पाठ ५७

तपाईँले गम्भीर पाप गर्दा के गर्नुपर्छ?

छापिएको संस्करण

तपाईँ यहोवालाई मनैदेखि प्रेम गर्नुहुन्छ र उहाँको चित्त नदुखाउन हरप्रयास गर्नुहुन्छ। तैपनि तपाईँ कहिलेकाहीँ गल्ती गर्न पुग्नुहुन्छ। कतिपय गल्ती गम्भीर किसिमका हुन्छन्‌। (१ कोरिन्थी ६:९, १०) यदि तपाईँले गम्भीर पाप गर्नुभयो भने यो कुरा नबिर्सनुहोस्‌, यहोवा अझै पनि तपाईँलाई माया गर्नुहुन्छ अनि क्षमा र मदत गर्न इच्छुक हुनुहुन्छ।

१. हामीले यहोवाबाट क्षमा पाउन के गर्नै पर्छ?

यहोवालाई प्रेम गर्ने व्यक्‍ति आफूबाट गम्भीर पाप हुँदा साह्रै दुःखी हुन्छन्‌। तर तिनीहरू यहोवाले आफ्ना सेवकहरूलाई गर्नुभएको यस प्रतिज्ञाबाट सान्त्वना पाउँछन्‌: “तिमीहरूका पापहरू सिन्दूरे रङ्‌गका भए पनि ती हिउँजस्तै सेता हुनेछन्‌।” (यसैया १:१८) हामीले साँचो पश्‍चात्ताप गऱ्‍यौँ भने यहोवाले पूर्ण रूपमा क्षमा गर्नुहुनेछ। त्यसोभए हामी कसरी पश्‍चात्ताप गर्छौँ? हामी मनैदेखि पछुतो मानेर गलत काम गर्न छोड्‌छौँ र क्षमा पाउन यहोवालाई बिन्ती गर्छौँ। त्यसपछि हामीलाई पाप गर्ने हदसम्म पुऱ्‍याएको गलत विचार र बानी हटाउन कडा मेहनत गर्छौँ अनि हामी यहोवाको शुद्ध नैतिक स्तरअनुसार जीवन बिताउन सक्दो प्रयास गर्छौँ।—यसैया ५५:६, ७ पढ्‌नुहोस्‌।

२. हामीले पाप गर्दा यहोवाले कसरी एल्डरहरूमार्फत मदत गर्नुहुन्छ?

यदि हामीले गम्भीर पाप गऱ्‍यौँ भने यहोवाले भन्‍नुभएझैँ हामीले ‘मण्डलीका एल्डरहरूलाई आफूकहाँ बोलाउनुपर्छ।’ (याकुब ५:१४, १५ पढ्‌नुहोस्‌।) ती नियुक्‍त पुरुषहरू यहोवा र उहाँका भेडाहरूलाई माया गर्छन्‌। तिनीहरू हामीलाई यहोवासितको सम्बन्ध सुधार्न मदत गर्न सक्छन्‌ किनभने तिनीहरूले यसको लागि तालिम पाएका हुन्छन्‌।—गलाती ६:१.

हामीले गम्भीर पाप गर्दा एल्डरहरूले हामीलाई कसरी मदत गर्छन्‌? दुई वा तीन जना एल्डरले हामीलाई बाइबलआधारित सल्लाह दिएर सच्याउँछन्‌। तिनीहरूले हामीलाई त्यो पाप नदोहोऱ्‍याउन व्यावहारिक सल्लाह र हौसला दिन्छन्‌। एल्डरहरूले मण्डलीलाई हानिकारक प्रभावबाट जोगाउन गम्भीर पाप गरेर पश्‍चात्ताप नगर्ने जोकोहीलाई मण्डलीबाट हटाउन सक्छन्‌।

अझ खोतल्नुहोस्‌

हामीले गम्भीर पाप गर्दा यहोवा हामीलाई कसरी मदत गर्नुहुन्छ भनेर थाह पाउनुहोस्‌ र त्यसको कदर गर्नुहोस्‌।

३. हामीले पाप स्विकाऱ्‍यौँ भने यहोवासितको सम्बन्ध सुधार्न सक्छौँ

हामीले पाप गर्दा यहोवालाई असाध्यै दुःख लाग्छ। त्यसैले हामीले उहाँसामु आफ्नो पाप स्विकार्नुपर्छ। भजन ३२:१-५ पढ्‌नुहोस्‌ अनि यो प्रश्‍न छलफल गर्नुहोस्‌:

यहोवादेखि आफ्नो पाप लुकाउन खोज्नुको सट्टा उहाँसामु त्यो स्विकार्नु किन राम्रो हो?

