“Lo Nguye UNkulunkulu Wethu!”

 1, 2. (a) Kuyini ongafisa ukukubuza uNkulunkulu? (b) Kuyini uMosi akubuza uNkulunkulu?

AKE uzicabange uxoxa loNkulunkulu, uMbusi Wendawo Yonke! Wona nje umcabango wokuthi ukhuluma laye uyakwethusa. Uqala uthikaze kodwa ubusucina usenelisa ukuphendula. UNkulunkulu uyakulalela abesekuphendula njalo ukwenza ukhululeke ukubuza loba yiwuphi umbuzo ofuna ukuwubuza. Manje kuyini ongambuza khona?

² Kudala kulendoda eyathola ithuba lokukhuluma loNkulunkulu. Ibizo layo nguMosi. Umbuzo eyakhetha ukuwubuza uNkulunkulu ungakumangalisa. UMosi kazange abuze ngokuphathelane laye loba ngekusasa lakhe kumbe ngenhlupho zabantu. Kodwa wabuza ibizo likaNkulunkulu. Lokho kungakumangalisa ngoba uMosi wayevele elazi ibizo likaNkulunkulu. Ngakho lokho kutshengisa ukuthi wayefuna ukwazi okunengi. Umbuzo lo wawuqakatheke ukwedlula yonke uMosi ayengayibuza. Impendulo yawo iyasinceda sonke. Ingakunceda ukuthi usondele kuNkulunkulu. Njani? Ake sixoxe ngaleyongxoxo eyayiphakathi kukaNkulunkulu loMosi.

 3, 4. Kwahamba njani ukuze uMosi acine esekhuluma loNkulunkulu futhi babekhuluma ngani?

³ Ngalesosikhathi uMosi wayeleminyaka engu-80 futhi kwasekuleminyaka engu-40 engahlali labantu bakibo ababeyizigqili eGibhithe. Kwathi ngelinye ilanga eyeluse izimvu zikayisezala, wabona isimanga. Isihlahla sameva sasibhebha kodwa singatshi. Sasilokhu sibhebha njengomlilo olelangabi elikhulu esiqongweni sentaba. UMosi wasondela ukuze ahlole ukuthi kuyini okwakusenzakala. Kufanele ukuthi wethuka kakhulu lapho esizwa ilizwi emlilweni likhuluma laye! UNkulunkulu waxoxa loMosi okwesikhathi eside esebenzisa ingilosi. Wamtshela ukuthi abuyele eGibhithe ayekhulula ama-Israyeli ebugqilini.—U-Eksodusi 3:1-12.

⁴ UMosi wayengabuza uNkulunkulu loba yiwuphi umbuzo. Kodwa nanzelela umbuzo akhetha ukuwubuza, wathi: “Manje nxa ngingahamba ebantwini bako-Israyeli ngithi kubo, ‘UNkulunkulu wabokhokho benu ungithumile kini,’ besebesithi kimi, ‘Ngubani ibizo lakhe?’ Kumele ngithini kubo?”—U-Eksodusi 3:13.

 5, 6. (a) Umbuzo kaMosi usifundisani? (b) Kuyini abantu abakwenzileyo ngebizo likaNkulunkulu? (c) Kungani uNkulunkulu esitshele ibizo lakhe?

⁵ Umbuzo kaMosi usifundisa ukuthi uNkulunkulu ulebizo. Lokhu kuqakatheke kakhulu kodwa abantu abanengi abazihluphi ngakho. Ibizo likaNkulunkulu selakhitshwa emaBhayibhilini amanengi kwafakwa amabizo okuhlonipha anjengokuthi “Nkosi” loba “Nkulunkulu.” Le yinto embi futhi edanisa kakhulu eyenziwe ngamasonto. Nxa ufuna ukwazi umuntu, uyambuza ibizo lakhe. Lathi nxa sifuna ukwazi uNkulunkulu kufanele silazi ibizo lakhe. Lanxa singeke simbone, ulalo ibizo futhi singenelisa ukumazi nxa singafunda ngaye. Ibizo lakhe nguJehova.

⁶ Okwenza uNkulunkulu asitshele ibizo lakhe yikuthi ufuna simazi besesisondela kuye sibe ngabangane bakhe. Kambe kukhona yini okuqakatheke ukwedlula ukuba ngumngane kaNkulunkulu? Nxa singakhetha ukuba ngabangane bakhe siyabe senze isinqumo esihle ukwedlula loba yisiphi. UJehova kasitshelanga ibizo lakhe kuphela kodwa usifundise okunengi ngaye.

