Ungakhalali!

 1. Yisiphi isibusiso esilaso esenza sithokoze?

KUYASITHOKOZISA futhi kuyisibusiso ukuba ngoFakazi bakaJehova! Singabantu bakhe, njalo sitshengisa ukuthi singoFakazi bakhe ngokutshumayela langokufundisa abanye ngaye. Siyajabula nxa singancedisa umuntu ‘olesifiso sokuthola ukuphila okungapheliyo’ ukuthi laye abe nguFakazi kaJehova. (ImiSeb. 13:48) Sithokoza njengoJesu ‘owathokoza kakhulu ngomoya ongcwele’ lapho abafundi bakhe bemxoxela okuhle okwakwenzakale ngesikhathi betshumayela.—Luk. 10:1, 17, 21.

 2. Singatshengisa njani ukuthi siyawuqakathekisa umsebenzi wethu wokutshumayela?

² Siyawuqakathekisa kakhulu umsebenzi wokutshumayela. Umphostoli uPhawuli wakhuthaza uThimothi wathi: “Ziqaphele zikhathi zonke wena kanye lokufundisa kwakho.” Waphinda wathi: “Ungenza njalo uzazisindisa wena kanye lalabo abakulalelayo.” (1 Tim. 4:16) Amazwi kaPhawuli atshengisa ukuthi umsebenzi wethu wokutshumayela wenza abantu basindiswe. Siqaphela zikhathi zonke indlela esiphila ngayo ngoba siyizizalwane zoMbuso kaNkulunkulu. Sifuna ukuhlala siziphatha ngendlela ezakwenza uJehova adunyiswe futhi etshengisa ukuthi siyazikholwa izindaba ezinhle esizitshumayelayo. (Flp. 1:27) ‘Siqaphela zikhathi zonke ukufundisa kwethu’ ngokulungiselela kuhle langokucela uJehova ukuthi asincedise singakaqalisi ukutshumayela.

 3. Ngabantu bonke yini abazalalela izindaba ezinhle? Nika isibonelo.

³ Lanxa singenza konke esingakwenza ekutshumayeleni, abantu abanengi ensimini yethu bangabe bengafuni ukulalela. Lokho kwenzakala kumfowethu uGeorg Lindal owayenguye yedwa uFakazi e-Iceland ngesikhathi etshumayela khona ngo-1929 kusiya ku-1947. Wanika abantu izinkulungwane zamabhuku kodwa akula ngitsho loyedwa wabo owaba nguFakazi. Wabhala wathi: “Abanye abantu kukhanya abavumelani lalokho okutshiwo liBhayibhili njalo abanengi vele abalandaba lalo.” Kwathunyelwa abanali ababeqeqetshwe eGiliyadi ukuthi bancedise emsebenzini wokutshumayela. Kodwa kwadlula iminyaka eyisitshiyagalolunye kungakabi lomuntu we-Iceland owayesezinikele kuJehova futhi wabhabhathizwa.b

 4. Singezwa njani nxa abantu bengazilaleli izindaba ezinhle?

⁴ Siyadana nxa abantu bengazilaleli izindaba ezinhle. Singezwa ubuhlungu njengoPhawuli ‘owadabuka kakhulu futhi wezwa ubuhlungu obungapheliyo’ ngenxa yokuthi amaJuda amanengi ayengakholwa ukuthi uJesu unguMesiya. (Rom. 9:1-3) Kwesinye isikhathi ungazama ngazo zonke izindlela ukuthi umfundise kuhle lowo ofunda laye iBhayibhili njalo umthandazele kanengi kodwa angathuthuki, kuze kudingeke ukuthi ume ukufunda laye. Engxenye awukaze ufunde lomuntu aze abhabhathizwe. Kambe sekumele uzithonisise kumbe ucabange ukuthi uJehova kayibusisi inkonzo yakho? Esihlokweni lesi sizaphendula imibuzo emibili. Owokuqala, kuyini okwenza uJehova athi umsebenzi wethu wokutshumayela uyaphumelela? Owesibili, kuyini okumele sikukhangelele nxa sisekutshumayeleni?

