Oshike tu shi kombinga yohenda yaJehova? Jehova okwe shi ulike ngiini kutya “ina hala ku kale nando ogumwe ta geelwa”? (2 Pet. 3:9) Natu taleni nkene a li a ulukile yalwe ohenda, mboka ya yona omayono ga kwata miiti. Omukwaniilwa David okwa li a yono omayono ga kwata miiti, mwa kwatelwa oluhondelo nokudhipaga. Nonando ongawo, David okwa li i iyele ombedhi, Jehova e te mu sile ohenda noku mu dhimina po. (2 Sam. 12:1-12) Omukwaniilwa Manasse okwa li a longo iinima iinyanyalithi monkalamwenyo ye. Ihe nando okwa li a longo iinima iinyanyalithi ya tya ngawo, Jehova okwe mu sile ohenda e te mu dhimine po, oshoka okwi iyela ombedhi. (2 Ondjal. 33:9-16) Iiholelwa mbika otayi tu dhimbulukitha kutya Jehova oha ulike ohenda, uuna e wete kutya okwa pumbwa oku shi ninga. Aantu ya tya ngaaka ote ke ya yumudha, molwaashoka sho ya yono omayono ga kwata miiti, oyi iyele ombedhi. w24.05 4 ¶12

Konima sho Jehova a hupitha oshigwana she muupika waEgipiti, okwa langeke po aayambi ya longe metsalihangano lye. Aalevi oya li ya pewa oshinakugwanithwa shokusila oshimpwiyu iilonga yilwe yometsali ndyoka eyapuki. Mbela Jehova okwa li ha sile oshimpwiyu nawa mboka haya longo metsalihangano, nenge haya zi popepi nalyo shi vulithe yalwe? Hasho nando! Jehova ke na okatongo. Kehe gumwe okwa li ta vulu okukala kuume kaJehova kopothingo. Pashiholelwa, Jehova okwa li a shilipaleke kutya oshigwana ashihe otashi vulu okumona oshikumithalonga shoshikogo nosho wo shomulilo tagu yeta kombanda yetsalihangano. (Eks. 40:38) Uuna oshikogo sha tameke okwiinyenga sha uka kombinga yilwe, nokuli naamboka ya unga oontanda kokule netsalihangano oya li haya vulu oku shi mona, e taya gongele iinima yawo nokutembudha ootenda dhawo, opo ya ye pamwe noshigwana ashihe. (Num. 9:15-23) Sha faathana nokunena, kutya nduno otu li peni muuyuni, Jehova oku tu hole, ohe tu sile oshimpwiyu nohe tu gamene. w24.06 4 ¶10-12

Omwenyo gwaDavid ogwa li moshiponga, molwaashoka omwanamati Absalom okwa li a tokola toko e mu dhipage, opo a ninge omukwaniilwa. (2 Sam. 15:12, 13) Onkee ano David okwa li a pumbwa okuza mo nziya muJerusalem. Sho aapiya ye ya li taya yi, David okwa mono kutya gumwe okwa pumbwa okuthigala muJerusalem, opo a kale te mu lombwele shoka Absalom ta dhiladhila okuninga. Onkee ano okwa lombwele Sadok nosho wo aayambi yalwe ya shune moshilando, opo ya kale taye mu tseyithile shoka tashi ningwa po. (2 Sam. 15:27-29) Oya li ye na okukala ya kotoka, sho taye shi ningi. David okwe ya po nompangela yimwe ndjoka ya li ya kwatela mo Sadok nosho wo Hushai, ookuume kaDavid kopothingo. (2 Sam. 15:32-37) Konima yompangela ndjoka, Hushai okwi iningitha a fa a gama kuAbsalom, nokwe mu pe omayele gankene e na okuponokela David, shoka sha li tashi ka pa David ompito i ilongekidhile olugodhi. Opo nduno Hushai okwa li a lombwele Sadok naAbiatar ompangela ndjoka. (2 Sam. 17:8-16) Aalumentu mboka yaali oya li ya vulu okutumina David etumwalaka kombinga yompangela yaAbsalom, nokungawo, oya dhana onkandangala ya simana mokugamena omwenyo gwaDavid. — 2 Sam. 17:21, 22. w24.07 4-5 ¶9-10