 7. (a) Ibizo likaNkulunkulu litshoni? (b) Kuyini uMosi ayefuna ukwazi sibili lapho ebuza uNkulunkulu ukuthi ibizo lakhe ngubani?

⁷ UJehova wazikhethela ibizo njalo ibizo lelo lilengcazelo eqakatheke kakhulu. Ibizo elithi “Jehova” litsho ukuthi “Wenza Ukuthi Kube Khona.” Kafanani laloba ngubani ngoba nguye owenza ukuthi zonke izinto zibekhona. Uphinda enze ukuthi izithembiso zakhe zigcwaliseke njalo uyenelisa ukwenza ukuthi izinceku zakhe zibe yilokho akhetha ukuthi zibe yikho. Lokhu kuyamangalisa kakhulu. Kodwa kukhona yini okunye okutshiwo libizo likaNkulunkulu? Phela uMosi wayekwazi ukuthi uJehova nguMdali njalo wayelazi ibizo likaNkulunkulu. Kwasekuleminyaka eminengi elisebenzisa. Ngakho kuyakhanya ukuthi wayefuna ukwazi okwedlula lokho. Wayefuna ukwazi okunengi ngomnikazi walelobizo. Kungathi wayesithi: ‘Ngingabatshelani abantu bakho ngawe okuzabenza babe lokholo kuwe futhi babe leqiniso lokuthi uzabakhulula sibili?’

 8, 9. (a) UJehova wawuphendula njani umbuzo kaMosi futhi kuyini okungaqondanga ngendlela impendulo kaNkulunkulu eyandise ukuhunyutshwa ngayo? (b) Utshoni umutsho othi “Ngizakuba Yilokho Engikhetha Ukuba Yikho”?

⁸ UJehova waphendula uMosi ngokumtshela okunye okutshiwo libizo lakhe futhi okuveza ubuntu bakhe. Wathi: “Ngizakuba Yilokho Engikhetha Ukuba Yikho.” (U-Eksodusi 3:14) EmaBhayibhilini amanengi ivesi le ithi: “Nginguye Enginguye.” Kodwa nxa ivesi le ihunyutshwe kuhle iveza ukuthi uNkulunkulu wayengakhulumi nje ngokuthi ukhona. Lapha uJehova wayefundisa uMosi kanye lathi ukuthi ‘wayezakuba’ yiloba yini ukuze agcwalise izithembiso zakhe. UJ. B. Rotherham uhumutsha ivesi le ngokuthi: “Ngizakuba Yilokho Engifuna Ukuba Yikho.” Enye ingcitshi ehlola isiHebheru okwabhalwa ngaso iBhayibhili ithi umutsho lo utsho ukuthi: ‘Kuloba yisiphi isimo esivukayo, uNkulunkulu ‘uzakuba’ yiloba yini ukuze alungise lesosimo.’

⁹ Kuyini uJehova ayefuna ukuthi abako-Israyeli bakuzwisise ngaye? Wayefuna bazwisise ukuthi wayezakuba yiloba yini edingakalayo ukuze abakhulule ebugqilini njalo abangenise elizweni ayebathembise lona, lanxa babengahlangana lobunzima. Ibizo lelo lalisenza ukuthi bamthembe uNkulunkulu njalo lathi lamuhla kumele simthembe. (IHubo 9:10) Ngenxa yani?

10, 11. Ibizo likaJehova likuveza njani ukuthi unguBaba olothando kulabo bonke futhi ovumelana lezimo? Nika umzekeliso.

¹⁰ Nanku umzekeliso: Abazali bayakwazi ukuthi kumele bazimisele ukwenza loba yini nxa benakekela abantwababo. Ngelanga elilodwa nje, umzali kungadingakala ukuthi akhuze, apheke, afundise, elaphe kumbe enze eminye imisebenzi eminenginengi. Abanengi bakuthola kunzima ukwenza konke lokhu. Abantwana bayabathemba kakhulu abazali babo njalo bazitshela ukuthi umama lobaba bazaqeda bonke ubuhlungu abangabe bebuzwa. Abantwana bayathemba lokuthi abazali babo bazalamula nxa kulokuxabana, balungise amathoyi aqamukileyo futhi baphendule loba yiwuphi umbuzo ongafika ezingqondweni zabo. Ngezinye izikhathi abazali abanengi bayadana nxa bebona ukuthi bayehluleka ukwenza okunengi kwalokho okumele bakwenzele abantwababo.

