व्यवस्था

२३ “लिङ्‌ग काटिएको वा अण्डकोष कुच्याइएको मानिस यहोवा परमेश्‍वरको सभाको भाग हुन पाउनेछैन।+

२ “नाजायज सम्बन्धबाट जन्मेको कुनै पुरुष यहोवा परमेश्‍वरको सभाको भाग हुन पाउनेछैन।+ उसको दसौँ पुस्तासम्म कोही पनि यहोवा परमेश्‍वरको सभाको भाग हुन पाउनेछैन।

३ “अम्मोनीहरू र मोआबीहरू यहोवा परमेश्‍वरको सभाको भाग हुन पाउनेछैनन्‌।+ उनीहरूको दसौँ पुस्तासम्म कोही पनि यहोवा परमेश्‍वरको सभाको भाग हुन पाउनेछैन। ४ किनभने तिमीहरू मिश्रबाट निस्केर आउँदा तिनीहरूले तिमीहरूलाई खाना र पानी दिएनन्‌+ अनि तिमीहरूलाई सराप्न मेसोपोटामियाको पेथोरमा बस्ने बेअरका छोरा बालामलाई पैसा दिएर बोलाए।+ ५ तर यहोवा तिमीहरूका परमेश्‍वरले बालामको कुरा सुन्‍नुभएन।+ बरु तिनले दिएको सरापलाई यहोवा तिमीहरूका परमेश्‍वरले आशिष्‌मा बदलिदिनुभयो।+ किनभने यहोवा तिमीहरूका परमेश्‍वर तिमीहरूलाई माया गर्नुहुन्छ।+ ६ तिमीहरूले तिनीहरूको शान्ति र संवृद्धिको लागि कहिल्यै केही नगर्नू।+

७ “तिमीहरूले एदोमीहरूलाई घृणा नगर्नू किनभने तिनीहरू तिमीहरूका दाजुभाइ हुन्‌।+

“तिमीहरूले मिश्रीहरूलाई पनि घृणा नगर्नू किनभने तिनीहरूको देशमा तिमीहरू प्रवासी भएर बसेका थियौ।+ ८ तेस्रो पुस्तादेखि तिनीहरू यहोवा परमेश्‍वरको सभाको भाग हुन पाउनेछन्‌।

९ “तिमीहरू शत्रुहरूसित लडाइँ गर्न छाउनी हालेर बस्दा आफूलाई अशुद्ध पार्ने सबै कुरादेखि जोगिएर बस्नू।+ १० यदि राती सुतेको बेला वीर्य निस्केको कारण कुनै पुरुष अशुद्ध भयो भने ऊ छाउनीबाहिर निस्कोस्‌ र त्यहीँ बसोस्‌।+ ११ साँझ घाम अस्ताइसकेपछि ऊ नुहाओस्‌; त्यसपछि मात्र ऊ छाउनीभित्र पस्न सक्छ।+ १२ तिमीहरूले दिसा बस्नको लागि छाउनीबाहिर एउटा ठाउँ* छुट्ट्याउनू र दिसा गर्न त्यहीँ जाने गर्नू। १३ तिमीहरूले अरू औजारहरूसँगै खन्‍ने औजार पनि राख्नू। दिसा बस्न जाँदा त्यही औजारले खाल्टो खन्‍नू र दिसा बसिसकेपछि पुरिदिनू। १४ यहोवा तिमीहरूका परमेश्‍वर तिमीहरूलाई शत्रुहरूदेखि छुटाउन र उनीहरूलाई तिमीहरूको हातमा सुम्पन छाउनीमा तिमीहरूमाझ घुमिरहनुहुन्छ।+ त्यसैले तिमीहरूको छाउनी पवित्र हुनुपर्छ। उहाँले तिमीहरूबीच कुनै अशुद्ध कुरा देख्न नपरोस्‌ नत्र त उहाँले तिमीहरूलाई त्याग्नुहुनेछ।+

१५ “कुनै दास आफ्नो मालिकको घरबाट भागेर तिमीहरूकहाँ आयो भने उसलाई उसको मालिकको हातमा नसुम्पनू। १६ ऊ तिमीहरूको सहरहरूमध्ये जहाँ बस्न चाहन्छ, त्यहीँ बस्न दिनू। उसलाई कुनै किसिमको दुर्व्यवहार नगर्नू।+

१७ “इस्राएलको कुनै पनि स्त्री मन्दिरको वेश्‍या नबनोस्‌।+ त्यसैगरि इस्राएलको कुनै पनि पुरुष मन्दिरमा पुरुषहरूसित सम्बन्ध राख्ने व्यक्‍ति नबनोस्‌।+ १८ यस्तो काम गर्ने पुरुष* वा स्त्रीले आफूले कमाएको पैसा आफ्नो भाकल पूरा गर्न यहोवा परमेश्‍वरको घरमा भेटीस्वरूप ल्याउन पाउनेछैन। किनभने त्यस्ता पुरुष वा स्त्रीलाई यहोवा परमेश्‍वर घृणा गर्नुहुन्छ।

१९ “तिमीहरूले आफ्ना इस्राएली दाजुभाइलाई ऋण दिँदा त्यसको ब्याज नलिनू,+ चाहे त्यो ऋण पैसा होस्‌, खानेकुरा होस्‌ वा ब्याज लिन सकिने किसिमको ऋण नै किन नहोस्‌। २० तिमीहरूले विदेशीहरूसित ब्याज लिन सक्छौ+ तर आफ्ना इस्राएली दाजुभाइसित भने ब्याज नलिनू।+ यसो गऱ्‍यौ भने मात्र तिमीहरूले अधिकार गर्न लागेको देशमा यहोवा तिमीहरूका परमेश्‍वरले तिमीहरूले गर्ने हरेक कामकुरामा आशिष्‌ दिनुहुनेछ।+

२१ “तिमीहरूले यहोवा परमेश्‍वरसामु कुनै भाकल गऱ्‍यौ भने+ त्यसलाई पूरा गर्न ढिलो नगर।+ तिमीहरूले त्यो भाकल पूरा गरेको यहोवा परमेश्‍वर चाहनुहुन्छ। भाकल पूरा गरेनौ भने तिमीहरूले पाप गरिरहेका हुनेछौ।+ २२ तर भाकल गरेका छैनौ भने तिमीहरूले पाप गरेका हुनेछैनौ।+ २३ तिमीहरू आफूले दिएको वचन पूरा गर।+ यहोवा परमेश्‍वरको लागि तिमीहरू जे भाकल गर्छौ, त्यो स्वैच्छिकभेटी हो। तिमीहरूले त्यो पूरा गर्नै पर्छ।+

२४ “तिमीहरू आफ्नो छिमेकीको अङ्‌गुर बगानमा गयौ भने आफूलाई मन लागेजति खान सक्छौ तर आफ्नो भाँडामा चाहिँ नलग्नू।+

२५ “तिमीहरू आफ्नो छिमेकीको खेतमा गयौ भने त्यहाँको अन्‍न टिपेर खान सक्छौ तर उसको खेतमा हँसियाचाहिँ नलगाउनू।+