Marku

6 Yesu aavinya vaavale aya elapo awe, nave oohuserya awe yaamuchara. 2 Naaphiyalaaya nihiku na Sapata, owo aapacerya ohusiha mu nipuro na malapelo,* nave ancipale yaanwiriyanne yaahitikhiniheya epacerya oloca: “Mulopwana ola oruuhale woowi ichu seiha? Ntakhara heeni ovahiweiye miruku seiha? Nave ntakhara heeni ineereyaaya sootikhiniha* seiha orweela wa yoowo? 3 Tahi yoola karpinteiru, mwaana a Mariya, nave asinnawe Tiyaku, Yosefe, Yutasi, ni Simoni? Nave arokora awe tahi yaala oothene anakhala ni hiyo?” Mwawiihiiha, awo yaapacerya okwaculeya vanthowa na yoowo. 4 Nto Yesu aalocano ariki: “Mulipa a miririmu onnacicimihiwa makupa makina, ohiya mweelapo awe, ni ahima awe, naari owannyawe.” 5 Hiihaa, owo haawenrye opaka sootikhiniha* weiwe, nto aapenunxe achu avakhaani yiiceliwa. 6 Yesu aatikhina vanthowa na ohikhalano waya nroromelo. Nave owo aaheeceeca mmiceche soorukurerya, ahusihaka.

7 Vano owo aawiichana oohuserya Khumi Napiili, apacerya waarumiha eeli-eeli, nave aavaha owerya wa wiikara minepa soonanara. 8 Aahaalamulela tho ohikuxa echu vamukwahani, pahiru ekopo; ehikuxe naari epaau, naari murupa wa yoolya, naari ikhorowa;* 9 yaaware asantaalya, nto ehikuxe soowara piili.* 10 Ohiya yeeyo, aahaaleela tho: “Empa vyakala muneeraanyu mvolowemo, mukhale vaavaa ophiyerya opwahavo wanyu nipuro nenlo. 11 Nave nipuro vyakala muneeraanyu muhaakheliwe naari owiriyaniwa, mwaavinyakavo, mutathe nchupi nri mu inaani sanyu ntoko namoona wa yaawo.” 12 Voocharela awo yaacimula, enalaleerya wi achu yaaphwanela ocharuwa; 13 nave tho yaaniikara masololo mancipale, yaamiinelaka makhurwa awiiceliwa ancipale ni waapenuxa yaawo.

14 Vano, Mwene Heroti aahiiwa sa yeela, woona wi nsina na Yesu naasuweliwa vancipale, nave achu yaanaloca eriki: “Yohani Mpatisi ooviihiwa mookhwani, ti nthowa nene onapakeiye sootikhiniha* seiha.” 15 Nyenya akina yaani: “Ola ti Eliya.” Nlelo akina yaanaloca: “Ola mulipa a miririmu oolikana ni mmoha aalipa a miririmu akhalai.” 16 Nyenya Heroti iiwaleiye yeela, aaloca: “Yohani, yoole kimwiiphalaaka, ooviihiwa mookhwani.” 17 Tiwi, Heroti aalamulela wi Yohani aphariwe, amakiwe ni awaleliwe mukariposo nthowa na Herotiya, mwaara a munnawe awiichaniwa Filipi, yoowo Heroti aamuthenleiye. 18 Woona wi Yohani aanaloca wa Heroti ariki: “Honeemereryiwa wa nyuwo omuthela mwaara a munninyu.” 19 Mwawiihiiha, Herotiya aanamwiica Yohani, ophiyerya anachuna omwiipha, nyenya haawerya. 20 Heroti aanamoova Yohani, woona wi aanasuwela wi aari muchu awookololowa ni aweela murima, nave aanamukhapelela. Yohani alocaka owo aananwiriyana, anahaleela echu yaweera; naamwiihiiha, waanamusivela onwiriyana.

21 Nyenya naaphiya nihiku noophwanelela wa Herotiya, vaavaa Heroti aapankeiye efesta ya ochapela nihiku na oyariwa wawe. Owo aahaawopa achu oocicimiheya, ahooleli aanakhoco vamoha ni achu oovuwa o Kalileya. 22 Nave mwaana amwaamuthiyana a Herotiya aarwa iina, amuhakalaliha Heroti vamoha ni yaale yaalya* ni yoowo. Hiihaa, Mwene aahi wa mwali: “Okiveke echu onachunaawe, kinamoovaha.” 23 Aa, owo aalipela: “Echu eri yoothene oneeraawe okiveke, kinamoovaha, ophiyerya wookawela omwene* aka.” 24 Mwawiihiiha owo aakhuma, aya aakoha amama awe: “Tiheeni kinaphwanelaaka oveka?” Awo yaahaakhula: “Muru wa Yohani Mpatisi.” 25 Mwawaakuveya, owo aachimaka ayaaka wa mwene nave amveka ariki: “Kinachuna wi hiihaano vaava, mukivahe mparathoni muru wa Yohani Mpatisi.” 26 Naamwi aathananne vancipale ni yeeyo, mwene haachunne ohaakhwaniherya yooveka ya mwali, nthowa na olipela wawe ni wa yaale aawompeiye.* 27 Mwawiihiiha, mwene aamuruma mwawaakuveya nakhoco, amulamulela wi aruuhe muru wa Yohani. Hiihaa, owo aayawo, amuhita Yohani mukariposo 28 nave aaruuha muru ene mparathoni. Amunnya mwali, nave owo aaveleela wa amama awe. 29 Oohuserya a Yohani yiiwalaaya sa yeela, yaarwa ekuxa muruchu ene, eya yavitha o mahiye.*

