Luka

24 Nihiku noopacerya na esumana,* awo yaapeherya wooxixelo ene eya o nihiye,* ekunxe sawunkhela yaareherenryaaya. 2 Nto, yaaphwannye nluku nipirikixiwevo va mulako wa nihiye,* 3 nyenya yaavolonwaayamo, hiyaaphwaannyemo mwiili wa Apwiya Yesu. 4 Eri oohaleeliheya wa nthowa na yeela, yaahooneya wa yaawo alopwana eeli ewanre soowara sawaarya. 5 Athiyana yaatepa woova nave yuurameliha vathi ithoi saya; voocharela alopwana ale yaahi: “Ntakhara heeni munamwaavyaanyu muchu mukumi variyari va achu ookhwa? 6 Owo haamomo muumu, nto ooviihiwa mookhwani. Muupuwele wi, owo aaloca wa nyuwo ari o Kalileya, 7 alocaka wi Mwaana a muchu onaphwanela oveleeliwa wa alipa oocheka, iiphiwe va mwiri nave nihiku naneeraru naya, aviihiwe mookhwani.” 8 Mwawiihiiha, awo yaahuupuwela masu awe, 9 nave yaakoonkaaya o nihiye,* yaalokoha ichu soothene iha wa oohuserya Khumi Nammoha ni wa akina. 10 Athiyana awo yaari, Mariya Matalena, Xowana ni Mariya amama awe Tiyaku. Nave tho athiyana akina yaari ni yaawo, yaanalokoha ichu seiha wa arummwa. 11 Nto wa arummwa, masu yaala yaari ntoko woopa mwaha, nave hiyaaroromela athiyana.

12 Nto Petru aavinya achimakela o nihiye;* nave uurammeiye, onne pahi ikuwo sa eliinyu. Mwawiihiiha, aavinya arowa iikohaka echu taani yeeren’ye.

13 Nyenya mu nihiku nene nenle, oohuserya apiili yaamweeca eyaaka muceche mmoha wawiichaniwa Emawu, yoowo waari woorakamelana ni Yerusalemu ikiloometru khumi nammoha,* 14 nave awo yaanachekula vooloca sa ichu soothene.

15 Vano erikimuchekula ni ovaanyihana ichu seihe, Yesu aawaacamela apacerya weeca ni yaawo, 16 nto miitho aya yaahiihiwa omusuwela yoowo. 17 Owo aahaakoha ariki: “Mwaha taani yoowo munalocaanyu mweecaka?” Awo yaaheemela, ethoi aya eri yoothanana. 18 Mmoha a yaawo awiichaniwa Keleyopa aaloca ariki: “Nyuwaano mwa namarwa munakhala meekhiinyu o Yerusalemu nave hamunasuwela* ichu seeren’ye weiwo mmahiku yaala?” 19 Owo aahaakoha: “Ichu taani?” Awo yaamwaakhula: “Ichu vooloca sa Yesu Munaasareti, yoowo oonihenrye okhala mulipa a miririmu oowerya mu saweera ni mmasu vamiithoni va Muluku ni va achu oothene; 20 nave ahooleli a alipa a mukucho vamoha ni alamuleli ahu yaamveleela wi athoriheliwe okhwa ni othomeiwa va mwiri. 21 Nyenya hiyo naanawehererya wi mulopwana ola ti yoowo aahaala woopola nloko na Isarayeli. Nto ohiya yeeyoru, nla nihiku naneeraru ovinyerya vaavaa seeren’yaaya ichu seiha. 22 Nave tho, athiyana akina a mwa hiyo, aantutuxa, woona wi yaapeherya wooxixelo ene eyaaka o nihiye* 23 nave yahaaphwannyaaya mwiili awe, awo yaakooka elocaka wi aawoona ankeelo, yaawo yaalonce wi owo mukumi. 24 Nto akina a yaawo yaari ni hiyo yaayawo o nihiye,* nave ephwanya hiihaa ntoko athiyana yaaloncaaya, nyenya hiyaamoonne Yesu.”

