Estra

8 Vano ala yaari ahooleli a ichoko sa makholo aya ni muyareriwo wa yaale yaakhumme ni miyo o Papulu variyari va olamulelo wa mwene Artaxerxe: 2 Wa anamwane a Fineya, Kerisomi; wa anamwane a Itamari, Taniyeli; wa anamwane a Tavite, Hatusi; 3 wa anamwane a Sekaniya, wa anamwane a Parosi, Sakariya, nave ni yoowo yaakhalavo tho akina yaarepeliwe alopwana nsana nimoha ni makhumi mathanu; 4 wa anamwane a Pahiti-mowapi, Eliyohenai, mwaana a Serahiya, nave ni yoowo yaakhalavo alopwana masana meeli; 5 wa anamwane a Satu, Sekaniya mwaana a Yahasiyeli, nave ni yoowo yaakhalavo alopwana masana mararu; 6 wa anamwane a Atini, Epeti mwaana a Yonata, nave ni yoowo yaakhalavo alopwana makhumi mathanu; 7 wa anamwane a Elami, Yesaiya mwaana a Ataliya, nave ni yoowo yaakhalavo alopwana makhumi mathanu nameeli;* 8 wa anamwane a Sefatiya, Sepatiya mwaana a Mikayeli, nave ni yoowo yaakhalavo alopwana makhumi mathanu namararu;* 9 wa anamwane a Yowapi, Opatiya mwaana a Yehiyeli, nave ni yoowo yaakhalavo alopwana masana meeli ni khumi nathanu nararu;* 10 wa anamwane a Pani, Selomite mwaana a Yosifiya, nave ni yoowo, yaakhalavo alopwana nsana nimoha makhumi mathanu nammoha;* 11 wa anamwane a Pepai, Sakariya mwaana a Pepai, nave ni yoowo yaakhalavo alopwana makhumi meeli nathanu nararu; 12 wa anamwane a Asikati, Yohanani mwaana a Hakatani, nave ni yoowo yaakhalavo alopwana nsana nimoha ni alopwana khumi;* 13 wa anamwane a Atonekami, yaawo yaari ookuchula masina aya yaari ala: Elifeleti, Yeyeli, ni Semaya, nave ni yaawo yaakhalavo alopwana makhumi mathanu nammoha; 14 ni wa anamwane a Pikivai, Utai ni Saputi, nave ni yaawo yaakhalavo alopwana makhumi mathanu nameeli.*

15 Miyaano kaahaathukumanya yaawo o muhice onaya o Ava, nave naakhala vaavale mahiku mararu. Nyenya vaavaa kaavarenryaaka achu ni alipa a mukucho, kaahoona wi haarivoru mmoha a anamwane a Alevi. 16 Mwawiihiiha kaamwiichaniha Eliyeseri, Ariyeli, Semaya, Elinatani, Yaripe, Elinatani, Natani, Sakariya ni Mexulami, yaawo yaari ahooleli, ni Yoyaripe ni Elinatani, yaawo yaari ahusiha. 17 Voocharela kaahaaruma wa Itu muhooleli a nipuro nawiichaniwa Kasifiya. Kaahaaleela yaawo wi emveke Itu ni asinnawe vamoha ni anamuteko a empa ya Muluku* o Kasifiya wi enruuhele alapeli a empa ya Muluku ahu. 18 Woona wi ntata naphaama na Muluku ahu naari ni hiyo, awo yaanruuhela mulopwana a Miruku a nihimo na Mali, musulwa a Levi mwaana a Isarayeli, awiichaniwa Serapiya vamoha ni anaawe ni asinnawe, alopwana khumi nathanu nararu; 19 nave Hasapiya, aari ni Yesaiya a nihimo na Merari ni asinnawe vamoha ni anaaya alopwana makhumi meeli. 20 Nave yaakhalavo anamuteko a empa ya Muluku* masana meeli ni makhumi meeli yaawo Tavite ni ahooleli yaavanhaaya Alevi wi yaakhaviheryeke mmuteko aya, oothene yaawo yaarepeliwe masina aya.

