Yohani

19 Voocharela, Pilatu aamukuxa Yesu alamulela wi awaxuliwe. 2 Anakhoco yaamvathaanya* korowa a miiwa, enwariha mmuruni, nave tho yaahinwariha ekuwo yoophilivila, 3 awo yaanamwaacamela enaloca eriki: “Mooni, nyuwo Mwene a Ayuta!” Awo tho yaanamvaha mapuraata. 4 Pilatu aakhumela tho vaate nave aloca wa yaawo ariki: “Onani! Kinammukumiherya vaate wa nyuwo wi musuwele wi nkiphwannye nthowa mwa yoowo.” 5 Mwawiihiiha, Yesu aakhumela vaate, anwanre korowa a miiwa ni ekuwo yoophilivila. Nave Pilatu aaloca wa yaawo: “Mmoone muchu ene!” 6 Nyenya, vaavaa ahooleli a alipa a mukucho ni asitokweene yaamoonnaaya Yesu, awo yaakhuwela eriki: “Athomeiwe vamwirini! Athomeiwe va mwiri!”* Pilatu aaloca wa yaawo: “Mmukuxe nyeenyu wi mwamuthomeye,* woona wi nkiphwannye nthowa mwa yoowo.” 7 Ayuta yaamwaakhula eriki: “Hiyaano nookhalano nlamulo, nave mwawiiwanana ni nlamulo owo onnaphwanela okhwa, woona wi ohiiseera okhala mwaana a Muluku.”

8 Pilatu iiwaleiye masu yaala, woova wawe waahaaceereryeya, 9 nave aavolowa mu empa ya mulamuleli amukoha Yesu ariki: “Weyo wa woowi?” Nto Yesu haamwaakhunle. 10 Mwawiihiiha Pilatu aalocano ariki: “Honakaakhula? Honasuwela wi kookhalano owerya wa wootaphula ni owerya tho wa woothomeya?”* 11 Yesu aamwaakhula ariki: “Nyuwo himwaahaala okhalano owerya wa miyo waakhanle wi hamvahiwe orweela osulu. Ti nthowa nene mulopwana yoowo okiveleenle wa nyuwo ookhalano yoocheka etokweene.”

12 Wa nthowa nenla, Pilatu aanaavyaavya meerelo a omutaphula Yesu, nto Ayuta yaanakhuwela eriki: “Wakhala wi moomutaphula mulopwana ola, hamuri nthamwene a Kaisara. Oothene yoole oniiseera okhala mwene, onavaanyihana* ni Kaisara.” 13 Pilato iiwaleiye masu yaala, aamukumiherya Yesu vaate, akiraathi va nipuro noothoriha niichaniwa Maluku Oothataanyiwa, nyenya mu Ehepri Kapata. 14 Naari nihiku na Omurehererya Paska; eyo yaari ewora yaneethanu nammoha.* Pilatu aahi wa Ayuta: “Mmoone! Mwene anyu ola!” 15 Nyenya, awo yaakhuwela eriki: “Mmwiiphe! Mmwiiphe! Mmuthomeye va mwiri!”* Pilatu aahaakoha ariki: “Kinnaphwanela omwiipha mwene anyu?” Ahooleli a alipa a mukucho yaamwaakhula eriki: “Hinaanono mwene mukina voohikhala Kaisara.” 16 Voocharela owo aamveleela Yesu wi iiphiwe va mwiri.

Mwawiihiiha awo yaamukuxa Yesu. 17 Owo mwaneene, aateexa mwiri wa ohooxiwavo,* acimula ayaaka nipuro nenlo mu Ehepiri nniichaniwa Kolokota, ela tiwi, Nipuro na Ekarakasa. 18 Weiwe, awo yaamukhomela va mwiri vamoha ni alopwana eeli, mmoha o moono woolopwana mukina o moono woothiyana nave Yesu akhala veeri. 19 Pilatu aarepa tho masu va nipawani, akuha osulu wa mwiri woohooxiwavo.* Masu ene yaarempwe taala: “Yesu Munaasareti, Mwene a Ayuta.” 20 Ayuta ancipale yaahaalakhanya masu yaala woona wi nipuro nenlo Yesu aakhomeliweiye va mwiri naahaacamela o muceche, nave yaarempwe mu Ehepiri, mu Elatini ni mu Ekiriki. 21 Nyenya ahooleli a mukucho a Ayuta yaahi wa Pilatu: “Muhirepe: ‘Mwene a Ayuta,’ nto murepe yeeyo aalonceiye: ‘Miyo ka Mwene a Ayuta.’” 22 Pilatu aahaakhula: “Yeeyo kirempaaka, koorepa.”