¹¹ UJehova laye ungumzali olothando. Kodwa uyenelisa ukuba yiloba yini ukuze anakekele abantwabakhe abasemhlabeni ngendlela engcono ukwedlula zonke nxa lokho kuvumelana lezimiso zakhe. Ngakho ibizo lakhe elithi Jehova lisinceda ukuthi simbone enguBaba olothando ukwedlula bonke. (UJakhobe 1:17) UMosi labo bonke abako-Israyeli ababethembekile bafunda ukuthi uJehova wenza ngokuvumelana lebizo lakhe. Babona uJehova esiba nguMlawuli webutho, esiba lamandla phezu kwemvelo, ebanika imithetho, esiba nguMahluleli, ebapha ukudla njalo elondoloza izigqoko lezicathulo zabo futhi esenza lokunye okunengi.

12. UFaro wayetshiyene njani loMosi?

¹² UNkulunkulu wenze ukuthi ibizo lakhe laziwe futhi usifundise okunengi ngaye. Utshengisile ukuthi lokho okutshiwo libizo lakhe kuliqiniso. Asithandabuzi ukuthi uNkulunkulu ufuna simazi. Manje wena uzakwenzani ngakho? UMosi wayefuna ukumazi uNkulunkulu. Isifiso leso esikhulu yiso esenza uMosi waba yilokho aba yikho ekuphileni njalo samenza wasondela kakhulu kuYise osezulwini. (AmaNani 12:6-8; KumaHebheru 11:27) Kodwa kuyadanisa ukuthi balutshwana abaphila ngesikhathi sikaMosi ababefuna ukumazi uNkulunkulu. UMosi wathi ekhuluma ngebizo likaJehova phambi kukaFaro, lowombusi owayeziphakamisa wathi: “Ungubani uJehova?” (U-Eksodusi 5:2) UFaro wayengafuni ukufunda okunengi ngoJehova. Wamdelela uNkulunkulu wako-Israyeli wenza angani kaqakathekanga. Lalamuhla banengi abantu abenza njengoFaro. Lokhu kwenza abantu abanengi bangakunanzeleli ukuthi uJehova unguMbusi Wendawo Yonke.

13, 14. (a) Kungani uJehova elamabizo okuhlonipha amanengi, njalo yiwaphi amanye akhona? (Khangela ibhokisi elithi “Amanye Amabizo KaJehova Okuhlonipha.”) (b) Kungani uJehova kunguye yedwa okufanele abizwe ngokuthi ‘yiNkosi Enkulu’?

¹³ UJehova uvumelana lezimo yikho elamabizo okuhlonipha amanengi. Amabizo la kawafanani lebizo lakhe elithi Jehova kodwa asifundisa okunengi ngokutshiwo libizo lakhe. Ngokwesibonelo ubizwa ngokuthi ‘yiNkosi Enkulu.’ (2 USamuyeli 7:22) Ibizo lelo lokuhlonipha litholakala izikhathi ezinengi eBhayibhilini futhi lisitshela ukuthi ulesikhundla esiphakemeyo. UJehova nguye kuphela okufaneleyo ukuba nguMbusi Wendawo Yonke. Ake sibone ukuthi kungani kunjalo.

¹⁴ Akulamuntu ofanana loJehova ngoba unguMdali. USambulo 4:11 uthi: “Ufanele Jehova Nkulunkulu wethu ukwamukela inkazimulo lodumo lamandla ngoba wadala zonke izinto njalo ngenxa yentando yakho zaba khona, zadalwa.” UJehova nguye kuphela ofanele ukudunyiswa ngalindlela. Konke okukhona kwadalwa nguye! UJehova ulufanele sibili udumo, lamandla kanye lenkazimulo ngoba nguye iNkosi Enkulu loMdali wazo zonke izinto.

