प्रथम शताब्दीमा येशूलाई मसीहको रूपमा चिन्‍ने पहिलो मानिसहरूमध्ये अन्द्रियास एक थिए। मसीहलाई भेट्टाएपछि तिनले कसलाई खबर गरिहाले? “सबैभन्दा पहिला, तिनले [अन्द्रियासले] आफ्नो दाइ सिमोनलाई भेटे र तिनलाई भने: ‘हामीले मसीहलाई (जसको अनुवाद गर्दा अर्थ हुन्छ, ख्रीष्ट) भेट्टाएका छौं।’” अन्द्रियासले पत्रुसलाई येशूकहाँ लगे। यसरी उनलाई येशूको चेला बन्‍ने मौका दिए।—यूह. १:३५-४२.

अन्द्रियास र कर्नीलियसबाट हामी के सिक्न सक्छौं?

अन्द्रियास र कर्नीलियस दुवैले मौका गुम्न दिएनन्‌। अन्द्रियास आफैले पत्रुसलाई येशूकहाँ लगे अनि कर्नीलियसले पनि नातेदारहरूलाई पत्रुसको कुरा सुनाउने प्रबन्ध मिलाए। तर अन्द्रियास र कर्नीलियसले आफ्ना नातेदारहरूलाई दबाब दिएनन्‌। उनीहरूलाई जसरी हुन्छ ख्रीष्टको अनुयायी बनाइछाड्‌ने कोसिस पनि गरेनन्‌। अन्द्रियास र कर्नीलियसबाट तपाईंले के सिक्नुभयो? हामीले पनि तिनीहरूले जस्तै गर्नुपर्छ। आफ्ना नातेदारहरूलाई बाइबलबारे बताऔंला अनि उनीहरूलाई हाम्रा भाइबहिनीसित चिनापर्ची गराऔंला। तैपनि छनौट गर्ने उनीहरूको अधिकारको हामी सम्मान गर्छौं र उनीहरूलाई दबाब दिंदैनौं। परिवारका सदस्यहरूलाई कसरी मदत गर्न सक्छौं भनी बुझ्न जर्मनीका एक दम्पती यर्गन र पेट्राको उदाहरण विचार गरौं।