Mateyu

27 Waaxilaayavo, ahooleli oothene a alipa mukucho vamoha ni asitokweene aachu yaathukumana wi evaanele mukhalelo wa omwiipha Yesu. 2 Emanle ommaka, yaamukeriha wa mulipa oolamulela Pilatu.

3 Mwawiihiiha, Yutasi yoowo aamveleenle, oonneiye wi Yesu aathoriheliwa okhwa, aakhalano ekeerelani nave akuxa ikhorowa makhumi mararu sa eparata, aakookiherya ahooleli a alipa a mukucho ni asitokweene aachu, 4 ariki: “Koocheka, koomveleela muchu ohirino nthowa.” Awo yaahaakhula: “Owo tahi mwaha ahu. Owo ti wawaa!”* 5 Mwa yeeyo, owo aarihela ikhorowa ihe sa eparata mu empa ya Muluku nave akhuma. Voocharela, aavinyavo iiheya. 6 Nyenya, ahooleli a alipa a mukucho yaakuxa ikhorowa ihe sa eparata eloca eriki: “Honeemerereya ohela ikhorowa iha mu sooveleela sa mu empa ya Muluku, woona wi ithummweno nikhami.” 7 Emanle ovaanela, yaalakelela opharihela ikhorowa ihe wi ethumeno emaca ya mulipa a wuupa ipiya wi ekhale mahiye a anamarwa. 8 Nthowa na yeeyo, emaca ele eniichaniwa Emaca ya Nikhami ophiyerya olelo. 9 Mwawiihiiha, yaahaakhwanela masu a mulipa a miririmu Yeremiya: “Yaakuxa ikhorowa makhumi mararu sa eparata, seiho saalakeleliwe wi athummweno muchu, waaca wa ikhorowa seiho anamwane akina a Isarayeli yaalakelenlaaya omutumiha yoowo. 10 Nave awo yaaveleela wi ethummweno emaca ya mulipa a wuupa ipiya, hiihaa ntoko Yehova aakilamulenleiye.”

11 Yesu eemenle vamiithoni va mulamuleli Pilatu, owo aamukoha ariki: “Eparipari wi weyaano wa Mwene a Ayuta?” Yesu aahaakhula: “Ti yeeyo mmanlaanyu oloca.” 12 Nyenya vaavaa owo aasomeliweiye ni ahooleli a alipa a mukucho ni asitokweene aachu, owo haakhunleru echu. 13 Voocharela Pilatu aamukoha: “Apwanne honiiwa ichu soothene iha achu ala anoosomelaaya?” 14 Nto Yesu haakhunle, naari nsu nimoharu mano, nave Pilatu aatepa otikhina.

15 Mu iyaakha soothene mmahiku a paska, yaari yookhovelela ya mulamuleli omutaphula muchu mmoha a yaale yaaphariwe, yoowo muloko wa achu waamukhwelaaya. 16 Elukuluku yeele, aakhalavo muchu oophariwa, aari oosuweliwa iichaniwa Parapa. 17 Mwawiihiiha, vaavaa yaathukumannaaya, Pilatu aahaakoha ariki: “Taani munachunaanyu wi kimutaphule, akhale Parapa naari Yesu awiichaniwa Kristu?” 18 Tiwi Pilatu aanasuwela wi achu yaamveleenle Yesu nthowa na nrima. 19 Ohiya yeeyoru, vaavaa owo aakiraantheiye va nipuro na othoriha, amwaariye yaarumiha michaka eriki: “Muhimweerele yoonanara muchu owo awookololowa, ntakhara olelo kootepa ohooxeya moolohani nthowa na yoowo.” 20 Nto, ahooleli a alipa a mukucho ni asitokweene, yaalekecha muloko wa achu wi eveke otaphuliwa wa Parapa, nto wi Yesu iiphiwe. 21 Hiihaa, mulamuleli aaloca ni yaawo: “Wa achu yaala apiili, taani munachunaayu wi kimutaphule?” Awo yaahaakhula: “Parapa.” 22 Pilatu aahaakoha: “Vano kimweerele eheeni Yesu awiichaniwa Kristu?” Awo yaahaakhula: “Athomeiwe va mwiri!”* 23 Hiihaa, owo aahi: “Ntakhara heeni? Yoonanara taani opankeiye?” Nlelo awo yaamvira ekhuwelaka eriki: “Athomeiwe va mwiri!”