23 Vaavaa anakhoco yaamukhomenlaaya Yesu va mwiri, yaakuxa soowara sawe, ekawanya mmakupa maxexe wi mukhoco ti mukhoco akhaleno makupa awe. Yaakuxa tho yoowara awe ya malaya a namakhata oorekama, yahaacochiwe* okhuma osulu ophiya vathi. 24 Mwawiihiiha, awo yaahiloca wa mukina ni mukhwaawe eriki: “Ala nihaahule, nto neeherye ehako wi noone taani oni akuxe.” Ela yaaheereya wi yaakhwanele yoorepa eni: “Awo yaakawana soowara saka nave yeeherya ehako malaya aka.” Nave anakhoco chiryene yaaheerano ichu seiha.

25 Waacamela mwiri woohooxiwavo* wa Yesu, yaaheemelavo amama awe Yesu, murokora aya, Mariya mwaara a Kolopa, vamoha ni Mariya Matalena. 26 Mwawiihiiha, aawoonneiye amama awe vamoha ni oohuserya yoowo aamusiveleiye yeemenle vakhiviru vaavale, Yesu aahi wa amama awe: “Mwaninyu owo!” 27 Voocharela aaloca tho ni oohuserya yoole ariki: “Amamaa awo!” Ovinyerya elukuluku ene yeele, oohuserya aahaakuxa anakhalano owannyawe.

28 Emanle weereya yeela, Yesu asuwelaka wi ichu soothene soheereya, wi yaakhwanele yoorepa, owo aahi: “Kookhalano nthanana.” 29 Yaakhalavo vaavale ekahi yaarimo eviinyu yoosukumana. Mwawiihiiha, awo yaakuxa nchoce eruweya* mu eviinyu yoosukumana emakelela va mutathi wa isopo* nave emukuherya vayanoni vawe. 30 Vaavaa aalawinheiye eviinyu yoosukumana, Yesu aahi: “Vano, sohaakhwanela!” Nave uuramihaka muru awe, owo aaveleela munepa awe.*

31 Woona wi naari nihiku na Wiirehererya, wi miruchu ihititelele okhala va mwiri woohooxiwavo mu nihiku na Sapata (woona wi Sapata yoole aahaala okhala Sapata mutokweene), Ayuta yaamveka Pilatu wi alamulele opwexiwa meco sa alopwana yaale ni oviihiwavo miruchu saya. 32 Mwawiihiiha, anakhoco yaayawo epwexa meco sa mulopwana oopacerya ni sa mukina yoowo aathomeiwe va mwiri mmakupa a Yesu. 33 Nyenya yaaphin’yaaya wa Yesu, awo yaamoona wi aari ookhweene, mwawiihiiha hiyaapwenxe meco sawe. 34 Nto, mmoha a anakhoco aamuhoma mpararini nnivaka, moohilekela naakhuma nikhami ni maahi. 35 Yoowo onne yeela oheerela onamoona, nave onamoona awe ti weeparipari, owo oosuwela wi yeeyo olonceiye ti yeeparipari, wi nyuwo tho muroromele. 36 Chiryene, saaheereya ichu seiha wi yaakhwanele yoorepa: “Hanipwexiwa* nikhuva nawe nimoharu mano.” 37 Nave tho yoorepa ekina eni: “Awo enarwa emoona yoowo yaamuhommaaya.”

38 Simanle weereya ichu seiha, Yosefe o Arimateiya, yoowo aari oohuserya a Yesu nto moovitheya nthowa na owoova wawe Ayuta, amveka Pilatu waahaalaka okhala wooweryeya oviihavo mwiili wa Yesu, nave Pilatu aamweemererya. Mwawiihiiha owo aayawo, aviihavo muruchu yoole. 39 Nikotemu, yoole aakele wa Yesu ohiyu, aarwa tho akunxe miira awaakanyeryiwa, vamoha ni eloi echu ya ikiilu makhumi mararu nararu.* 40 Awo yaakuxa mwiili wa Yesu evitikeleliwa ni ekuwo ya elinyu vamoha ni sawunkhela, mwawiiwanana ni sookhovelela sa Ayuta sa ovitha muruchu. 41 Orivo hiihaa, yaakhalavo emaca nipuro nenle owo aathomeiweiyewo* nave mu emaca eyo, naakhalamo nihiye* nivyaani nenlo nahaatonkoru ovithiwamo muchu. 42 Woona wi naari nihiku na Wiirehererya na Ayuta nave nihiye naari vakhiviru, yaamvitha Yesu mwemmo.