe ungacina usukuthanda ukuzibala.

 2. Sizaxoxa ngani esihlokweni lesi?

² Isihloko lesi sizasinceda sibone ukuthi kungani kumele sizitaditshe iziphrofetho eziseBhayibhilini. Sizasinceda sibone lokuthi singazitaditsha njani. Sizahlola iziphrofetho ezimbili ezisebhukwini likaDanyeli sibone ukuthi ukuzizwisisa kungasinceda njani khathesi.

 3. Kumele senzeni nxa sifuna ukuzwisisa iziphrofetho eziseBhayibhilini?

³ Nxa sifuna ukuzwisisa iziphrofetho eziseBhayibhilini kumele sicele ukuthi uJehova asincedise. Nanku umzekeliso ongasinceda sikuzwisise lokhu. Ake sithi uvakatshela endaweni ongayaziyo kodwa uhamba lomngane oyazi kuhle leyondawo. Umngane wakho uyakwazi lapho elikhona lokuthi yiphi indlela okumele lihambe ngayo. Kumele ukuthi uyathaba sibili ukuthi umngane wakho uvumile ukukuphelekezela. UJehova ufana lomngane lo, uyakwazi ukuthi sesingaphi kwesikhathi kanye lokuthi ikusasa lisiphatheleni. Ngakho ukuze sizwisise iziphrofetho eziseBhayibhilini kumele sizithobe sicele uJehova asincedise.—Dan. 2:28; 2 Phet. 1:19, 20.

 4. Kungani uJehova wathi iziphrofetho zibhalwe eLizwini lakhe? (UJeremiya 29:11) (Khangela lomfanekiso.)

⁴ Abazali abahle bafuna abantwababo babe lekusasa elihle. UJehova laye ufuna sibe lekusasa elihle. (Bala uJeremiya 29:11.) Lanxa kunjalo uJehova utshiyene labazali, yena uyenelisa ukutsho okuzakwenzakala kusasa futhi kwenzakale njengoba kunjalo. UJehova wathi iziphrofetho zibhalwe eLizwini lakhe ukuze sikwazi izinto eziqakathekileyo ezizakwenzakala esikhathini esizayo. (Isaya. 46:10) Iziphrofetho yizipho esiziphiwe nguBaba wethu osezulwini olothando. Kodwa kuyini okungenza uqiniseke ukuthi iziphrofetho eziseBhayibhilini zizagcwaliseka?

 5. Abasakhulayo bangafundani kuMax?

⁵ Izikhathi ezinengi abasakhulayo abangoFakazi bafunda labantu abangalihloniphiyo iBhayibhili futhi abangelandaba lalo. Abakwenzayo labakukhulumayo kungenza abasakhulayo laba bacine bethandabuza ukuthi abakukholwayo kuliqiniso. Ake sixoxe ngokwenzakala komunye umzalwane okuthiwa nguMax. Uthi: “Ngisafunda ngake ngathandabuza ukuthi abazali bami bangifundisa okuliqiniso yini lokuthi iBhayibhili liphefumulelwe nguNkulunkulu sibili.” Abazali bakhe bamncedisa njani? Uthi: “Abazange bangicaphukele, kodwa ngangibona ukuthi bakhathazekile.” Abazali bakaMax baphendula yonke imibuzo ayelayo besebenzisa iBhayibhili. Kodwa uMax laye kazange agoqe izandla. Wathi: “Ngataditsha iziphrofetho eziseBhayibhilini futhi engakufundayo ngangikuxoxa labanye abasakhulayo ababesebandleni.” Kwamnceda njani lokhu? UMax uqhubeka esithi: “Ngathi sengenze njalo ngangingasathandabuzi ukuthi iBhayibhili laphefumulelwa nguNkulunkulu sibili.”