24 Pilatu oonneiye wi hawerya weera echu, nto waahaala okhuma mukhico, aaveka maahi, anyawa vamiithoni va achu oothene, ii: “Miyo nkaano nthowa nnikhami na muchu ola. Eyo ti yawinyu.” 25 Nto achu oothene yaahaakhula: “Ninneema wi nikhami nawe nnimorele hiyo vamoha ni anamwane ahu.” 26 Owo aamutaphula Parapa, nto aalamulela wi Yesu awaxuliwe, aamveleela wi iiphiwe va mwiri.

27 Voocharela, anakhoco a Pilatu yaamukuxa Yesu emukeriha vaate va Pilatu nave nikhuuru noothene na anakhoco naamurukurerya yoowo. 28 Yaamurunlaaya soowara, yaanwariha ekuwo yoophilivila, 29 emvathaanya* korowa a miiwa enwariha mmuruni, emphareliha mutathi omoono awe woolopwana. Nave ekokhoraka vamiithoni vawe, yaanamuroha eriki: “Mooni, nyuwo Mwene a Ayuta!” 30 Yaanamutaphera mara, nave yaakuxa ekopo enammanano vamuru. 31 Yaamanlaaya omuroha, yaamurula ekuwo yeele yoophilivila, enwariha soowara sawe, nave emukuxa wi yamukhomele va mwiri.

32 Yaacimunlaaya, yaamphwanya mulopwana o Sirene awiichaniwa Simoni. Awo yaamwaakeeleliha mulopwana ola wi ateexe mwiri.* 33 Yaaphiyalaaya o nipuro nawiichaniwa Kolokota, ela tiwi, Nipuro na Ekarakasa, 34 yaamvaha eviinyu yaakanyeriwe ni wamwe* wi awurye; nyenya aalawinheiye, aakhooca owurya. 35 Emanle omukhomela va mwiri, yaakawana soowara sawe moorweela wa weeherya ihako, 36 nave yaakilaathi vaavale enamulipelela. 37 Osulu wa muru vawe, waarempwavo nthowa na othorihiwa wawe: “Ola ti Yesu Mwene a Ayuta.”

38 Yaathomeiwa vamoha ni Yesu ampava eeli, mmoha omoono awe woolopwana, mukina omoono awe woothiyana. 39 Yaale yaavira vaavale, yaanamunyemula Yesu ecikinyaka miru saya 40 eriki: “Weyo waalonce wi onahaala okumula empa ya Muluku ni oteka mmahiku mararu, wiivuluxe meekhaa! Waari mwaana a Muluku, okhuruwe va mwiri owo!”* 41 Vamohamoha tho, ahooleli a alipa a mukucho, alipa oorepa vamoha ni asitokweene aachu, yaapacerya omuroha yoowo eriki: 42 “Owo aavuluxa akina; nto hanawerya wiivuluxa mukhateiye! Owo Mwene a Aisarayeli; mmuhiye wi akhuruwe mukhateiye va mwiri* hiihaano vaava, wi nimuroromele. 43 Ola aamuroromenle Muluku; vano mmuhiye wi Owo amvuluxe hiihaano aarimwi amukhwelaka, woona wi aanaloca ariki: ‘Miyo ka Mwaana a Muluku.’” 44 Ophiyerya tho ampava yaale yaathomeiwe vamoha ni yoowo yaanamuruwana.

