Sho omukwaniilwa Hiskia a li e na omimvo 39, okwa li a kwatwa kuuvu wa kwatwa miiti. Omuhunganeki Jesaja okwa li a lombwele Hiskia etumwalaka lya za kuJehova kutya masiku ota ka sa komukithi ngoka. (2 Aak. 20:1) Sho Hiskia a uvu etumwalaka ndyoka, okwa li a gwililwa po nokulila noonkondo. Okwa li a galikana kuJehova nopwaa na ezimbuko. Jehova okwa li a uvu Hiskia sho a galikana kuye ta lili, nokwe mu lombwele nohenda a ti: “Ondu uvu egalikano lyoye. Nonda mono omahodhi goye. Otandi ke ku aludha.” Okupitila muJesaja, Jehova okwa ulike ohenda nokwa uvaneke kutya ote ke mu kaleka nomwenyo uule wethimbo lyontumba, nokuhupitha Jerusalem miikaha yAayassur. (2 Aak. 20:4-6) Mbela owa taalela uuwehame mboka tawu ku ningitha wu kale kuu na etegameno? Popya naJehova okupitila megalikano, nokuli nando oto shi ningi to lili. Ombiimbeli otayi tu shilipaleke kutya, “Kalunga kehekeleko alihe, ngoka he tu hekeleke,” ote ke tu hekeleka momaudhigu getu agehe. — 2 Kor. 1:3, 4. w24.12 24 ¶15-17

Itashi ka kala tuu enyanyu enene oku ka hambelela mboka ta ya ka yumuka! Dhiladhila owala nkene to ka nyanyukilwa okwiilonga kombinga yaJehova, mokukonakona iinima oyindji mbyoka a shita. (Eps. 104:24; Jes. 11:9) Shoka sha dhengambanda, otashi ka kala oshiwanawa okulongela Jehova nopwaa na okukala tu uvite tu na ondjo yasha. Mbela “uutoye wuulunde wokathimbo kowala,” oto ke wu pitika wu ku ningithe wu hunuthe omalaleko nuuyamba gomonakuyiwa? (Heb. 11:25) Hasho nando! Kapu na nando eiyambo kehe tatu ningi ngashingeyi, tali vulu okuyelekanithwa nomalaleko nuuyamba ngoka. Dhimbulukwa kutya itatu ka kala twa tegamena Oparadisa kombanda yevi sigo aluhe, oshoka etegameno ndyoka otali ka gwanithwa sikulimwe lyomomasiku. Omalaleko nuuyamba agehe ngoka oga ningwa, molwaashoka Jehova oku tu hole, sho e tu pe ekuliloyambo lyOmwana. w25.01 29 ¶12.

Moses oku li gumwe gwomwaamboka ya popiwa membo lyAahebeli, ye na eitaalo endhindhilikwedhi. (Heb. 3:2-5; 11:23-25) Eitaalo lyaMoses kalya li osima yowala, molwaashoka Kalunga okwa longo oshikumithalonga, sho a gandja iikulya nomeya kaantu mboka ya li mombuga. (Eks. 15:22-25; Eps. 78:23-25) Nonando Moses okwa li e na eitaalo lya kola, konima yomumvo gumwe sho Aaisraeli ya mangululwa mo muupika waEgipiti, okwa li a limbililwa ngele Jehova ota ka vula ngaa okugandja onyama koshigwana she. Moses ka li a vulu okuuva ko kutya ongiini Jehova a li ta ka gandja onyama ya gwana okukutitha aantu omamiliyona, mboka ya yunga ontanda mombuga. Onkee Jehova okwa pula Moses a ti: “Oshikaha shOmuwa oshifupi nani?” (Num. 11:21-23) Niitya yimwe, Jehova okwa li ta pula Moses kutya, ‘Mbela oto dhiladhila kutya itandi vulu okuninga shoka nda ti otandi ka ninga?’ w25.03 26 ¶1-2