Luka

20 Nihiku nimoha, Yesu aahusihaka achu mu empa ya Muluku nave alaleeryaka michaka saphaama, yaarwa wa yoowo ahooleli a alipa a mukucho, alipa oorepa vamoha ni asitokweene a achu 2 nave eloca wa yoowo eriki: “Munleele, owerya wanyu wa weerano ichu seiha onarwa woowi? Naari, taani oovanheeni owerya yoola?” 3 Owo aawaakhula ariki: “Miyo tho kinachuna wookohaani echu emoha, nave mukileele: 4 Opatiso wa Yohani waarweenle wirimu naari wa achu?” 5 Awo yaanavaanyihana mukina ni mukhwaawe eriki: “Naloca wi, ‘Waarweenle wirimu,’ onahaala wi, ‘Vano ntakhara heeni himwaamuroromenle?’ 6 Nyenya naloca wi, ‘Waarweenle wa achu,’ muloko woothene wa achu onannivonya maluku, ntakhara wi oothene anneemererya wi Yohani aari mulipa a miririmu.” 7 Mwawiihiiha, awo yaamwaakhula wi hiyaasuwenle orweenlaayawo. 8 Yesu aaloca wa yaawo: “Miyo tho nkinooleelaani onarwaayawo owerya waka weerano ichu seiha.”

9 Voocharela, owo aapacerya waaleela achu niphwanaphwaniho nla: “Mulopwana mmoha aahaala miri sa uuva,* aahiyerya emaca anamuteko awe, apaka mukwaha nave alekela weiwo. 10 Yaaphiyalaaya elukuluku ya orukula sawiima, aamuruma kapuro awe wa anamuteko, wi avahiwe sawiima sa mmacani. Nyenya, anamuteko yaammana kapuro yoole nave emurowiha ahirino echu. 11 Aahaarumihela tho kapuro mukina. Yoola tho, yaammana, emunyemula* nave emurowiha ahirino echu. 12 Aamurumihelawo tho aneeraru; yoola tho anamuteko yaamphoreiha nave emwiikara. 13 Hiihaa, mwaneene a emaca aahuupuwela ariki: ‘Kini keere eheeni? Kinamwaarumihela mwanaka amwaamulopwana, oosiveliwa. Akhweya anahaala omucicimiha.’ 14 Vaavaa anamuteko yaamonnaaya, yaaloca wa mmoha ni mukhwaawe eriki: ‘Ola mukelampa. Haya nimwiiphe wi muhakhu okhale wawihu.’ 15 Mwawiihiiha, awo yaampurulela okhwipi wa emaca, emwiipha. Vano, tiheeni mwaneene a emaca onahaaleiye oweerela anamuteko yaale? 16 Owo onahaala orwa, awiiphe anamuteko yaala ni waahiyera emaca eyo anamuteko akina.”

Yiiwalaaya yeela, awo yaahi: “Echu eyo ehirwe yeereye!” 17 Nto Yesu aawenheiye aahi wa yaawo: “Vano, ela erempwe enataphulela eheeni: ‘Nluku nenlo naakhoociwe ni alipa ooteka, ti nenlo naakhanle nluku noochuneya noopharelano empa’?* 18 Oothene yoole oni uuwele nluku nla, onamunyaanyeya. Nto yoowo oni uuweliwe ti nluku nenla, onamuchupuwa.”

19 Alipa oorepa ni ahooleli a alipa a mukucho yaanamwaavya wi emphare elukuluku ene yeele, nyenya yaanoova muloko wa achu, woona wi yaanasuwela wi aalonce niphwanaphwaniho nenla awuupuwelaka yaawo. 20 Nave emanle omvarerya, yaahaaruma alopwana oohocahoca, yaawo yiiseera okhala awookololowa. Yaachuna omphara Yesu mmasu awe, wi emphwanyerye nthowa na omveleela mmatani mwa asitokweene ni alipa oolamula. 21 Nave awo yaamukoha eriki: “Muhusiha, noosuwela wi munnaloca nave munnahusiha mwaphaama nave hamunooniherya nthalu, nyenya munnahusiha mweeparipari ephiro ya Muluku: 22 Apwanne ti yaweemereryeya* wa hiyo oliva muxokho wa Kaisara naari hooye?” 23 Nto owo aasuwela ovyaka waya, nave aloca wa yaawo ariki: 24 “Mukoonihe etenaariyu ene. Eruku ela ni masu ari vaava tawani?” Awo yaahaakhula: “Ta Kaisara.” 25 Yesu aalocano ariki: “Mwawiihiiha, munaphwanela oveleela wa Kaisara ichu sa Kaisara, nto wa Muluku ichu sa Muluku.” 26 Hiihaa, yaaviliwa omphara mmasu awe vamiithoni va achu, nyenya etikhinihen’ye ni naakhulo nawe, awo yaahimaala.

