१-३. व्यापारीहरूले मन्दिरलाई दूषित बनाइरहेको देखेपछि येशूले के गर्नुभयो?

येशू यरूशलेमको मन्दिरको सम्मान गर्नुहुन्थ्यो। उहाँले यो मन्दिरको महत्त्व बुझ्नुभएको थियो। यो मन्दिरले वर्षौंदेखि पृथ्वीमा साँचो उपासनाको केन्द्रको रूपमा काम गरिरहेको थियो। यहोवा परमेश्‍वर पवित्र हुनुभएकोले उहाँलाई चढाइने उपासना पनि पवित्र हुनै पर्छ। त्यसैले इस्वी संवत्‌ ३३, नीसान १० का दिन यरूशलेमको मन्दिरमा पस्नुहुँदा त्यहाँको अवस्था देखेर येशूलाई कस्तो लाग्यो होला, हामी कल्पना गर्न सक्छौं।—मत्ती २१:१२, १३ पढ्‌नुहोस्‌।

^२ अन्यजातिहरूको चोकमा लोभी व्यापारी र पैसा साट्‌नेहरूले मन्दिरमा भेटी चढाउन आएका उपासकहरूलाई ठगिरहेका थिए।a येशूले “किनबेच गरिरहेकाहरू सबैलाई बाहिर लघार्नुभयो। उहाँले पैसा साट्‌नेहरूको टेबुल . . . पल्टाइदिनुभयो।” (नहेम्याह १३:७-९ तुलना गर्नुहोस्‌) ती लोभी मानिसहरूले आफ्नो बुबाको घरलाई “डाँकुहरूको ओडार” बनाए भनेर येशूले भर्त्सना गर्नुभयो। यसरी येशूले त्यो मन्दिर यहोवाको उपासना गर्ने स्थल हो भनेर जोड दिंदै मन्दिरको सम्मान गर्नुभयो। यहोवालाई चढाउने उपासना शुद्ध हुनै पर्छ भनेर पनि उहाँले जोड दिनुभयो!