Isizatho Sokubaleka kukaDavida

UDAVIDA esebulele uGoliyathi, induna yamabutho ako-Israyeli okuthiwa ngu-Abhineri imletha ku-Sawuli. USawuli uyamthabela uDavida. Umenza abe yinduna yamabutho njalo umthatha ukuthi ahlale laye endlini yakhe yobukhosi.

Ngemva kwesikhathi, amasotsha esevela kulwa lamaFilisti, abesifazana bahlabela besithi: ‘USawuli ubulele izinkulungwane zakhe, kodwa uDavida ubulele amatshumi ezinkulungwane.’ Lokhu kwenza uSawuli abe lomhawu ngenxa yokuthi abantu badumisa kakhulu uDavida kulaye. Kodwa indodana kaSawuli okuthiwa nguJonathani kayilamhawu. Uyamthanda kakhulu uDavida, loDavida uyamthanda uJonathani. Yikho-ke, bobabili bathembisana ukuthi bazahlala bengabangane.

UDavida uyakwazi ukudlalisa ichacho kuhle njalo uSawuli uyawuthanda umculo amtshayela wona. Kodwa ngelinye ilanga umhawu kaSawuli wenza enze into embi kakhulu. UDavida esadlalisa ichacho, uSawuli uthatha umkhonto awujikijele kuDavida esithi: ‘Ngizamnamathisela lomduli uDavida!’ Kodwa uDavida uyavika umkhonto umkhuthe. Ngemva kwesikhathi uSawuli uyamkhutha njalo uDavida ngomkhonto. Yikho-ke uDavida usekwazi ukuthi kumele ananzelele kakhulu.

Uyasikhumbula yini isithembiso uSawuli asenzayo? Wathi wayezanika indodakazi yakhe ukuthi ibe ngumfazi wendoda eyayizabulala uGoliyathi. Ekucineni uSawuli utshela uDavida ukuthi nxa efuna ukuthatha indodakazi yakhe uMikhali, kumele aqale abulale amaFilisti ayizitha angu-100. Leli linani elikhulu sibili! USawuli ulethemba lokuthi amaFilisti azabulala uDavida. Kodwa kabambulali, yikho-ke, uSawuli unika uDavida indodakazi yakhe ukuthi ibe ngumkakhe.

Ngelinye ilanga uSawuli utshela izinceku zakhe zonke loJonathani ukuthi ufuna ukubulala uDavida. Kodwa uJonathani uthi kubaba wakhe: ‘Ungamlimazi uDavida, konanga lutho kuwe. Konke akwenzileyo kuwe kukuncedile. Wazifaka engozini ngokubulala uGoliyathi, njalo wathi wena ukubona wathaba kakhulu.’

USawuli ulalela indodana yakhe njalo uthembisa ukungamlimazi uDavida. UDavida uyabuyiselwa endlini kaSawuli ukuthi asebenze khona njengoba ebesenza kuqala. Kodwa ngelinye ilanga uDavida etshaya umculo, uSawuli uyamjikijela ngomkhonto njalo. UDavida uyavika, umkhonto utshaye umduli. Sekungokwesithathu lokhu kusenzakala! UDavida uyabona khathesi ukuthi sekumele abaleke!

Ngobusuku bona lobu, uDavida uya endlini yakhe. Kodwa uSawuli uthuma abantu ukuthi bayembulala. UMikhali uyakwazi ukuthi ubaba wakhe uhlela ukwenzani. Yikho-ke, utshela umkakhe: ‘Uma ungabaleki lamuhla ebusuku, kusasa uzabulawa.’ Ebusuku bona lobu, uMikhali uncedisa uDavida ukuthi abaleke ngokumkhupha ngewindi. UDavida kumele ahambe ecatsha lapha lalaphaya okweminyaka engaba yisikhombisa ukuze uSawuli engamtholi.