व्यवस्था

१४ “तिमीहरू यहोवा परमेश्‍वरका सन्तान हौ। तिमीहरूले कसैको मृत्युको शोक मनाउन शरीरमा काटेर चोट नबनाउनू+ अनि आफ्नो आँखीभुइँ नखौरनू।+ २ किनभने तिमीहरू यहोवा परमेश्‍वरको निम्ति एक पवित्र जाति हौ।+ यहोवा तिमीहरूका परमेश्‍वरले पृथ्वीका सबै जातिमध्ये आफ्नो प्रजा र आफ्नो विशेष* सम्पत्ति बनाउन तिमीहरूलाई रोज्नुभएको छ।+

३ “तिमीहरूले कुनै पनि अशुद्ध कुरा नखानू।+ ४ तिमीहरूले खान हुने जनावर यी हुन्‌:+ बहर, भेडा, बाख्रा, ५ हरिण, मृग, बँराठ, जङ्‌गली बाख्रा, कृष्णसार, जङ्‌गली भेडा अनि पहाडी भेडा। ६ खुर चिरिएको र उग्राउने जनावर तिमीहरूले खान सक्छौ। ७ तिमीहरूले उग्राउने तर खुर नचिरिएका जनावरहरूचाहिँ नखानू। जस्तै: उँट, जङ्‌गली खरायो र भीरखरायो। किनभने यिनीहरू उग्राउँछन्‌ तर यिनीहरूको खुर चिरिएका हुँदैनन्‌। यिनीहरू तिमीहरूका निम्ति अशुद्ध हुन्‌।+ ८ तिमीहरूले सुँगुर पनि नखानू किनभने त्यसको खुर चिरिएको हुन्छ तर त्यसले उग्राउँदैन। त्यो तिमीहरूका लागि अशुद्ध हो। तिमीहरूले त्यसको मासु नखानू वा त्यसको सिनु नछुनू।

९ “तिमीहरूले पानीमा बस्ने पखेटा र कत्ला भएका जीवजन्तु खान सक्छौ।+ १० तर तिमीहरूले पखेटा र कत्ला नभएका जीवजन्तुचाहिँ नखानू। त्यो तिमीहरूका लागि अशुद्ध हो।

११ “तिमीहरूले सबै शुद्ध चराचुरुङ्‌गी खान सक्छौ। १२ तर तिमीहरूले यी चराचुरुङ्‌गी नखानू: चील, मलाहा-चील, कालो गिद्ध,+ १३ रातो चील, कालो चील र सबै किसिमका चील, १४ सबै किसिमका काग, १५ सुतुरमुर्ग,* लाटोकोसेरो, गङ्‌गाचील, सबै किसिमका बाज, १६ सानो खालको लाटोकोसेरो, लामो कान हुने लाटोकोसेरो, राजहाँस, १७ घाउँके हावासील,* गिद्ध, जलेवा, १८ गरुड, सबै किसिमका बकुल्ला, फाप्रेचरा र चमेरो। १९ पखेटा भएका र झुन्डमा रहने किराफट्‌याङ्‌ग्रा तिमीहरूका निम्ति अशुद्ध हुन्‌। तिमीहरूले ती नखानू। २० तर तिमीहरूले उड्‌न सक्ने सबै शुद्ध जीव खान सक्छौ।

२१ “तिमीहरूले मरिसकेको जनावर भेट्टायौ भने त्यसको मासु नखानू।+ तिमीहरूले त्यो आफ्नै सहरमा बस्ने विदेशीलाई दिन सक्छौ र उसले त्यो खान सक्छ अथवा त्यो तिमीहरूले कुनै विदेशीलाई बेच्न सक्छौ। किनभने तिमीहरू यहोवा तिमीहरूका परमेश्‍वरको निम्ति एक पवित्र जाति हौ।

“तिमीहरूले बाख्राको पाठोको मासु त्यसको माउको दूधमा नउमाल्नू।+

२२ “तिमीहरूले हरेक वर्ष आफ्नो खेतमा हुने सबै उब्जनीबाट दशांश* दिन नबिर्सनू।+ २३ यहोवा तिमीहरूका परमेश्‍वरले आफ्नो नामको महिमा गर्न जुन ठाउँ रोज्नुहुन्छ, त्यहाँ तिमीहरूले अन्‍नको, नयाँ मद्यको र तेलको दस भागको एक भाग अनि तिमीहरूका गाईवस्तु र भेडाबाख्राको पहिलो सन्तान उहाँसामु खान सक्छौ।+ यसो गऱ्‍यौ भने तिमीहरूले यहोवा तिमीहरूका परमेश्‍वरको सधैँ डर मान्‍न सिक्नेछौ।+

२४ “तर यहोवा तिमीहरूका परमेश्‍वरले आफ्नो नामको महिमा गर्न रोज्नुभएको ठाउँ+ तिमीहरू बसेको ठाउँदेखि टाढा छ र यहोवा तिमीहरूका परमेश्‍वरले प्रशस्त आशिष्‌ दिनुभएकोले तिमीहरूलाई आफ्नो उब्जनीको दशांश त्यहाँसम्म लैजान गाह्रो छ भने २५ त्यो दशांश तिमीहरू बेच्न सक्छौ। त्यसबाट पाएको पैसा लिएर यहोवा तिमीहरूका परमेश्‍वरले रोज्नुभएको ठाउँमा जानू। २६ अनि त्यो पैसाले तिमीहरूले बहर, भेडा, बाख्रा, दाखमद्य,* अरू किसिमको मद्य वा आफूलाई मन लागेको जुनसुकै कुरा किन्‍न सक्छौ। त्यसपछि यहोवा तिमीहरूका परमेश्‍वरसामु आफ्नो घरानासँगै ती खानू र खुसी मनाउनू।+ २७ तिमीहरूले आफ्नो सहरमा बस्ने लेवीहरूको ख्याल राख्न नबिर्सनू+ किनभने तिमीहरूले पैतृक सम्पत्ति वा अंश पाएका छौ तर तिनीहरूले भने केही पाएका छैनन्‌।+

२८ “तिमीहरूले प्रत्येक तीन वर्षको अन्तमा तेस्रो वर्षको उब्जनीको सबै दशांश आफ्नै सहरमा जम्मा गर्नू।+ २९ सहरमा कुनै पैतृक सम्पत्ति वा अंश नपाएका लेवीहरूले अनि विदेशीहरू, अनाथहरू* र विधवाहरूले ती खाऊन्‌ र सन्तुष्ट होऊन्‌।+ यसो गऱ्‍यौ भने यहोवा तिमीहरूका परमेश्‍वरले तिमीहरूको हरेक काममा आशिष्‌ दिनुहुनेछ।+