Mateyu

13 Mu nihiku nenle, Yesu aavinya vaate nave akiraathi oxerexere wa ephareya. 2 Muloko* mutokweene wa achu waamurica, mwawiihiiha owo aawela mmwaaceyani akiraathi mwemmo nave muloko woothene wa achu waaheemela muxerexere mwa ephareya. 3 Voocharela, owo aahaaleela ichu sincipale moorweela wa maphwanaphwaniho, ariki: “Wiriyanani! Mulipa oomisa aavinya anamisa mmiso. 4 Arikimmisa hiihale, mmiso mukina waamorela muxerexere mwa mphiro, nave saarwa ipalame ithupamo. 5 Mukina waamorela vamalukuni wahaarivo echaya yincipale, moohilekela waamela woona wi yaarivo echaya vakhaani. 6 Nto vaavaa nsuwa noompaaya, waanyaala ophiyerya wuuma woona wi mitathaari saya hisaari sawiixeela. 7 Mukina waamorela vamiiwani; vaavaa miiwa sinnuwaaya saahiiphelela. 8 Nto mukina waamorela va echaya yaphaama, opacerya ovaha sawiima, mukina opwaha ikwaha nsana,* mukina opwaha ikwaha makhumi mathanu nammoha,* ni mukina opwaha ikwaha makhumi mararu.* 9 Yoowo orino maaru, iiwe.”

10 Oohuserya yaamwaacamela enamukoha eriki: “Ntakhara heeni munalocaanyu ni achu mpharihelaka maphwanaphwaniho?” 11 Yesu aawaakhula ariki: “Nyuwo moovahiwa osuwela soovitheya saweela sa Omwene wa wirimu, nyenya awo havahiwe. 12 Yoowo orinono, onamwaaceereryiwa nave onamukhalano mwawaaca; nto yoowo ohirino, onamwaakhiwa ni yeeyo ene oreiyeno. 13 Ti nthowa nene kinalocaaka wa yaawo kipharihelaka maphwanaphwaniho; woona wi awo annoona, nto hanoonavo echu; anniiwa, nto haniiwexexa yeeyo aniiwaaya, naari hanaphuravo echu. 14 Nave annakhwaanela wa yaawo masu a mulipa a miririmu Yesaya, anii: ‘Chiryene munanwiriyanaka, nto hamurwa mwiiwexexa; chiryene munanwehaka, nto hiyaavo munahaalaanyu woonaka. 15 Ntakhara mirima sa achu ala ti sooturuwa, awo aaciyela iwaru saya ni orupiha miitho aya, wi ehirwe yooneke ni miitho aya, naari wiiwa ni iwaru saya, naari wiiwexexa ni murima aya ni ocharuwa, wi miyo kaapenuxe.’

16 “Nyenya, oohakalala ti miitho anyu ntakhara annoona, ni maaru anyu, anniiwa. 17 Chiryene kinnooleelaani wi, alipa a miririmu ancipale ni achu eekhaikhai yaanachuna woona ichu seiho munoonaanyu, nto hoonne, ni wiiwa ichu seiho muniiwaanyu, nto hiiwale.

18 “Vano wiriyanani niphwanaphwaniho na mulipa oomisa. 19 Muchu yoowo oniiwa masu a Omwene nyenya ahiiwexexavo, oonanara owo* onnarwa akuxavo yeeyo yaaliwe mmurimani mwawe; ola onaxipela mmiso yoowo waamorenle muxerexere mwa mphiro. 20 Mmiso yoole omorenle vamalukuni, onaxipela muchu yoowo oniiwa masu nave mwawaakuveya, eemererya moohakalala. 21 Naamwi ahirino mitathaari onnakhala mu elukuluku yavakhaani, nto saphiya soohooxa naari wiikariwa nthowa na masu, owo onnakwaculiwa mwawaakuveya. 22 Mmiso yoowo omorenle vamiiwani, onaxipela muchu yoowo oniiwa masu, nto sawuukhula sa elapo yeela* ni owoka wa muhakhu onniiphelela masu, ahinavaha sawiima. 23 Nto mmiso yoowo omorenle va echaya yaphaama, onaxipela muchu yoowo iiwale masu nave iiwexexavo, chiryene onnavaha sawiima, mukina opwaha ikwaha nsana,* mukina ikwaha makhumi mathanu nammoha,* ni mukina ikwaha makhumi mararu.”*

24 Owo aahaaleela niphwanaphwaniho nikina ariki: “Omwene wa wirimu onalikana ni muchu yoowo aanle mmiso waphaama mmacani mwawe. 25 Achu erikimukona, aarwa mwiicani awe, aalamo tho ntakataka* nave apwaha. 26 Mmiso ole waamenlaaya opacerya wiima, naahooneya tho ntakataka. 27 Anamuteko yaaya omukoha mwaneene a emaca eriki: ‘Pwiya, himwaanle mmiso waphaama mmacani? Vano ntakataka nrwenle woowi?’ 28 Owo aawaakhula: ‘Mwiicani, taanlemo.’ Anamuteko yaahimukoha: ‘Apwanne munnachuna wi niyewo napholemo?’ 29 Owo aahaakhula: ‘Hooye, kinoova wi mwaapholaka ntakataka, muni munaamumphola tho tiriku. 30 Hiyani wi sinnuwe vamoha ophiyerya elukuluku ya ohaca, mu elukuluku yeeyo, kinahaala waaleela alipa oohaca kiriki: Mpacerye othukumanya ntakataka, mmakanye ni mweeyele; voocharela, mmuthukumanye tiriku munikhupini mwaka.’”