 6. Kumele wenzeni nxa uthandabuza futhi kungani kumele wenze njalo?

⁶ Nxa lawe uyake uthandabuze ukuthi iBhayibhili likhuluma iqiniso, ungaboni angani usulahlekile. Kodwa akumelanga uphonguhlala nje. Ukuthandabuza kufana lerusi. Nxa irusi ingayekelwa ingadla into eqakathekileyo icine ingaselancedo. Nxa ufuna ukukhipha izinto ezinjengerusi ezingakwenza uthandabuze lokho okukholwayo qala ngokuzibuza ukuthi, ‘Ngiyakukholwa yini okukhulunywa liBhayibhili mayelana lokuthi ikusasa lizabe linjani?’ Nxa uthandabuza kumele utaditshe iziphrofetho eziseBhayibhilini esezigcwalisekile. Ungakwenza njani lokho?

 7. Kuyini okwakusenziwa nguDanyeli okungasinceda nxa sitaditsha iziphrofetho? (UDanyeli 12:10) (Khangela lomfanekiso.)

⁷ Nxa sifuna ukuthola indlela enhle yokutaditsha iziphrofetho eziseBhayibhilini singalingisela lokho okwakusenziwa nguDanyeli. UDanyeli wayengaphongubala nje iziphrofetho, wayezitaditsha ehlose ukuthola iqiniso. UDanyeli wayethobekile, ekwazi ukuthi nxa angahlala eseduze loJehova futhi elalela imithetho yakhe uJehova wayezamncedisa ukuthi azwisise. (Dan. 2:27, 28; bala uDanyeli 12:10.) Wayetshengisa ukuthi wayethobekile ngoba wayecela ukuthi uJehova amncedise. (Dan. 2:18) Kanti njalo uDanyeli wayechwayisisa, eyihlolisisa iMibhalo eyayiphefumulelwe eyayikhona ngalesosikhathi. (Jer. 25:11, 12; Dan. 9:2) Ungamlingisela njani uDanyeli?

 8. Kuyini okwenza abanye bangafuni ukukholwa ukuthi iziphrofetho eziseBhayibhilini ziyagcwaliseka, kodwa thina kumele senzeni?

⁸ Cabangisisa ngalokho okuhlosileyo. Nxa utaditsha iziphrofetho eziseBhayibhilini uyabe uhlose ukwazi iqiniso yini? Nxa kunjalo uJehova uzakuncedisa. (Joh. 4:23, 24; 14:16, 17) Kodwa abanye abantu bataditsha iziphrofetho eziseBhayibhilini belezinye inhloso. Abanye bayabe befuna ukuthola ubufakazi bokusekela umbono wabo wokuthi iBhayibhili kaliphefumulelwanga nguNkulunkulu. Lokhu bakwenza befuna ukuthola isizathu sokuzifakela eyabo imithetho yokuthi kuyini okulungileyo loba okungalunganga besebeziphilela umathanda. Kodwa thina kumele sitaditshe iziphrofetho eziseBhayibhilini silezinhloso ezinhle. Kulokunye futhi okuqakathekileyo okuzasinceda ukuthi sizwisise iziphrofetho.

 9. Kumele sibe ngabantu abanjani ukuze sizwisise iziphrofetho eziseBhayibhilini? Chasisa.

⁹ Thobeka. UJehova uthembisa ukuthi uzabancedisa abathobekileyo. (Jak. 4:6) Ngakho kumele sithandazele ukuthi asincedise sizwisise iziphrofetho eziseBhayibhilini. Kumele sivume lokuthi sidinga ukuncediswa yinceku ethembekileyo lehlakaniphileyo uJehova ayisebenzisayo ukuze asiphe ukudla okuqinisa ukholo ngesikhathi esifaneleyo. (Luk. 12:42) Kulengqondo ukukholwa ukuthi uJehova usebenzisa iqembu elilodwa labantu ukuze asincedise sizwisise iqiniso eliseLizwini lakhe ngoba yena nguNkulunkulu ohlelekileyo.—1 Khor. 14:33; Efe. 4:4-6.