25 Mwawiihiiha, Yesu aalocano: “Nyuwo mwa achu oolosowa ni oolekela weemererya* ichu soothene saalociwe ni alipa a miririmu! 26 Apwanne hiwaari woochuneya wi Kristu ahooxeye ichu seiha nave wi avolowe mu ncicimiho nawe?” 27 Nave apaceryaka wa Mose ni wa Alipa a Miririmu oothene, owo aahaataphulela ichu vooloca sa yoowo mu Soorempwa soothene.

28 Yaacamelaka muceche yoowo yaayaayawo, Yesu aahoola anakhala ntoko wi onampwaha. 29 Nto awo yaamwaakeelela eriki: “Mukhale ni hiyo, woona wi onniilavo nave nsuwa noomorelamo.” Mwawiihiiha, owo aavolowa wi akhale ni yaawo. 30 Nave vaavaa aalyeiye* ni yaawo, owo aakuxa epaau, areeliha, akawanya nave apacerya waakawela. 31 Enreiye yeela, miitho aya yaahuleya nave emusuwela; nyenya owo aacakanela wa yaawo. 32 Mwawiihiiha, awo yaahi mukina ni mukhwaawe: “Mirima sahu hisaavarela mpuwa mwahu vaavaa aaloceiye ni hiyo mphironi, ahulaka* Soorempwa mookwakwaleya wa hiyo?” 33 Elukuluku ene yeele, awo yaavinya ekookela o Yerusalemu, nave yaahaaphwanya oohuserya Khumi Nammoha vamoha ni yaale yaathukumanne ni yaawo, 34 elocaka eriki: “Chiryene, Apwiya aaviihiwa, nave ahooneya wa Simoni!” 35 Voocharela awo yaahaaleela yeeyo yeeren’ye mphironi ni mukhalelo yaamusuwenlaaya vaavaa aakawannyeiye epaau.

36 Erikimuloca ichu seiha, Yesu mwaneene aahooneya veeri vaya nave aloca wa yaawo ariki: “Murecele okhale ni nyuwo.” 37 Nto, woona wi yaari ootuthuwa ni awoova, yuupuwela wi anoona munepa. 38 Mwawiihiiha, owo aaloca ni yaawo ariki: “Ntakhara heeni muryaanyu awoova, nave ntakhara heeni muryaanyuno minikwa mmurimani mwanyu? 39 Moone mata aka ni inaani saka, ti yoomi ene; kitannyeeni wi moone, woona wi munepa honakhalano mwiili naari makhuva ntoko munoonaanyu wi miyaano kookhalano.” 40 Alocaka yeela, owo aawooniha mata awe ni inaani sawe. 41 Nto nlelo eheemereryaka ni ohakalala vamoha ni otikhina yaaraayano, owo aahaakoha: “Mookhalano vaava echu ya olya?” 42 Mwawiihiiha, awo yamvaha epetaasu ya ehopa yawooxiwa, 43 nave owo aakuxa, akhuura emoonaka.

44 Voocharela owo aalocano: “Ala masu aka kaaloncaaka kiri ni nyuwo wi, ichu soothene irempwe vooloca sa miyo mu Nlamulo na Mose, ni Alipa a Miririmu, ni mu Masalmu sinnaphwanela waakhwanela.” 45 Mwawiihiiha, owo aahula muupuwelo aya wi yiiwexexe yootaphulela ya Soorempwa, 46 nave aahi wa yaawo: “Yoorempwa wi Kristu aahaala ohooxeya nave nihiku naneeraru aviihiwe mookhwani, 47 nave moorweela wa nsina nawe, waahaala olaleeryiwa wa maloko oothene, orukunuwa murima wi ileveleliwe soocheka, opacerya Yerusalemu. 48 Nyuwaano munamukhala anamoona a ichu seiha. 49 Nave suwelani wi kinamoorumihelaani yeeyo eroromelihiwe ni Atiithi aka. Vano nyuwo, mukhale mpooma muumu ophiyerya mwaakhenle owerya onarwa osulu.”

50 Voocharela, owo aahaakuxa ayano o Petaniya, nave aaviiha matata awe ni aareeliha. 51 Aareelihaka hiihale, owo aamwalanyihiwa ni yaawo, nave akuxiwa awelihiwa wirimu. 52 Awo yaamucicimiha,* nave ekookela o Yerusalemu ehakalanle vancipale. 53 Awo yaatitelela okhala mu empa ya Muluku, emucicimihaka Muluku.