Afilipi

2 Vano, waakhanle wi nookhalavo nlipiho na mwa Kristu, nihakararyo na mwa osivela, naari waataana woomunepani,* naari ikharari vamoha nniphwanya, 2 mwaakhwaniherye ohakalala waka moorweela wa okhalano muupuwelo mmohamoha, ni osivela omohamoha, ni okhalano wiiwanana wawaakhwanela* ni murima mmoha. 3 Muheerekeno echu eri yoothene moowanawana naari mwawiikuxererya; nyenya mwawiiyeviha,* nwooneke akina okhala atokweene woopwahaani nyuwo, 4 mwaavyaka ohiya pahiru soochuna sanyu, nyenya tho soochuna sa akina.

5 Mukhaleno muupuwelo mmohamoha yoola ntoko Kristu Yesu aareiyeno, 6 naamwi aakhanle mmakhalelo oomuluku, owo haachunne wiikuxererya, ela tiwi, okhala oolikana ni Muluku. 7 Moohiyana, owo aaleva soothene aareiyeno, eemererya okhala kapuro nave akhala muchu.* 8 Opwaha yeela, vaavaa aareiye ntoko muchu,* aahiiyeviha nave akhala awiiwelela ophiyerya okhwa, aa, okhwa va mwiri wa ohooxiwavo.* 9 Vanthowa nenla, Muluku aamunnuwiha amukuha va nipuro noocukhuwaxa nave amvaha nsina noopwaha masina oothene, 10 wi mu nsina na Yesu makutha oothene a yaawo ari wirimu, veelaponi, ni vathi veelapo emukokhorele 11 nave oothene* elaleye wi Yesu Kristu ti Pwiya, wi acicimihiwe Muluku Atiithi.

12 Mwawiihiiha oosiveliwa aka, hiihaa ntoko muniiwelelaanyu mahiku oothene ohiya pahiru kiri ni nyuwaano, nyenya moopwahaxa vano kihiryaaka ni nyuwo, mutitelele olapa ntakhara ovuluxiwa wanyu moovaka ni othukumela. 13 Vawi Muluku, ti yoowo onaphara muteko mwa nyuwo, oovahakaani nchuno ni owerya wa weerano yeeyo enamuhakalaliha. 14 Titelelani weerano ichu soothene muhaapanaka naari waakhulana, 15 wi mukhale anamwane a Muluku oohikhalano nthowa naari nihoonya. Moorweela wa okhala oororomeleya, nyuwo munnaarya ntoko ekamaama ya elapo naamwi mukhalaka variyari va muyareriwo yoola woohiroromeleya ni woohuwela. 16 Mutitelele opharela phaama masu a okumi. Hiihaa, kinamukhalano mathowa a ohakalala mu nihiku na Kristu, kisuwelaka wi nkichimanke mahaleene naari mano olapa mwakuru mahaleene. 17 Nyenya, naamwi ekumi aka eyeehiwaka ntoko yoovaha ya yoowurya va mukucho ni muteko waweela* onarwa wa nroromelo nanyu,* kinnachapa ni wuuka ohakalala yoola ni oothene anyu. 18 Moolikana, nyuwo tho munaphwanela ohakalala ni wuuka ohakalala wanyu ni miyo.

19 Kinnawehererya mwa Apwiya Yesu woorumihelaani mwawaakuveya Timotiyu, wi kilipiheye kaakhela michaka sanyu. 20 Vawi haavo muchu mukina awiiveleela ntoko yoowo oni oothokororyeeni moosivela. 21 Woona wi akina anuukhuwa ni soochuna saya, ohiya ni sa Yesu Kristu. 22 Nto nyuwo moosuwela wi owo ohiiveleela mukhateiye, alapa ni miyo ntoko kapuro mu olaleya michaka saphaama ntoko mwaana ni apapa awe. 23 Mwawiihiiha, ti yoowo kineeraaka koorumiheleeni mwawaakuveya kasuwelaru yeeyo eni yeereye ni mi. 24 Chiryene, kinnaroromela mwa Apwiya wi voohilekela miyo tho kinamurwa weiwo.

25 Nyenya, mwa hiihaano, kinoona okhala woochuneya woorumihelaani Epafrotitu, munnaka, namuteko ni nakhoco mukhwaaka yoowo mwaakirumihenlaanyu wi akikhaviheryeke mu soothowa saka. 26 Vano owo onnachuna vancipale owoonaani oothene nyu nave wi onnathanana nthowa nawi mohiiwa wi owo aaniiceliwa. 27 Chiryene, owo aatepa wiiceliwa anahala vakhaani okhwa. Nto Muluku aammorela ikharari; mweeparipari, ohiya wa yoowo pahiru nyenya tho wa miyo, wi othanana waka ohaaceereryeye. 28 Vanthowa na yeeyo kinnoorumihelaani mwawaakuveya, wi mwamoona, muhakalale wanaawiili nave tho wi miyo kihuukhuweexa. 29 Mwawiihiiha, mmwaakhele ntoko yookhovelela anyu mwa Apwiya, ni ohakalala woothene, nave mutitelele waacicimiha alopwana ntoko yoowo. 30 Owo aahanle vakhaani okhwa nthowa na muteko wa Kristu,* ahelaka ekumi awe va yawoopiha wi akhale mu nipuro nanyu woona wi nyuwo himwaari wenno wi mukikhaviheryeke.