10. Ufundani kulokho okwenziwa ngu-Esther?

¹⁰ Chwayisisa. Khetha isiphrofetho osithandayo ubusuchwayisisa ngaso. Yikho okwenziwa ngomunye udadewethu okuthiwa ngu-Esther. Yena wayefuna ukuzwisisa iziphrofetho ezimayelana lokuza kukaMesiya. Uthi: “Ngathi ngileminyaka engu-15 ngaqalisa ukuchwayisisa ngidinga ubufakazi obutshengisa ukuthi kuliqiniso yini ukuthi iziphrofetho lezi zabhalwa uJesu engakabuyi emhlabeni.” Lokho akufunda ngesikhathi ebala incwadimgoqwa ezatholakala eLwandle Lwesawudo kwamnceda. Kwenza wangathandabuzi ukuthi kuliqiniso sibili ukuthi iziphrofetho lezo zabhalwa uJesu engakabuyi emhlabeni. Uthi: “Ezinye incwadimgoqwa lezi zabhalwa uJesu engakabuyi emhlabeni, okutsho ukuthi iziphrofetho ezibhalwe phakathi kwazo zazivela kuNkulunkulu sibili.” U-Esther uqhubeka esithi: “Ngabala kanenginengi ngaze ngacina sengizwisisile.” Uyathokoza ukuthi wenza konke okusemandleni akhe ukuze azwisise. Wathi esehlolisise iziphrofetho ezinengi eziseBhayibhilini wathi: “Kwangicacela sibili ukuthi okubhalwe eBhayibhilini kuliqiniso.”

11. Kusinceda ngani ukudinga ubufakazi bokuthi iziphrofetho eziseBhayibhilini ziliqiniso?

¹¹ Nxa sibona indlela iziphrofetho eziseLizwini likaNkulunkulu ezigcwaliseke ngayo siyamthemba kakhulu uNkulunkulu njalo siyayithemba kakhulu lendlela asikhokhela ngayo. Iziphrofetho eziseBhayibhilini ziyasinceda ukuthi sihlale silethemba lokuthi ikusasa lethu lizakuba lihle lanxa sihlangana lenhlupho khathesi. Asixoxeni ngeziphrofetho ezimbili ezabhalwa nguDanyeli ezigcwalisekayo khathesi. Nxa singazwisisa iziphrofetho lezo sizakwenza izinqumo ezinhle.

12. Inyawo zesithombe ezenziwe ‘ngensimbi ehlangene lebumba elibuthakathaka’ zimelani? (UDanyeli 2:41-43)

¹² Bala uDanyeli 2:41-43. Ephutsheni leNkosi uNebhukhadinezari elachasiswa nguDanyeli, inyawo zesithombe zazenziwe ‘ngensimbi ehlangene lebumba elibuthakathaka.’ Nxa siqathanisa isiphrofetho lesi lezinye ezisebhukwini likaDanyeli leleSambulo siyabona ukuthi inyawo zesithombe lesi zimela umbuso we-United States leBritain, umbuso olamandla kakhulu lamuhla. UDanyeli wathi ewuchasisa wathi: “Umbuso lo uzakuba lamandla nganxanye, ube buthakathaka nganxanye.” Kungani kuthiwa uzakuba buthakathaka nganxanye? Isizathu yikuthi abantu bayawuvimbela ukuthi ungenelisi ukusebenzisa amandla awo anjengawensimbi. Abantu laba yibo abamelwa libumba elibuthakathaka.b

