भजनसङ्‌ग्रह

९० हे यहोवा, पुस्तौँपुस्तादेखि तपाईँ हाम्रो निवासस्थान*+ हुनुभएको छ।

 २ पहाडहरूको जन्म हुनुअघि नै,

तपाईँले पृथ्वी र उर्वर भूमिलाई अस्तित्वमा ल्याउनुअघि नै,*+

अनादिदेखि अनन्तसम्म* तपाईँ नै परमेश्‍वर हुनुहुन्छ।+

 ३ तपाईँ मरणशील मानिसलाई माटोमा फर्काइदिनुहुन्छ;

तपाईँ भन्‍नुहुन्छ: “ए मानिसका सन्तान हो, माटोमा फर्किजाओ।”+

 ४ हजार वर्ष तपाईँको नजरमा हिजो बिताएको एक दिनजस्तै,+

रातको एक प्रहरजस्तै हो।

 ५ तपाईँ तिनीहरूको अन्त गरिदिनुहुन्छ;+ तिनीहरू केवल निद्राजस्ता छन्‌;

तिनीहरू बिहान पलाउने घाँसजस्ता छन्‌।+

 ६ बिहान त्यो मौलाउँछ र ताजा हुन्छ

तर बेलुकीसम्ममा त्यो ओइलाउँछ र सुकिजान्छ।+

 ७ हामी तपाईँको दन्केको रिसले भस्म भएका छौँ,+

तपाईँको क्रोधले भयभीत भएका छौँ।

 ८ तपाईँ हाम्रा गल्तीहरू आफ्नो सामुन्‍ने राख्नुहुन्छ;*+

हामीले गुप्तमा गरेका कामहरू तपाईँको मुहारको ज्योतिमा उदाङ्‌ग हुन्छन्‌।+

 ९ तपाईँको क्रोधले गर्दा हाम्रा दिनहरू घट्‌दै जान्छन्‌;

हाम्रा वर्षहरू सुस्केराजस्तै बितिजान्छन्‌।

१० हाम्रो आयु त केवल ७० वर्ष हुन्छ,

जो हट्टाकट्टा छ, उसको आयु ८० पुग्ला।+

तर ती वर्षहरू पनि दुःख र पीडाले भरिएका हुन्छन्‌;

ती चाँडै बित्छन्‌ र हामी बिलाइहाल्छौँ।+

११ तपाईँको क्रोधमा कति शक्‍ति छ, कसले बुझ्न सक्छ?

तपाईँको क्रोध तपाईँलाई दिनुपर्ने भयजत्तिकै ठूलो छ।+

१२ हाम्रा दिनहरू गन्‍न हामीलाई सिकाउनुहोस्‌+

ताकि हामीले बुद्धिले भरिएको हृदय पाउन सकौँ।

१३ हे यहोवा, फर्कनुहोस्‌!+ यस्तो कहिलेसम्म भइरहन्छ?+

आफ्ना सेवकहरूमाथि दया देखाउनुहोस्‌।+

१४ बिहान आफ्नो अटल प्रेमले+ हामीलाई सन्तुष्ट पार्नुहोस्‌

अनि हामी जीवनका बाँकी दिनहरूमा खुसीले कराउन र रमाउन सकौँ।+

१५ हामीलाई जति दिन तपाईँले दुःख दिनुभएको थियो, त्यति नै दिन खुसी दिनुहोस्‌,+

जति वर्ष हामीमाथि विपत्ति आइपऱ्‍यो, त्यति नै वर्ष हामी रमाउन सकौँ।+

१६ तपाईँका सेवकहरूले तपाईँको काम देखून्‌,

तिनीहरूका सन्तानले तपाईँको वैभव देखून्‌।+

१७ हाम्रा परमेश्‍वर यहोवाको अनुग्रह हामीमाथि रहोस्‌;

हाम्रा हातको कामलाई सफल* पार्नुहोस्‌।

हो, हाम्रा हातको कामलाई सफल* पार्नुहोस्‌।+