21 Voocharela kaalamulela wiinanela olya o muhice Ava, wi niiyevihe vamiithoni va Muluku ahu, ni waavya ohoolela ntakhara mukwaha naahaalaahu opaka, vamoha ni anamwane ahu ni sookhalano sahu soothene. 22 Muru waanakuula omveka mwene anakhoco ni alipa ooweeciha akavalo wi enikhapelele variyari va amwiicani mumphironi, woona wi naaloca wa mwene nriki: “Ntata naphaama na Muluku ahu nri wa oothene yaale anamwaavya, nyenya ikuru sawe ni esara awe enaarweela oothene yaale anamunyanyala yoowo.” 23 Mwawiihiiha naahiinanela olya nave naaveka vooloca sa yeela wa Muluku ahu, nave owo aahiiwa mavekelo ahu a vathi va murima.

24 Variyari va ahooleli a alipa a mukucho kaahaathanla alopwana khumi napiili: Serapiya, Hasapiya ni asinnaya khumi. 25 Voocharela kaahaaphimela eparata, ooru ni ikaruma, sooveleela seiho mwene ni anamiruku awe, ni ahooleli aya, vamoha ni Aisarayeli oothene yaari vaavale yaapankaaya ntakhara empa ya Muluku ahu. 26 Kaaphima nave kiwunnyererya italentu* masana mathanu nammoha ni makhumi mathanu* sa eparata, ikaruma nsana sa eparata siiwanana ni italentu piili, italentu sa ooru nsana, 27 itixela ikhaani makhumi meeli sa ooru siiwanana ni itarku* ncikhwi, ni ikaruma piili sa enyacu yoorehereryiwa yawaarya ni ekoore yoophilivila, sasisapo ntoko ooru.

28 Voocharela kaaloca wa yaawo: “Nyuwo mwa aweela a Yehova, nave ikaruma ti saweela, nave eparata ni ooru iri soovaha soolakelela wa Yehova Muluku a makholo anyu. 29 Mukhapelele phaama ichu seiha ophiyerya mphimme mu isaala* sa empa ya Yehova, vamiithoni va ahooleli a alipa mukucho ni Alevi, ni vamiithoni va ahooleli a ichoko sa Isarayeli o Yerusalemu.” 30 Nave alipa a mukucho ni Alevi yaahaakhela eparata, ooru ni ikaruma seiho saaphwimmwe, wi ekerihe o Yerusalemu o empa ya Muluku ahu.

31 Vookuchula naacimula n’yaaka o muhice Ava mu nihiku naneekhumi napiili na mweeri woopacerya n’yaaka o Yerusalemu, nave ntata na Muluku ahu naari ni hiyo, nave owo aanoopola mmatani mwa amwiicani, ni wa yaale yaaniipithela mumphironi. 32 Mwawiihiiha naaphiya o Yerusalemu nave nikhala weiwo mahiku mararu. 33 Mu nihiku naneexexe, naaphima eparata, ni ooru ni ikaruma ikina sa empa ya Muluku ahu, nave naamunnya mulipa a mukucho Meremoti, mwaana a Uriya. Ni yoowo yaakhalavo Eliyasare, mwaana a Fineya, ni Alevi Yosapati, mwaana a Yesuwa, ni Yowatiya, mwaana a Penuwi. 34 Ichu soothene saahaalakhanyeryiwa ni ophwimmwa, nave ohokola waya waarepeliwa. 35 Oothene yaale yaakhumme wookapuroni, yaavaha mikucho soopahiwa wa Muluku a Isarayeli: Imope seelopwana khumi napiili wa Aisarayeli oothene, ipucepuche seelopwana makhumi mathanu namaxexe ni thanu nammoha,* asaana a ipucepuche makhumi mathanu napiili ni thanu napiili,* ni ipuri khumi napiili ntoko yooveleela ya yoocheka; soothene ntoko soovaha soopahiwa wa Yehova.

36 Voocharela, naahaavahererya ahooleli a mwene ni alamuleli a makupa makina a muhice Eufrate* malamulo a mwene nave awo yaahaakhaviherya achu ni empa ya Muluku eeparipari.