13. Yiziphi izinto eziqakathekileyo esizifunda esiphrofethweni lesi?

¹³ Sithola izifundo ezinengi kulokho okwabhalwa nguDanyeli echasisa isithombe esaphutshwa yiNkosi uNebhukhadinezari, ikakhulu nxa singahlolisisa lokho akukhuluma ngenyawo zesithombe. Okokuqala, umbuso we-United States leBritain utshengisile ukuthi ulamandla. Ngokwesibonelo amazwe la ayephakathi kwamazwe anqobayo eMpini Yomhlaba yokuqala leyesibili. Lanxa kunjalo umbuso lo usubuthakathaka futhi uqhubeka usiba buthakathaka ngoba abantu bawo baqhubeka besilwa bodwa futhi belwisana lohulumende. Okwesibili, umbuso lo yiwo ozabe ulokhu ubusa ngesikhathi uMbuso kaNkulunkulu ubuya uzokhipha yonke imibuso yabantu. Lanxa amanye amazwe engaphikisana lombuso we-United States leBritain, awasoze awunqobe futhi awasoze angene endaweni yawo. Okwenza sitsho njalo yikuthi “ilitshe” elimela uMbuso kaNkulunkulu lizatshaya inyawo zesithombe liziphahlaze. Inyawo lezi zimela umbuso we-United States leBritain.—Dan. 2:34, 35, 44, 45.

14. Ukuzwisisa isiphrofetho esimayelana lenyawo zensimbi lebumba kungasinceda njani ukuthi sikhethe kuhle?

¹⁴ Uyakholwa yini ukuthi isiphrofetho sikaDanyeli esimayelana lenyawo ezenziwe ngensimbi lebumba siliqiniso? Nxa ukukholwa kuzakhanya ngendlela ophila ngayo. Awusoze utshone ugijimisana lemali kumbe ezinye izinto ezisemhlabeni lo ngoba uyabe ukwazi ukuthi sekuseduze ukuthi zitshabalaliswe. (Luk. 12:16-21; 1 Joh. 2:15-17) Ukuzwisisa isiphrofetho lesi kuzakunceda lokuthi ubone ukuqakatheka komsebenzi wokutshumayela lowokufundisa. (Mat. 6:33; 28:18-20) Nxa ungataditsha isiphrofetho lesi kungaba kuhle ukuthi uzibuze umbuzo lo, ‘Engikhetha ukukwenza empilweni yami kuyatshengisa yini ukuthi ngiyakholwa ukuthi uMbuso kaNkulunkulu usuzasusa bonke ohulumende abakhona emhlabeni?’

15. Lamuhla ngubani “inkosi yasenyakatho” njalo ngubani “inkosi yaseningizimu”? (UDanyeli 11:40)

¹⁵ Bala uDanyeli 11:40. UDanyeli isahluko 11 ukhuluma ngamakhosi amabili kumbe ohulumende abalwisanayo ngenxa yokuthi ngamunye ufuna kube nguye olamandla kulababusi bonke emhlabeni. Nxa siqathanisa isiphrofetho lesi lezinye eziseBhayibhilini sithola ukuthi “inkosi yasenyakatho” yiRussia lamazwe ayisekelayo lokuthi “inkosi yaseningizimu” ngumbuso we-United States leBritain.c

16. “Inkosi yasenyakatho” ibaphatha njani abantu bakaNkulunkulu?

¹⁶ Lamuhla “inkosi yasenyakatho” ibathwalise amagabha avuzayo abantu bakaNkulunkulu abangaphansi kombuso wayo. Abanye oFakazi bayatshaywa futhi abanye bafakwa emajele ngenxa yokholo lwabo. Okwenziwa ‘yinkosi yasenyakatho’ akubethusi abafowethu labodadewethu laba kodwa kubaqinisa ukholo. Kungani? Kungenxa yokuthi bayakwazi ukuthi ukuhlukuluzwa kwabantu bakaNkulunkulu kugcwalisa iziphrofetho ezabhalwa nguDanyeli.d (Dan. 11:41) Lathi ukwazi lokhu kuyasinceda singathandabuzi ukuthi esikuthenjiswa nguNkulunkulu kuzagcwaliseka loba sekutheni lokuthi sihlale siqotho.

