CIJIJO 11

Cido

VaRoma 12:11

MUNODIKANA KUITENYI? Kanjamusanyi zve musanyi cidaka-daka co vapurutani venyu ngo kuvereketa makakanjamuka.

Mwoyo wenyu ngaubaiwe ngo masokowo. Pamunonga mecinasirira hurukuro yenyu, nasanyi kurangarijisisa ngo kudikana ko masokowo. Nasanyi kuzwisisa masoko amunoda kobhuya zvo kuti mungakwanisa kumananga mucingasoti pakatahwa.
Rangarijisisanyi ngo vapurutani venyu. Rangarijisisanyi mabesere anozoita masoko amunoda koverenga kana kusanangura ku vapurutani. Sotesesanyi manera okuzonanga masokoo kuti adakajise vapurutani venyu.
Ipanyi simba hurukuro yenyu. Mucavereketa makatondhora. Shandisanyi ndhengo jo muviri wenyu mucibarihwe zve mumeso mwenyu ngamuvonese mazwiro enyu.

Ngwariranyi kukhanganisa vapurutani venyu ngo kushandisa zvitatijo zvondhozvo mukuvo wese zvoita inga mukhuva. Zvitatijo zvenyu ngazvive no revo. Vonesanyi cido maningi-ningi mecinanga mafundo makuru zve mecikhwindijira vapurutani venyu kuti vaite ciito. Mucadovonesa cido mu njira yo kuti vapurutani avazotovonizve kuti fundo guru ngo rapi zvovaita kuti varembe.