15. Kungani uJehova ebizwa ngokuthi ‘yiNkosi yaphakade’?

¹⁵ Elinye ibizo lokuhlonipha elifanele uJehova kuphela ngelithi ‘Nkosi yaphakade.’ (1 KuThimothi 1:17; ISambulo 15:3) Ibizo leli litshoni? Litsho ukuthi uJehova wayevele ekhona kusukela nini lanini futhi uzabakhona kuze kube phakade. Kungabanzima ukuthi thina abantu sikuzwisise lokhu kodwa iHubo 90:2 lithi: “Kusukela nininini kuze kube nini lanini, wena unguNkulunkulu.” UJehova kalasiqalo, wayevele ekhona. Yikho ukufanele ukubizwa ngokuthi ‘nguSimakade’ ngoba wayevele ekhona kusukela nini lanini kungakabi lalutho. (UDanyeli 7:9, 13, 22) Kambe ngubani ongala ukuthi uNkulunkulu ulelungelo lokubizwa ngokuthi yiNkosi Enkulu?

16, 17. (a) Kungani singeke simbone uJehova njalo kwenzakalani kuMosi? (b) Kungani kuthiwa uJehova uphakeme kuloba yini esingayibona kumbe esingayibamba?

¹⁶ Abanye abantu bafanana loFaro, bayala ukuthi uJehova ulelungelo lokubizwa ngokuthi yiNkosi Enkulu. Okunye okwenza kube njalo yikuthi thina vele abantu siqakathekisa kakhulu lokho esikubona ngamehlo. Kodwa ngeke siyibone ngamehlo iNkosi Enkulu ngenxa yokuthi ingumoya. (UJohane 4:24) Umuntu angafa nxa engama phambi kukaJehova uNkulunkulu. Phela uJehova wathi kuMosi: “Awusoze ububone ubuso bami ngoba akulamuntu ongangibona aphile.”—U-Eksodusi 33:20; UJohane 1:18.

¹⁷ Okwenzakala kuMosi kungasinceda sizwisise amazwi lawo. UJehova wamtshengisa ingxenye nje yenkazimulo yakhe esebenzisa ingilosi. Kwasekusenzakalani? Ubuso bukaMosi bahlala isikhathi ‘bukhazimula.’ Abako-Israyeli besaba ngitsho lokukhangela ubuso bakhe. (U-Eksodusi 33:21-23; 34:5-7, 29, 30) Ngakho akulamuntu ongabona uJehova ngamehlo aphile. Kodwa lokhu sekutsho yini ukuthi uJehova kakho njengoba singeke simbone ngamehlo? Hatshi, ngoba phela kulezinto esingaziboniyo kodwa esikwaziyo ukuthi zikhona. Ngokwesibonelo siyakwazi ukuthi umoya ukhona lanxa singawuboni. Siyakwazi lokuthi amagagasi erediyo akhona lanxa singawaboni. LoJehova ukhona lanxa singamboni njalo katshintshi lanxa kungaze kudlule iminyaka eminengi kangakanani. Lokhu kutsho ukuthi yena uphakeme kulazo zonke izinto. (UMathewu 6:19) Kodwa sekusitsho yini ukuthi ukhatshana kakhulu, kazwisiseki futhi kalandaba lathi? Ake sibone.

18. UHezekheli watshengiswa wuphi umbono futhi bumelani ubuso obune ‘bezidalwa eziphilayo’ eziseduze loJehova?

¹⁸ Lanxa singeke simbone uNkulunkulu, kulamavesi aseBhayibhilini asinceda sibone kancane okusezulwini. Amanye akhona atholakala esahlukweni sokuqala sikaHezekheli. UHezekheli wabona inqola enkulu kakhulu emela inhlanganiso kaJehova yasezulwini. Iyamangalisa indlela okuchasiswa ngayo izidalwa zomoya ezilamandla ezigombolozele uJehova. (UHezekheli 1:4-10) ‘Izidalwa lezi eziphilayo’ ziseduze kakhulu loJehova njalo ukukhangeleka kwazo kusitshela okunye okuqakathekileyo ngoNkulunkulu ezimkhonzayo. Isidalwa ngasinye silobuso obune, obenkunzi, obesilwane, obokhozi lobomuntu. Kuyacaca ukuthi izidalwa lezi ezine zimela ubuntu bukaJehova obuqakathekileyo.—ISambulo 4:6-8, 10.

19. Yibuphi ubuntu bukaNkulunkulu obumelwa (a) bubuso benkunzi? (b) bubuso besilwane? (c) bubuso bokhozi? (d) bubuso bomuntu?

