2 Akorintu

2 Tiwi, ekwaha yanaawiili kineeraaka kooxekuryeeni hekhala yoothananiha. 2 Woona wi wakhala wi kohoothananihaani, taani oni akihakalalihe, voohikhala yaawo kaathananinhaaka? 3 Koorepa yeeyo kirempaaka, wi vaavaa kineeraaka kirwe weiwo, kihithananihiwe ni yaale yaaphwanela okihakalaliha; woona wi kinnaroromela wi yeeyo enakiruuhela ohakalala ennooruuhelaani oothene nyuwo ohakalala omohamoha. 4 Tiwi, miyaano kohoorepelaani ni ohooxeya otokotoko ni wuukhuwa mmurimani vamoha ni miithori mancipale, nto wi musuwele osivela wawiiseela kiryaakano wa nyuwo.

5 Vano wakhala wi muchu oothananiha, owo hakithananinhe miyo, nto oothananinheeni oothene nyuwo. Nkaachuna ocicimiheryaxa mwaha yoola. 6 Osamela yoola wa achu ancipale ntakhara mulopwana yoola onnaakhwana; 7 moohiyana, nyuwo munaphwanela omulevelela mooreera murima ni omuhakararya, wi owo ahivoothiwe* ni othanana woopwaha mphimo. 8 Mwawiihiiha, kinnooceenyeryaani wi mmooniherye yoowo osivela wanyu. 9 Ti nthowa na yeela tho koorepenlaakaani: Wi koone waakhanle wi mwaahaala ovaha sawooniherya wi muri awiiwelela mu ichu soothene. 10 Wakhala wi moomulevelela muchu wa nthowa na echu vyakala, miyo tho koomulevelela. Mweeparipari, yeeyo kilevelenlaaka (wakhala wi koolevelela echu), waari wa nthowa nanyu, vamiithoni va Kristu, 11 wi nihivoothiwe* ni Satana, woona wi noosuwela ovyaka* wawe.

12 Vaavaa kaaphin’yaaka o Trowate wi kilaleerye michaka saphaama vooloca sa Kristu, nave waahuliwaaya mulako wa miyo ntakhara muteko wa Apwiya, 13 murima aka* hiwaawiichuuwale* wa nthowa na ohimphwanya munnaka Titu. Mwawiihiiha, kaahaalaanya anna a weiwo nave kaacimula kiyaaka o Maketoniya.

14 Nto mathamalelo eye wa Muluku, yoowo onanihoola mu wooneiha ovootha vamoha ni Kristu, nave moorweela wa hiyo onamwaramwaxa muhiriri wa wunkhela wa masuwelelo awe mmakupa oothene! 15 Tiwi wa Muluku nri muhiriri wa wunkhela wa Kristu, variyari va yaale anavuluxiwa ni variyari va yaale anarimeela; 16 wa yaala ookuchula muhiriri wa okhwa onnaakeriha wookhwani, wa oopacerya muhiriri wa wunkhela wa okumi onnaakeriha wookumini. Nave taani ori oophwanelela wa ichu seiha? 17 Hiyo nri oophwanelela, woona wi hanri alipa ootumiha* masu a Muluku, ntoko ancipale aryaaya, nto ninnaloca ni murima weeparipari ntoko oorummwa ni Muluku, aa, vamiithoni va Muluku, vamoha ni Kristu.