17. Yibuphi ubunzima abantu bakaNkulunkulu abangaphansi ‘kwenkosi yaseningizimu’ abahlangana labo?

¹⁷ Kudala “inkosi yaseningizimu” layo yake yahlasela abantu bakaJehova. Ngokwesibonelo, ngesikhathi seMpi Yomhlaba yokuqala leyesibili abafowethu abanengi babotshwa ngenxa yokuthi babengafuni ukungena kwezombusazwe futhi labantwana baboFakazi baxotshwa ezikolo ngenxa yalesosizathu. Eminyakeni esanda kwedlula, abantu bakaJehova abangaphansi ‘kwenkosi yaseningizimu’ bebehlangana lezinye izilingo ebezingenza kube nzima ukuthi babe qotho eMbusweni kaNkulunkulu. Ngokwesibonelo, ngesikhathi sokhetho umKhristu angalingeka ukuthi asekele iqembu elithile lezombusazwe kumbe umuntu othile okhankasela ukukhethwa. Lanxa umKhristu lo engasoze ayevota uyabe esekela iqembu elithile engqondweni yakhe lasenhliziyweni yakhe. Kuqakathekile ukuthi singatshengisi ngezenzo kuphela ukuthi asingeneli kwezombangazwe kodwa sinanzelele lemicabango yethu kanye lendlela esizizwa ngayo ngezombusazwe.—Joh. 15:18, 19; 18:36.

18. Ukulwisana ‘kwenkosi yasenyakatho’ ‘lenkosi yaseningizimu’ kuyasikhathaza yini? Chasisa. (Khangela lomfanekiso.)

¹⁸ Abantu abangazikholwayo iziphrofetho eziseBhayibhilini bangabanjwa ngumhedehede nxa bebona ‘inkosi yasenyakatho ifuqana lenkosi yaseningizimu.’ (Dan. 11:40) Amakhosi la womabili alezikhali ezilamandla kakhulu okokuthi angabulala yonke into ephilayo emhlabeni. Kodwa siyakwazi ukuthi uJehova ngeke avumele ukuthi lokho kwenzakale. (Isaya. 45:18) Ngakho ukulwisana ‘kwenkosi yasenyakatho’ kanye ‘lenkosi yaseningizimu,’ akusikhathazi kodwa kuyasiqinisa ukholo njalo kwenza siqiniseke ukuthi ukuphela komumo lo wezinto sekuseduze.

19. Kuyini esingakutsho mayelana leziphrofetho eziseBhayibhilini?

¹⁹ Asikwazi ukuthi ezinye iziphrofetho eziseBhayibhilini zizagcwaliseka njani. Umphrofethi uDanyeli laye wayengazwisisi ukuthi ezinye izinto ayezibhala zazisitshoni. (Dan. 12:8, 9) Kodwa ukuthi asizwisisi ukuthi ezinye iziphrofetho zizagcwaliseka njani akutsho ukuthi azisoze zigcwaliseke. Asithandabuzi ukuthi uJehova uzasivezela ngesikhathi esiyiso lokho okumele sibekwazi njengoba wayesenza kudala.—Amos. 3:7.

20. Yiziphi iziphrofetho eziseBhayibhilini esezizagcwaliseka njalo thina kumele siqhubeke sisenzani?

²⁰ Kuzakuba lesimemezelo ‘sokuthula lokuvikeleka.’ (1 Thes. 5:3) Ngemva kwalokho imibuso yomhlaba izahlamukela inkolo yamanga ibisiyibhubhisa. (Isam. 17:16, 17) Imibuso le izathi isibhubhise inkolo yamanga, ibisihlasela abantu bakaNkulunkulu. (Hez. 38:18, 19) Lokhu yikho okuzakwenza ukuthi kube lempi yokucina i-Amagedoni. (Isam. 16:14, 16) Sileqiniso lokuthi sekuseduze ukuthi izinto zonke lezi zenzakale. Kodwa zingakenzakali asiqhubekeni sitaditsha iziphrofetho eziseBhayibhilini futhi sincedise abanye benze njalo ukuze sitshengise ukuthi siyambonga uBaba wethu osezulwini osithandayo.