27 Nyenya, Asatuki* akina, yaawo ahineemererya ovinya mookhwani, yaamwaacamela Yesu emukoha: 28 “Muhusiha, Mose aanrepela: ‘Wakhala wi mulopwana ookhwa ahirino anamwane, munnawe onaphwanela omuthela naamukhwele owo wi amuyarele munnawe anamwane.’ 29 Vano, yaakhalavo alopwana athanu napiili yaawo yaari onna aya. Oopacerya aathela, nyenya aakhwa ahirino anamwane. 30 Hiihaa tho anaawiili 31 ni aneeraru aamuthela muthiyana yoole. Yaaheerano emohamoha oothene yaale athanu napiili; nto awo yaahikhwa ehiyanreno muthiyana yoole. 32 Wookuchulani waya, muthiyana ole aakhwa tho. 33 Vano, mu ovinya mookhwani, muthiyana yoole oni akhale awani? Woona wi oothene athanu napiili yaamuthela.”

34 Yesu aaloca wa yaawo ariki: “Anamwane a mukhalelo yoola wa ichu* annathela nave annatheliwa, 35 nyenya yaale eni yeeriwe oophwanelela waakhela mukhalelo wa ichu onoorwa ni oviihiwa mookhwani wa alipa ookhwa, hanathela naari mano hanatheliwa. 36 Chiryene, awo hanakhwaru tho, woona wi anaphwanaphwana ni ankeelo, nave ari anamwane a Muluku, vanthowa na okhala anamwane a ovinya mookhwani. 37 Nyenya sa oviihiwa mookhwani wa alipa ookhwa, ophiyerya tho wi Mose aasuweliha mu yaweereya ya mwiri* waavarela, vaavaa aamwiichanneiye Yehova ntoko: ‘Muluku a Aparahamu, Muluku a Isaki, ni Muluku a Yakopo.’ 38 Owo Muluku, ohiya a achu ookhwa nto a akumi, ntakhara oothene annakhala akumi mwa yoowo.”* 39 Alipa oorepa akina yaamwaakhula eriki: “Muhusiha, mooloca phaama.” 40 Nave haavo eerenrye ompakela nikoho nimoharu mano.

41 Yesu aahaakoha ariki: “Vano onaweryeya hai awo enaloca wi Kristu mwaana a Tavite? 42 Tiwi, Tavite mwaneene aaloca mu liivuru a Salmu ariki: ‘Yehova aaloca wa Pwiyaka: “Okiraathi o ntata naka noolopwana 43 ophiyerya kaakunhe amwiicani aa vathi va inaani saa.”’ 44 Tavite onamweera Pwiya; vano, onaweryeya hai okhala tho mwanawe?”

45 Nave vaavaa achu oothene yaawiriyanaaya, Yesu aaloca wa oohuserya awe ariki: 46 “Mwiikasoopeke ni alipa oorepa yaawo anasiveliwa weeca ewanre soowara soorakama, anasiveliwa oloceliwa mmapuro awaaciwamo, okiraathi mmipaco soopacerya* mmapuro a malapelo* vamoha ni okiraathi mmapuro oocicimiheya mu ifesta, 47 nave yaawo waasivela waalyela anaamukhwele mmawannyaya,* nave wi yaatikhinihe,* annapaka mavekelo oorakama. Ala enarwa yaakhela olaka otokotoko.”*