व्यवस्था
८ “आज मैले तिमीहरूलाई दिएका सबै आज्ञा होसियारीसाथ पालन गर। यसो गऱ्यौ भने तिमीहरू जीवितै रहनेछौ+ र तिमीहरूको वृद्धि हुनेछ। अनि यहोवा परमेश्वरले तिमीहरूका पुर्खाहरूलाई दिन्छु भनेर कसम खानुभएको देश तिमीहरूले अधिकार गर्नेछौ।+ २ यहोवा तिमीहरूका परमेश्वरले तिमीहरूलाई ४० वर्षसम्म निर्जनभूमिको लामो बाटो हिँड्न लगाउनुभएको कुरा कहिल्यै नबिर्स।+ तिमीहरूलाई नम्र बनाउन र तिमीहरूको हृदयमा के छ भनेर बुझ्न+ अनि तिमीहरूले उहाँको आज्ञा पालन गर्छौ कि गर्दैनौ भनेर जाँच्न उहाँले त्यसो गर्नुभएको हो।+ ३ उहाँले तिमीहरूलाई नम्र बनाउनुभयो र तिमीहरूलाई भोकै हुन दिनुभयो+ अनि पछि मन्न* खुवाउनुभयो;+ त्यो मन्न, जसबारे तिमीहरूलाई र तिमीहरूका पितापुर्खालाई पनि थाह थिएन। मानिस रोटीको भरमा मात्र होइन तर यहोवा परमेश्वरको मुखबाट निस्कने प्रत्येक वचनको भरमा बाँच्छ भनेर देखाउन नै उहाँले यसो गर्नुभएको थियो।+ ४ ती ४० वर्षसम्म तिमीहरू कसैको लुगा फाटेन अनि कसैको खुट्टा सुन्निएन।+ ५ तिमीहरूलाई राम्ररी थाह छ, बुबाले आफ्नो छोरालाई सुधारेझैँ यहोवा तिमीहरूका परमेश्वरले तिमीहरूलाई सुधार्नुभयो।+
६ “त्यसैले आफ्ना परमेश्वर यहोवाको मार्गमा हिँडेर अनि उहाँको डर मानेर तिमीहरूले उहाँको आज्ञा पालन गर। ७ किनभने यहोवा तिमीहरूका परमेश्वरले तिमीहरूलाई असल देशमा लैजाँदै हुनुहुन्छ,+ जहाँ पहाड र बेँसी हुँदो खोलानाला बग्छ र पानीको मूल पनि प्रशस्तै छ, ८ जहाँ गहुँ, जौ, अङ्गुरको बगान, अन्जिरका रूखहरू अनि अनारका बोटहरू छन्+ अनि जुन देश जैतुनको तेल र महले भरिएको छ।+ ९ तिमीहरूलाई त्यहाँ खानेकुराको कमी हुनेछैन र केही कुराको अभाव हुनेछैन। त्यहाँका ढुङ्गाहरूमा तिमीहरूले फलाम भेट्टाउनेछौ र पहाडहरूबाट तामा निकाल्नेछौ।
१० “जब त्यहाँ तिमीहरू खाएर सन्तुष्ट हुनेछौ, तब तिमीहरूले त्यो असल देश दिनुहुने यहोवा आफ्ना परमेश्वरको प्रशंसा गर्न नभुल्नू।+ ११ तिमीहरू होसियार रहो, मैले आज तिमीहरूलाई दिएका आज्ञा, विधिविधान अनि नियमहरू तोडेर यहोवा परमेश्वरलाई कहिल्यै नभुल्नू। १२ जब तिमीहरू खाएर सन्तुष्ट हुनेछौ अनि राम्रा-राम्रा घरहरू बनाएर बस्नेछौ,+ १३ तिमीहरूका भेडाबाख्रा र गाईवस्तु धेरै हुनेछन्, सुनचाँदी प्रशस्तै हुनेछन् अनि सबै थोक छेलोखेलो हुनेछ, १४ तब तिमीहरू घमन्डले नफुल्नू+ अनि यहोवा तिमीहरूका परमेश्वरलाई नभुल्नू। किनभने उहाँले तिमीहरूलाई दासत्वको घर—मिश्रबाट छुटाएर ल्याउनुभयो।+ १५ उहाँले तिमीहरूलाई विशाल अनि भयानक निर्जनभूमिको बाटो हुँदै ल्याउनुभयो, जहाँ विषालु सर्प र बिच्छीहरू थिए अनि पानी नभएर जमिन सुक्खा थियो।+ त्यहाँ उहाँले चट्टानबाट पानी निकाल्नुभयो।+ १६ अनि तिमीहरूलाई मन्न खुवाउनुभयो,+ जसबारे तिमीहरूका पितापुर्खालाई थाहै थिएन। तिमीहरूको परीक्षा गर्न र तिमीहरूलाई नम्र बनाउन उहाँले यसो गर्नुभएको थियो,+ जसले गर्दा पछि तिमीहरूकै भलो हुने थियो।+ १७ तिमीहरू मनमनै यस्तो सोचौला, ‘मेरो आफ्नै पौरखले, मेरो आफ्नै हातको शक्तिले आज यत्रो धनसम्पत्ति कमाएँ।’+ १८ तर नबिर्स, तिमीहरूलाई धनसम्पत्ति कमाउन सक्ने शक्ति दिनुहुने यहोवा तिमीहरूका परमेश्वर नै हुनुहुन्छ।+ उहाँले तिमीहरूका पितापुर्खासित कसम खाएर गरेको करार पूरा गर्न यसो गर्नुभएको हो र यो कुरा आज तिमीहरू आफैले देखेका छौ।+
१९ “यदि तिमीहरूले यहोवा आफ्ना परमेश्वरलाई बिर्स्यौ, अरू देवताको पछि लाग्यौ, उनीहरूलाई पुज्यौ र उनीहरूलाई ढोग्यौ भने आज म तिमीहरूलाई चेतावनी दिन्छु, तिमीहरू निश्चय नाश हुनेछौ।+ २० तिमीहरूले यहोवा तिमीहरूका परमेश्वरको कुरा सुनेनौ भने जसरी यहोवाले तिमीहरूकै सामने अरू जातिहरूलाई नाश गर्दै हुनुहुन्छ, त्यसरी नै तिमीहरूलाई पनि नाश गर्नुहुनेछ।+