Ta elengbi bo ti lingɔ zu ti tingɔ kpengbani na ya nyingɔ ma, kanda elengbi nga ti batangɔ ni. Ti nɛngɔ ya, e li ni ko, ayɔ ya e zia kpãngɔ bɛ e gba na ndo tɛrɛ e nvɛ̃ni. (1 Kɔr. 10:12) Kanda elengbi ti ngbãngɔ lá kwɛ “bangɔ tɛrɛ e” ti nɛngɔ ya, e hĩnga bere e ndo gwe uzu na ya nyingɔ. Na ya mbeti mɛndó lo su to hɛ̃ azi ti Kɔlɔsɛ ko, toma Polo dirindó tɛnɛ hɛ̃ ala nda mɛ ayɔ ya, ala ngbã kpengbani na ya nyingɔ. Abɛse ala maindó na ya nyingɔ wɛ ko, Polo kebisandó ala ti nɛngɔ ya, ta ala ti na lɛ sɔ̃ ti dungɔ na dangɔ bɛ ngama tɛ azi ti lɛ gigi olo ma. (Kɔl. 2:6-10) Epafrasi mɛndó lo hĩnga ayata lo ti ya bombi nzɔ̃ni ko, lo ndo lindó sambela ngoi zu na lo tɛ ala ya, ala hĩnga ye zu, afa ya ala “mai na ya nyingɔ.” (Kɔl. 4:12) Wangɔ mɛ e lua nɛ? Polo ná Epafrasi gbɔ̃ndó ndani ya, ti nɛngɔ ya, zo ngbã kpengbani na ya nyingɔ ko, ayɔ ya, lo du na ge ge ge wa lo lua nga lisalisi tɛ Nzapa. Ala yendó ya, awakristo ti Kɔlɔsɛ angbã kpengbani nga azi mɛ mai na ya nyingɔ abɛse akpengba kpale mɛndó ala ndo tengbi na ni. w24.04 p. 6-7 par. 16-17

Se e du na seliye ti kpɛngɔ Yehova ko, e na yengɔ lo gba, wa ta e na lingɔ ye kɔi mɛ bɛ lo ndo kɛ̃ ma. E ye mandangɔ hĩngangɔ ɔngbi mɛ ka popo tɛ nzɔ̃ni ná siɔni, mbilimbili ná nvɛ̃nɛ ti nɛngɔ ya, Yehova ye e. (Mas. 2:3-6; Aeb. 5:14) Se e kpɛ azi ɔngɔ Nzapa ko, elengbi ti bandangɔ lingɔ aye mɛ aɔngbi na mbilimbili mɛ ndo lo ka tɛ Yehova. E ba se lɛlo tɛ agbia ti ndasewa 12 mɛndó ala gwe ti bangɔ kɔdɔrɔ mɛndó Yehova ko kapa ti hɛ̃ngɔ aya Izraɛlɛ. Sui kɔi ka popo tɛ la ndó na mbɛtɔ tɛ azi ti Kanana ɔngɔ songo mɛndó ala na ni na ndo Yehova. Ala tɛnɛndó hɛ̃ aya Izraɛlɛ ya: “Ta e na ngunu ti tiringɔ to na azi niko ma, na lo mɛ ya, ngunu tɛ la ɔ tɛ e madãma.” (Mit. 13:27-31) Na bangɔ dangɔ bɛ tɛ azi ko, adu biani ya, azi ti Kanana ndó na ngunu ɔngɔ azi ti Izraɛlɛ. Kanda tɛnɛngɔ ya, ta aya Izraɛlɛ lengbi ti longangɔ awa kula tɛ Yehova ma ko, ni ɔngbi na dangɔ bɛ tɛ Nzapa. w24.07 p. 9 par. 5-6

Elengbi ti yengɔ na bɛ e kɔi ya, ngoi zu ko la Yehova ndo fa ngbanga ndo azi, abɛse ni du ngasia ko ni du ti mbilimbili? Ĩi! Abrahama gbɔ̃ndó ndani ya, Yehova du “wa fangɔ ngbanga” ti mbilimbili ti ndo “lɛ sese zu,” wa lo na ndara nga na bɛ ti vundu. Lo hɛ̃ Nyi lo fɔrmasiɔ̃ wa lo hɛ̃ nga lo kumba ti fangɔ ngbanga tɛ azi zu. (Yn. 5:22) Yehova ná Yezo lengbi ti hĩngangɔ aye mɛ aɔndɛ tɛrɛ lo ka bɛ azi. (Mat. 9:4) Ni la, na ya akpale zu ala na lingɔ “ye mɛ mbilimbili”! Zia ya, e mu ekateli ti kpãngɔ bɛ e na ndo Yehova nga na ndo ekateli tɛ lo zu. Lo hĩnga nzɔ̃ni nvɛ̃ni ye mɛ lo ndo li ɔngɔ e. E hĩnga ya, ta e du azi mɛ elengbi ti fangɔ ngbanga ma, kanda bo lo la lo lengbi! (Yis. 55:8, 9) Na lo ni la, e kpã bɛ e na ndo fangɔ ngbanga tɛ Yehova zu ná tɛ Nyilo Yezo. Wa e hĩnga nga ya, Gbia tɛ e Yezo ndo landa na seni seliye tɛ To lo na omɛ aba fangɔ ngbanga na mbilimbili nga na bɛ ti vundu.—Yis. 11:3, 4. w24.05 p. 7 par. 18-19