Ye mɛndó za Korneyi ya lo mu batisimɔ nɛ? Lo dundó zo mɛ lo ndo “kpɛ Nzapa ndoni kɔi ná azi ti ndasewa tɛ lo zu.” Korneyi ngbãndó lá kwɛ lingɔ sambela hɛ̃ Nzapa. (Aw. 10:2) Ngoi mɛndó Petro pa nzɔ̃ pa hɛ̃ Korneyi ná azi ti ndasewa tɛ lo ko, ala yendó tɛnɛ tɛ Kristo wa ala ye ngandó mungɔ batisimɔ. (Aw. 10:47, 48) Korneyi ndó dã ti nɛngɔ ya lo gbinyangbi akpale ti ngbondoni na ya dungɔ lɛ ngɛ̃́ tɛ lo ti nɛngɔ ya, lo vɔrɔ Yehova ndoni kɔi na azi ti ndasewa tɛ lo. (Yos. 24:15; Aw. 10:24, 33) Korneyi lengbindó ti ziangɔ ya, kumba mɛ lo na ni gbanzi lo na tingɔ wakristo. Kanda ta lo lindó ngaso ma. Mɔ lengbi nga ti gbinyangbingɔ kpale ti ngbondoni na ya dungɔ lɛ ngɛ̃́ tɛ mɔ ti nɛngɔ ya mɔ mu batisimɔ? Se mɔ li ngaso ko, Yehova na dungɔ dã ti zangɔ mɔ. Lo na sulungɔ ekateli tɛ mɔ ti lingɔ kwa hɛ̃ lo na mangbi na ndia ti ya Ngbangɔ. w25.03 p. 5 par. 12-13

Se mɔ ndo ma apandɛ ti nvɛ̃nɛ na ndo linɔ tɛ e nga na ndo azi mɛ ndo tambwisa e ko, binga li mɔ na ndo pɛnɔ mɛndó Yezo hũ nga pɛnɔ mɛndó ava hũ na siɛklɛ ti uzu. Ndɛ lo mɛ, e ndo hũ tɛnɛ mɛndó Ngbangɔ tɛnɛ ya, azi na temelangɔ awa kwa tɛ Yehova wa ala nga na tɛnɛngɔ tɛnɛ ti nvɛ̃nɛ na ili ala. (Mat. 5:11, 12) Kanda ta e na ziangɔ ya apandɛ ti nvɛ̃nɛ niko anzɛ̃ na e ma, se du ya, e ndo gi hĩngangɔ azi mɛ ndo si na nvɛ̃nɛ ni wa e kɛ̃ nga ni mbala kɔi. Ngasia la elengbi ti batangɔ tɛrɛ e na ya tɛnɛ niko ti nvɛ̃nɛ nɛ? Kɛ̃ apandɛ ti nvɛ̃nɛ. Toma Polo hɛ̃ e awangɔ ti yangondo na ndo aye mɛ elengbi ti lingɔ se du ya, e ma atɛnɛ ti nvɛ̃nɛ. Lo tɛnɛndó hɛ̃ Timɔte ya ‘lo pa hɛ̃ azi mɛndɛ̃ ya [. . .] ala zia kpãngɔ bɛ la na ndo apandɛ ti nvɛ̃nɛ’ wa lo panga hɛ̃ la ya, ‘ĩ kɛ̃ apandɛ ti nvɛ̃nɛ.’ (1 Tim. 1:3, 4) E ndo e kɛ̃ apandɛ ti nvɛ̃nɛ na lo mɛ ya, e hĩnga ndo mɛ ni ndo lo da. E ndo ye “atɛnɛ mɛ ndo dũ ale” ti mbilimbili.—2 Tim. 1:13. w24.04 p. 11 par. 16; 13 par. 17

Ĩ ngbã lá kwɛ na mangbi ná azi mɛ mbilimbili ka tɛ Yehova. Nzapa ndo ye ya, e vɔrɔ lo na mangbi, e na ngbãngɔ ngoi zu na mangbi se du ya, e ngbã lá kwɛ mbilimbili. Azi ko la ndo zi lége ya, ani ti yɔngɔrɔ ni na mbimbili ko, ala ndo si na kangbi kaya bombi. Na lo ni la, Nzapa hɛ̃ e wangɔ ya, “e kpɛ ala.” Se ta e li ngaso ma ko, e nvɛ̃ni nga na tingɔ yɔngɔrɔ ni na mbilimbili. (Roma 16:17) Na ngoi ko la e hĩnga mbilimbili wa e gbɔ̃ nga ni kpengbani ko, e na dungɔ na siriri nga na sãte ti nzɔ̃ni na ya nyingɔ. (Ef. 4:15, 16) Ni na batangɔ e na ndo ahangɔ lo ná kapanyɛ ti nvɛ̃nɛ tɛ Satana, wa e nga na ngbãngɔ na siriri ka gbɛ libateli tɛ Yehova na ngoi ti kota pɛnɔ. Ĩ gbɔ̃ aye zu mɛ mbilimbili kpengbani, “wa dila Nzapa mɛ ndo li ya bɛ adu pii adu ndoni kɔi na ĩ.”—Fil. 4:8, 9. w24.07 p. 13 par. 16-17