Salmu

Muluku aka ti mwala aka, yoowo kinachawelaakawo;

Owo eyaakiho aka ni mvuluxa aka akuru,* nipuro naka noochawelavo nookhapeleleya.*

 3 Kinnamwiichana Yehova, yoowo ori oophwanela ovuwihiwa,

Nave kinarwa kivuluxiwa wa amwiicani aka.

 4 Mikoi sa okhwa saakirukurerya;

Ntoko maahi awoopiha, achu ancipale ootakhala yaanakoopopiha.

 5 Mikoi sa Mahiye* sookirukurerya;

Miraakho sa okhwa sookiphwanya.

 6 Mu wuukhuwa waka kaamwiichana Yehova,

Kaakhuwela wa Muluku aka ntakhara nikhaviheryo.

Orweela o empa awe owo aahiiwa nsu naka,

Nave okhuwela waka ntakhara nikhaviheryo waaphiya owaruni wawe.

 7 Mwawiihiiha, elapo yavathi yaapacerya ocikinyeya ni othukumela;

Mathipelo a miyaako yaacikinyeya

Nave yaathukumela, woona wi owo aanyeenyeya.

 8 Mphulani mwawe waakhumamo mwiixi,

Nave mwaano mwawe waakhumamo mooro wootoloxa;

Mwa yoowo yaakhumamo makhala oovarela.

 9 Owo aahuuramiha erimu nave akhuruwa;

Nave vathi va inaani sawe yaakhalavo epiiphi yooriipa phii.

10 Owo aaruule avavaka, anwenle kerupi;

Owo aaruule mwawaakuveya awenle va muuphelo a munkeelo.*

11 Mwawiihiiha, owo aahiihuruwela ni epiiphi;

Ntoko nipuro nawiipithavo, voorukurerya vawe voothevene,

Yaakhalavo maahi ooripa ni mahuruku ooripa.

12 Orweela wa waarya wa vamiithoni vawe,

Yaakhuma maralala ni makhala a mooro variyari va meeku.

13 Voocharela, Yehova aapacerya woopa itari wirimu;

Awiirimurimu aaheeriha nsu nawe wiiweya

Ni maluku a maralala vamoha ni makhala a mooro.

14 Owo aavonya mavaka awe nave aamwaramwaxa;

Owo aaverunya nave awaakanyerya.

15 Vathi va mihice* waanooneyavo;

Mathipelo a elapo yavathi yaakhuruwa wa nthowa na osamela wanyu, khwoo Yehova,

Moorweela wa nwiya wakuru onakhuma mphulani mwanyu.

16 Orweela wiirimurimu owo aahookola ntata;

Owo aahikiphara nave akiviihamo mmaahini awiixa.

17 Owo aakoopola wa mwiicani aka akuru,

Wa yaale yaakiica, yaawo yaari akuruxa okipwaha miyaano.

18 Awo yaakiphwanya mu nihiku na epahu aka,

Nto Yehova taari mukhaviheryi aka.

19 Owo aakikeriha mu nipuro nookhapeleleya;*

Owo aakoopola woona wi aanahakalala ni miyaano.

20 Yehova onnakichuwela mwawiiwanana ni wookololowa waka;

Owo onnakikookiherya mwawiiwanana ni ohikhalano nthowa* wa matata aka.

21 Tiwi kinnakhapelela iphiro sa Yehova,

Nave nkipanke yoonanara ya omunyanyala Muluku aka.

22 Mathoriheryo awe oothene ari vamiithoni vaka;

Nkirwa kihiya malamulo awe.

23 Kinamutitelela ohikhalano nthowa vamiithoni vawe,

Nave kinamutitelela wiikhapelela wa yoohesa.

24 Yehova akichuwele mwawiiwanana ni wookololowa waka,

Mwawiiwanana ni ohikhalano nthowa wa matata aka vamiithoni vawe.

25 Ni muchu ororomeleya, nyuwo munneerano ichu moororomeleya;

Muchu oohikhalano nthowa, munnamukhaliha moohikhalano nthowa;

26 Ni muchu aweela murima, nyuwaano munnooniherya okhala aweela murima;

Nto ni muchu ootakhala munnooniherya okhala oovyaka.

27 Tiwi munnaavuluxa awiiyeviha,*

Nto munnaayeviha awiirumiha.*

28 Woona wi ti nyuwaano munapariha epanthi aka, khwoo Yehova,

Muluku aka yoowo onamwaleela epiiphi aka.

29 Nnikhaviheryo nanyu kinanwerya ohiphela nikhuuru na alipa oohuhula;

Ni ikuru sa Muluku kinanwerya owela exiri.

30 Ephiro ya Muluku eeparipari, ti yoophaameya;

Masu a Yehova taweela.*

32 Muluku eeparipari ti yoowo onakiwariha ikuru,

Owo onamweeriha ephiro aka okhala yoophaameya.

33 Owo onneeriha inaani saka okhala ntoko sa naahe

Nave onnakeemexa mmapuro oocukhuwa.

34 Owo onnavyakiha matata aka ntakhara ekhoco;

Miwono saka sinanwerya ovonya munra wa muchove.

35 Nyuwaano munnakivaha naakiho nanyu na ovuluxa,

Ntata nanyu noolopwana ninnakikhapelela,*

Nave wiiyeviha wanyu onnakinnuwiha.

36 Munnannuwiha ephiro ntakhara meecelo aka;

Inaani* saka hirwa iserekuwa.

37 Kinarwa kiwiikara amwiicani aka ni waaphwanya yaawo;

Nkirwa kikooka ophiyerya kaatolonxe.

38 Kinamwaanyaanya ophiyerya wi awo hewerya ovinya;

Awo anamuuwela vathi va inaani saka.

39 Nyuwo munarwa mukiwariha ikuru ntakhara mukhico;

Munarwa mweeriha wi amwiicani aka yuuwe vamiithoni vaka.

40 Nyuwo munamweeriha wi amwiicani aka echawe vamiithoni vaka,*

Nave kinamwaatoloxa* yaale anakiica.

41 Awo annakhuwela ntakhara nikhaviheryo, nto haavo awaavuluxa;

Ophiyerya tho wi annakhuwela wa Yehova, nto owo hanawaakhula.

42 Kinarwa kaachupula ntoko nchupi nnavavihiwa ni echeku;

Kinarwa kaavonya ntoko ncokwi na mmiphironi.

44 Wiiwaru pahi vooloca sa miyo, awo anamukiiwelelaka;

Achu a ilapo ikina* anamurwa wa miyo esaren’ye woova.

45 Achu a ilapo ikina anamuyeleela olipa murima;*

Anamukhuma ethukumelaka mmapuro aya oolipihiwa.

47 Muluku eeparipari onninla ikuhu wa nthowa naka;

Owo onnakinnyererya maloko wi kilamuleleke.

48 Nyuwo munnakivuluxa wa amwiicani aka oonyeenyeya;

Munnakikeriha osuluxa wa yaale anakihiphela;

Munnakivuluxa wa muchu a nlala.

49 Ti nthowa nene kineeraaka koovuwiheeni variyari va maloko, khwoo Yehova,

Nave kinarwa kiipa macipo oocicimihano* nsina nanyu.

50 Owo onnapaka miteko mitokotoko sa ovuluxa* ntakhara mwene awe;

Onnooniherya osivela woororomeleya wa oothanliwa awe,

Wa Tavite ni wa muyareriwo* awe, okhala wookhala.