¹⁹ EBhayibhilini inkunzi yandise ukumela amandla, njalo lokho kufanele ngoba ilamandla kakhulu. Isilwane saziwa ngokuba lesibindi futhi eBhayibhilini sandise ukumela ukwahlulela okuhle ngoba ukuze umuntu ahlulele kuhle kumele abe lesibindi. Ukhozi lona lwaziwa kakhulu ngokwenelisa ukubona izinto ezincane lanxa zikhatshana. Ngakho ubuso bokhozi buyimela kuhle inhlakanipho kaNkulunkulu emenza enelise ukubona izinto ezizakwenzakala esikhathini esizayo. Ubuso bomuntu bona bumelani? Bumela uthando. Umuntu wenziwe ngomfanekiso kaNkulunkulu, kafanani lezinye izidalwa ngenxa yokuthi uyenelisa ukutshengisa uthando. Uthando yibuntu bukaNkulunkulu obuqakatheke kakhulu. (UGenesisi 1:26) Amandla, ukwahlulela kuhle, inhlakanipho lothando yibuntu bukaJehova okukhulunywa ngabo kakhulu eMibhalweni okokuthi kungathiwa yibo obuqakatheke kakhulu.

20. Kumele sikhathazeke yini ngokuthi ubuntu bukaJehova bungabe sebatshintsha futhi kungani usitsho njalo?

²⁰ IBhayibhili labhalwa eminyakeni eyinkulungwane eyadlulayo. Manje kumele sikhathazeke yini sicabanga ukuthi engxenye uNkulunkulu sewatshintsha? Hatshi akumelanga sikhathazeke ngoba yena ngokwakhe uthi: “Mina nginguJehova, kangitshintshi.” (UMalakhi 3:6) UJehova ngubaba omuhle sibili, katshintshi kodwa uveza ubuntu obufaneleyo kusiya ngesimo esikhona. Uthando lwakhe luqakatheke ukwedlula ukwahlulela kuhle, amandla lenhlakanipho yakhe. Lona lukhanya kukho konke akwenzayo. UJehova wahlulela ngendlela elothando futhi indlela asebenzisa ngayo amandla akhe lenhlakanipho yakhe itshengisa ukuthi ulothando. Kodwa iBhayibhili liphinda lithi: “UNkulunkulu uluthando.” (1 UJohane 4:8) Nanzelela ukuthi alithi uNkulunkulu ulothando kumbe ukuthi uNkulunkulu uyathanda. Kodwa lithi uNkulunkulu uluthando. Uthando yilo olumenza enze konke akwenzayo futhi luveza lokho ayikho.

21. Ukufunda ngobuntu bukaJehova kuzasinceda njani?

²¹ Wake wabona umntwana omncane eme labangane bakhe ekhombela uyise, ekhuluma ethabile futhi ezigqaja esithi, “Ngubabami lowana”? Abantu bakaNkulunkulu labo balezizatho ezinhle zokuzigqaja ngoJehova. IBhayibhili likhuluma ngesikhathi esizayo lapho abantu abathembekileyo abazakuthi: “Lo nguye uNkulunkulu wethu!” (U-Isaya 25:8, 9) Nxa ungaqhubeka ufunda ngobuntu bukaJehova, uzabona ukuthi uloBaba ongcono ukwedlula bonke.

22, 23. IBhayibhili lithi unjani uBaba wethu osezulwini futhi sazi njani ukuthi ufuna sibe seduze laye?

²² UJehova uBaba wethu uyasithanda futhi ulendaba lathi. Kakho khatshana lathi njengokutshiwo ngabanye abantu. Aluba uNkulunkulu ubengelamusa, besingasoze sibe lesifiso sokusondela kuye, kodwa iBhayibhili lithi uBaba wethu osezulwini kanjalo. Limbiza ngokuthi ‘nguNkulunkulu othokozayo.’ (1 KuThimothi 1:11) UJehova ulendaba lalokho abantu abakwenzayo. ‘Inhliziyo yakhe iba buhlungu’ nxa abantu besephula imithetho abapha yona. (UGenesisi 6:6; IHubo 78:41) Kodwa ‘inhliziyo yakhe iyathokoza’ nxa sisenza lokho okutshiwo liLizwi lakhe.—IZaga 27:11.

²³ UBaba wethu ufuna sibe seduze laye. ILizwi lakhe lisikhuthaza ukuthi ‘simlalamele size simthole njengoba yena engakhatshana komunye lomunye wethu.’ (ImiSebenzi 17:27) Kodwa abantu bangenelisa yini ukusondela eduze kukaJehova njengoba yena eyiNkosi Enkulu?