2 Akorintu

3 Apwanne nnapacerya wiiseemererya hiyo aneene wanaawiili? Naari apwanne ninnachuna, ntoko achu akina, ikaarata sa oneemererya ntakhara nyuwo naari soorweela wa nyuwo? 2 Nyeenyu ene muri ekaarata ahu, erempwe mmurimani mwahu, esuweliwe nave yaalakhanyiwa ti achu oothene. 3 Woona wi nyuwo mohooniherya okhala ekaarata ya Kristu erempwe ni hiyo ntoko anamuteko, erepiwe ohiya ni etinta nto ni munepa wa Muluku mukumi, ohiya mu ithaapwa sa maluku nyenya mu ithaapwa sa mwiili, mmurimani.

4 Nookhalano ororomela yoola mwa Muluku moorweela wa Kristu. 5 Tahi wi nniiseera okhala oophwanelela wi nthokororyeke wi ichu soothene inarwa wa hiyo, nyenya weeriwa wahu okhala oophwanela onarweela wa Muluku, 6 yoowo chiryene oniphwanelelinhe okhala anamuteko a waataana wahiihaano, ohiya ni nlamulo noorempwa, nyenya na munepa; tiwi nlamulo noorempwa nnathorihela okhwa, nyenya na munepa nnavaha okumi.

7 Vano, waakhanle wi nlamulo nenlo nnavareryela okhwa nave naarempwe vamalukuni, naarwiile ni ncicimiho nenlo anamwane a Isarayeli yahaaweryaaya oweha ethoi ya Mose wa nthowa na ncicimiho na ethoi awe, ncicimiho nenlo naahaala oviihiwavo, 8 apwanne okaiwa wa munepa hiwaahaala okhalano ncicimiho ntokweenexa? 9 Waakhanle wi nlamulo nenlo nnaathorihela achu okhwa ti noocicimiheya, muteko yoowo onakeriha o wookololowani wookhalano ncicimiho ntokweenexa! 10 Mweeparipari, naamwi yeeyo khalai yeeriwa okhala yoocicimiheya, yooyeleela ncicimiho, wa nthowa na ncicimiho nnapwaha nenlo. 11 Tiwi, waakhanle wi yeeyo yaahaala oviihiwavo yaapaceryihiwe ni ncicimiho, ncicimiho na nenlo nniikhalelaru ti noopwahaxa!

12 Woona wi nookhalano ewehereryo yeela, ninnaloca mootaphuwa, 13 nave hinneerano ntoko Mose, yoowo aakhuneela wiithoni wawe ni ekuwo, wi anamwane a Isarayeli ehititelele oweha yeeyo wookuchulani yaahaala oviihiwavo. 14 Nyenya muupuwelo aya waariipihiwa. Tiwi ophiyerya olelo, ekuwo yeele yakhalai enniikhalelaru vaavaa onaalakhanyiwaaya waataana wakhalai, woona wi eyo enaviihiwavo pahiru moorweela wa Kristu. 15 Mweeparipari, ophiyerya olelo, ikwaha soothene onaalakhanyiweiye liivuru a Mose, ekuwo ennakhuneela murima aya. 16 Nto vaavaa muchu onakookeleiye wa Yehova, ekuwo ennaviihiwavo. 17 Yehova ti Munepa, nave weiwo oriwo munepa wa Yehova, wookhalawo otaphuwa. 18 Nave oothene ahu, ni ethoi yoohikhuneeliwa nnooniheryaahu ncicimiho na Yehova ntoko espeelyu,* ninnatatuxiwa wa eruku emohamoha yeeyo ovinya mu ncicimiho nimoha niyaaka mu ncicimiho noopwahaxa,* hiihaayene ntoko Yehova, Munepa,* oneereiye.