Kutanga Ko Upenyu Hunonesa

KUNJA ko munda wo Edheni, Adhamu na Evha vakawana zvineso zvizinji. Ivona vaishanda ngo simba kuti vawane cokuha. Kunja ko kuva no muti jo mucero jakanyara, ivona vaivona basi muzwa no makato akavatendeneja. Izvi ndizvona zvakaitika apo Adhamu na Evha vakapandukira Mwari pomwe no kusia kuva shamwari Jake.

Asi cakashatisisa maningi kupinda izvi, Adhamu na Evha vakatanga kufa. Rangarirai, Mwari wainga akavangwaja kuti vaizofa kudari vaizoha mucero wo muti wakati kuti. Hino, njiku yavakaha kamare ndiyona njiku yavakatanga kufa. Upenji hwakadini hwovakaita ngo kutama kupurutana Mwari!

Vana vese va Adhamu na Evha vakabahwa pakupera ko vabari vavo kugogomehwa ndi Mwari mu munda wo maruva wo Edheni. Izvi zvinoreva kuti vana vaizoita harahwa zve vofa.

Kudari basi Adhamu na Evha vakazwira Jehovha, upenyu hwaizodakajisa kwavari pomwe no vana vavo. Ivona vese vaizorarama kwenda no kwenda no mudakaro pasi pano. Apana waizoita cikarahwa, kuhwaja zve kufa.

Mwari waida kuti vandhu vararame no kucingaperi mu mudakaro, zve Iyena anogondisa kuti zuva rimwe zvicazoitika. Kuciripi basi kuita pasi pese pakanyara asi vandhu vese vacazova no uhomi hwaushoni. Vandhu vese pasi pano vacazova shamwari jakanaka umwe kuno umweni pomwe na Mwari.

Kaveta Evha aazivi kuzova no ushamwari hwokwenda no kwenda na Mwari. Ngo kudaro pa kubara vana vake zvaimunesa. Iyena wakazwa kuhwaja. Kutama kwake kuzwira Jehovha kwakamuviisira kutambujika kuzinji, andizvopi?

Adhamu na Evha vakava no vana vazinji, vorume no vokaji. Pavakabara mwana wavo wokutanga, vakamudura kuti Khaini. Wocipiri vakamudura kuti Abheri. Zvicinyi zvakaitika kwavari? Unozviziva?