 5. Kungani ngezinye izikhathi lokho esikwenzela uJehova kungahambi ngendlela ebesikhangelele ukuthi kuhambe ngayo?

⁵ IBhayibhili lithi umuntu owenza intando kaNkulunkulu ‘uyaphumelela kukho konke akwenzayo.’ (Hubo. 1:3) Kodwa lokhu akutsho ukuthi konke esikwenzela uJehova kuzahamba ngendlela esifisa kuhambe ngayo. Impilo ‘igcwele inhlupho’ ngenxa yokuthi sonke silesono. (Jobe. 14:1) Kanti njalo abaphikisi bangaphumelela ngezinye izikhathi ukumisa indlela umsebenzi wethu wokutshumayela esijayele ukuwenza ngazo. (1 Khor. 16:9; 1 Thes. 2:18) Manje kuyini okwenza uJehova athi umsebenzi wethu uyaphumelela? Asixoxeni ngokunye okutshiwo liBhayibhili okuzasinceda siphendule umbuzo lowu.

 6. Kuyini okwenza uJehova athi umsebenzi wethu uyaphumelela?

⁶ UJehova ukhangela indlela esisebenza nzima ngayo lokuqinisela kwethu. Ubona umsebenzi wethu uphumelela nxa siwenza sikhuthele njalo siwenza ngoba simthanda, kungelani lokuthi abantu bayalalela loba hatshi. UPhawuli wathi: “UNkulunkulu kayisuye ongalunganga ukuthi usengaze awukhohlwe umsebenzi wenu lothando elalutshengisa ebizweni lakhe lapho lisiza abangcwele njalo liqhubeka libasiza.” (Heb. 6:10) UJehova uyakukhumbula esikwenzileyo lothando esilalo lanxa kungelamuntu esimfundise waze wabhabhathizwa. Yikho okwatshiwo nguPhawuli kwabaseKhorinte kuyasebenza lakithi. Wathi: “Umsebenzi wenu eNkosini kawusoze uphelele emoyeni,” lanxa lowo msebenzi ungasahambanga ngendlela ebesifuna uhambe ngayo.—1 Khor. 15:58.

 7. Sifundani kulokho okwatshiwo ngumphostoli uPhawuli ngenkonzo yakhe?

⁷ Umphostoli uPhawuli wayengumnali otshisekayo, owabumba amabandla emadolobheni amanengi. Lanxa wasolwa ngabanye besithi kafundisi kuhle, kazange akhulume ngokuthi wayencede abantu abangaki ukuthi babe ngamaKhristu. Kodwa waphendula wathi: “Ngenze umsebenzi omkhulu kulowabo.” (2 Khor. 11:23) Lathi kumele sikhumbule ukuthi uJehova uqakathekisa kakhulu ukusebenza kwethu nzima lokuqinisela kwethu.

 8. Kuyini okumele sikukhumbule ngomsebenzi wethu wokutshumayela?

⁸ Umsebenzi wethu wokutshumayela uyamthokozisa uJehova. UJesu wathuma abafundi abangu-70 ukuthi bayetshumayela futhi “baphenduka bejabula.” Kuyini okwakubenza bajabule? Bathi: “Lamadimoni ayazehlisa kithi nxa sisebenzisa ibizo lakho.” Kodwa uJesu waqondisa indlela ababecabanga ngayo, wathi: “Lingathokoziswa yikuthi amadimoni ayazehlisa kini, kodwa thokoziswani yikuthi amabizo enu asebhaliwe emazulwini.” (Luk. 10:17-20) Wayekwazi ukuthi babengasoze bahlale bephumelela ekutshumayeleni. Phela asikwazi lokuthi bangaki abacina bengamaKhristu kulabo ababetshunyayezwe ngabafundi bakaJesu. Kwakuqondile sibili ukuthi abafundi bathokoze ngalokho ababekwenzile kodwa okwakumele kubathokozise kakhulu yikwazi ukuthi uJehova wayethokoza ngokukhuthala kwabo.

 9. Ngokwalokho okutshiwo kuGalathiya 6:7-9, sizatholani nxa singaqhubeka sitshumayela?

⁹ Sizathola ukuphila okungapheliyo nxa singaqinisela ekutshumayeleni. Nxa sikhuthele emsebenzini wokutshumayela lowokufundisa abanye ngoMbuso, siyabe ‘sihlanyela sifuna ukuthokozisa umoya.’ Kungani sisitsho njalo? Sitsho njalo ngoba siyabe sivumela umoya ongcwele kaNkulunkulu ukuthi usebenze kithi. Nxa singaqhubeka sitshumayela ‘singadinwa’ uJehova usithembisa ukuthi sizavuna ukuphila okungapheliyo, lanxa kungelamuntu esimfundise waze wabhabhathizwa.—Bala uGalathiya 6:7-9.