30 Arummwa yaathukumana ni Yesu, emuleela ichu soothene yenraaya ni yaahusinhaaya. 31 Nave owo aalocano: “Murwe, n’ye nipuro nawiipitheya wi niichuuwe vakhaani.” Woona wi ancipale yaanarwa ni yaanapwaha, ophiyerya wi Yesu ni oohuserya awe ehinakhalano elukuluku yawiichuuwa naari mano ya olya. 32 Mwawiihiiha, yaanwela mwaaceya eyaaka nipuro nawiipitheya wi yakhalewo meekhaaya. 33 Nyenya achu yaawoona ecimulaka, nave ancipale yaasuwela yeeyo. Hiihaa, achu a ipooma soothene yaachimakela nipuro nenlo ni meco nave ti yaapacenrye ophiya. 34 Akhuruwaka mmwaaceyani, owo aahoona muloko* wa achu, aamoriwano ikharari, woona wi yaari ntoko ipucepuche ihirino mukukhula. Nave aapacerya waahusiha ichu sincipale.

35 Oxekuwakavo, oohuserya yaamwaacamela Yesu elocano eriki: “Wenno homakiwewo nave onniila. 36 Mwaarowihe achu ala, wi yathume mmawaani ni mu ipooma sawaacamela echu ya olya.” 37 Owo aawaakhula: “Yeenyu ene mwaavahe echu ya olya.” Mwawiihiiha, awo yaahi: “Munachuna wi nathume ipaau sa itenaariyu masana meeli* wi naavahe achu ala elye?” 38 Owo aahaakoha: “Murino ipaau kavi? Haweni moone!” Yaavarenryaaya, yaaloca: “Thanu ni ihopa piili.” 39 Nave Yesu aahaaruma achu oothene okiraathi vamanaxini makithi, ekawanyen’ye mmakhuuru. 40 Awo yaakiraathi ekawanyen’ye mmakhuuru a achu nsana* naari makhumi mathanu.* 41 Aakunxeiye ipaau ihe thanu ni ihopa piili, aaweha wirimu nave areeliha. Voocharela aakawanya ipaau, apacerya waavaha oohuserya awe wi awo yaakawele achu, nave tho aakawanya ihopa ihe piili wa oothene. 42 Mwawiihiiha, oothene awo yaalya evona, 43 nave yaathukumanya ipaau saahalenle isareya micanka khumi napiili, ihaalakhanyeriwe ihopa saahalenle. 44 Yaale yaalyile ipaau yaari alopwana macikhwi mathanu.*

45 Moohilekela, Yesu aahaaruma oohuserya awe onwela mwaaceya wi ehoole elapuwelaka okhopela wa ephareya, makupa o Petisaita, aniiha vaiye alaanyaka muloko wa achu. 46 Amanle waalaanya achu, owo aaya omwaako wi avekele. 47 Wiilalaayavo, mwaaceya aari veeri va ephareya, nyenya Yesu aahanle mukhateiye omokoni. 48 Mwawiihiiha, Yesu onneiye wi oohuserya awe yaanaviliwa olapuwa vanthowa na echeku yawuupa, aaya wa yaawo eecaka vasulu va ephareya elukuluku ya oweherya waneexexe wa ohiyu;* nyenya aakhala ntoko wi aahaala* waavirela. 49 Yaamonnaaya eecaka vasulu va ephareya, oohuserya yaahuupuwela: “Malavi!” Nave yaakhuwela, 50 woona wi oothene yaamoona nave etuthuwa. Nyenya mwawaakuveya, owo aahi wa yaawo: “Mulipe murima! Ti miyaano; muhoove.” 51 Voocharela aawela mmwaaceyani akhala ni yaawo, nave echeku yaamaala. Mwawiihiiha, awo yaatepa otikhina, 52 woona wi hiyiiwexenxe yootaphulela ya ipaau; mirima saya saawaleya ehiniiwexexa.

53 Yaalapunwaaya, yaaphiya makupa o Xenesareti, nave weiwo yaammakelela mwaaceya. 54 Nyenya erikimukhuruwaru mmwaaceyani, achu yaamusuwela yoowo. 55 Awo yaachimaka mmiceche soothene sawaacamela, yaaleelaka akina vooloca sa Yesu; yaanaakuxa areca yaatenxe mmatetheni, yaakerihaka weiwo yiiwaaya wi Yesu taareiyewo. 56 Mmapuro oothene owo aavireiyemo, mmicecheni, mu ipooma, naari mmawaani, achu yaanaatheteeyamo areca aya, enamveka wi etannye mano niveru na yoowara awe. Nave oothene yaawo yaatannya, yaanapenuwa.