यहोवासामु आफ्नो पाप स्विकार्नुको साथै एल्डरहरूबाट पनि मदत लिँदा हामी मनोशान्ति पाउँछौँ। भिडियो हेर्नुहोस्‌ अनि तल दिइएको प्रश्‍न छलफल गर्नुहोस्‌:

भिडियो: “यहोवा जसलाई माया गर्नुहुन्छ, उसैलाई अनुशासन दिनुहुन्छ” (३:०१)

भिडियोमा देखाइएका क्यानन्‌लाई यहोवाकहाँ फर्कन एल्डरहरूले कसरी मदत गरे?

एल्डरहरू हामीलाई मदत गर्न चाहन्छन्‌। त्यसैले तिनीहरूसामु कुनै कुरा नलुकाई साँचो बोल्नुपर्छ। याकुब ५:१६ पढ्‌नुहोस्‌ अनि यो प्रश्‍न छलफल गर्नुहोस्‌:

हामीले एल्डरहरूसामु कुनै कुरा नलुकाई साँचो बोल्यौँ भने हामीलाई मदत गर्न तिनीहरूलाई किन सजिलो हुन्छ?

चित्रहरूको सँगालो: १. एक भाइ मनैदेखि पछुताउँछन्‌ र आफ्नो पुर्पुरोमा हात राख्छन्‌। २. उक्‍त भाइ यहोवालाई प्रार्थना गर्छन्‌। ३. तिनी फोनमा एक जना एल्डरसित कुरा गर्छन्‌। ४. ती भाइ तीन जना एल्डरसित भेट्‌छन्‌। ५. ती भाइ अन्तस्करण सफा राख्न सकेकोले मुस्कुराउँछन्‌। — आफूले गरेको पाप स्विकार्नुहोस्‌, एल्डरहरूसित कुनै कुरा नलुकाई साँचो बोल्नुहोस्‌ र यहोवाको मायालु मदत स्विकार्नुहोस्‌

४. यहोवा पापीहरूमाथि कृपा देखाउनुहुन्छ

यदि गम्भीर पाप गरेको कुनै व्यक्‍ति यहोवाको स्तरअनुसार चल्न इन्कार गर्छन्‌ भने तिनी मण्डलीबाट हटाइनेछन्‌ अनि हामी तिनीसित सङ्‌गत गर्दैनौँ। पहिलो कोरिन्थी ५:६, ११ पढ्‌नुहोस्‌ अनि यो प्रश्‍न छलफल गर्नुहोस्‌:

अलिकता खमिरले पीठोको पूरै डल्लोलाई खमिरा बनाएझैँ पापको पश्‍चात्ताप नगर्ने व्यक्‍तिसित सङ्‌गत गर्दा मण्डलीलाई कस्तो असर पर्छ?

पाप गर्ने असिद्ध व्यक्‍तिहरूमाथि यहोवाले देखाउनुहुने कृपाको अनुकरण गर्दै एल्डरहरू विगतमा मण्डलीबाट हटाइएकाहरूलाई भेट्‌छन्‌ र मदत दिन्छन्‌। थुप्रै व्यक्‍ति फेरि मण्डलीमा फर्केका छन्‌। किन? यस्तो अनुशासन पीडादायी भए तापनि यसले तिनीहरूलाई आफ्नो गल्ती कत्ति गम्भीर थियो भनेर महसुस गरायो।—भजन १४१:५.

यहोवाले पापीहरूसित गर्नुहुने व्यवहारले उहाँ व्यावहारिक, कृपालु र मायालु हुनुहुन्छ भनेर कसरी देखाउँछ?

५. हामीले पश्‍चात्ताप गर्दा यहोवा क्षमा दिनुहुन्छ

कुनै व्यक्‍तिले पश्‍चात्ताप गर्दा यहोवा कस्तो महसुस गर्नुहुन्छ भनेर बुझ्न येसुले चलाउनुभएको एउटा उदाहरणले मदत गर्छ। लुका १५:१-७ पढ्‌नुहोस्‌ अनि यो प्रश्‍न छलफल गर्नुहोस्‌: