1 Petru

5 Mwawiihiiha, miyaano ntoko mutokweene mukhwiinyu, namoona a makacamiho a Kristu ni mulipa a wuuka a ovuwa yoowo oni wuupululiwe, kinnaaceenyerya* atokweene yaawo ari variyari vanyu: 2 Mukukhuleke muhuwo wa Muluku yoowo munakhapelelaanyu, murumeelaka ntoko alipa ooweherya,* ohiya mwawaakeelelihiwa, nyenya mootaphuwa vamiithoni va Muluku; ohiya ni osivela wa wiiphwanyerya, nyenya ni murima woothene; 3 muhiiseere okhala pwiya a yaawo ari mukelampa wa Muluku, nto mukhale yootakiherya wa muhuwo. 4 Nave vaavaa mukukhula mutokweene oneereiye ooneihiwe, nyuwo munahaala omwaakhela korowa oohuuca a ovuwa.

5 Emohamoha tho, nyuwo amiravo, nwiiweleleke atokweene.* Nyenya oothene nyuwo mukhale* awiiyeviha* mukina ni mukhwaawe, woona wi Muluku onnawiica awiirumiha, nyenya onnavaha mahala matokweene wa awiiyeviha.

6 Mwawiihiiha, mwiiyevihe mu ntata noowerya na Muluku, wi owo awunnuwiheeni mu elukuluku yoophwanelela. 7 Mumvonyerye Muluku wuukhuwa wanyu woothene,* woona wi owo onnookhapelelaani. 8 Mukhapelele mavyakelo anyu a wuupuwela, mukhale oolipelela! Mwiicani anyu, Musaserya, onneeca moorukurerya ntoko mwaco onoopa murika, amwaavyaka muchu oomukhuura. 9 Nyenya mukhome ni yoowo, oothipeleya mu nroromelo, musuwelaka wi masooso mamohamoha yaawo munahoolelaanyu, anninyu a* elapo yoothene annahoolela masooso mamohamoha yaawo. 10 Nyenya mmanle ohooxeya mu elukuluku tonto, Muluku a mahala matokweene oothene, yoowo owiichanenleeni ovuwa wawe woohimala mwawiiwanana ni Kristu, yoowo mwaneene onarwa aakhwaniherya ovyakihiwa wanyu. Owo onarwa ootikitheryaani, owo onarwa oolipihaani, owo onamookuhaani mmathipelo ootikitheryeya. 11 Wa yoowo okhale owerya mahiku oothene. Aamen.

12 Moorweela wa Silvanu,* yoowo kinamoonaaka okhala munna oororomeleya, kihoorepelaani masu avakhaani wi koolipiheeni ni oweerelaani namoona wi yaala ari mahala matokweene a Muluku eeparipari. Mukhale ootikitheryeya mwa yaala. 13 Muthiyana yoowo ori o Papulu, yoowo othanliwe ntoko nyuwo, onnoovonyeryaani mooni awe vamoha ni mwanaka Marku. 14 Mvahaneke mooni mukina ni mukhwaawe ni epeexu ya osivela.

Oothene nyuwo muri mwawiiwanana ni Kristu, mukhaleno murecele.