Yohani

7 Evinre yeela, Yesu aatitelela weeceeca o Kalileya, nto haachunne weerano emohamoha o Yuteya, woona wi Ayuta yaanaavyaavya omwiipha. 2 Nyenya, yaanaacamela Efesta ya Mixakala* ya Ayuta. 3 Mwawiihiiha, asinnawe yaahi wa yoowo: “Mvinyewo wenno muye o Yuteya, wi oohuserya anyu tho yoone miteko munapharaanyu. 4 Vawi haavo muchu oneera ichu moovitheya aniiha aavyaka ovuwa. Waakhanle wi munneerano ichu seiha, mwiisooneihe wa achu.”* 5 Mweeparipari, asinna awe hiyaamuroromela yoowo. 6 Mwawiihiiha, Yesu aahi wa yaawo: “Elukuluku aka hephiyale, nto wa nyuwo elukuluku yoothene ti yoophwanelela. 7 Elapo hiyaano mathowa a owiicaani nyuwo, nto enakiica miyo ntakhara kinneerela onamoona wi miteko saya ti sootakhala. 8 Haweni nyuwo ofestani; miyaano nkiyawo efesta yeela, ntakhara elukuluku aka nlelo hiyaakhwanenle.” 9 Mwawiihiiha, aaleenleiye ichu seiha, aatitelela okhala o Kalileya.

10 Nto vaavaa asinnawe yaawenlaaya eyaaka ofestani, owo tho aawela, ohiya mwawooneya nyenya moovitheya. 11 Mwawiihiiha, Ayuta yaapacerya omwaavya ofestani nave enaloca eriki: “Ori woowi mulopwana yoole?” 12 Nave variyari va muloko* wa achu ancipale yaanamwaapa yoowo. Akina yaanaloca eriki: “Owo mulopwana aphaama.” Nto akina yaani: “Hooye. Owo onnahuweliha muloko wa achu.” 13 Mweeparipari, haavo aamuloca Yesu waaciwevo nthowa na owoova Ayuta.

14 Efesta eri veeri, Yesu aawela avolowa mu empa ya Muluku apacerya ohusiha. 15 Ayuta yaatikhina, eloca eriki: “Ti mwawiihai mulopwana ola oreiyeno masuwelelo yaala oothene a Soorempwa* aniiha ahivolonwe oxikola?”* 16 Yesu aawaakhula ii: “Yeeyo kinahusihaaka tahi yaaka, nyenya ti ya yoole okirumme. 17 Aakhanlevo muchu onachuna weerano yookhwela Awe, onamusuwela waakhanle wi yeeyo kinahusihaaka enarwa wa Muluku naari waakhanle wi yeeyo kinalocaaka enarwa wa miyo. 18 Yoowo onaloca sa mwaneene meekheiye, onaavya wiicicimiha; nto yoole onaavya ncicimiho na yoole omurumme, teeparipari nave mwa yoowo hiwaamo ohookololowa. 19 Mano Mose hoovanheeni Malamulo? Nnya haavo mmoharu a nyuwo oniiwelela Malamulo. Vano ntakhara heeni munaavyaanyu okiipha?” 20 Muloko wa achu waahaakhula: “Weyaano wookhalano nsololo. Taani onachuna owiipha?” 21 Yesu aawaakhula ii: “Keenreno echu emoha pahiru, nyenya oothene nyuwo mootikhiniheya.” 22 Mwawiihiiha, muthokororye ela: Mose ohoovahaani othikiliwa (tahi wi ela yaarwenle wa Mose, nyenya wa makholo akhalai), nave nyuwo munaathikila alopwana mu nihiku na Sapata. 23 Waakhanle wi mulopwana onnathikiliwa mu nihiku na Sapata wi Nlamulo na Mose nihichekeliwe, ntakhara heeni munanyeenyeyaanyu ni miyo nthowa na ompenuxa moomalela mulopwana ola mu nihiku na Sapata? 24 Muhithoriheke mwawiiwanana ni moonelo anyu, nto muthoriheke mwawookololowa.”

