सहायक सेवकहरूले मण्डलीमा महत्त्वपूर्ण कामहरू गर्छन्‌। प्रेषित पावल यी वफादार पुरुषहरूप्रति कृतज्ञ थिए। त्यसैले तिनले फिलिप्पीका ख्रिष्टियनहरूलाई लेखेको पत्रमा एल्डरहरूका साथै सहायक सेवकहरूलाई पनि तोकेरै अभिवादन गरे। (फिलि. १:१) चाहे जवान होऊन्‌ वा वृद्ध, बप्तिस्मा गरिसकेका थुप्रै भाइहरू सहायक सेवकको रूपमा सेवा गर्न पाउँदा निकै खुसी छन्‌। जस्तै: डेभान भाइ १८ वर्षको उमेरमै सहायक सेवक नियुक्‍त भएका थिए। अर्कोतर्फ लुइस भाइ भने सहायक सेवक नियुक्‍त हुँदा ५० वर्ष कटिसकेका थिए। तिनी यसो भन्छन्‌: “मण्डलीका भाइबहिनीले मलाई धेरै प्रेम देखाउनुभएको छ। अब सहायक सेवकको रूपमा आफूले पाएको जिम्मेवारी पूरा गर्दा म पनि उहाँहरूप्रति प्रेम देखाउन सक्छु। यस्तो सुअवसर पाएकोमा म साँच्चै कृतज्ञ छु!” थुप्रै सहायक सेवकहरू त्यस्तै महसुस गर्छन्‌। भाइहरू हो, यदि तपाईँले बप्तिस्मा गरिसक्नुभएको छ तर सहायक सेवक नियुक्‍त हुनुभएको छैन भने के तपाईँ त्यसलाई आफ्नो लक्ष्य बनाउन सक्नुहुन्छ? w२४.११ पृ. १४ अनु. १-३

राजा हिजकियाह ३९ वर्षको छँदा तिनलाई एउटा गम्भीर रोग लाग्यो। यहोवाले भविष्यवक्‍ता यसैयामार्फत तिनलाई यसो भन्‍नुभयो: “अब तिम्रो रोग निको हुनेछैन, तिमी मर्नेछौ।” (२ राजा २०:१) त्यो खबर पाएपछि हिजकियाहलाई अब बाँच्ने आसै छैन जस्तो लागेको हुनुपर्छ। तिनी डाँको छोडेर रोए र यहोवालाई व्यग्र प्रार्थना गरे। हिजकियाहले आँसुको धारा बगाउँदै गरेको प्रार्थनालाई यहोवाले बेवास्ता गर्नुभएन। यहोवाले तिनलाई यसैयामार्फत यसो भन्‍नुभयो: “मैले तिम्रो बिन्ती सुनेँ र तिमीले बगाएको आँसु पनि देखेँ। त्यसैले म तिमीलाई निको पार्नेछु।” यहोवाले तिनको आयु लम्ब्याइदिने अनि यरुसलेमलाई अस्सेरियालीहरूको हातबाट जोगाउने प्रतिज्ञा पनि गर्नुभयो। (२ राजा २०:४-६) के तपाईँ कुनै गम्भीर स्वास्थ्य समस्याले गर्दा निराश हुनुहुन्छ? त्यसो हो भने यहोवालाई आफ्नो मनको बह पोखाउनुहोस्‌। धरधरी आँसु बगाउँदै प्रार्थना गर्नुपरे तापनि उहाँले तपाईँको पुकारा सुन्‍नुहुनेछ। बाइबलले यहोवा “कोमल कृपाका बुबा र सबै सान्त्वनाका परमेश्‍वर हुनुहुन्छ” अनि “उहाँले हाम्रा सबै परीक्षामा सान्त्वना दिनुहुन्छ” भनेर आश्‍वासन दिन्छ।—२ कोरि. १:३, ४. w२४.१२ पृ. २४ अनु. १५-१७

हामीले फेरि जीवित भएर आएकाहरूलाई स्वागत गर्न पाउनेछौँ। अनि सृष्टिका विभिन्‍न कुराहरूलाई नजिकबाट नियालेर यहोवाबारे अझ धेरै कुरा बुझ्नेछौँ। त्यो क्षण कत्ति रमाइलो होला! (भज. १०४:२४; यसै. ११:९) अझ उत्तम कुरा त के हो भने हामीले सफा अन्तस्करण राखेर यहोवाको उपासना गर्न सक्नेछौँ किनभने त्यतिबेला हामीले पाप गर्नेछैनौँ र हामीलाई दोषी भावनाले सताउनेछैन। त्यसोभए के तपाईँ “पापको क्षणिक सुखभोग गर्न” भविष्यमा पाइने इनामलाई लत्याउनुहुन्छ? (हिब्रू ११:२५) त्यसो त पक्कै गर्नुहुन्‍न। हामीले भविष्यमा पाउने आशिष्‌हरूलाई अहिले गर्नुपर्ने त्यागहरूसित तुलनै गर्न सकिँदैन। नबिर्सनुहोस्‌, सुन्दर पृथ्वी आशामा मात्रै सीमित हुनेछैन। त्यो वास्तविकतामा परिणत हुनेछ। तर यी सब यहोवाले हामीलाई असाध्यै प्रेम गरेर आफ्नो छोरा दिनुभएकोले मात्र सम्भव भएको हो। w२५.०१ पृ. २९ अनु. १२