Luka

18 Voocharela, Yesu aaloca wa yaawo niphwanaphwaniho vooloca sa ochuneya waya otitelela ovekela ni ohivelavela, 2 ariki: “Mu epooma emoha, aakhalamo muthoriha yoowo ahaamoova Muluku naari mano omucicimiha muchu. 3 Mu epooma ene yeele tho, aakhalamo naamukhwele aatitelela oya wa yoowo ariki: ‘Muthorihe mwaha aka mweekhaikhai ni mwiicani aka.’ 4 Nto yaaviravo elukuluku ahimpwachaka, nyenya ohoolo waya aaloca wa yoowo meekheiye ariki: ‘Naamwi kihimoovaka Muluku naari mano omucicimiha muchu, 5 nthowa na otitelela wa naamukhwele ola okuukhula, kinamuthoriha mwaha awe mweekhaikhai wi ahuuluule tho orwa anakuukhula ni mwaha awe.’”* 6 Apwiya yaahi: “Nwiriyane yooloca ya mulipa oothoriha, naamwi ari ohookololowa! 7 Chiryene, apwanne Muluku heeriha wi yeeriweno ekhaikhai wa oothanliwa awe, yaawo anakhuwela wa yoowo othana ni ohiyu, akhalaka tho oopixa murima ni yaawo? 8 Miyo kinnooleelaani wi, owo onahaala weeriha wi awo yeereliwe ekhaikhai mwawaakuveya. Vano, vaavaa Mwaana a muchu oneereiye arwe, apwanne chiryene onamphwanya nroromelo nenla* veelaponi yavathi?”

9 Owo tho aaloca niphwanaphwaniho nla wa akina a yaawo yiisoona okhala eekhaikhai, nave yawoona akina ohikhala echweenevo: 10 “Alopwana apiili yaavolowa mu empa ya Muluku wi yavekele, mmoha aari Mfarisi nave mukina aari mulipa ooliviha muxokho. 11 Mfarisi eemenle, aapacerya ovekela mwa meekheiye ariki: ‘Khwoo Muluku, kinnoothamalaani woona wi nkiri ntoko achu akina: yaawo ari ampava, oohookololowa, ooraruwa; naari ntoko mulipa ooliviha muxokho ola. 12 Kinniinanela olya ikwaha piili va esumana; kinnaveleela yaneekhumi ya ichu soothene kinaphwanyaaka.’ 13 Nto mulipa ooliviha muxokho eemenle ocaiwene, ahiweryaka mano oweha wirimu, aaniimana vachirima, ariki: ‘Khwoo Muluku, mukimorele ikharari miyo,* mulipa oocheka.’ 14 Kinnooleelaani wi, mulopwana yoola aakookela owannyawe eeriwe eekhaikhaixa ompwaha Mfarisi yoole. Ntakhara wi yoole oniisinnuwiha onamuyevihiwa, nyenya yoole oniiyeviha onamwinnuwihiwa.”

15 Achu yaanamuruuhela tho Yesu makwiya wi atannye;* nto oohuserya yaapacerya waasamela. 16 Mwawiihiiha, Yesu aahiichaniha makwiya, ariki: “Mwaahiye anamwane erwe wa miyo, nave muheererye waahiiha, woona wi Omwene wa Muluku ti wa yaale ari ntoko anamwane yaala. 17 Chiri kinnooleelaani wi, oothene yoole ohinaakhela Omwene wa Muluku ntoko mwaana mukhaani, harwa avolowamo.”

18 Nave mmoha a alamuleli, aamukoha Yesu ariki: “Muhusiha Aphaama, tiheeni kinaphwanelaaka weera wi kaakhele okumi woohimala?” 19 Yesu aamwaakhula: “Ntakhara heeni onakeeraawe aphaama? Haavo ori aphaama voohikhala mmoharu, Muluku. 20 Weyaano woosuwela malamulo: ‘Ohiraruwe, ohiiphe, ohiiye, ohimootherye mukhwaa, waacicimiheke apapaa ni amamaa.’” 21 Owo aahi: “Kinniiwelela malamulo oothene yaala ovinyerya woonamwaneni waka.” 22 Amanle onwiriyana, Yesu aahi wa yoowo: “Ennoohala echu emoha: Watumihe ichu soothene oryaaweno nave ikhorowa sene waakawele achu oohaawa, hiihaa, onamukhalano muhakhu wirimu; nave orwe okichareke.” 23 Vaavaa iiwaleiye yeela, owo aatepa othanana, woona wi aatepa oreela.

24 Yesu aanweha yoowo, aloca ariki: “Chiri, onamukhala woovila wa yaale ari ooreela ovolowa mu Omwene wa Muluku! 25 Ti wookhweya ekamelu ovira va ephaka ya sikano, opwaha mulipa ooreela ovolowa mu Omwene wa Muluku.” 26 Yaale yiiwale yeela, yaaloca: “Vano taani oni awerye ovuluxiwa?” 27 Owo aahi: “Ichu ihinaweryeya wa achu ti sooweryeya wa Muluku.” 28 Nto Petru aaloca ariki: “Onani! Noohiya soothene naaryaahuno nave nnoocharaani.” 29 Owo aaloca wa yaawo ariki: “Chiri kinnooleelaani wi, haavo muchu ohin’ye empa awe, naari amwaariye, naari asinnawe, naari asitiithaawe, naari anamwane awe, vanthowa na Omwene wa Muluku 30 oni ahaakhele ikwaha sincipale mu elukuluku yeela, nave muhoolo,* ekumi yoohimala.”

31 Voocharela, owo aahaakeriha okhwipi oohuserya awe Khumi Napiili alocano ariki: “Wiriyanani ela! Nnaya o Yerusalemu nave ichu soothene irempwe ni alipa a miririmu vooloca sa Mwaana a muchu, sinarwa saakhwanela* weiwo. 32 Ntoko yootakiherya, owo onarwa aveleeliwa mmatani mwa amalapo, nave anyemuliwe, ahooxiwe ni otapheriwa mara. 33 Nave emanle onwaxula, awo anammwiipha, nto nihiku naneeraru onarwa aviihiwa mookhwani.” 34 Nto oohuserya hiyaasuwela yootaphulela ya ichu seiha, woona wi masu yaala yaari oovitheya wa yaawo, nave awo hiyiiwexexa ichu aaloceiye.

35 Vaavaa Yesu aacameleiye o Yeriko, mulopwana mmoha eevaasi aakiraathi muxerexere mwa rampha avekaka. 36 Woona wi aaniiwa muloko wa achu oviraka, owo aapacerya okoha echu yeereya. 37 Awo yaamuleela eriki: “Ti Yesu Munaasareti onavira!” 38 Hiihaa, owo aakhuwela ariki: “Yesu, Mwaana a Tavite, okimorele ikharari!” 39 Yaale yaari ohoolo yaapacerya omusamela, emuleelaka wi amaale, nyenya owo aamvira akhuwelaka ariki: “Mwaana a Tavite, okimorele ikharari!” 40 Yesu aaheemela, alamulela wi aruuheliwe mulopwana yoole. Amanle omwaacamela, Yesu aamukoha: 41 “Tiheeni onachunaawe wi kiweerele?” Owo aahaakhula ii: “Pwiya, mukikhaviherye wi kooneke wanaawiili.” 42 Mwawiihiiha, Yesu aahi wa yoowo: “Kookela woona waa; nroromelo naa nohoopenuxa.” 43 Elukuluku ene yeele owo aakookela woona, nave apacerya omuchara Yesu, amucicimihaka Muluku. Nave tho achu oothene yoonnaaya yeela, yaanamvuwiha Muluku.