25 Voocharela achu akina o Yerusalemu yaapacerya oloca eriki: “Tahi mulopwana yoola onaavyiwa wi iiphiwe? 26 Vano mmoone onaloca vanlakani vene, nave awo hanaloca echu wa yoowo. Apwanne ahooleli ahu anamoona owo okhala Kristu chiryene? 27 Hiyaano noosuwela mulopwana ola onarweiyewo; nyenya vaavaa Kristu oneereiye arwe, haavo oni asuwele onarweiyewo.” 28 Voocharela, vaavaa aahusiheiye mu empa ya Muluku, Yesu aaloca moovuwa ariki: “Nyuwaano mookisuwela nave moosuwela weiwo kinarwaakawo. Nkiruule mwa miyo meekhaaka nto Yoowo okirumme teeparipari nave nyuwo hammusuwenle. 29 Miyaano koomusuwela yoowo, woona wi kiruule mu nsina nawe, nave ti yoowo okirumme.” 30 Mwawiihiiha, awo yaapacerya waavya meerelo a omphara, nto hiyaawenrye omphara, woona wi nlelo elukuluku awe hiyaaphiyale. 31 Nto achu ancipale a muloko yoole yaanamuroromela, nave yaanaloca eriki: “Vaavaa Kristu oneereiye arwe, apwanne onampaka ineneeryo opwaha seiha mulopwana ola onapakeiye?”

32 Afarisi yaahiiwa muloko wa achu olocaka ichu seiha vooloca sa Yesu, nave ahooleli a alipa a mukucho ni Afarisi yaahaaruma alipa oolipelela wi yamphare.* 33 Voocharela Yesu aahi: “Kinamukhala ni nyuwo elukuluku vakhaani, kihaakumve oya wa Yoowo okirumme. 34 Nyuwo munamukaavya, nyenya hamukiphwanya, nave weiwo kinayaakawo nyuwo hamuwerya oyawo.” 35 Mwawiihiiha, Ayuta yaapacerya okohana eriki: “Ti woowi mulopwana ola onachuneiye oyawo, weiwo nneeraahu nihimphwanye? Apwanne onachuna oya wa Ayuta yaawo amwalamwalenle wa Akriki ni waahusiha Akriki? 36 Tiheeni onachuneiye oloca ni masu awi: ‘Nyuwo munamukaavya, nyenya hamukiphwanya, nave weiwo kinayaakawo nyuwo hamuwerya oyawo’?”

37 Mu nihiku nookuchula, nenlo naari nihiku ntokotoko na efesta, Yesu aaheemela nave aloca moovuwa ariki: “Aakhanlevo muchu orino nthanana, arwe wa miyo awurye. 38 Yoowo onakiroromela miyo, hiihaa ntoko yoorepa enalocaaya: ‘Mwa yoowo inarwa iphacuwa mihice sa maahi ookumi.’” 39 Tiwi, Yesu aaloca sa munepa yoowo yaahaalaaya waakhela yaawo yii emuroromele; elukuluku yeele, munepa hiwaavahiwe vawi Yesu eera nlelo ahicicimihiwe. 40 Akina a yaale yaari vaavale, yiiwalaaya masu yaala yaapacerya oloca eriki: “Ola chiryene Mulipa a Miririmu.” 41 Akina yaani: “Ola ti Kristu.” Nyenya akina yaanaloca eriki: “Apwanne Kristu aahaala orwa o Kalileya? 42 Mano, soorepa hasinaloca wi Kristu aahaala orweela mmuyareriwo wa Tavite, o Petelehemu, epooma yeeyo Tavite aakhaleiyewo?” 43 Mwawiihiiha, waakhalavo okawanyeya variyari va muloko yoole vanthowa na yoowo. 44 Akina a yaawo yaanachuna omphara, nyenya haavo aawenrye omphara.*

45 Alipa oolipelela yaale yaakookela wa ahooleli a alipa a mukucho ni Afarisi, nave awo yaahaakoha yii: “Ntakhara heeni muhimuruuhalaanyu?” 46 Alipa oolipelela yaahaakhula: “Haavo muchu ontonko oloca ntoko yoowo.” 47 Mwawiihiiha Afarisi yaawaakhula: “Nyuwo tho moowokiwa? 48 Apwanne ookhala mmoha a ahooleli ahu naari a Afarisi omuroromenle yoowo? 49 Nyenya muloko yoola ohisuwenle Malamulo, achu awuulumeliwa.” 50 Nikotemu, yoowo aakele okumana ni Yesu, nave aari mmoha a yaawo, aaloca wa yaawo ariki: 51 “Apwanne malamulo ahu anneemererya omuthoriha muchu ahipacenre owiriyaniwa ni osuweliwa echu ene eenreiye?” 52 Awo yaamwaakhula eriki: “Apwanne weyaano tho wa Mukalileya? Otholathole nave onamoona wi haavo mulipa a miririmu oni arwe o Kalileya.”*