10. Kuyini okwenza abanye balalele kodwa abanye bengalaleli nxa sibatshumayeza?

¹⁰ Abantu yibo abazikhethelayo ukuthi bazalalela yini loba hatshi. UJesu wakucacisa lokhu emzekelisweni wakhe womlimi owahlanyela inhlanyelo emihlabathini etshiyeneyo. Ngeyodwa kuphela eyathelayo. (Luk. 8:5-8) Wathi imihlabathi etshiyeneyo imela abantu abalenhliziyo ezilamukela ngendlela ezitshiyeneyo ‘ilizwi likaNkulunkulu.’ (Luk. 8:11-15) Lathi njengomuntu ohlanyelayo asenelisi ukwenza ukuthi inhlanyelo ikhule ezinhliziyweni zabantu esibatshumayezayo, yibo abazikhethelayo. Okwethu yikuqhubeka sihlanyela inhlanyelo enhle yoMbuso. Umphostoli uPhawuli wathi “umuntu ngamunye uzathola umvuzo ohambelana lomsebenzi awenzileyo” hatshi ohambelana lempumela yomsebenzi wakhe.—1 Khor. 3:8.

11. Kungani uJehova wathokoza ngomsebenzi wokutshumayela owawenziwe nguNowa lanxa abantu bengamlalelanga? (Khangela umfanekiso ongaphandle.)

¹¹ Zinengi izinceku zikaJehova ezatshumayeza abantu ababengafuni ukulalela. Ngokwesibonelo, kukhanya uNowa waba ‘ngumtshumayeli wokulunga’ okweminyaka engaba ngu-40 loba engu-50. (2 Phet. 2:5) Akuthandabuzwa ukuthi wayelethemba lokuthi abanye bazamlalela kodwa uJehova kazange atsho lutho ngalokho. Ngesikhathi emtshela ukuthi akhe umkhumbi, wathi: “Wena uzangena emkhunjini—wena lamadodana akho lomkakho kanye labomalokazana bakho babe lawe.” (Gen. 6:18) Kanti njalo ngesikhathi uJehova emtshela ukuthi awakhe ube nganani umkhumbi, kumele ukuthi uNowa wazibonela ukuthi abantu abanengi babengasoze bamlalele nxa ebatshumayeza. Phela wawungeneli abantu abanengi. (Gen. 6:15) Njengoba sisazi, akula ngitsho loyedwa ebantwini labo ababelodlakela owamlalelayo uNowa. (Gen. 7:7) Kambe uJehova wabona angani kawenzanga kuhle umsebenzi wokutshumayela? Ngitsho! Kuye wayephumelele ngoba wayekwenze konke ayemlaye ukuthi akwenze.—Gen. 6:22.

12. Kuyini okwenza umphrofethi uJeremiya wathokoza ekutshumayeleni lanxa abantu babengelandaba layekutsho njalo bemphikisa?

¹² Okweminyaka edlula 40, umphrofethi uJeremiya laye watshumayeza abantu ababengelandaba lalokho ayekutsho lababemphikisa. ‘Izithuko lensolo’ zabantu ababemphikisa zamdanisa okokuthi waze wacabanga ukukhalala umsebenzi wakhe. (Jer. 20:8, 9) Kodwa kasakwenzanga lokho. Kuyini okwamnceda ukuthi aqhubeke ewenza futhi ethokoza kuwo? Yikucabanga ngezinto ezimbili eziqakathekileyo. Okokuqala, lokho uJehova ayemthume ukuthi akutshele abantu kwakuzabanika “ithemba kanye lesikhathi esizayo.” (Jer. 29:11) Okwesibili, uJehova wayekhethe yena uJeremiya ukuthi atshele abantu lokho ayefuna bakuzwe. (Jer. 15:16) Lathi sitshumayela izindaba ezinhle ezinika abantu ithemba futhi uJehova ukhethe thina oFakazi bakhe ukuthi senze umsebenzi lowo. Nxa singahlala sicabanga ngalokho, sizathokoza kungelani lokuthi abantu bayalalela loba hatshi.

13. Sifundani emzekelisweni kaJesu okuMakho 4:26-29?

¹³ Kuthatha isikhathi ukuthi umuntu athuthuke. UJesu wakucacisa lokho emzekelisweni wakhe womlimi ohlanyela inhlanyelo yakhe abeselala nxa sekusebusuku. (Bala uMakho 4:26-29.) Inhlanyelo leyo yakhula kancane kancane futhi akulalutho umlimi ayengalwenza ukuthi aphangisise ukukhula kwayo. Lawe kungadingeka ulinde isikhathi eside ukuthi umuntu ofunda laye iBhayibhili aze aqalise ukusebenzisa lokho akufundayo. Awungeke umenze athuthuke ngesikhathi ofuna athuthuke ngaso njengoba nje kungelalutho olungenziwa ngumlimi ukuthi inhlanyelo yakhe ikhule ngesikhathi afuna ikhule ngaso. Yikho ungadani kumbe ukhalale nxa engathuthuki ngendlela okhangelele ukuthi athuthuke ngayo. Umsebenzi wokwenza abafundi ufanana lokulima, kumele sifunde ukubekezela.—Jak. 5:7, 8.