31 Yesu aahaaleela niphwanaphwaniho nikina ariki: “Omwene wa wirimu onalikana ni mwaammiso wa mustarta muchu aakunxeiye aala mmacani mwawe. 32 Owo chiryene ti wooyevaxa opwaha mmiso woothene, nto wamela, onnannuwa okhala mwiri mutokweene opwaha mukhwani woothene, nave ipalame sa wirimu sinnakaya mmirayini mwaya.”

33 Owo aahaaleela tho niphwanaphwaniho nikina: “Omwene wa wirimu onalikana ni yooruruvaliha* yeeyo muthiyana onaheleiye ephepa yaweetheiwa ya miphimo miraru wi enyaruwe.”*

34 Ichu soothene seiha, Yesu aaloca wa muloko moorweela wa maphwanaphwaniho. Chiryene, hiyaavo aaloceiye wa yaawo ahipharihenle niphwanaphwaniho, 35 wi ekhwaanele yeeyo yaalociwe ni mulipa a miririmu ariki: “Kinamuhula eyano aka mmaphwanaphwaniho; kinamulokoha ichu soovitheya ovinyerya woopaceryani.”*

36 Voocharela, amanle ohiya muloko wa achu, owo aarowa. Oohuserya awe yaamwaacamela nave eloca: “Muntaphulele niphwanaphwaniho na ntakataka naaliwe mmacani.” 37 Owo aawaakhula ariki: “Mulipa oomisa mmiso waphaama ti Mwaana a muchu; 38 emaca ti elapo. Mmiso waphaama anamwane a Omwene, nto ntakataka anamwane a mulipa oonanara owo, 39 nave mwiicani aanle ntakataka ti Musaserya. Elukuluku ya ohaca ti makuchuwelo a mukhalelo yoola wa ichu,* nave alipa oohaca ene ti ankeelo. 40 Mwawiihiiha, ntoko ntakataka nnathukumanyiwaaya nave neeyeliwa, hiihaa tho enamweereya omakuchuwelo wa mukhalelo yoola wa ichu.* 41 Mwaana a muchu onahaala waaruma ankeelo awe, wi epholemo mu Omwene awe ichu soothene inakwaculiha vamoha ni oothene aweera sootakhala. 42 Nave awo enarwa yaarihela o cukucha a mooro. Weiwo toni okhalewo winla ni okhuuriha miino. 43 Mu elukuluku yeeyo, awookololowa murima enarwa yaarya ntoko nsuwa mu Omwene wa Atiithi aya. Yoowo orino maaru, iiwe.

44 “Omwene wa wirimu onalikana ni muhakhu ovithiwe mmacani, yoowo mulopwana aaphwannyeiye nave avitha wanaawiili; wa nthowa na ohakalala wawe, aarowa atumiha soothene aareiyeno wi athume emaca yeele.

45 “Omwene wa wirimu onalikana tho ni mulipa a maroca oneeceeca aavyaka maluku asisapo. 46 Aaphwannyeiye nluku nimoha noowalamelaxa, aarowa atumiha mwawaakuveya ichu soothene areiyeno wi athume nluku nenle.

47 “Nave tho, Omwene wa wirimu onalikana ni mulapa oreiwe mphareya nave ophara ihopa soohiyanahiyana. 48 Vaavaa waasaren’yaaya, achu yaapurulela omokoni, ekiraathi, epacerya othanlela ihopa saphaama ehelaka mmucankani nave soohiphwanelela erihelaka okhwipi. 49 Ti yeeyo enahaala weereya omakuchuwelo wa mukhalelo yoola wa ichu.* Ankeelo anamwaavalaanya oonanara murima mwa awookololowa, 50 nave awo enarwa yaarihela o cukucha a mooro. Weiwo toni okhalewo winla ni okhuuriha miino.

51 “Apwanne mohiiwexexa phaama soothene seiha?” Awo yaamwaakhula: “Aa.” 52 Voocharela, aahaaleela ariki: “Mwawiihiiha, muhusiha yoowo onahusihiwa vooloca sa Omwene wa wirimu onalikana ni mulopwana, mwaneene a vaate, yoowo onakumiha mmuhakhuni mwawe ichu ivyaani ni sakhalai.”

53 Vaavaa Yesu aamalinheiye oloca maphwanaphwaniho yaala, aapwahavo. 54 Aaphiyaleiye mu elapo awe, aapacerya waahusiha achu mu nipuro naya na malapelo.* Nave achu yaahitikhiniheya epacerya oloca: “Mulopwana ola onaruuha woowi miruku ni ikuru seiha sa weerano sootikhiniha? 55 Tahi yoola mwaana a karpinteiru? Amama awe tahi Mariya, nave asinnawe tahi Tiyaku, Yosefe, Simoni ni Yutasi? 56 Arokora awe tahi yaale oothene anakhala ni hiyo? Vano oruuhale woowi soothesene seiha?” 57 Mwawiihiiha, awo yaapacerya okwaculeya vanthowa na yoowo. Nto Yesu aalocano ariki: “Mulipa a miririmu onnacicimihiwa makupa makina, ohiya mweelapo awe naari owannyawe.” 58 Vanthowa na ohikhalano waya nroromelo, Yesu haapankewo sootikhiniha sincipale.