45 Ovinyerya ewora yaneethanu nammoha,* epiiphi yaahuruwela elapo yoothene ophiyerya ewora yaneethanu naxexe.* 46 Variyari va ewora yaneethanu naxexe, Yesu aakhuwela ni masu oovuwa ariki: “Eli, Eli, lama sapakitaani?” ela tiwi: “Muluku aka, Muluku aka, ntakhara heeni mukinyanyanlaanyu?” 47 Yiiwalaaya yeela, akina a yaale yaari vaavale, yaapacerya oloca eriki: “Mulopwana ola onamwiichana Eliya.” 48 Mwawaakuveya, mmoha a yaawo aachimaka akuxa nchoce, aruweya mu eviinyu yoosukumana, amakelela va mutathini nave amvaha Yesu wi awurye. 49 Nave akina yaanaloca: “Mmuhiye hiihaa! Noone waakhanle wi Eliya onamurwa wi amvuluxe.” 50 Yesu aakhuwela wanaawiili ni masu oovuwa nave aaveleela munepa awe.*

51 Elukuluku ene yeeyo, ekurtina ya mu empa ya Muluku yaahaahuwa veeri ovinyerya osulu ophiyerya vathi, elapo yaacikinyeya, nave maluku yaaphweeya. 52 Mahiye* yaahuleya nave miruchu sa achu aweela murima, yaawo yaakonne mookhwani yaavinya 53 (nave achu yaawo yaakhumme mmahiyeni Yesu amanle oviihiwa, yaavolowa mu epooma yaweela), nave awo yaahooneya wa achu ancipale. 54 Nyenya muhooleli aanakhoco ni akina yaari vaavale emulipelelaka Yesu, yoonnaaya ocikinyeya wa elapo ni ichu ikina seereya, yaatepa woova enaloca eriki: “Chiryene ola aari Mwaana a Muluku.”

55 Yaakhalavo athiyana ancipale yoona soothene iha eri ociiwene. Ti yaala yaamuhoonle Yesu ovinyerya o Kalileya wi emukhaviheryeke; 56 variyari va yaawo, aakhalavo Mariya Matalena, Mariya amama awe Tiyaku ni Yosexi, vamoha ni amaayi a anamwane a Sepeteyu.

57 Vano, woona wi waanaxekuwavo, aarwa mulopwana ooreela awiichaniwa Yosefe o Arimateiya, yoowo tho aari oohuserya a Yesu. 58 Mulopwana ola aaya wa Pilatu nave aveka muruchu wa Yesu. Voocharela Pilatu aalamulela wi annyiwe. 59 Yosefe aakuxa muruchu ole, ahuruwela ni ekuwo yaphaama ya liinyu, 60 avitha mu nihiye* nawe nivyaani, nenlo aapankeiye vamwala. Amanle opirikixelavo nluku ntokotoko vamulako va nihiye,* owo aarowa. 61 Mariya Matalena ni Mariya mukina yaatitelela okhala vaavale, ekiranthe ohoolo wa nihiye.

62 Mmeeloni mwaya, nivinre nihiku na Wiirehererya, ahooleli a alipa a mukucho ni Afarisi yaathukumana vamiithoni va Pilatu, 63 eloca eriki: “Pwiya, ninnuupuwela wi nawoothe yoole ahaakumve okhwa, aanaloca ariki: ‘Yavira mahiku mararu kinamviihiwa mookhwani.’ 64 Mwawiihiiha, mulamulele wi nlipeleliweke nihiye ophiyerya nihiku naneeraru, wi oohuserya ehirwe yiiyewo muruchu nave eloceke wa achu eriki: ‘Owo ooviihiwa mookhwani!’ Hiiha, wootha ola wookuchula onamutepa opwaha ole woopacerya.” 65 Pilatu aawaakhula ariki: “Mwaakuxe alipeleli. Haweni, mwalipeleleke ophiyerya munaweryelaanyuvo.” 66 Mwawiihiiha, awo yaayawo o nihiye. Yaaphiyalaaya, yaahelavo eseelu vanlukuni elipiha nave yaahaakuhavo alipeleli.