14. Yisiphi isibonelo esitshengisa ukuthi kungathatha isikhathi ukuthi abantu basilalele nxa sibatshumayeza?

¹⁴ Kwezinye indawo singatshumayela okwesikhathi eside kungazange kube lomuntu obhabhathizwayo. Cabanga ngesibonelo sikadade Gladys Allen lodadewabo uRuby, ababengamaphayona esikhathi sonke athunyelwa edolobheni elalisesabelweni seQuebecc eCanada ngo-1959. Abantu babengafuni ukulalela izindaba ezinhle ngoba besesaba omakhelwane labaphristi beRoma. UGladys wathi: “Okweminyaka emibili sasitshumayela endlini ngendlu okwamahola angu-8 ngelanga kungelamuntu owayefuna ukukhuluma lathi. Babesithi bangabuya emnyango babone kuyithi bahle bawuvale. Kodwa asizange sikhalale.” Kancane kancane abantu bancibilika. Khathesi sokulamabandla amathathu edolobheni lelo.—Isaya. 60:22.

15. U-1 Khorinte 3:6, 7 usifundisani ngomsebenzi wokwenza abafundi?

¹⁵ Siyancedisana emsebenzini wokwenza abafundi. Bonke ebandleni bangancedisa umuntu ukuthi abhabhathizwe. (Bala u-1 Khorinte 3:6, 7.) Ngokwesibonelo, umzalwane utshiyela umuntu olesifiso sokufunda iphetshana, abesenanzelela ukuthi ngeke athole isikhathi sokuphindela emuntwini lowo. Yikho ucela omunye umfowethu ukuthi ayexoxa laye. Umfowethu lo ufika aqalise ukufunda iBhayibhili lomuntu lowo. Umfowethu uhlala ehamba labafowethu labodadewethu abatshiyeneyo futhi bonke bamkhuthaza ngendlela ezitshiyeneyo lowo ofundiswa iBhayibhili. Bonke bazamncedisa ukuthi abelokholo oluqinileyo. Lokho kuzakwenza bonke abamncedisileyo bathokoze nxa esebhabhathizwa.—Joh. 4:35-38.

16. Kungani ungathokoza ngenkonzo oyenzayo lanxa ugula kumbe ungaselamandla?

¹⁶ Kuthiwani nxa ungasenelisi ukwenza okunengi emsebenzini wokutshumayela lokufundisa ngenxa yokuthi uyagula kumbe awuselamandla owawulawo kuqala? Ungathokoza ngalokho owenelisa ukukwenza emsebenzini lo. Cabanga ngalokho okwenzakala ngesikhathi iNkosi uDavida lamadoda ayelawo sebekhulule izimuli zabo njalo bathatha lempahla eyayithunjwe ngama-Amaleki. Amanye amadoda akhe angu-200 ayedinwe efile okokuthi ayengeke ayekulwa, yikho ayesele elinde impahla. Ngemva kokunqoba empini, uDavida wathi amadoda lawo abelwe impango elingana leyamadoda ayehambe empini. (1 Sam. 30:21-25) Indaba le isifundisa okuthile ngomsebenzi wethu wokutshumayela lowokwenza abafundi. Ungabe ungasenelisi ukwenza konke ofisa ukukwenza kuwo. Kodwa nxa ungenza konke ongakwenza, uzathokoza kakhulu sonke isikhathi nxa kungaba lomuntu ofunda ngoJehova njalo abhabhathizwe, lanxa kungayisuwe omfundisileyo.

17. Kuyini okwenza simbonge uJehova?

¹⁷ Siyambonga uJehova ngendlela abona ngayo lokho esimenzela khona. Uyakwazi ukuthi ngeke sibambe abantu ngamandla ukuthi basilalele kumbe baqalise ukumkhonza. Lanxa kunjalo, uyabona ukuthi sikhuthele lokuthi siyamthanda sibili, futhi uyasibusisa. Uyasifundisa lokuthi singenzani ukuze sithokoze kungelani lokuthi senza okunganani emsebenzini wokutshumayela. (Joh. 14:12) Asithandabuzi ukuthi uJehova uzathokoza ngathi nxa singakhalali!